Иегова пуктэм ужпумъёстэ быдэстыны мед юрттоз

1. Кыӵе ужпум кутоно егит дыръя но малы солэсь кышкано ӧвӧл? (Учке статья кутсконысь туспуктэмъёсты.)

КУЗЬ сюрес вылэ потон азьын нырысь малпано, кытчы тынад мынэмед потэ. Улонмес сыӵе кузь сюресэн ӵошатыны луоз, но егит дыр — самой тупась вакыт ужпум кутон понна, малы тынад улондэ сӥземед потэ. Зэм, сыӵе ужпум кутыны капчи ӧвӧл. Тани мар вераз Хезер нимо егит ныл: «Малпаны ик кышкыт: кулэ ужпум кутыны, кызьы тон ортчытод быдэс улондэ». Но кышканы кулэ ӧвӧл, малы ке шуоно Иегова аслаз ужась-тыршисьёсызлы вера: «Эн кышка, Мон — тонэн огазьын, эн кепыра, Мон — тынад Инмаред; Мон тонэ юнмато, юртто тыныд» (Ис. 41:10).

2. Кытысь ми тодӥськомы, Иеговалэн потэ, ми сыӵе ужпумъёс мед пуктомы шуыса, кудъёсыз милемыз шудо карозы?

² Иегова тыныд визь-кенеш сётэ шонер ужпумъёс пуктыны (Екк. 12:1; Матф. 6:20). Солэн потэ, тон шудо мед луод шуыса. Кытысь ми сое тодӥськомы? Сое валаны луэ котырысьтымы пӧртэм яркыт буёлъёсты адӟыса, чебер куараосты кылыса но ческыт зынъёсты шӧдыса. Малпа озьы ик со сярысь но, Инмар милемыз яратыса дышетэ шуыса, кызьы самой умой улон сюресэз быръёно. Соослы, кинъёс уг кылзӥсько солэн визь-кенешъёсызлэсь, Иегова вера: «Тӥ... бырйылӥды сое, мар Мыным ярантэм вал. ...Мынам ляльчиосы шулдыръяськозы, нош тӥ возьытэ усёды; Мынам ляльчиосы сюлэмзы шумпотыса кырӟалозы» (Ис. 65:12—14). Христианъёс шонер ужпумъёс куто ке, озьы соос Иеговаез данъяло (Мад. 27:11).

УЖПУМЪЁС, КУДЪЁСЫЗ ТЫНЫД ШУДО ЛУЫНЫ ЮРТТОЗЫ

3. Кыӵе ужпумъёс пуктыны ӵектэ Иегова егитъёслы?

³ Кыӵе ужпумъёс пуктыны ӵектэ тыныд Иегова? Шудо луон понна, адямиослы кулэ Иегова сярысь тодыны но солы оскымон ужаны-тыршыны. Соос озьы кылдытэмын (Пс. 127:1; Матф. 5:3). Соин ми туж пӧртэм луиськомы пудо-животъёслэсь, кудъёсызлэн улонзы сиён но пи поттон котырын гинэ берга. Иеговалэн уг поты, милям шудмы сиёнэн но семьяен гинэ герӟаськемын мед луоз шуыса. Милям Кылдытӥсьмы — «яратыса, тупаса улонлэн Инмарез», кудӥз «адямиез Аслыз укшатыса кылдытӥз» (2 Кор. 13:11; Ул.-выл. 1:27). Тон шудо луод, яратӥсь Инмармылэсь адӟем карид ке. Апостолъёслэн ужъёсазы 20:35 гожтэмын: «Басьтон сярысь, сётыны умойгес». Шӧдӥд-а тон ас вылад, со кылъёс зэм луо шуыса? Со улонын тужгес но валтӥсь возет. Соин ик Иеговалэн потэ, тынад пуктэм ужпумъёсыд мед возьматозы, тон Иеговаез но адямиосты яратӥськод шуыса. (Лыдӟы Матфейлэсь 22:36—39.)

4, 5. Мар Иисусэз шудо каре вал?

⁴ Иисус Христос тӥледлы, егитъёс, самой умой пример возьматӥз. Пичи дыръяз со мукет нылпиосын ӵош шудӥз но шулдыръяськиз. Инмарлэн Кылаз «серекъянлэн аслаз дырыз... эктонлэн аслаз дырыз» шуыса верамын (Екк. 3:4). Со сяна, Иисус, Священной Гожтэмъёсты эскерыса, Иеговаен кусыпъёссэ юнматӥз. Одӥг пол, куке солы 12 арес вал, храмысь дышетӥсьёс «Солэн визьмызлы но, ответ сётэмъёсызлы но паймизы» (Лука 2:42, 46, 47).

