Тау кариськоды-а тӥ Иеговалы солэн кузьымъёсыз понна?

1, 2. Псалтирез 39:6 лыдэ басьтыса, кыӵе кузьымъёс милемлы лэсьтӥз Иегова но кыӵе пайда милемлы ваёз соос сярысь малпаськон?

ИЕГОВА — шырыт сямо Инмар. Малпаське, кыӵе кузьымъёс со милемлы сётӥз: туж умой улон интыез, Музъемез; паймымон кылдытэм йырвизез но аслэсьтыз туж дуно Кылзэ, Библиез. Иегова кузьмаз туж умой улон интыез, малпаськыны но вераськыны быгатонлыкез, озьы ик сётӥз тужгес но кулэ луись юанъёслы валэктонъёс. (Лыдӟе Псалтирез 39:6.)

² Та статьяын ми вакчияк эскеромы та куинь кузьымъёсты. Макем тросгес ми соос сярысь малпаськомы, сокем золгес ми соосты дунъяломы но сокем юнгес мылкыдмы луоз шумпоттыны яратӥсь Кылдытӥсьмес, Иеговаез (Усьт. 4:11). Озьы ик ми эшшо но быгатыса вераськомы соосын, кинъёс малпало, улон эволюцилы луыса кылдӥз шуыса.

ПАЙМЫМОН МУЗЪЕММЫ

3. Маин пӧртэм луэ Музъем мукет планетаослэсь?

³ Со, кызьы Инмар кылдытӥз асьмелэсь улон интымес, Музъемез, возьматэ солэсь визьлыко луэмзэ (Рим. 1:20; Евр. 3:4). Шунды котыртӥ мукет планетаос но бергало, озьы ке но адями Музъем вылын гинэ улыны быгатэ.

4. Малы со, кызьы Музъеммы кылдытэмын, Инмарлэсь визьлыко луэмзэ возьматэ? Вералэ пример.

⁴ Музъем но космической корабль ог-огзылы маин ке но тупало. Нош космической корабльлэн, кудзэ адями лэсьтӥз, но асьме планетамылэн трос пӧртэмлыкъёссы но вань. Малпаське, кӧня дыр ӵоже улыны быгатысалзы космонавтъёс, соослы кислород, сиён но ву ӧз лэзьясалзы ке, озьы ик соос жуг-жагзэс космосэ ӧз куясалзы ке? Дыр ортчемъя, соослэн кислородзы, вузы но сиёнзы бырысал, нош жуг-жагзы тросгес но тросгес луысал. Ӝоген космической корабльын адямиос кулысалзы. Нош Музъем вылын вань ваньмыз, мар кулэ трос миллиард адямиослы но пудо-животъёслы улон понна. Асьмелэн планетаямы кислород, сиён но ву ноку уг быро. Музъем вылысь жуг-жагез нокытчы уг келяло ке но, планетамы озьы ик чебер улэ но со вылын улыны луэ. Кызьы озьы луыны быгатэ? Иегова музъемез туж визьмо кылдытӥз: жуг-жаг умой макелы пӧрме но, ми сое выльысь уже кутыны быгатӥськомы. Ойдолэ вакчияк эскеромы инкуазьын кислородлэсь но вулэсь бергамзэс. Со эшшо одӥг пол возьматоз милемлы Иеговалэсь туж визьлыко луэмзэ.

5. Мар со сыӵе кислородлэн бергамез но мае со возьматэ?

⁵ Кислород — со газ, кудӥзтэк адямиос но пудо-животъёс улыны уг быгато. Ар куспын Музъем вылын вань улэп макеос шокан понна ог сю миллиард тонна кислородэз уже куто, нош со дыре ик углекислой газ сёто. Озьы ке но кислород ноку уг быры, но углекислой газ омырын мултэс трос ноку уг луы. Малы? Малы ке шуоно Иегова кылдытӥз туж трос будосъёсты — синмын адскисьтэм вубудосъёсты но, туж бадӟымесь писпуосты но, кудъёсыз омырысь углекислой газэз басьто, нош кислородэз сёто. Кислородлэн бергамез возьматэ, Иегова «улон но, шокан но» сётэ шуыса (Ап. уж. 17:24, 25).

