«Соос сярысь тон Монэ золгес яратӥськод-а?»

1, 2. Кызьы Иисуслэн кылъёсыз Пётр вылын шӧдӥськизы?

ИИСУС ХРИСТОСЛЭН сизьым дышетскисьёсыз быдэс уй Галилей зарезьын чорыгазы, но номыр ӧз кутэ. Иисус, ярдурысен соос шоры учкыса, шуиз: «Калтондэс пыждылэн бурпалаз чӧлтэ». Соос «чӧлтӥзы но туж трос чорыг сюремен сэрен калтонзэс поттэмзы ик ӧз луы ни» (Иоанн 21:1—6).

² Ярдуре потыса, дышетскисьёс Иисусэн ӵукна дасям сиёнэз сиизы но, Иисус Симон Пётрлэсь юаз: «Иона пи Симон! Соос сярысь тон Монэ золгес яратӥськод-а?» Малы Иисус озьы юаз? Пётр туж яратэ вал чорыганы. Соин ик, со юанэз сётыса, Иисуслэн тодэмез потэ вал, мар Пётрлы дуногес луэ: чорыган яке Иисус но со, малы со дышетӥз. Пётр шуиз: «Бен, Кузё-Инмаре! Тон тодӥськод, мон Тонэ яратӥсько шуыса» (Иоанн 21:15). Пётр ӧз пӧя. Иисусэз яратэмзэ со ужъёсыныз возьматӥз: мылысь-кыдысь тодытон уже пыриськиз но нырысетӥ даурысь христиан кенешлы юрттӥсь луиз.

3. Кыӵе кышкытлыкъёс сярысь христианъёслы вунэтоно ӧвӧл?

³ Нош малы милемыз дышетыны быгато Иисуслэн Пётрлы верам кылъёсыз? Милемлы чакланы кулэ, Христосэз яратонмы медаз лябӟы но Инмарлэсь Эксэйлыксэ улонамы нырысетӥ интые пуктыны милемлы номыр медаз люкеты шуыса. Иисус умой тодэ вал, макем юн «таизлэн дуннелэн сюлмаськонэз» адямиос вылын шӧдӥськыны быгатэ шуыса. Кизись сярысь мадёнын Иисус вераз, куд-огъёсыз «Эксэйлык сярысь кылэз» кыло но кабыл басьто шуыса, нош «таизлэн дуннелэн сюлмаськонэз, узырлыклы синмаськон» со кылэз ӝокато (Матф. 13:19—22; Марк 4:19). Ми сак ӧм луэ ке, нуналысь нуналэ сюлмаськонъёс милемлы люкетыны быгатозы Иеговалы ужаны-тыршыны. Соин ик Иисус дышетскисьёссэ чакласькыны косӥз: «Асьтэдыз асьтэос чаклалэ: мултэс сиыса, вина юыса, та улонлэн сюлмаськонъёсынызы сэрен сюлэмъёсты секыт медаз улы» (Лука 21:34).

4. Мар юрттоз милемлы эскерыны, макем юн ми Христосэз яратӥськомы? (Учке статья кутсконысь туспуктэмъёсты.)

⁴ Пётр сямен ик, Христослэсь сётэм ужзэ нырысетӥ интые пуктыса, ми возьматӥськомы Иисусэз яратӥськомы шуыса. Мар кароно, асьмеды эскерон понна? Дырын-дырын юалляно асьмелэсь: «Мар мыным ваньмызлэсь дуногес? Мар мыным тросгес шумпотон вае: Иеговалы ужан-тыршон яке мар ке но мукетыз?» Соин ик ойдолэ эскеромы улонмылэсь куинь удысъёссэ, кудъёсаз милемлы визьмо луыны кулэ, Христосэз но Инмарлы ужан-тыршонэз яратонмы медаз сӥя шуыса. Со уж шоры, шутэтскон шоры но ваньбур шоры учкон.

УЖ ШОРЫ ШОНЕР УЧКЕ

5. Кыӵе уж сётӥз Инмар семьяослэн йыръёссылы?

