Лыдӟисьёслэн Юанъёссы

Малы Матфей но Лука Иисуслэн вордӥськемез но пичи дырыз сярысь одӥг кадь ӧз гожтэ?

Матфейлэн верамез Лукалэн верамезлэсь пӧртэм луэ, малы ке шуоно Матфей Иосифен герӟаськем югдуръёс сярысь вера, нош Лука тросгес вера со сярысь, мар герӟаськемын Марияен.

Матфей гожтэ со сярысь, мар карыны малпаз Иосиф Мария секытэн шуыса тодэмез бере, кызьы Иосиф уйвӧт адӟиз, кудаз кылчин ваньзэ солы валэктӥз, но кызьы Иосиф солэн кылъёсызлэсь кылзӥськиз (Матф. 1:19—25). Собере Матфей вера, кызьы кылчин Иосифез уйвӧтаз Египетэ пегӟыны косэ, кызьы со семьяеныз отчы кошке, кызьы мукетаз уйвӧтын кылчин Иосифез Израиле берытскыны косэ, кызьы Иосиф солэсь кылзӥське но кызьы Назаретын улыны ужпум кутэ (Матф. 2:13, 14, 19—23).

Лука вера со сярысь, кызьы Мария доры Гавриил кылчин лыктӥз, кызьы со Елисавета ӵыжы-выжыез доры ветлӥз, озьы ик гожтэ Мариялэсь кылъёссэ, кудъёсыныз со Иеговаез данъяз (Лука 1:26—56). Со сяна, Лука Симеонлэсь кылъёссэ гожтэ, кудӥз вераз, Иисуслы курадӟоно луоз шуыса. 12 аресъем Иисуслэн но солэн семьяезлэн храме лыктэмзы сярысь веракуз но, Лука Иосифлэсь кылъёссэ уг гожты, нош гожтэ Мариялэсь кылъёссэ. Озьы ик, Лука гожтэ на со сярысь, макем мур Мариялэн сюлмаз пыӵа вал ваньмыз, мар вал со вакытэ (Лука 2:19, 34, 35, 48, 51). Озьыен, Матфей тросгес вера Иосифлэн малпанъёсыз но ужъёсыз сярысь, нош Лука — Мариялэн.

Иисуслэн выжыез сярысь но Матфей Лукалэсь пӧртэм гожтэ. Матфей гожтэ Иосифлэсь выжызэ но возьматэ, Иисус Иосифлэн вордос пиез луэ бере, солэн Давидлэн престол вылаз пукыны законъя правоез вань шуыса. Озьыен, Матфей пусъе, Иосиф Давидлэн Соломон пиезлэн выжыысьтыз потэмын вал шуыса (Матф. 1:6, 16). Нош Лука гожтэ Мариялэсь выжызэ но возьматэ, Иисуслэн Давидлэн престол вылаз пукыны правоез вань шуыса, малы ке шуоно «Со Давидлэн кидысэз бордысь вордскиз» (Рим. 1:3). Озьыен, Лука пусъе, Мария Давидлэн Нафан пиезлэн выжыысьтыз потэмын вал шуыса (Лука 3:31). Нош малы Лука ӧз вера, Мария Илийлэн нылыз луэ шуыса? Малы ке шуоно, вашкала Израильын адямилэсь выжызэ гожъякузы, пиосмуртъёсты гинэ гожъяло вал. Соин ик Лукалэн верамез, Иосиф Илийлэн пиез луэ шуыса, возьматэ, Иосиф Илийлэн эмеспиез луэ шуыса (Лука 3:23).

Иисуслэн выжыез сярысь Матфейлэн но Лукалэн гожъямзы возьматэ, Иисус сӥзем Мессия вал шуыса. Иисуслэн кыӵе выжыысь вордскемез умой тодмо вал, соин ик фарисейёс но саддукейёс гинэ но Иисус Давид эксэй выжыысь ӧвӧл шуыса вераны ӧз быгатэ. Иисуслэн выжыез сярысь кыкез ик гожтэмъёс милесьтым осконмес юнмато но оскыто милемыз, Инмарлэн кыл сётонъёсыз одно ик быдэсмозы шуыса.