6. Мар со сыӵе инкуазьын вулэн бергамез но мае со возьматэ? (Учке «Ву — Иеговалэн кузьымез» рамкаез.)

⁶ Ву Музъем вылын кизер возиське, малы ке шуоно планетамылэн но Шундылэн тужгес но тупамон виссы. Музъеммы Шундылы ӧжыт гинэ матынгес луысал ке, вань ву бырысал но, Музъем улыны ярасьтэм кыр дуннелы пӧрмысал. Нош Музъеммы Шундылэсь ӧжыт гинэ кыдёкынгес луысал ке, со вылысь вань ву кынмысал но, планетамы бадӟым йӧ шарлы пӧрмысал. Иегова Музъеммес Шундылэсь тужгес но тупамон интые пуктӥз бере, со вылын ву берганы быгатэ. Шундылэн пиштэмезлы луыса Музъем вылысь но океанъёсысь ву инме тубе но пилемъёслы пӧрме. Ар куспын ог 500 000 кубической километр ву ӝутске, нош со вань тыосысь вулэсь тросгес луэ. Ӝутскемез бере ву 10 нунал котыр омырын возиське, нош собере музъем вылэ зор яке лымы луыса усе. Озьыен, ву океанъёсы но тыосы берытске, собере ваньмыз выльысен кутске. Вулэн паймымон бергамез возьматэ, Иеговалэн мертантэм кужымез но визьлыкез вань шуыса (Иов 36:27, 28; Екк. 1:7).

7. Кызьы Иеговалы тау кареммес возьматоно кузьым понна, кудӥз сярысь Псалтирьын 113:24 вераське?

⁷ Мар юрттоз Иеговалы тау карон мылкыдмес юнматыны планетамы понна но ваньмыз понна, мар со вылын вань? (Лыдӟе Псалтирез 113:24.) Кылсярысь, Иеговалэн кылдытэмъёсыз сярысь малпаськон. Сыӵе малпаськон мылкыдмес ӝутоз котькуд нунал Иеговалы тау карыны вань кузьымъёсыз понна. Озьы ик ми Музъеммы понна Иеговалы тау карыны быгатӥськомы, улон интымес чылкыт возьыса.

ПАЙМЫМОН ЙЫРВИЫММЫ

8. Малы вераны луоз, адямилэн йырвиымез туж паймымон амалэн кылдытэмын шуыса?

⁸ Адямилэн йырвиымез туж паймымон амалэн кылдытэмын. Анайлэн кӧтаз нылпилэн йырвиымез нимысьтыз радлыкъя будэ но, котькуд минут куспын отын трос сю сюрс выль лулпырыос кылдо. Тодосчиослэн эскеремзыя, бадӟым адямилэн йырвиымаз вань ог 100 миллиард аспӧртэмлыко лулпырыос — нейронъёс. Соос пӧрмыто йырвиымез, кудӥз 1,5 килограмм секта луэ. Ойдолэ эскеромы йырвиыммылэсь куд-ог паймымон быгатонлыкъёссэ.

9. Мар оскытэ тӥледыз, вераськыны быгатонлык — со Инмарлэн кузьымез шуыса?

⁹ Вераськыны быгатонлыкмы туж паймымон. Малпалэ гинэ: одӥг гинэ кылэз веран понна, тӥляд йырвиымды кивалтыны кулэ кылдылэн, ньылондылэн, ымдуръёстылэн, анлыдылэн но гадьдылэн ог 100 быгытъёсынызы. Вераськонмы валамон мед луоз шуыса, вань та быгытъёс нимысьтыз радлыкъя ужаны кулэ. 2019-тӥ арын гожтэмын вал эскерон сярысь, кудаз вераськиз, али гинэ вордскем нылпиос кылъёсты висъяны быгато шуыса. Та эскерон тодосчиослэн малпамзылэсь шонер луэмзэ возьматӥз: адями вордӥськем дырысеныз ик вераськемез валаны быгатэ но ачиз вераськыны дышетске. Зэм но, вераськыны быгатонлыкмы — со Инмарлэн кузьымез (Пот. 4:11).

