Котькуд нунал Иеговаен валче ужалэ

1. Кызьы тӥ Иеговаен валче ужаны быгатӥськоды?

ТЫРБЫДЭС адямиосты кылдытыкуз, Иеговалэн потэ вал, адямиос соин валче мед ужалозы но солэсь малпанзэ быдэстыны мед юрттозы шуыса. Туннэ Инмарлэн ужась-тыршисьёсыз тырбыдэстэмесь ке но, соос нуналысь нуналэ соин валче ужаны быгато. Кылсярысь, ми «Инмарлэн ужасьёсыз», яке ӵош ужасьёсыз, луыны быгатӥськомы, куке Эксэйлык сярысь ӟеч иворез вераськомы но дышетскисьёсты дасян уже пыриськиськомы (1 Кор. 3:5—9). Малпалэ ай, мар быдӟа дан милемлы сётэмын — Ваньзэ быгатӥсь Кылдытӥсен валче ужаны но быдэстыны ужез, кудзэ со туж кулэен лыдъя! Но ми мукет амалъёсын но быгатӥськомы соин валче ужаны. Ойдолэ эскеромы, кызьы быгатомы семьямылы но огъя оскисьёсмылы юрттыны, куно карись сяммес возьматыны, быдэс дунне вылысь пуктӥськон-лэсьтӥськон ужын юрттӥськыны но Иеговалы ужан-тыршонын тросгес карыны (Кол. 3:23).

2. Малы кулэ ӧвӧл ӵошатыны сое, мар тӥ карыны быгатӥськоды Иеговалы, соин, мар карыны быгато мукетъёсыз?

² Та статьяез лыдӟыкуды, эн ӵошатэ сое, мар тӥ карыны быгатӥськоды Иеговалы, соин, мар карыны быгато мукетъёсыз. Тодады возе, ваньмызлэн арлыдзы, тазалыксы, югдуръёссы но быгатонлыкъёссы пӧртэм шуыса. Инмарлэн святой духезлэн кивалтэмез улсын Павел гожтӥз: «Котькудӥз аслэсьтыз ужъёссэ ачиз мед эскероз-чаклалоз, соку со, мукетъёсын ассэ ӵошатытэк, аслаз азинсконъёсыныз ушъяськыны быгатоз» (Гал. 6:4).

СЕМЬЯДЫЛЫ НО ОГЪЯ ОСКИСЬЁСТЫЛЫ ЮРТТЭ

3. Малы вераны луоз, соос, кинъёс семьязы сярысь сюлмасько, Инмарен валче ужало шуыса?

³ Иегова возьма, солэн ужась-тыршисьёсыз семьяоссы сярысь сюлмаськозы шуыса. Семьядылы коньдон поттон понна, тӥледлы ужано луэ, вылды. Тросэз анайёс пичи нылпиосынызы доразы пуко. Нош кинлы ке но асьсэды утялтыны быгатӥсьтэм анай-атайёссы сярысь сюлмаськоно луэ. Ваньмыз со кулэ луись уж. Библиын верамын: «Нош кин аслаз ӵыжы-выжыосыз, уката ик семьяосыз сярысь уг ке сюлмаськы, со мурт Инмарлы осконлэсь куштӥськемъёсын одӥг радэ пыре, оскисьтэм муртлэсь но уродгес шуыса лыдӟиське» (1 Тим. 5:8). Тӥляд сыӵе югдуръёсты кылдэмын ке, тӥ уд быгатӥське, луоз, Инмарлы ужан-тыршонэ пыриськыны сомында, кӧня потэ. Но ӝоже эн усе! Семьяды сярысь сюлмаськыса, тӥ Иеговалэсь сюлэмзэ шумпоттӥськоды (1 Кор. 10:31).

4. Кызьы тросэз анай-атайёс возьмато, Эксэйлыкез нырысетӥ интые пукто шуыса? Кызьы Инмар соосты бакель каре?

