Кызьы Иеговаез яратон юрттэ милемлы кышканэз вормыны

1. Вералэ, кыӵе кышканъёс луыны быгато.

МАЛПАСЬКОМЫ куд-ог учыръёс сярысь. Сантьягоb но Мария кузпалъёслэн потэ вал ужамзы-тыршемзы отын, кытын тодытӥсьёс уг тырмо. Со понна соослы дышетсконо вал ӧжытгес коньдон быдтыны. Но соос кышказы, коньдонзы ӧжытгес луиз ке, соос шудоесь уз луэ шуыса. Биниам агай улэ шаерын, кытын кивалтӥсьёс ужмес нуыны уг лэзё. Со валаз, Иеговалэн Адӟись-Ивортӥсез луыса, со уйылон-уллянъёсын пумиськоз шуыса. Со талэсь кышказ ке но, эшшо но золгес со сюлмаськиз, ӵыжы-выжыосызлы выль осконэз уз кельшы шуыса. Валерия сузэрлэсь рак висёнзэ шедьтӥзы. Со уг быгаты вал шедьтыны эмъясез, кудӥз солы виртэк операция лэсьтысал. Валерия кышказ, висёнэз вормоз но со кулоз шуыса.

2. Малы кышканлы сётсконо ӧвӧл?

² Ми пӧлысь тросэзлы таӵе шӧдонъёс тодмо, дыр. Но Иеговаен кусыпъёсмы медаз сӧриське шуыса, кышканлы сётсконо ӧвӧл. Малы ке шуоно Шайтан сое гинэ возьма. Со сяна, солэн потэ, ми Иеговалэсь медам кылзӥське, кылсярысь, тодытэмысь мед дугдомы шуыса (Усьт. 12:17). Шайтан туж лек, туж кужмо но нокинэ уг жаля. Но ми солэсь утиськыны быгатӥськомы. Кызьы?

3. Мар юрттоз милемлы кышканъёсмес вормыны?

³ Ми оскиськомы ке, Иегова милемыз яратэ но со ми палан шуыса, Шайтан милемыз ноку кышкатыны уз быгаты (Пс. 117:6). Тани 117-тӥ Псаломез гожтӥсьлэн учырез. Со туж бадӟым шуг-секытъёсын пумиськиз. Солэн трос тушмонъёсыз вал, соос пӧлын нимо-дано адямиос но вал (9-тӥ но 10-тӥ кылбуръёс). Куддыръя со вылэ туж зол зӥбизы (13-тӥ кылбур). Со сяна, Иегова сое кылкутытӥз (18-тӥ кылбур). Озьы ке но псаломъёсты гожъясь кырӟаз: «Уг кышка». Малы со ӧз кышка? Иегова сое кылкутытӥз ке но, псаломъёсты гожъясь тодӥз, инмысь Атаез сое яратэ шуыса. Со оскиз, маин гинэ со медам пумиськы, яратӥсь Инмарез солы юрттоз шуыса (Пс. 117:29).

4. Кыӵе кышканъёсты ми вормыны быгатӥськомы, оскимы ке, Инмар милемыз яратэ шуыса?

⁴ Ми оскиськомы ке, Иегова милемыз яратэ шуыса, соку ми ум кышкалэ: 1) семьямы понна, 2) адямиослэсь но 3) кулонлэсь. Агайёс но сузэръёс, кудъёсыз сярысь нырысетӥ абзацын вераськиз, кышканъёссэс вормыны быгатӥзы, малы ке шуоно юн оскизы, Инмар соосты яратэ шуыса.

СЕМЬЯМЕС СЮДЫНЫ-ВОРДЫНЫ УМ БЫГАТЭ ШУЫСА КЫШКАН

5. Мар сюлмаськытыны быгатэ семьяослэсь йыръёссэс? (Учке вылбамысь суредэз.)