⁵ Куке Иисус быдэ вуиз, Инмар сое косӥз лэсьтыны сое, мар Иисусэз шудо кариз. Кылсярысь, Инмар куриз «куанеръёслы Ӟеч Ивор вераны» но синтэмъёсты адӟись карон сярысь тодытыны (Лука 4:18). Инмарлэсь эриксэ быдэсъян Иисусэз шудо каре вал. Тани мар верамын солэн шӧдонъёсыз сярысь Псалтирьын 39:9: «Инмаре, мынам Тынэсьтыд эриктэ быдэсъяса улэме потэ». Иисуслы туж кельше вал адямиослы инмысь Атаез сярысь вераны. (Лыдӟы Лукалэсь 10:21.) Одӥг кышномуртэн зэмос Инмарлы йыбыртъян сярысь вераськемез бере Иисус аслаз дышетскисьёсызлы вераз: «Мынам сиёнэ — Монэ Ыстӥсьлэсь эриксэ карон но Солэсь ужзэ быдэстон» (Иоанн 4:31—34). Иисус Инмарез но, адямиосты но яратӥз. Со сое шудо каре вал. Со тонэ но шудо карыны быгатоз.

6. Малы умой луоз, тон мукет христианъёсын азьланезлы ужпумъёс кутон сярысь вераськид ке?

⁶ Тросэз христианъёс шудо луизы, егит дыръязы пионер луыса ужаны-тыршыны кутскыса. Быгатысалыд-а тон вераськыны сыӵе вын-агайёсын но сузэр-апайёсын азьланезлы ужпумъёс кутон сярысь? Мадёнъёсын 15:22 верамын: «Визь-кенештэк мытэм уж куашка, нош визь-кенеш сётӥсьёс трос ке, со уж быдэсме». Со вын-агайёс но сузэр-апайёс тыныд вераны быгатозы, пионер луыса ужан-тыршон сётэ шуыса быгатонлыкъёс но тодон-валан, кудъёсыз азьланяз туж кулэ луозы. Иисус тросэзлы дышетскиз Атаезлэсь инмын дыръяз. Музъем вылын дыръяз но со дышетсконзэ азьланьтӥз. Кылсярысь, со тодӥз, макем бадӟым шумпотон вае ӟеч иворез веран но шуг-секытъёс дыръя Инмарлы оскымон кылён. (Лыдӟы Исаиялэсь 50:4; Евр. 5:8; 12:2.) Ойдолэ эскеромы, малы вань дырез сётыса ужан-тыршон бадӟым шумпотон вае.

МАЛЫ АДЯМИОСТЫ ЗЭМЛЫКЛЫ ДЫШЕТОН — СО КУЛЭ ЛУИСЬ УЖ?

7. Малы тросэз егитъёс ярато адямиосты дышетон уже пыриськыны?

⁷ Иисус вераз: «Мынэлэ, вань калыкъёсты дышетэлэ» (Матф. 28:19, 20). Со тужгес но кулэ луись уж, кудӥзлы улонэз сӥзьыны луэ, малы ке шуоно со Инмарез данъя. Котькыӵе мукет ужын сямен ик, та ужын азинлыко луон понна, тыныд дыр кулэ луоз. Тани мар вераз Тимоти нимо вын-агай, кудӥз 19 арескын пионер луыса ужаны-тыршыны кутскиз: «Мыным туж кельше Иеговалы вань дырме сётыса ужаны-тыршыны. Озьы мон возьматыны быгатӥсько, сое яратӥсько шуыса. Мынам нокызьы но Библия дышетон шедьтэме уг луы вал. Нош куке мон мукет интые кошки, толэзь улыса ини мон шедьтӥ адямиосты, кудъёсыз Библия дышетыны соглаш луизы. Одӥгез соос пӧлысь Эксэйлык юртамы пумиськонъёсы ветлыны кутскиз. Кышнояськымтэ вын-агайёслы библейской школаынa кык толэзь ӵоже дышетскеме бере монэ мукет кенеше ыстӥзы, кытын мон ньыль Библия дышетонъёс ортчытъяны кутски. Мон туж яратӥсько адямиосты зэмлыклы дышетыны, малы ке шуоно мон адӟисько, кызьы соос воштӥсько, святой духлэн юрттэменыз сэрен» (1 Фес. 2:19).