⁴ Христиан анай-атайёс Иеговаен валче ужало, куке юртто нылпиоссылы Иеговалы ужан-тыршонын ужпумъёс пуктыны. Солы луыса тросэз егитъёс вань дырзэс сётыса ужаны-тыршыны кутско но дорысьтызы кыдёке кошко: кин ке но тырше миссионер луыса, кин ке но пионер луыса отын, кытын ивортӥсьёс уг тырмо, нош кин ке но Вефильын. Кыдёке кошкеменызы, вылды, соос анаенызы но атенызы ӵем адӟиськыны уг быгато. Озьы ке но, анай-атайёс, кудъёсыз асьсэ сярысь гинэ уг малпасько, нылпиоссылэсь мылкыдзэс ӝуто ужан-тыршонзэс азьланьтыны. Нош малы? Малы ке шуоно соос туж шумпото, нылпиоссы Эксэйлыкез нырысетӥ интые пукто шуыса (3 Иоанн 4). Тросэзлы христианъёслы тодмо, дыр, Анналэн шӧдонъёсыз, кудӥз Самуил пиез сярысь вераз: «Мон сое... Кузё-Инмар кие сётӥсько». Соос понна Иеговаен валче ужан — со туж бадӟым дан. Но соос туж шумпото, нылпиоссылэн улонзы озьы ортче шуыса (1 Экс. 1:28).

5. Кызьы уж вылын кенешысь кинлы ке юрттыны луэ? (Учке статья кутсконысь туспуктэмъёсты.)

⁵ Семьяысьтыды югдуръёс тӥледлы уг люкето ке, быгатысалды-а тӥ юрттыны соослы, кинъёс висё, кинъёслэн арлыдзы бадӟым яке кыӵе ке мукет шуг-секытъёсын пумисько? Юрттэт кулэ луэ соослы но, кинъёс сыӵе вын-агайёс но сузэр-апайёс сярысь сюлмасько. Тырше адӟыны, кинлы тӥляд кенешады юрттэт кулэ. Кылсярысь, сузэр арлыдо анай-атайзэ утялтэ ке, быгатысалды-а тӥ огдырлы ке но сое воштыны, со мукет ужъёссэ лэсьтыны мед быгатоз шуыса? Нош кинлы ке но мукет сямен юрттыны луоз: кенешлэн пумиськоназ мыныкумы, сое сьӧрамы басьтыны, магазинэ ветлыны, соин ӵош тодмоез доры больницае ветлыны. Оло нош, тӥляд юрттэмды пыр Иегова кыӵе ке вын-агайлэн яке сузэр-апайлэн вӧсяськемезлы ответ сётэ. (Лыдӟе 1 Коринфъёслы 10:24.)

КУНО КАРИСЕСЬ ЛУЭ

6. Кызьы ми куно карись сяммес возьматыны быгатӥськомы?

⁶ Инмарен валче ужасьёс куно карись луэменызы тодмо. Христиан Грек Гожтэмъёсын «куно карон» шуыса берыктэм кылъёс «тодмотэм муртъёслы ӟеч уж лэсьтонэз» возьмато (Евр. 13:2). Библиын трос учыръёс гожтэмын, кудъёсыз возьмато, макем кулэ куно карись луыны (Ул.-выл. 18:1—5). Милемлы ваньмызлы юрттыны тыршоно — кызьы «асьме осконысь агай-вынъёсмылы», озьы ик мукетъёсызлы но (Гал. 6:10).

7. Кыӵе бакель каронъёс тӥ басьтыны быгатӥськоды, мынӥсь-ветлӥсь ужась-тыршисьёслы куно карись сямдэс возьматыса?

⁷ Кызьы эшшо тӥ Инмарен валче ужаны быгатысалды? Кылсярысь, тӥ быгатоды мынӥсь-ветлӥсь ужась-тыршисьёсты ӧтьыны дорады дугдыны. (Лыдӟе 3 Иоаннлэсь 5, 8.) Со туж умой луонлык «огмес огмы юнматыны» (Рим. 1:11, 12). Тани Олафлэн примерез. Трос аръёс талэсь азьло, куке со туж егит на вал, соослэн кенешазы кышнояськымтэ ёросэз чаклась лыктӥз. Солы кытчы ке интыяськоно вал, но нокин ӧз быгаты сое ас дораз пыртыны. Соку Олаф юаз анай-атаезлэсь, кудъёсыз Адӟись-Ивортӥсьёс ӧй вал, яра-а ёросэз чакласьлы соос дорын улыны. Соос пумит ӧз луэ, но веразы, Олафлы диван вылын кӧлано луоз шуыса. Олаф ӧз жаля, соглаш луиз шуыса. Со тодаз вае: «Соиз арня вунонтэм вал! Ми ёросэз чакласен вазь султылӥмы но, ӵукна сиськыкумы, тунсыко юанъёс сярысь вераськылӥмы. Вераськонъёсмы мынам сюлмам мур пыӵазы, но мынам вань дырме сётыса ужаме-тыршеме потӥз». Берпум 40 аръёс ӵоже Олаф трос шаеръёсын миссионер луыса ужаз-тыршиз.