⁵ Христиан муртъёс туж тыршо, семьязылэн улон понна ваньмыз кулэез мед луоз шуыса (1 Тим. 5:8). Семьяослэн йыръёссы, пандемия сэрен тӥляд трос сюлэмшугъяськонъёсты кылдӥзы. Тӥ сюлмаськиды, вылды, уждэс ыштоды, нош мукетсэ уд шедьтэ шуыса, семьядэс сюдыны яке улон интыды понна коньдон тырыны уд быгатэ шуыса. Яке тӥ малпады, Сантьяго но Мария кузпалъёс сямен, ӧжытгес коньдонэн улэмды уз луы шуыса. Сыӵе кышканъёс сэрен Шайтан трос адямиосты Иеговалэсь палэнтыны быгатӥз.

6. Кыӵе шонертэм малпанъёсты сётэ Шайтан?

⁶ Шайтан милемыз оскытыны тырше, Иегова ужась-тыршисьёсыз сярысь уг сюлмаськы но семьяоссэс сюдыны-вордыны уг юртты шуыса. Ми Шайтанлы оскимы ке, соку малпаломы: гижысь-пиньысь тыршоно кутӥськыны уж борды, со понна Библиысь возетъёсты тӥяно луиз ке но.

7. Кыӵе оскытон сётӥз Иисус?

⁷ Иисус Иеговаез котькинлэсь умой тодэ. Со милемыз оскытэ: «Атайды уго Солэсь куриськемдылэсь азьвыл ик тодэ, мар тӥледлы кулэ» (Матф. 6:8). Иисус юн оске: Инмар котьку дась милемлы ваньзэ кулэзэ сётыны, малы ке шуоно ми солэн семьяез луиськомы. Иегова — семьямылэн Йырыз. Соин ик со лыдэ басьтэ возетэз, кудӥз гожтэмын 1 Тимофейлы 5:8.

8. а) Мар юрттоз милемлы кышканмес вормыны, ми семьямес сюдыны-вордыны ум быгатэ шуыса? (Матфей 6:31—33). б) Учке суредэз. Малы дышетскыны луэ семьялэсь, кудӥз сузэрлы сиён-юон вайиз?

⁸ Ми оскиськомы ке, Инмар милемыз но семьямес яратэ шуыса, соку милям малпанмы но уз кылды, со милемыз кельтоз шуыса. (Лыдӟе Матфейлэсь 6:31—33.) Иеговалы туж кельше ми сярысь сюлмаськыны, малы ке шуоно милям Атаймы туж шырыт сямо. Музъемез кылдытыкуз, со самой кулэзэ гинэ ӧз сёты, нош шумпотон понна но троссэ сётӥз (Ул.-выл. 2:9). Милям коньдонмы самой кулэезлы гинэ тырме ке, малпано со сярысь, мармы милям вань, малы ке шуоно Иегова ми сярысь сюлмаське (Матф. 6:11). Ойдолэ ум вунэтэ: мае гинэ ми кельтоно медам луэ, сое ӵошатыны ик уг луы соин, мар милемлы Иегова али сётэ но вуонояз сётоз. Тае ас вылазы шӧдӥзы Сантьяго но Мария (Ис. 65:21, 22).

9. Малы ми дышетскыны быгатӥськомы Сантьяголэсь но Мариялэсь?

⁹ Колумбиысь Сантьяго но Мария кузпалъёслэн чебер корказы но умой ужзы вал. Соос верало: «Милям потэ вал огшорыгес улэммы но тросгес тодытэммы. Но ми кышкамы. Ми малпамы, коньдонмы ӧжытгес луиз ке, ми шумпотонмес ыштомы шуыса». Мар юрттӥз соослы кышканзэс вормыны? Сантьяго но Мария малпаськыны кутскизы, кызьы Иегова соослы яратэмзэ азьвыл возьматылӥз ини. Соос валазы, Иегова соосты уз кельты шуыса. Та юрттӥз соослы бадӟым уждунэн ужзэс кельтыны, корказэс вузаны но кошкыны отчы, кытын тодытӥсьёс уг тырмо. Мар соос малпало кутэм ужпумзы сярысь? Сантьяго вера: «Ми ас выламы шӧдӥмы, кызьы быдэсмо кылъёс, кудъёсыз гожтэмын Матфейлэсь 6:33. Милям ваньмыз вань. Ми эшшо но шудогес луимы!»