8. Мар каро куд-ог егит христианъёс, тросгес адямиосты зэмлыкен тодматон понна?

⁸ Куд-ог вын-агайёс но сузэр-апайёс выль кылэз дышетӥзы. Тани Огазеяськем Штатъёсысь Джейкоблэн учырез. Со гожтэ: «Куке мыным сизьым арес вал, мынам классам Вьетнамысь трос нылпиос дышетскизы. Мынам туж потэ вал соослы Иегова сярысь вераме. Соин ик, кӧня ке дыр ортчыса, мон соослэсь кылзэс дышетыны кутски. Сое мон дышетӥ, англи но вьетнам кылын поттэм „Возьмаськон башняосты“ ӵошатыса но мукет амалъёсын. Озьы ик, мон эшъяськи вьетнам кылын вераськись кенешысь вын-агайёсын но сузэр-апайёсын. Куке мыным 18 арес тырмиз, мон пионер луи. Собере Кышнояськымтэ вын-агайёслы библейской школаын дышетски. Али мон вьетнам кылын вераськись группаын пионер но тӧро луыса ужасько-тыршисько. Нош со, малы мон дышетски со школаын, мыным али туж юрттэ. Вьетнамысь лыктэмъёс ӵемысь паймо, мон соослэсь кылзэс дышетӥ шуыса. Соос монэ доразы пырыны ӧтё, но ӵем дыръя ми соосын Библия дышетыны кутскиськомы. Куд-огез соос пӧлысь пылатӥськизы». (Ӵошатэ Апостолъёслэн ужъёссы 2:7, 8.)

9. Малы дышетскыны быгатӥськомы, адямиосты зэмлыклы дышетыса?

⁹ Адямиосты зэмлыклы дышетыса, тон дышетскиськод тыныд сётэм уждэ умой быдэсъяны, адямиосын вераськыны но лякыт сямо луыны. Со сяна, тынад аслыд осконэд но будэ (Мад. 21:5; 2 Тим. 2:24). Нош адямиосты зэмлыклы дышетон тужгес но бадӟым шумпотон вае эшшо одӥг муген: со юрттэ эшшо но умойгес адӟыны, тынад осконэд Библия вылэ пыкиськемын шуыса. Со сяна, тон дышетскиськод Иеговаен ӵош огкылысь ужаны (1 Кор. 3:9).

10. Малы адямиосты зэмлыклы дышетон милемлы шумпотон вае, ми ужаськомы-тыршиськомы ке но сыӵе интыын, кытын милемыз уг кылзо?

¹⁰ Отын, кытын тон ӟеч иворез вераськод, Библия дышетыны туж ӧжытэз кутско ке но, тон шумпотон басьтыны быгатӥськод. Адямиосты зэмлыклы дышетон — со быдэс кенешлэн ужез. Кенешысь кин ке но одӥгез гинэ кутске ке но Библия дышетыны адямиен, кудӥз бератаз христиан мурт луэ, шумпотэ быдэс кенеш, малы ке шуоно соос ваньзы тыршизы. Тани мар вера Брэндон, кудӥз укмыс ар ӵоже ужаз-тыршиз со интыын, кытын туж ӧжытэз ӟеч иворен тунсыкъяське: «Мон яратӥсько ӟеч иворез вераны, малы ке шуоно со Иеговаен сётэм уж. Ӝоген, школаез быдтэм бере, мон пионер луыса ужаны-тыршыны кутски. Мыным туж кельше егит вын-агайёслэсь мылкыдзэс ӝутыны сыӵе ужпумъёс пуктыны, кудъёсыз Иеговалы матэ кариськыны юртто. Но мон туж шумпотӥсько адӟыны, кызьы соос пуктэм ужпумъёссэс быдэсто. Кышнояськымтэ вын-агайёслы библейской школаын дышетскем бере монэ выль интые ыстӥзы. Кинэн мон Библия дышетӥ, нокин но ӧз пылатӥськы, но мукетъёсызлэн вал сыӵе дышетскисьёссы, кудъёсыз пылатӥськизы. Мон шумпотӥсько, адямиосты зэмлыклы дышетон ужлы вань кужымме сётыны ужпум кутӥ шуыса» (Екк. 11:6).