8. Малы ӟеч ужъёс лэсьтоно, тыршеммес уг дунъяло кадь потэ ке но? Вералэ пример.

⁸ Ӟеч ужъёс пӧртэм амалъёсын лэсьтыны луэ, адямиос тыршеммес уг дунъяло ке но. Тани одӥг пример. Испаниын одӥг сузэр Эквадорысь лыктэм Есика нимо кышномуртэн Библиез дышетэ вал. Одӥг нуналэ, Библиез дышетыкузы, Есика бӧрдыны кутскиз. Сузэр тодӥз, Эквадорын Есика туж куанер улэм шуыса. Одӥг пол солэн сиёнэз бырем но, нылызлы, ву сяна, номыр сётыны быгатымтэ ни. Нылзэ веттаса, Есика Инмарлы вӧсяськем. Кема дыр ортчымтэ, Есика доры кык сузэръёсмы лыктӥллям. Есика ассэ соосын туж лек возем но солы сётэм журналэз кесям. «Таин-а мон нылпиме сюдыны кулэ?»— вожзэ поттыса, верам со. Сузэръёс сое буйгатыны тыршиллям, но быгатӥллямтэ. Берлогес соос ӧс дораз сиён-юонэн корзина вайыса кельтӥллям. Сузэръёслэн ӟеч сямо луэмзы Есикалэсь сюлэмзэ вырӟытӥз. Али, Библиез дышетыкуз, со валаз, соку со Инмарлэсь вӧсяськемезлы ответ сётэмзэ ӧз адӟы шуыса, но солы туж ӝож луиз. Со бере Есика Иеговалы ужаны-тыршыны ужпум кутӥз. Сузэръёслэн шырыт сямо луэмзы умой емышъёс вайиз (Эккл. 11:1, 6).

ПУКТӤСЬКОН-ЛЭСЬТӤСЬКОН УЖЕ ПЫРИСЬКЕ

9, 10. а) Кызьы вашкала дыръя израиль калык Иеговалы ужан-тыршонын юрттӥськыны быгатэ вал? б) Кызьы вын-агайёс кенешлы юрттыны быгато?

⁹ Вашкала дыръя израиль калыклэн трос луонлыкъёсыз вал Иеговалы ужан-тыршонын юрттӥськыны (Пот. 36:2; 1 Пар. 29:5; Неем. 11:2). Туннэ но милям быгатонлыкъёсмы но луонлыкъёсмы вань вын-агайёсмылы но сузэр-апайёсмылы юрттыны, кылсярысь, дырмес но коньдонмес сётыса. Озьы лэсьтӥмы ке, со милемлы бадӟым шумпотон ваёз но Иегова милемыз бакель кароз.

¹⁰ Кызьы вын-агайёс Иеговаен валче ужаны быгато? Библия ӧте соосты кенешлы юрттӥсьёс но тӧроос луыны (1 Тим. 3:1, 8, 9; 1 Пётр 5:2, 3). Сыӵе вын-агайёслэн мылкыдзы вань мукетъёсызлы уж вылын юрттыны но юрттыны соослы Инмарлы матэ кариськыны (Ап. уж. 6:1—4). Нош тӧроос тӥледыз куро ке пумиськонъёсын радъясь луыны, публикациос но тодытонлы участокъёс понна кыл кутыны яке Эксэйлык юртэз эскерон-тупатъянын юрттӥськыны? Соглаш луоды-а тӥ? Сыӵе ужъёсы пыриськись вын-агайёс верало, со туж бадӟым шумпотон вае шуыса.