АДЯМИОСЛЭСЬ КЫШКАН

10. Малы паймонэз ӧвӧл, адямиос ог-огзылэсь кышкало шуыса?

¹⁰ Адам но Ева дырысен адямиос ог-огзылы изъян ваё (Екк. 8:9). Сыӵе учыръёс туж вӧлмемын. Кивалтӥсьёс асьсэлы гинэ пайда утчало, котькытын йыружъёс лэсьтӥсько, школаын дышетскисьёс ог-огзэс ултӥяса возё, нош куд-огъёсыз семьяенызы но асьсэды лек возё. Соин ик паймонэз ӧвӧл, адямиос ог-огзылэсь кышкало шуыса. Кызьы Шайтан та кышканэз кутэ?

11, 12. Мар карыны быгатэ Шайтан, ми адямиослэсь кышканлы сётскимы ке?

¹¹ Шайтанлэн потэ, адямиослэсь кышкаменымы, ми Инмарлэсь медам кылзӥське яке тодытэмысь мед дугдомы шуыса. Куд-ог шаеръёсысь кивалтӥсьёслэсь Шайтан мылкыдзэс ӝутэ люкетыны милемлы ужмес нуыны яке милемыз уйылыны-улляны (Лука 21:12; Усьт. 2:10). Тросэз ми сярысь шонертэмзэ верало. Кинъёс солы оско, милемыз серем каро, куд-огъёсыз лекъясько но (Матф. 10:36). Но ми талы ум паймиське, малы ке шуоно Шайтан та амалэз нырысетӥ даурын но кутӥз вал ини (Ап. уж. 5:27, 28, 40).

¹² Нош куд-огъёсыз эшшо но золгес сюлмасько, мар малпалозы ӵыжы-выжыоссы, Адӟись-Ивортӥсь луэмзэс тодӥзы ке. Соос ӵыжы-выжыоссэс ярато но соослэн потэ, семьязы но Иеговаен мед тодматскоз но сое мед яратоз шуыса. Соин ик соослэн мылкыдзы ик куашка, куке ӵыжы-выжыоссы Инмар сярысь но солэн ужась-тыршисьёсыз сярысь уродзэ верало. Но куддыръя ӵыжы-выжыосмы, кудъёсыз нырысь пумитъяськизы вал, Адӟись-Ивортӥсьёс луо. Нош мар кароно, выль осконмы сэрен семьямы милемын кусып воземысь дугдӥз ке?

13. Кызьы милемлы юрттыны быгатэ оскон, Инмар милемыз яратэ шуыса? (Псалтирь 26:10).

¹³ Милемыз буйгатыны быгато чебересь кылъёс, кудъёсыз гожтэмын Псалтирьын 26:10 (лыдӟе). Ми малпаськимы ке, макем зол яратэ милемыз Иегова, соку ум сюлмаське, милемыз семьямы кельтӥз ке но. Ми оскиськомы: Инмар юн луэммы понна бакель кароз. Иегова милемлы улон понна ваньзэ кулэзэ сётоз, юрттоз милемлы сюлмаськытэк но шумпотыса улыны но соин матысь кусыпъёс возьыны. Тае ас вылаз шӧдӥз Биниам агай.

14. Малы ми дышетскыны быгатӥськомы Биниам агайлэсь?