ТОН АЗЬЫН ТРОС ЛУОНЛЫКЪЁС УСЬТӤСЬКО

11. Кыӵе тунсыко ужан-тыршонэ пыриськыны быгато егит христианъёс?

¹¹ Ужаны-тыршыны луэ пӧртэм амалъёсын. Кылсярысь, куд-ог егит вын-агайёс но сузэр-апайёс ас мылкыд каремзыя пуктӥськон ужын юртто. Туж трос Эксэйлык юртъёс пуктыны кулэ на. Пуктӥськон уже пыриськон — со священной ужан-тыршон, кудӥз Иеговаез данъя но тыныд бадӟым шумпотон вайыны быгатэ. Со сяна, тон быгатӥськод трос пӧртэм вын-агайёсын но сузэр-апайёсын ӵош ужаны но солэсь шумпотон басьтыны. Ас мылкыд каремедъя пуктӥськон ужын юрттӥськон тросэзлы тонэ дышетэ. Кылсярысь, тон дышетскиськод чакласькыса ужаны, тыныд сётэм ужез умой быдэсъяны но пуктӥськон уж понна кыл кутӥсь вын-агайёсын кенешыса ужаны.

12. Кыӵе луонлыкъёс усьтӥсько соос азьын, кинъёс пионер луыса ужало-тыршо?

¹² Кевин нимо вын-агай вера: «Пичи дырысеным ик мынам Иеговалы вань дырме сётыса ужаме-тыршеме потэ вал. 19 арескын мон пионер луи. Мон сыӵе уже интыяськи, кытын быдэс нунал ужано ӧй вал. Ужай вын-агай дорын, кудӥз лэсьтӥськись вал. Мон дышетски липет липыны, укноос но ӧсъёс пуктыны. Берлогес, кык ар ӵоже, мон ужай бригадаын, кудӥз сильтӧлъёс бере Эксэйлык юртъёсты но вын-агайёслэсь юртъёссэс тупатъяны юрттэ вал. Куке мон тодӥ, Лымшор Африкае лэсьтӥськисьёс кулэ шуыса, мон заявление гожтӥ, но монэ отчы ужаны ӧтизы. Татын, Африкаын, мон туж ӵем улон интыме вошъясько: кӧня ке арня куспын одӥг Эксэйлык юртэз пуктыса быдтӥськомы но, мон мукет интые юрт пуктыны мынӥсько. Лэсьтӥськисьёсын группа, кудӥныз мон ужасько, мыным семья кадь. Ми ӵош улӥськомы, ӵош Библиез эскериськомы, ӵош ужаськомы. Со сяна, мыным туж кельше арнялы быдэ интыысь вын-агайёсын тодытон уже пыриськыны. Мон ӧй но малпа, пичи дыръям пуктэм ужпумъёсы мыным сомында шумпотон ваёзы шуыса».

13. Малы Вефильын ужан-тыршон егит христианъёслы шумпотон вае?

¹³ Куд-огъёсыз соос пӧлысь, кинъёс азьло пионер луыса ужазы-тыршизы, али Вефильын тыршо. Сыӵе ужан-тыршон трос шумпотон вае, малы ке шуоно ваньзэ, мае Вефильын ужась-тыршисьёс лэсьто, соос лэсьто сое Иеговалы. Соослэн тыршемзылы луыса, вын-агайёс но сузэр-апайёс, озьы ик мукет адямиос но, Инмар сярысь тодон-валан басьтыны быгато. Тани мар вера Дастин нимо Вефильын ужась-тыршись: «Укмыс арес дыръям мон ужпум пуктӥ — Иеговалы вань дырме сётыса ужаны-тыршыны. Школаез быдтыса, мон пионер луи. Ар но ӝыны ортчыса, монэ Вефиле ӧтизы. Отын мон печатлан станокен ужаны дышетски, нош берлогес — программаос гожъяны. Мыным туж кельше, Вефильын мон тодыны быгатӥсько шуыса, кызьы быдэс дунне вылын тодытон уж ортчытӥське вын-агайёслэсь, кудъёсыз со бордын ужало-тыршо. Мыным кельше Вефильын ужаны-тыршыны, малы ке шуоно, милемлы оскем ужмес быдэстыса, ми юрттӥськомы мукет адямиослы Иегова доры матэ кариськыны».