⁵ Пётр понна чорыган шутэтскон дыр гинэ ӧй вал — озьы со аслыз улыны коньдон поттӥз. Семьяослэн йыръёссы валало, семьяоссылэн кулэяськонъёссы сярысь сюлмаськыны соосты Инмар косӥз шуыса (1 Тим. 5:8). Со понна соослы трос ужано. Нош та берпуметӥ нуналъёсы уж зэмос сюлмаськонъёс вайыны быгатэ.

6. Кыӵе шуг-секытъёсын пумисько тросэз адямиос уж доразы?

⁶ Асьме нуналъёсы ӵем дыръя тазьы луэ: адямиослы уж кулэ, нош ужан интыос уг тырмо. Соин ик тросэз уж понна нюръяськоно луо но тросгес ужаны соглаш карисько, соослы ӧжыт коньдон тыро ке но. Со сяна, уж сётӥсьёс, тросгес коньдон поттон понна, ужасьёссэс туж трос ужаны косо. Ваньмыз со кужымез быдтэ, сюлэмшугъяськонъёс но висёнъёс вае. Нош соос, кинъёс трос ужаны соглаш уг карисько, ужзэс ыштыны но быгатозы.

7, 8. а) Кинлы ми нырысь ик оскымонэсь? б) Мае валаз Таиландысь одӥг вын-агаймы ужез пумысен?

⁷ Ми, христианъёс, нырысь ик оскымонэсь Иеговалы, нош уж сётӥсьмылы ӧвӧл (Лука 10:27). Уж кулэяськонъёсмы сярысь сюлмаськыны но Инмарлы ужаны-тыршыны юрттэ. Нош ми сак ӧм луэ ке, милям ужмы люкетыны быгатоз Инмарлы ужаны-тыршыны. Тани мар тодаз вае Таиландысь одӥг вын-агаймы: «Мон компьютеръёсты тупатон бордын ужай. Со уж мыным туж яра вал. Но ужлы трос дыры кошкемен, духовной ужъёслы дыры чик уг кыльы ни вал. Кӧня ке дыр ортчыса, мон валай: Эксэйлык улонам нырысетӥ интыын мед луоз шуыса, мыным ужме воштоно луоз». Мар со кариз?

⁸ Вын-агаймы вера: «Ар пала умой-умой малпаськеме но коньдон люкаме бере мон ужпум кутӥ ульчаын мороженой вузаны. Кутсконаз ужъёс умой ӧз мынэ, соин мон туж куректылӥ. Азьло уж дорысьтым ӵош ужасьёсы монэ ульчаысь адӟо ке, серекъяса юало вал, малы мон сайкыт азьысь, кытын кондиционеръёс пуктэмын, ульчае мороженой вузаны кариськи. Малы, пе, мон малпай со умойгес луоз шуыса. Мон Иеговалы трос вӧсяськи но кури, со мыным ужме быдэстыны но солы тросгес ужаны-тыршыны пуктэм ужпумме быдэстыны мед юрттоз шуыса. Ӝоген ужъёсы тупатскизы. Мон умойгес валаны кутски, кыӵе мороженой адямиос ярато. Дыр ортчемъя мон усто вуз карись луи но нунал куспын вань мороженойме вузаса быдтӥсько вал. Табере мон азьло сярысь тросгес коньдон поттыны кутски. Али мон асме трослы шудоенгес шӧдӥсько, малы ке шуоно мынам ӧвӧл ни азьвыл сюлмаськонъёсы. Нош валтӥсез — мынам Иеговаен кусыпъёсы юнмазы». (Лыдӟы Матфейлэсь 5:6; Лукалэсь 11:28.)

9. Мар юрттоз милемлы уж шоры шонер учкыны?