¹⁴ Биниамлэн шаераз Иеговалэсь Адӟись-Ивортӥсьёссэ туж уйылӥзы-уллязы ке но, со ужпум кутӥз Инмарлэн ужась-тыршисез луыны. Кызьы солы юрттӥз оскон, Иегова сое яратэ шуыса? Биниам вера: «Уйылон-уллянъёс малпамелэсь но секытгес вал. Нош эшшо но золгес мон кышкай, семьяе лекъяськоз шуыса. Мыным малпаны ик кышкыт вал, Адӟись-Ивортӥсь луи ке, атаелэн мылкыдыз куашкалоз, нош семьяе монэ пӧрмостэм адямиен лыдъялоз шуыса». Но Биниам юн оскиз, Иегова аслаз калыкез сярысь сюлмаське шуыса. Со азьланьтэ: «Мон малпаськи, кызьы Иегова юрттӥз мукет агайёслы но сузэръёслы чиданы коньдонэн герӟаськем шуг-секытъёссэс, адямиослэсь мыскыллямзэс но пумитъяськемзэс. Мон тодӥ: Иеговаез ӧй кельты ке, со монэ бакель кароз. Монэ трос пол арестовать карылӥзы, курадӟытӥзы но. Но мон ас вылам шӧдӥ: ми Инмарлы оскымон луимы ке, со одно ик юрттоз». Биниам понна Иегова зэмос Атай луиз, нош Адӟись-Ивортӥсьёс — зэмос семья.

КУЛОНЛЭСЬ КЫШКАН

15. Малы кулонлэсь кышканы умойтэм ӧвӧл?

¹⁵ Библиын вераське, кулон — со тушмон шуыса (1 Кор. 15:25, 26). Ми со сярысь малпаны ик кышкаськомы, вылды, уката но асьмелэн яке ӵыжы-выжыосмылэн секыт висёнзы вань ке. Нош малы ми кулыны кышкаськомы? Малы ке шуоно Иегова, милемыз кылдытыкуз, сюлмамы пырак улыны мылкыд понӥз (Екк. 3:11, ВД). Кулонлэсь кышкан улонмес но утьыны быгатэ. Кылсярысь, со мылкыдмес ӝутэ пайдаё сиён сиыны, спортэн вырыны, кулэ дыръяз эмъясь доры мыныны но улонмес дунъяны.

16. Кызьы Шайтан кутыны быгатэ кулонлэсь кышканэз?

¹⁶ Шайтан тодэ, ми улонмес дунъяськомы шуыса. Солэн верамезъя, улонмес утён понна, ми номыре ум жалялэ, Иеговаен кусыпъёсмес но (Иов 2:4, 5). Со озьы ӧвӧл ке но, Шайтан, «кулонлэн кузёяськисез», озьы гинэ уг сётскы. Со кулонлэсь кышканмес кутэ но милемыз кужмысь косыны тырше Инмарлэсь палэнскыны (Евр. 2:14, 15). Куддыръя Шайтан адямиослэсь мылкыдзэс ӝутыны быгатэ Иеговалэсь ужась-тыршисьёссэ кулонэн кышкатыны, соос осконзылэсь ӧз ке куштӥське. Яке, милемлы ӝог эмъюрттэт кулэ ке, Шайтан милесьтым мылкыдмес ӝутыны быгатэ Инмарлэсь законъёссэ тӥяны. Кылсярысь, эмъясьёс но оскисьтэм ӵыжы-выжыосмы милемыз косыны быгато вир лэзьыны яке эмъяськыны сыӵе амалэн, кудӥз Инмарлы но Библилы пумит мынысал.

17. Малы кулонлэсь кышкано ӧвӧл? (Римъёслы 8:37—39).

