Иеговалэсь сюрессэ бырйисько

СЬӦД ӴЫН ПӦЛЫСЬ ЯРКЫТ ШУНДЫ УЛЭ

Мон вордӥськи 1935-тӥ арын Дарластон карын. Со интыяськемын Сьӧд шаерын — Англилэн ёросаз, кудаз заводъёс но фабрикаос сьӧд ӵын потто вал. Куке мыным ог ньыль арес вал, анае но атае Иеговалэн Адӟись-Ивортӥсьёсыныз Библиез дышетыны кутскизы. 14 яке 15 арес дыръям мон но валай, со зэмлык шуыса. Собере 1952-тӥ арын 16 арес дыръям пылатӥськи.

Соку мон ужаны интыяськи бадӟым заводэ, кудаз ужан тӥрлыкъёс но автомобильёслы запчастьёс потто вал. Отын монэ дышетӥзы секретарь луыса ужаны. Та уж мыным туж кельше вал!

Со дыре ик ёросэз чаклась ӵектӥз мыным Уилленхолл карысь аслам кенешам книга дышетонэз ортчытъяны. Табере мыным быръён лэсьтоно вал, малы ке шуоно соку мон кык кенеше ветлӥ. Арня куспын мон ветлӥ Бромсгров карысь кенеше, кудӥз ужан интыелы матын вал, но дорелэсь 30 иськем кемын вал. Нош шутэтскон нуналъёсы мон бертӥсько вал анай-атае доры но Уилленхолл карысь кенеше ветлӥсько вал.

Мынам туж потэ вал Иеговалэн организациезлы юрттэме. Соин ик ёросэз чакласьлэн ӵектэменыз соглаш кариськи. Но со понна мыным кошконо вал ужысь, кудзэ мон туж яратӥсько вал. Мон туж шумпотӥсько, соку Иеговалэсь кылзӥськи шуыса! Сыӵе ужпум кутэме бере мынам тунсыко улонэ кутскиз, кудӥз сярысь мон ноку ӧй жаля.

Бромсгров карын пумиськонъёсы ветлыкум, мон тодматски туж чебер Энн нимо сузэрен, кудӥзлэн юн осконэз вал. 1957-тӥ арын ми кузпалъяськимы. Нырысь ми пионеръёс, собере нимысьтыз пионеръёс луыса ужамы-тыршимы, пуктӥськон ужъёсы пыриськимы но Вефильын ужамы-тыршимы. Энн быдэс улонэ ӵоже мыным шумпотон вае!

1966-тӥ арын ми Галаад школалэн 42-тӥ классаз дышетскимы. Собере милемыз Малави шаере ужаны-тыршыны ыстӥзы. Со интыысь улӥсьёслэн лякыт но куно карись луэмзы понна та шаерез Африкалэн пӧсь сюлмыныз нимало. Но ми ӧм но малпалэ, отын кема ик ум улэ шуыса.

МАЛАВИЫН СЕКЫТ ДЫРЪЁСЫ УЖАСЬКОМЫ-ТЫРШИСЬКОМЫ

Малави шаере ми вуимы 1967-тӥ арын 1-тӥ тулыспалэ. Быдэс толэзь ӵоже ми выль кылэз дышетӥмы. Собере мон улосэз чаклась луыса ужаны-тыршыны кутски. Ми ветлӥськомы вал джип машинаен. Куд-огъёсыз малпало вал, со котькыӵе сюресъёстӥ ветлыны быгатэ шуыса, шуръёс вамен но. Но со озьы ӧй вал. Со лазег вуостӥ гинэ ветлыны быгатӥз. Куддыръя ми кӧлӥськомы вал пичи коркаосын, кудъёсыз горд сюйлэсь лэсьтэмын но куроен липемын вал. Зол зорыку, корка пушкы ву медаз пыры шуыса, липет улэ брезент кыско вал. Озьы ми кутскимы миссионеръёс луыса ужаны-тыршыны! Но со милемлы кельше вал.

Оштолэзе мон тодӥ, кивалтӥсьёс милемлы пумитъяськыны кутско шуыса. Радио пыр Хастингс Банда, Малавиысь президент, речь вераз. Со Иеговалэсь Адӟись-Ивортӥсьёссэ янгыше уськытӥз, соос вытъёсты уг тыро но политикае пырисько шуыса. Но со озьы ӧй вал! Ми тодӥмы: кивалтӥсьёс пумитъяськыны кутскизы, малы ке шуоно ми нокин пала кариськытэк улӥмы. Тужгес но соослэн йырзы кур вал, вын-агайёс партийной билетъёс ӧз басьтэлэ шуыса.