⁹ Иегова туж дунъя, куке адями сюлмысь ужа. Сыӵе адямиез Иегова бакель каре (Мад. 12:14). Озьы ке но, кызьы адӟиськомы Таиландысь вын-агаймылэн учырысьтыз, ужмы шоры шонер учконо. Иисус вераз: «Нырысь ик Инмарлэсь Эксэйлыксэ но Солэсь шонерлыксэ утчалэ, соку ваньмыз таос но [со, мар адямилы нырысь ик кулэ] тӥледлы сётэмын луоз» (Матф. 6:33). Кызьы валано, шонер-а ми учкиськомы ужмы шоры? Умой луоз юаны: «Кызьы мон уже шоры учкисько: уже Иеговалы ужан-тыршонлэсь тунсыкогес уг поты-а?» Та выллем юанъёс вылын малпаськыса, ми валаны быгатомы, мар милемлы зэмзэ ик дуно луэ.

10. Мае валаны юрттӥз Иисус Марфалы?

¹⁰ Иисус валэктӥз, мае милемлы нырысетӥ интые пуктоно. Одӥг пол со Мария но солэн Марфа апаез дорын куноын вал. Марфа сиён дасяку, Мария Иисус вӧзын пукиз но сое кылзӥз. Куке Марфа Иисуслы ӝожтӥськиз, Мария солы уг юртты шуыса, Иисус вераз: «Мария ӟечсэ люкетэз бырйиз, кудӥз солэсь уз басьтӥськы» (Лука 10:38—42). Озьы Иисус Марфалы валаны юрттӥз: Христосэз яратӥськомы шуыса но ужмы но нуналысь нуналэ лэсьтоно ужъёсмы пӧлы выеммы уг поты шуыса возьматэммы потэ ке, милемлы азьланяз но «ӟечсэ люкетэз» бырйыны кулэ. Мукет кылъёсын вераса, Иеговаен кусыпъёсмы улонамы котьку нырысетӥ интыын луыны кулэ.

ШУТЭТСКОН НО ШУЛДЫРЪЯСЬКОНЪЁС ШОРЫ ШОНЕР УЧКЕ

11. Мар Библиын верамын шутэтскон сярысь?

¹¹ Тросэзлы асьме пӧлысь секыт но трос ужано луэ, соин милемлы шутэтскыны но кужым люканы кулэ. Инмарлэн Кылаз гожтэмын, «сиыса, юыса улон» но «аслэсьтыд лулдэ уженыд лӥятыса возён» адямилы шумпотон вае шуыса (Екк. 2:24). Иисус но вера вал, шутэтскыны кулэ шуыса. Одӥг пол, куке солэн дышетскисьёсыз тодытон ужын мылысь-кыдысь тыршемзы бере бертӥзы, Иисус вераз: «Асьтэ понна, калыктэм интые мыныса, ӧжытак шутэтске» (Марк 6:31, 32).

12. Кыӵе кышкытлык сярысь тодамы возёно шутэтскон но шулдыръяськонъёс пумысен? Вералэ пример.

¹² Зэмзэ ик, шутэтскыны но шулдыръяськыны кулэ. Но вань кышкытлык, ми солы бадӟым саклык висъяны кутскомы шуыса. Нырысетӥ даурын тросэз тазьы малпаськизы: «Ваелэ, сиёме-юоме, ӵуказе асьме доры кулон вуэ ук!» (1 Кор. 15:32). Туннэ но тросэз адямиос озьы малпасько. Кылсярысь, кӧня ке ар талэсь азьло Европаысь одӥг егит пи христиан пумиськонъёсы ветлыны кутскиз. Но со туж шулдыръяськыны яратӥз, соин ик Иеговалэн Адӟись-Ивортӥсьёсыныз кусыпъёс воземысь дугдӥз. Дыр ортчыса, со адӟиз, сыӵе улон куректонъёс гинэ вае шуыса. Со выльысь Библиез дышетыны кутскиз, улонзэ воштӥз но ӟеч иворез вераны кутскиз. Пылатӥськемез бере со вераз: «Таиз пумысен гинэ мынам сюлмы висе: мон сомында дырме ыштӥ валатозям, Иеговалы ужан-тыршон тросгес шумпотон вае шуыса шулдыръяськонъёс сярысь, кудъёссэ та дунне ӵектэ».

