«Ку милям вуоноез конгрессмы луоз?»

ШУРКЫНМОН толэзьлэн пумыз, 1932-тӥ ар, Мехико. Арня гинэ талэсь азьло та огыр-бугыр карын, кудаз миллионлэсь тросгес улӥсьёсыз, нырысетӥ электрической светофор пуктӥзы. Но али ваньзы верасько мукет ивор сярысь. Карысь репортёръёс чугун сюрес вокзал доры люкаськизы. Фотоаппаратъёссэс дасяса, соос возьмало нимысьтыз куноез — Джозеф Рутерфордэз, Возьмаськон Башнялэн обществоезлэсь президентсэ. Рутерфорд агаез Мексикаысь Иеговалэн Адӟись-Ивортӥсьёсыз но туж возьмало. Со лыктӥз куинь нуналъем конгрессэ, кудзэ дасязы быдэс шаерысь ивортӥсьёслы.

Тани мар гожтэмын вал «Зарни даур» журналын: «Та конгресс Мексикан республикаын Зэмлыкез вӧлмытонын бадӟым инты басьтоз». Нош малы та конгресс, кудаз 150 пала гинэ ивортӥсьёс вал, сокем нимысьтыз луиз?

Та конгресслэсь азьло Мексикаын Эксэйлык сярысь иворез тросэз ӧз кылзэ. 1919-тӥ арысен кутскыса, та шаерын пичиесь конгрессъёс ортчытъяло вал ке но, мукет аръёсаз кенешъёслэн лыдзы кулэсмиз. 1929-тӥ арын Мехикоын филиал усьтӥськиз, со умоезлы оскон сётэ вал. Озьы ке но, шуг-секытъёс вал. Книга вӧлмытӥсьёслы веразы, ужаса-тыршыса ветлыкузы, асьсэлэсь номырзэс но вузаны уг яра шуыса. Соку одӥгез соос пӧлысь йырзэ кур кариз, косонлэсь ӧз кылзӥськы но аслэсьтыз Библиез дышетон группазэ кылдытӥз. Со вакытэгес ик филиаллэсь чакласьсэ но воштоно луиз, малы ке шуоно со шонертэм ужъёс лэсьтыны кутскиз. Мексикаысь Инмарлы оскымон Адӟись-Ивортӥсьёсты юнматоно вал.

Мексикае лыктыса, Рутерфорд агай мылкыдэз ӝутӥсь кык речьёсын но радио пыр вить лекциосын туж юнматӥз отысь Адӟись-Ивортӥсьёсты. Соку ӟеч ивор нырысьсэ быдэс шаерын радио пыр верамын вал. Конгресс бере ужез борды кутскиз филиаллэн выль чакласез, но, Инмарлэн юрттэменыз, оскымон Адӟись-Ивортӥсьёс выль кужымен ӟеч иворез вераны кутскизы.

1933-тӥ арын Мексикаын кык конгресс ортчиз: одӥгез Мехикоын, нош мукетыз — ярдурын сылӥсь Веракрус карын. Тодытӥсьёслэн сюлмысь тыршемзы умой емышъёс вайыны кутскиз. 1931-тӥ арын шаерын 82 ивортӥсьёс вал. Нош дас ар ортчыса, соослэн лыдзы дас поллы йылӥз! 1941-тӥ арын Мехикоын теократической конгрессын 1 000 пала адями вал ини.

«СООС ВАНЬ УРАМЪЁСТЫ ТЫРМЫТӤЗЫ»

1943-тӥ арын Мексикаысь 12 каръёсын «Эрико калыклэн» теократической конгрессэз ортчыны кулэ вал. Адӟись-Ивортӥсьёс со конгрессэ адямиосты ӧтчазы, плакатъёсты уже кутысаa. Со плакатъёс пельпум вылын нуллыны тупатэмын вал: одӥгез гадь вылэ ошиське вал, нош мукетыз — тыбыр вылэ. Озьы тодытӥзы, 1936-тӥ арысен кутскыса.