11. Кызьы одӥг сузэрлы эшъёсыз юрттӥзы, кудъёсыныз со пуктӥськон-лэсьтӥськон ужын тодматскиз?

¹¹ Ӵем дыръя соос, кинъёс пуктӥськон-лэсьтӥськон уже ас мылкыд каремзыя пырисько, выль эшъёс шедьто. Тани Марджи сузэрлэн примерез, кудӥз 18 ар ӵоже Эксэйлык юртъёсты пуктонын тыршиз. Вань со аръёс ӵоже со егит сузэръёслы саклык висъяз но соослы аслэсьтыз тодон-валанзэ сётъяз. Марджи вера, пуктӥськон-лэсьтӥськон ужын юрттӥськон — со туж умой амал шуыса, кызьы мукетъёссэ юнматыны луэ (Рим. 1:12). Куке Марджилэн улоназ секыт дыръёс вуизы, сузэръёс, кудъёсыныз со пуктӥськон-лэсьтӥськон ужын эшъяськиз, туж юрттӥзы солы. Нош тӥ куке но пуктӥськон-лэсьтӥськон ужын юрттӥськиды-а? Кулэ луись быгатонлыкъёсты вань-а, ӧвӧл-а, тӥ со ужын юрттӥськыны быгатысалды.

12. Кызьы шимучыре сюремъёслы юрттыны луэ?

¹² Со сяна, ми Иеговаен валче ужаськомы, куке инкуазь шимучыръёсы сюрем вын-агайёслы но сузэр-апайёслы юрттӥськомы. Куд-огъёсыз соослы ваньбурен юртто (Иоанн 13:34, 35; Ап. уж. 11:27—30). Мукетъёсыз юртто шимучыръёслэсь бервылъёссэс чылкытатыны яке тупатыны сое, мар куашкатэмын вал. Эскеромы одӥг учырез. Польшаын ву тудӟон Габриела нимо сузэрлэсь корказэ быдэсак кадь куашкатӥз. Макем со шумпотӥз, куке матысь кенешъёсысь вын-агайёс солы юрттыны лыктӥзы! Со вера: «Мынам уг поты вераме со сярысь, мае мон ыштӥ,— со арбериос гинэ. Со интые, мон верало, макем трос мон басьтӥ. Монэн луэм учыр возьматэ, христиан кенеш пӧлын луыны — со туж бадӟым дан». Тросэз, кинъёслы со выллем юрттэт сётэмын вал, шӧдӥзы, соослэн Инмарен кусыпъёссы юнмазы шуыса. Нош шимучыре сюремъёслы юрттӥсьёс верало, юрттыса соос туж бадӟым шумпотон басьтӥзы шуыса. (Лыдӟе Апостолъёслэсь ужъёссэс 20:35; 2 Коринфъёслы 9:6, 7.)

13. Малы мукетъёсызлы сюлмысь юрттыса, ми Иеговалы матэ кариськиськомы? Вералэ пример.

¹³ Стефани нимо сузэр но мукет вын-агайёс но сузэр-апайёс Инмарен валче ужазы, куке Адӟись-Ивортӥсьёслэн семьяоссылы юрттӥзы, кудъёсызлы, войнаен сэрен, улон интыоссэс кельтоно но США-е мыноно луиз. Соос соослы улон инты но корка пушказы кулэ луись арбериос шедьтыны юрттӥзы. Стефани вера: «Вын-агайёс туж шумпотӥзы но тау каризы, куке быдэс дунне вылысь вын-агайёслэсь яратэмзэс ас вылазы шӧдӥзы. Соослэсь шумпотэмзэс адӟыса, ми но туж шумпотӥмы. Соос малпало вал, ми соослы юрттӥмы шуыса, нош зэмзэ ке верано, соос милемлы эшшо но тросгес юрттӥзы. Соослэсь Инмарлы оскемзэс, огкылысь улэмзэс но ог-огзэс яратэмзэс адӟыса, ми Иеговаез эшшо юнгес яратӥмы на. Ми туж тау кариськомы ваньмыз понна, мае сётэ милемлы солэн организациез».