¹⁷ Милям кулэммы уг поты ке но, ми тодӥськомы, кулоно луимы ке, Иегова милемыз азьланяз но яратоз шуыса. (Лыдӟе Римъёслы 8:37—39.) Инмар уг вунэты аслэсьтыз эшъёссэ. Со азьын ваньзы соос улэпесь (Лука 20:37, 38). Иеговалэн туж потэ соосты улӟытэмез (Иов 14:15). Соос понна со туж бадӟым дун тыриз — аслэсьтыз Пизэ сётӥз, «котькудӥз но Солы оскись мурт медаз быры, солэн быронтэм улонэз мед луоз шуыса» (Иоанн 3:16). Ми тодӥськомы, Инмар милемыз туж яратэ но ми сярысь сюлмаське шуыса. Соин ик милям секыт висёнмы вань ке яке милемыз кулонэн кышкато ке, ми Иеговалэсь ум куштӥське. Со интые, ми Иеговалэсь буйгатскон, визьлык но кужым куромы. Ӵапак озьы ик лэсьтӥзы Валерия но солэн картэз (Пс. 40:4).

18. Малы ми дышетскыны быгатӥськомы Валериялэсь?

¹⁸ Куке Валериялы 35 арес вал, эмъясьёс веразы, солэн рак шуыса, кудзэ туж секыт эмъяны но кудӥз туж ӝог будэ. Кызьы Иеговаез яратон юрттӥз солы кулонлэсь кышканзэ вормыны? Тани мар со вера: «Куке ми тодӥмы висёнэ сярысь, ваньмыз воштӥськиз. Мыным операция лэсьтоно вал. Но одӥг хирург но соглаш ӧз кариськы виртэк операция карыны. Туж кышкыт вал! Но мынам Иеговаез шумпоттэме потэ вал. Соин ик мон ноку соглаш ӧй кариськысал вирез лэзьыны. Вань улонэ ӵоже Иегова мыным трос пол аслэсьтыз яратонзэ возьматъяз! Табере мынам но луэ вал возьматэме, мон сое туж зол яратӥсько шуыса. Куке эмъясь мыным вералляз, тазалыке урод шуыса, мынам эшшо но золгес Иеговаез шумпоттэме потэ вал. Шайтанлы сётскеме мынам уг поты вал. Эмъясез шедьтыны секыт вал ке но, мыным виртэк операция лэсьтӥзы. Тазалыке али но туж ик умой ӧвӧл, но Иегова ваньзэ кулэзэ сётэ. Кылсярысь, висёнэ сярысь тодэме азьын ик кенешлэн пумиськоназ ми эскеримы „Сохраняйте мужество в бедственные времена“ статьяезc. Со туж дырыз дыръя вал. Ми сое выльысь но выльысь лыдӟимы. Сыӵе статьяос, тодытон уж но кенешлэн пумиськонъёсыз юрттӥзы милемлы картэным мултэс сюлмаськытэк улыны но шонер ужпумъёс кутыны».

КЫШКАНЪЁСМЕС ВОРМИСЬКОМЫ

19. Мар луоз ӝоген?

¹⁹ Быдэс дунне вылысь Иеговалэн ужась-тыршисьёсыз солэн юрттэменыз шуг-секытъёс пыр пото но Шайтанлы уг сётско (1 Пётр 5:8, 9). Соос пӧлын тӥ но! Ӝоген Иегова косоз Иисусэз но ӵош кивалтӥсьёссэ «Диаволлэсь ужъёссэ» куашкатыны (1 Иоанн 3:8). Собере Инмарлэсь калыксэ «нокин но... кышкатыса уз возьы» (Мих. 4:4; Ис. 54:14). Нош со дырозь ойдолэ тыршомы кышканъёсмылы сётскытэк улыны.

20. Мар юрттоз милемлы кышканъёсмес вормыны?

²⁰ Туж кулэ осконмес юнматыны, Иегова эшъёссэ яратэ но соосты уте шуыса. Кызьы осконмес юнматоно? Ойдолэ малпаськомы, кызьы Иегова азьвыл аслэсьтыз ужась-тыршисьёссэ юнматылӥз, но та сярысь мукетъёсыныз вераськомы. Озьы ик ойдолэ ум вунэтэ, кызьы со милемлы но шуг-секытъёс дыръя юрттылӥз. Иеговалэн юрттэменыз ми быгатомы кышканъёсмес вормыны! (Пс. 33:5).