Тани мар гожтэмын вал «Насьон» (La Nación) журналын Мехикоын ортчем плакатъёсын ӧтён кампанилэн азинлыко луэмез сярысь: «[Конгресслэн] нырысетӥ нуналаз [Адӟись-Ивортӥсьёсты] эшшо тросгес адямиосты ӧтьыны куризы. Нош мукетаз нуналэ ваньмызлы инты ӧз тырмы ни». Сое адӟыса, католической черклэн йырыз кур луиз но, со адямиосты Адӟись-Ивортӥсьёслы пумит ӝутыны кутскиз. Сыӵе пумитъяськон шоры учкытэк, кышкасьтэм вын-агайёс но сузэр-апайёс урамъёстӥ кампания ортчытэмысь ӧз дугдэ. «Насьон» журналын озьы ик верамын вал, плакатъёсын Адӟись-Ивортӥсьёсты быдэс кар адӟиз шуыса. Статьяын Мехиколэн урамъёсаз тодытӥсь вын-агайёслэсь но сузэр-апайёслэсь туспуктэмзэс печатлазы но со улэ гожтӥзы: «Соос вань урамъёсты тырмытӥзы».

«БЕТОН ВЫЖ ВЫЛЫН СЯРЫСЬ, НЕБЫТГЕС НО ШУНЫТГЕС»

Со вакытэ тросэзлы Адӟись-Ивортӥсьёслы капчи ӧй вал ветлыны со ӧжыт конгрессъёсы, кудъёсыз Мексикаын ортчытъясько вал. Тросэз лыкто вал кыдёкысь гуртъёсысь, кытын чугун сюресъёс но, огшоры сюресъёс но ӧй вал. Одӥг кенеш гожтӥз: «Ми палан чугун сюрес ӧвӧл, телеграфмы гинэ вань». Соин ик, конгрессэ мынон понна, нырысь кӧня ке нунал мулъёсын яке пыдын матысь чугун сюрес станцие мыноно вал. Собере гинэ, поездэ пуксьыса, вуоно вал каре, кытын конгресс ортчытӥське.

Тросэз Адӟись-Ивортӥсьёс куанер уло вал, соин ик соослы, одӥг пала мынон понна гинэ но, коньдон люканы капчи ӧй вал. Со каре лыктыса, кытын конгресс ортчытӥське, соос кӧлыны пыро вал отын улӥсь Адӟись-Ивортӥсьёс доры, кудъёсыз вын-агайёссэс ас доразы шумпотыса пырто вал. Куд-огъёсыз Эксэйлык юртъёсын кӧлаллязы. Одӥг пол 90 пала конгрессэ лыктэмъёс филиалэ кӧлыны кылизы. Соос кӧлӥзы книгаос бере кылем сэрттэм коробкаос вылын (котькудӥз улэ 20 коробка понэмын вал). «Арлы быдэ потӥсь книгаын» гожтэмын вал, куноос та «валесъёс» понна туж тау каризы шуыса, малы ке шуоно соос вылын кӧлыны, «бетон выж вылын сярысь, небытгес но шунытгес» вал.

Та Адӟись-Ивортӥсьёс сокем дунъяло вал вын-агайёсын но сузэр-апайёсын ӵош люкаськыны луонлыкез, со понна соос котьмае но чиданы дась вал. Туннэ Мексикаысь ивортӥсьёслэн лыдзы миллион пала вуэ ини, но соос али но тау карисесьb. 1949-тӥ ар понна Мексикаысь филиаллэн отчётаз со палъёсын улӥсь вын-агайёс сярысь верамын вал: «Шуг-секытъёс соослэсь сюлмысь тыршыны мылкыдзэс ӧз быдтэ, малы ке шуоно котькуд конгресс ортчем бере соос кема со сярысь верасько на. Но ваньзылэн одӥг юанзы кылдэ: ку милям вуоноез конгрессмы луоз?» Туннэ но Мексикаысь вын-агайёс сярысь сое ик вераны луоз. (Шор Америкаысь архивъёсысьтымы.)