Куарусён толэзе газетысь ми лыдӟимы, Малавиысь президент шаерысь вань шуг-секытъёс понна Адӟись-Ивортӥсьёсты янгыше уськытӥз шуыса. Ӝоген 1967-тӥ арын 20-тӥ коньывуонэ Иеговалэн Адӟись-Ивортӥсьёсызлы ужзэс нуыны ӧз лэзе ни. Собере Вефиле полицейскойёс но миграционной службаысь ужасьёс лыктӥзы, Вефилез ворсан понна но миссионеръёсты шаерысь уллян понна.

Куинь нунал ӵоже милемыз пытсэтын возизы. Собере ыстӥзы Маврикий шормуӵе, кудӥз Великобританилэн ки улаз возиськиз. Но Маврикиысь кивалтӥсьёс миссионеръёсты шаере пырыны ӧз лэзе. Соин ик агайёс ыстӥзы милемыз Родезия шаере (али Зимбабве). Отын милемыз пумитаз лек кивалтӥсь, кудӥз шаере пырыны ӧз лэзьы. Со вераз: «Тӥледыз Малавиысь уллязы, Маврикие пырыны ӧз лэзе. Тӥ малпаськоды, тӥледыз татын шумпотыса пумиталозы шуыса?» Энн бӧрдыны кутскиз. Ми малпамы, ми нокинлы кулэ ӧвӧл шуыса. Мынам ваньзэ куштэме но Англие берытскеме потэ вал. Озьы ке но кивалтӥсьёс лэзизы милемлы уйзэ филиалын ортчытыны, нош ӵукнаяз косӥзы соос доры лыктыны. Ми воксё катьтэммемын вал ке но, ми Иегова вылэ оскиськыса улӥмы. Ми солэсь кивалтэтсэ возьмамы. Мукет нуналаз кивалтӥсьёс лэзизы милемлы Зимбабвее туристъёс кадь кыльыны. Мон ноку уг вунэты аслэсьтым шӧдонъёсме! Мон валай, та сюрестӥ милемыз Иегова нуэ шуыса.

ВЫЛЬ УЖ: ЗИМБАБВЕЫСЕН МАЛАВИ СЯРЫСЬ СЮЛМАСЬКИСЬКОМЫ

Зимбабвеысь филиалын мон ужан-тыршонэз радъясь ёзэтын ужай-тырши. Мыным Малавиысь но Мозамбикысь Адӟись-Ивортӥсьёслы юрттоно вал. Малавиысь вын-агайёсты туж лек уйылӥзы-уллязы. Мыным Малавиысь ёросэз чакласьлэсь отчётъёссэ берыктылоно вал. Огпол, бер ӝытозь ужакум, мон бӧрдыса ик лыдӟи, макем лек уйыло-улляло вын-агайёсме но сузэр-апайёсмеa. Монэ туж паймытӥз соослэн оскымон но юн луэмзы (2 Кор. 6:4, 5).

Ми туж тыршимы, вын-агайёслэн, кудъёсыз Малави шаере кылизы, озьы ик соосызлэн но, кудъёсыз уйылон-уллянъёс сэрен Мозамбике кошкизы, духовной сиёнзы мед луоз шуыса. Малавиын самой вӧлмем кыл —чичева. Та кылэ берыктӥсьёс Зимбабвеысь одӥг Адӟись-Ивортӥсьлэн бадӟым фермаяз интыяськизы. Та агай лэсьтӥз соослы улон инты но, ужан инты но. Соин ик публикациосмес берыктон уж ӧз дугды.

Ми сюлмаськимы, Малавиысь ёросэз чакласьёс котькуд аре Зимбабвеын чичева кылын ортчытӥськись конгрессэ мед ветлозы шуыса. Конгресс бере ми соослы вань речьёслэсь планъёссэс сётӥськомы вал. Малавие берытскыса, соос та малпанъёсты мукет вын-агайёслы но сузэр-апайёслы верало вал. Нош огпол, ёросэз чакласьёсты юнматон понна, Зимбабвеын ми Эксэйлыклы ужан-тыршон школаез ортчытӥмы.

1975-тӥ арын тулыспал толэзе мон адӟиськи Малавиысь Адӟись-Ивортӥсьёсын, кудъёсыз Мозамбикын беженецъёслэн лагерязы улӥзы. Та вын-агайёс Иеговалэн организациезлэн берпуметӥ кивалтэтэзъя улӥзы. Соос тӧроослэсь кенешъёссэс кылдытӥзы, речьёс вераллязы, вын-агайёсын но сузэр-апайёсын котькуд нуналлы кылбурез но «Возьмаськон башняез» эскеризы, ёросысь конгрессъёсты ортчытъязы. Беженецъёслэн лагерьзы кельше вал бадӟым конгрессъёслы. Радъямын вал ужъёс, кудъёсыз герӟаськемын вал утялсконэн, сиён-юонэз люкылонэн но кышкытлыкъёслэсь утёнэн. Та вын-агайёс Иеговалэн юрттэменыз туж трос лэсьтӥзы! Тае адӟыса, мынам мылкыды ик ӝутскиз.