13. а) Вералэ пример, кудӥз возьматэ, ортчыт трос шутэтскон но шулдыръяськон пайда уг вайы шуыса. б) Мар юрттоз милемлы шутэтскон но шулдыръяськон шоры шонер амалэн учкыны?

¹³ Шутэтскон выльысь кужым люканы юрттэ. Нош кӧня дыр кулэ милемлы шутэтскон понна? Сое валаны милемлы юрттоз таӵе пример. Трос адямиос конял сиёнэз ярато. Озьы ке но, ми валаськомы: конфетъёсты гинэ сиыса улӥмы ке, со тазалыкмылы пайда уз вайы. Соин ик ми пайда вайись сиён сиыны тыршиськомы. Озьы ик шутэтсконэн но шулдыръяськонъёсын. Быдэс нуналъёсын шутэтскыса но шулдыръяськыса гинэ улӥмы ке, со Инмарен кусыпъёсмес лябӟытоз. Озьы медаз луы шуыса, милемлы ялан пыриськоно ужъёсы, кудъёсыз Инмарлы ужан-тыршонэн герӟаськемын. Кызьы валано, шонер-а ми учкиськомы шутэтскон шоры? Арня куспын гожъяса утчалэ, кӧня тӥляд дырды кошке духовной ужъёслы — кенешлэн пумиськонъёсаз ветлонлы, ӟеч иворез веранлы, семьяен но ас поннад Библиез дышетонлы — но кӧня шутэтсконлы, кылсярысь, спортлы, телевизор учконлы но видеошудонъёслы. Собере ӵошатэ. Кулэ-а мае ке воштыны? (Лыдӟы Ефесъёслы 5:15, 16.)

14. Мае лыдэ басьтоно, шутэтскон но шулдыръяськон амалэз бырйыкумы?

¹⁴ Котькуд адями бырйыны быгатэ, кызьы со шутэтскоз. Но шутэтскон амалэз, Библиысь возетъёсты лыдэ басьтыса, быръёноa. Семьяослэн йыръёссы но бырйыны быгато, кызьы соослэн семьязы шутэтскоз. Шутэтскон, кудӥз кужым сётэ но мылкыдэз ӝутэ, Инмарлэн кузьымез луэ (Екк. 3:12, 13). Веранэз ӧвӧл, пӧртэм адямиослэн пӧртэм возьытлыксы но мыл потонъёссы, соин ик соос пӧртэм шутэтскон амалъёсты быръё (Гал. 6:4, 5). Нош кыӵе гинэ шутэтскон амал ми медам быръе, милемлы сак луоно. Иисус вераз: «Кытын тӥляд ваньбурды, отын ик луоз сюлэмды но». Озьыен, ми мае ке туж яратӥськомы ке, милемлы со туж дуно луэ но ми солы трос дыр но саклык висъяськомы (Матф. 6:21). Соин ик, ми Иисус Христосэз яратӥськомы ке, со милесьтым мылкыдмес ӝутоз малпанъёсынымы, вераськонъёсынымы но ужъёсынымы возьматыны, Инмарлы ужан-тыршон улонамы ваньмызлэсь дуногес луэ шуыса (Флп. 1:9, 10).

ВАНЬБУРЕЗ ЯРАТОНЭН НЮРЪЯСЬКОН

15, 16. а) Кызьы ваньбурез яратон христиан муртлы сьӧлтэт луыны быгатоз? б) Кыӵе визь-кенеш сётӥз Иисус ваньбурез яратон пумысен?