УЖАН-ТЫРШОНЭ ТРОСГЕС ПЫРИСЬКЕ

14, 15. а) Кыӵе мылкыдыз вал Исаия пророклэн? б) Кызьы ивортӥсьёс возьматыны быгато, соослэн Исаия пророклэн кадь мылкыдзы шуыса?

¹⁴ Потэ-а тӥляд Иеговаен валче тросгес ужамды? Быгатӥськоды-а тӥ мыныны отчы, кытын ивортӥсьёс уг тырмо? Со понна куддыръя кыдёке мыноно ӧвӧл ке но, куд-ог вын-агайёслэн но сузэр-апайёслэн югдуръёссы уг люкето дорысьтызы кыдёке кошкыны но отын ужаны-тыршыны. Соослэн Исаия пророклэн кадь мылкыдзы. Куке Иегова юаз: «Кинэ Мыным ыстоно? Кин Асьме понна мыноз?» — пророк шуиз: «Тани мон, монэ ысты» (Ис. 6:8). Вань-а тӥляд но сыӵе мылкыдды но луонлыкты мыныны отчы, кытын юрттэт кулэ?

¹⁵ Ӟеч иворез веран но дышетскисьёсты дасян сярысь малпаса, Иисус вераз: «Аран трос, нош ужасьёс ӧжыт. Соин ик аранлэн Кузёезлэсь вӧсяськыса куре, Аслаз аран дораз ужасьёсты мед ыстоз шуыса» (Матф. 9:37, 38). Быгатӥськоды-а тӥ мыныны отчы, кытын ивортӥсьёс ӧжыт, но отын пионер луыса ужаны-тыршыны? Уд ке, быгатӥськоды-а мукетъёсызлы юрттыны? Тросэз вын-агайёс но сузэр-апайёс шӧдӥзы, самой умой амал, кызьы Инмарез но мукетъёссэ яратэмез возьматыны — со пионер луыса ужаны-тыршыны отын, кытын «аран трос, нош ужасьёс ӧжыт». Кызьы эшшо луоз на ужан-тыршонэ тросгес пыриськыны но бадӟым шумпотон басьтыны?

16, 17. Кызьы эшшо ужан-тыршонэ тросгес пыриськыны луэ на?

¹⁶ Потэ-а тӥляд Вефильын яке пуктӥськон-лэсьтӥськон ужын, огдырлы ке но мыныса, юрттӥськемды яке арняяз кӧня ке нунал юрттӥськыны ветлэмды? Инмарлэн организациезлы котьку кулэ мылкыд карисьёс, кудъёсыз дась быдэстыны котькыӵе ужез, кудзэ соослы сёто, соос мукет удысын ужаны дышемын ке но. Иегова туж дунъя вын-агайёсты но сузэр-апайёсты, кудъёсыз дась мае ке сётыны но юрттыны отын, кытын кулэ (Пс. 109:3).

¹⁷ Нош ужан-тыршонэ эшшо но быгатыса пыриськон вылысь, тӥляд тросгес дышетскемды потэ ке? Соку тӥ Эксэйлыкез тодытӥсьёслы школае заявление гожтыны быгатӥськоды. Со юрттэ духовноез ласянь быдэ вуэм но вань дырзэс сётыса ужась-тыршись вын-агайёслы но сузэр-апайёслы Иеговалы ужан-тыршонын эшшо но тросгес лэсьтыны. Со школаын дышетскыны мылкыд карисьёс дась луыны кулэ мыныны отчы, кытчы соосты ыстозы. Потэ-а тӥляд но отын дышетскемды? (1 Кор. 9:23).

18. Кызьы бакель каремын луозы соос, кинъёс котькуд нунал Иеговаен валче ужало?

¹⁸ Ми Иеговалэн ужась-тыршисьёсыз бере, милям потэ шырыт, ӟеч сямо, яратӥсь луэммы но котькуд нунал мукетъёсыз сярысь сюлмаськеммы. Со милемлы каньыллык но шумпотон вае (Гал. 5:22, 23). Кыӵе гинэ тӥляд югдуръёсты медам луэ, Иеговалэсь шырыт сямо луэмзэ адӟем каре, котьку соин валче ужалэ, соку тӥ трос бакель каронъёс басьтоды! (Мад. 3:9, 10).