10. Кызьы Иеговалы тау карыны луэ вераськыны быгатонлык понна?

¹⁰ Одӥгез амал, кызьы вераськыны быгатонлыкмы понна Иеговалы тау карыны луэ,— эволюцилы оскисьёслы валэктыны, малы ми Инмарлы оскиськомы (Пс. 9:2; 1 Пётр 3:15). Соос милемыз оскытыны тыршозы, вылды, Музъем но со вылысь вань улэп макеос ас понназы кылдӥзы шуыса. Нош Библиез но та статьяысь куд-ог малпанъёсты уже кутыса, ми соослы валэктыны быгатомы (соослэн кылзэмзы потӥз ке), малы ми оскиськомы, Иегова ваньзэ кылдытӥз шуыса. Озьы возьматомы, ми Инмар палан шуыса (Пс. 101:26; Ис. 40:25, 26).

11. Малы эшшо вераны луоз на, йырвиыммы паймымон кылдытэмын шуыса?

¹¹ Озьы ик паймымон луэ тодамы возьыны быгатонлыкмы. Кӧня ке дасо аръёс талэсь азьло одӥг тодосчи эскериз: адями тодаз возьыны быгатэ сомында тодон-валанэз, кудзэ ми тодыны быгатысалмы, 20 миллион бадӟым книгаосты лыдӟыса. Нош али лыдъяло, ми тросгес тодон-валан йырамы возьыны быгатӥськомы шуыса. Кыӵе эшшо паймымон луонлыкмы милям вань на тодамы возьыны быгатонлыкмылы луыса?

12. Кызьы вылӥ эсэпъёсъя улыны быгатэммы милемыз пудо-животъёслэсь пӧртэм каре?

¹² Музъем вылын вань кылдытэмъёс пӧлысь адямиос гинэ дышетскыны быгато вылӥ эсэпъёсъя улыны, малпаськыса со сярысь, мар соосын азьвыл луиз. Со юрттэ милемлы умойгес адямиос луыны, озьы ик малпаськон но улон амалмес тупатыны (1 Кор. 6:9—11; Кол. 3:9, 10). Ми быгатӥськомы возьытлыкмес дышетыны, умойзэ уродэзлэсь висъян понна (Евр. 5:14). Ми дышетскыны быгатӥськомы яратыны но гажаны-жаляны. Со сяна, ми Иеговалэн шонерлыко луэмезлы адӟем карыны быгатӥськомы.

13. Кызьы ми уже кутыны кулэ тодамы возьыны быгатонлыкмес, Псалтирез 76:12, 13 лыдэ басьтыса?

¹³ Одӥгез амал, кызьы тодамы возьыны быгатонлыкмы понна Иеговалы тау карыны луэ,— йырамы возьыны учыръёсты, куке Иегова милемлы юрттылӥз но милемыз буйгатылӥз. Озьы милям осконмы юнмалоз, со милемлы азьланяз но юрттоз шуыса. (Лыдӟе Псалтирез 76:12, 13; 77:4, 7.) Озьы ик ми тодамы возьыны быгатӥськомы ваньзэ умойзэ, мае милемлы мукет адямиос лэсьто, но вунэтоно ӧвӧл соосты тау карыны. Тодосчиос эскеризы, тау карись адямиос шудогес шуыса. Нош мае ке но умой луысал вунэтыны. Та пумысен ми Иеговалэсь адӟем карыны быгатӥськомы. Иеговалэн йырвизьмыз тырбыдэс ке но, милесьтым ӧпкелеммес адӟыса, со милемыз простить каре но янгышъёсмес вунэтэ (Пс. 24:7; 129:3, 4). Солэн потэ, милемыз вӧсь карись адямиосты ми простить мед каромы шуыса но соослэсь янгышъёссэс тодамы медам вайылэ ни шуыса (Матф. 6:14; Лука 17:3, 4).