¹⁵ Туннэ тросэз адямиос модая дӥсяськон, выль поттэм телефон яке компьютер но мукет арбериосты басьтон сярысь гинэ малпасько. Соин ик котькуд христиан муртлы дырын-дырын юано аслэсьтыз: «Мар мон понна валтӥсез луэ? Малы мынам дыры тросгес кошке, выль дӥськутэз яке выль поттэм машинаосты чакласа улонлы-а яке кенешлэн пумиськонъёсызлы дасяськонлы-а? Ӧй кутскы-а мон котькуд нуналъёсы лэсьтоно ужъёсылы тросгес саклык висъяны, Инмарлы вӧсяськонлы но Библиез лыдӟонлы сярысь?» Ми шӧдӥмы ке, ваньбурез, Христосэз сярысь, юнгес яратыны кутскиськомы шуыса, милемлы Иисуслэн таӵе кылъёсыз вылын малпаськоно: «Утиське мылкыддэс узырлык люканлы сётонлэсь» (Лука 12:15). Малы сокем кулэ соос вылын малпаськыны?

¹⁶ Иисус вераз: «Нокинлэн но кык кузёлы служить каремез уг луы». Солэн кылъёсызъя, ми ум быгатӥське огдыре ляльчиос луыны Инмарлы но, узырлык-байлыклы но, малы ке шуоно кыкназы ик соос возьмало, ми солы гинэ оскиськымон луомы шуыса. Ми «кык кузёлы» ужаськомы-тыршиськомы ке, одӥгзэ адӟемпотостэм каромы, нош мукетсэ яратомы; яке огезлы сюлмысьтымы тыршомы, нош мукетыз сярысь ум сюлмаське (Матф. 6:24). Ми ваньмы тырбыдэстэмесь, соин ик милемлы ялан нюръяськоно «лулмугормылэн кулэяськонъёсыныз», озьы ик ваньбурез яратонэн но (Еф. 2:3).

17. а) Малы куд-ог адямиослы секыт ваньбур шоры шонер учкыны? б) Мар юрттэ милемлы ваньбурез яратонэн нюръяськыны?

¹⁷ Адямилы, кудӥз нырысь ик аслаз мыл потонъёсыз сярысь малпаське, ваньбур шоры шонер учкыны секыт. Малы? Малы ке шуоно со уг быгаты ни валаны, мар Инмарлэн син азяз зэмзэ ик дуно луэ. (Лыдӟы 1 Коринфъёслы 2:14.) Сыӵе адямилы секытгес но секытгес луэ валаны, мар шонер, нош мар шонертэм (Евр. 5:11—14). Соин ик со ваньбурез юнгес яратыны быгатоз, но арбериос люкамъя люкамез потоз (Екк. 5:9). Нош сыӵе мылкыдмы медаз кылды шуыса, ми соин нюръяськыны быгатомы, кылсярысь, Инмарлэсь Кылзэ, Библиез, ялан лыдӟыса (1 Пётр 2:2). Иисус Инмарлэн визь-кенешъёсыз вылын малпаськиз, со юрттӥз солы Шайтанлэн визь сынанъёсызлы пумит сылыны. Озьы ик ми но, Библиысь возетъёсты уже кутӥмы ке, ум лэзе, сюлмамы ваньбурез яратон мед будоз шуыса (Матф. 4:8—10). Ваньмыз со возьматоз, ми Иисусэз котьмалэсь но юнгес яратӥськомы шуыса.

18. Мар карыны тӥляд юн мылкыдды вань?

¹⁸ «Соос сярысь тон Монэ золгес яратӥськод-а?» юанэныз, Иисуслэн тодаз вайытэмез потэ вал Пётрлы, макем кулэ саклык висъяны Инмарлы ужан-тыршонлы. Кызьы ми тодӥськомы, Пётрлэн нимыз «изгурезьысь из» шуыса берыктӥське. Вераны кулэ, бератаз Пётр улонэныз возьматӥз, солэн нимыз солы туж тупа шуыса, малы ке шуоно Пётр изгурезь кадь юн но оскымон вал (Ап. уж. 4:5—20). Милям но потэ, Христосэз яратонмы сыӵе ик юн мед луоз шуыса. Со понна милемлы уж, шутэтскон но ваньбур шоры шонер учконо. Кутэм ужпумъёсмы мед возьматозы, милям но Пётрлэн кадь шӧдонъёсмы кылдо шуыса, кудӥз шуиз: «Кузё-Инмаре! Тон тодӥськод, мон Тонэ яратӥсько шуыса»!