КЫӴЕ УЖПУМЪЁС ТОН ПУКТОД?

14. Мар кароно, вань дырдэ сётыса ужан-тыршон понна?

¹⁴ Мар тыныд кароно, вань дырдэ сётыса ужан-тыршон понна? Нырысь ик тыныд христиан сямъёстэ будэтоно. Соин ик тыршыса дышеты Инмарлэсь Кылзэ, лыдӟемед вылын мур малпаськы но кенешлэн пумиськонъёсаз эскеронэ пыриськыны тыршы. Школаын дышетскыкуд, тросгес тодытон уже пыриськы. Дышетскы адямиосын тунсыкъяськыны: лякытэн юа, мар соос малпало, но сак кылзы соосты. Со сяна, тон быгатӥськод кенешын юрттӥськыны, кылсярысь, Эксэйлык юртэз утялтонэ но сое эскерон-тупатъянэ пыриськыса. Тон зӥбыт-востэм но мукетъёсызлы юрттыны дась ке, Иегова азьланяз но шумпотыса тыныд ужан-тыршонын выль ужъёс оскоз. (Лыдӟы Псалтирез 109:3; Ап. уж. 6:1—3.) Апостол Павел Тимофеез сьӧраз ӧтиз тодытыса ветлыны, малы ке шуоно со сярысь «агай-вынъёс умойзэ веразы» (Ап. уж. 16:1—5).

15. Мар кароно, сыӵе уж шедьтон понна, кудӥз тыныд пионер луыса ужаны-тыршыны юрттысал?

¹⁵ Вань дырзэс сётыса ужась-тыршисьёс улон понна асьсэос коньдон потто (Ап. уж. 18:2, 3). Соин ик вакчи дыр куспын кыӵе ке профессия басьтыса, тон быгатысалыд сыӵе уж шедьтыны, кудӥз тыныд пионер луыса ужаны-тыршыны юрттысал. Вераськы ёросэз чакласен яке пионеръёсын, кудъёсыз тынад ёросад ужало-тыршо. Соос тыныд ӵектыны быгатозы, кыӵе уж утчаны, пионер луыса ужан-тыршон понна. Библиын верамын: «Ужъёстэ Кузё-Инмар кие сёт, соку мытэм ужъёсыд быдэсмозы» (Мад. 16:3; 20:18).

16. Кызьы вань дырдэ сётыса ужан-тыршон дася тонэ мукет удысъёсын но кыл кутыны быгатӥсь луыны?

¹⁶ Оскы: Иеговалэн потэ, тон юн мед кырмиськод шуыса «быронтэм улон» борды, шудо улон борды, кудӥз тонэ азьпалан возьма. (Лыдӟы 1 Тимофейлы 6:18, 19.) Вань дырдэ сётыса ужад-тыршид ке, тон быгатод мукет пионеръёсын эшъяськыны, нош со юрттоз тыныд Инмарен кусыпъёстэ юнматыны. Кызьы верало тросэз христианъёс, егит дыръязы вань кужымзэс сётыса ужам-тыршемзылы луыса, соос юн семья кылдытыны быгатӥзы. Ӵемысь соос, кинъёс кузпалъяськемзылэсь азьло пионер луыса ужазы-тыршизы, собере кузпалэнызы ӵош азьланьто со ужан-тыршонзэс (Рим. 16:3, 4).

17, 18. Кызьы герӟаськемын ужпумъёсмы сюлэммылэн куронъёсыныз?

¹⁷ Псалтирьын 19:5 Иегова сярысь тазьы верамын: «Сюлмыдлы кельшымонзэ тыныд мед сётоз, вань малпанъёстэ Со мед быдэстоз». Соин ик малпа, малы тынад улондэ сӥземед потэ. Малпаськы со вылын, кыӵе уж нуэ Иегова асьме нуналъёсы, но мар карыны тон быгатысалыд, со уже пыриськон понна. Собере пукты сыӵе ужпумъёс, кудъёсыз сое шумпоттозы.

¹⁸ Иеговалы вань кужымдэ сётыса, ужад-тыршид ке, тон бадӟым шумпотон басьтод, малы ке шуоно сыӵе улон сюрес Инмарез данъя. Соин ик «Кузё-Инмар дорын буйгатсконэд мед луоз, Со тынад сюлмыдлэсь куронзэ быдэстоз» (Пс. 36:4).