14. Кызьы Иеговалы тау каронмес возьматоно паймымон йырвиыммы понна, кудзэ со милемлы кузьмаз?

¹⁴ Паймымон йырвиыммы понна ми Иеговалы тау каронмес возьматыны быгатомы, куке сое уже кутомы, Инмарез данъян понна. Куд-огъёсыз йырвиымез уже куто асьсэлы пайда басьтон понна гинэ — соос асьсэос ужпум куто, мар шонер, нош мар шонертэм луэ. Нош милемыз Иегова кылдытӥз, соин ик валамон, со умойгес тодэ шуыса, мар милемлы пайда ваёз, нош мар — изъян (Рим. 12:1, 2). Солэсь курон-косонъёссэ быдэсъяса, ми каньыл сюлмын улӥськомы (Ис. 48:17, 18). Но ми умой валаськомы, малы улӥськомы,— Кылдытӥсьмес но инмысь Атаймес данъяськомы но сое шумпоттӥськомы (Мад. 27:11).

БИБЛИЯ — ИНМАРЛЭН ТУЖ ДУНО КУЗЬЫМЕЗ

15. Малы вераны луоз, Библия Иеговалэсь яратэмзэ возьматэ шуыса?

¹⁵ Библия — инмысь Атаймылэн туж дуно кузьымез. Со милемлы та книгаез кузьмаз, малы ке шуоно милемыз туж яратэ. Библиын Иегова тужгес но кулэ луись юанъёслы валэктонъёс сётэ, кылсярысь: кызьы ми кылдӥмы? Малы ми улӥськомы? Мар милемыз азьпалан возьма? Иеговалэн потэ, вань нылпиосыз та юанъёслы валэктонъёс мед шедьтозы шуыса. Соин ик дауръёс ӵоже со адямиослэсь мылкыдзэс ӝутылӥз Библиез пӧртэм кылъёсы берыктылыны. Туннэ быдэс Библиез яке солэсь люкетъёссэ 3 000-лэсь но тросгес кылъёсын лыдӟыны луэ! Быдэс дунне вылын Библия тужгес но трос кылъёсы берыктӥське, со тужгес но вӧлмем книга. Тросэз адямиос, кытын гинэ соос медам вордӥське, сое анай кылынызы лыдӟыны быгато. (Учке «Африкан кылъёсы Библиез берыктон» рамкаез.)

16. Кызьы ми Библия понна Иеговалы тау каронмес возьматыны быгатомы, Матфейлэсь 28:19, 20 лыдэ басьтыса?

¹⁶ Библия понна ми Иеговалы тау каронмес возьматыны быгатомы, куке котькуд нунал сое лыдӟомы, малпаськомы со сярысь, малы со дышетэ, но тодэммес улонамы пыртыны тыршомы. Со сяна, ми Инмарлы тау каронмес возьматомы, котькуд тупась учыре адямиослы Библиысь иворез вераса (Пс. 1:1—3; Матф. 24:14; лыдӟе Матфейлэсь 28:19, 20).

17. Кыӵе кузьымъёс сярысь ми али вераськимы но мае ми эскеромы вуоно статьяын?

¹⁷ Та статьяын ми вераськимы туж чебер Музъеммы сярысь, паймымон кылдытэм йырвиыммы сярысь но Инмарлэн Кылыз, Библия, сярысь. Нош милям вань на Иеговалэн мукет кузьымъёсыз но, кудъёссэ ми ас синмынымы ум адӟиське. Та дуно кузьымъёс сярысь ми вуоно статьяын вераськомы.