1970-тӥ аръёслэн пумазы Малави сярысь Замбиысь филиал сюлмаськыны кутскиз. Озьы ке но мон но, мукет агайёс но Малавиысь вын-агайёсмес ӧм вунэтэ но соос сярысь вӧсяськимы. Валтӥсь кивалтонниысь агайёс пумиськылӥзы Малавиысь, ЮАР-ысь но Замбиысь вын-агайёсын. Мон Зимбабвеысь филиаллэн комитетаз ужай-тырши бере, со пумиськонъёсын мон но кӧня ке пол вал. Котькуд пумиськонын агайёс малпаськизы: «Кызьы эшшо юрттыны быгатӥськомы на Малавиысь агайёслы?»

Дыр ортчыса, уйылон-уллянъёс лябӟизы. Беженецъёс Малавие берытскыны кутскизы, нош вын-агайёс, кудъёсыз нокытчы ӧз кошкылэ, капчиен шокчыны быгатӥзы. Артысь шаеръёс Иеговалэн калыкезлы ужзэс нуыны лэзё вал. Мозамбикын 1991-тӥ арын ужмес нуыны лэзизы. Но ми возьмаськомы вал: ку Малавиын Иеговалэн Адӟись-Ивортӥсьёсыз Инмарлы кышкатэк ужаны-тыршыны быгатозы?

МАЛАВИЕ БЕРЫТСКИСЬКОМЫ

Малавиын югдур воштӥськиз. 1993-тӥ арын кивалтӥсьёс Иеговалэн Адӟись-Ивортӥсьёсызлы ужзэс нуыны лэзизы. Соберегес ик мон вераськи одӥг миссионерен. Со юаз: «Табере Малавие берытскоды-а?» Соку мыным 59 арес вал, соин ик мон верай: «Ум, мынам арлыды бадӟым ини». Но самой со нуналэ ик милемлы Кивалтӥсь кенешлэсь гожтэт вуиз. Соос ӵектӥзы милемлы Малавие берытскыны!

Милемлы кельше вал Зимбабвеын ужаны-тыршыны, соин ик бырйыны секыт вал. Ми та интылы дышемын вал ини, милям трос эшъёсмы вал. Кивалтӥсь кенешысь агайёс гожтэтсэс туж лякыт кылъёсын гожтӥзы. Агайёс веразы, ми Зимбабвее но кыльыны быгатӥськомы шуыса. Ми озьы ик лэсьтысалмы, улон сюресмес асьмеос бырйысалмы ке. Но мынам тодам лыктӥзы Авраам но Сарра. Бадӟым арлыдзы шоры учкытэк, соос умой корказэс кельтӥзы но Иеговалэсь кылзӥськизы (Ул.-выл. 12:1—5).

Ми Иеговалэн организациезлэсь кылзӥськимы но Малавие берытскимы. Ми вуимы 1995-тӥ арын 1-тӥ тулыспалэ — та шаере нырысетӥзэ вуэммы бере 28 ар ортчыса. Малавиын филиаллэн комитетэз кылдытэмын вал. Отын ми эшшо кык агайёсын ӵош ужаны-тыршыны кутскимы. Ми Иеговалэн Адӟись-Ивортӥсьёсызлэсь ужъёссэс та шаерын выльысь радъяны кутскимы.

ИЕГОВАЛЭН БАКЕЛЬ КАРОНЪЁСЫЗ

Туж шумпотоно адӟыны, Иегова тыршеммес бакель каре шуыса. 1993-тӥ арын шаерын ог 30 000 ивортӥсьёс вал. Нош 1998-тӥ арын 42 000-лэсь тросгес ивортӥсьёс луизыb. Кивалтӥсь кенеш ужпум кутӥз филиал пуктыны, та шаерын улӥсь Адӟись-Ивортӥсьёс сярысь сюлмаськон понна. Соин ик Лилонгве карын ми 12 гектар музъем басьтӥмы, нош мон пуктӥськонъя комитетын ужаны-тыршыны кутски.

2001-тӥ арын куартолэзе филиал пуктэмын вал. Филиалэз Иеговалы сӥзьыку, речь вераз Кивалтӥсь кенешысь Гай Пирс агай. Со пумиськонын Малавиысь 2 000-лэсь но тросгес Адӟись-Ивортӥсьёс вал. Соос пӧлысь тросэз Иеговалы 40 арлэсь но тросгес ужазы-тыршизы ини. Та вын-агайёс но сузэр-апайёс туж лек уйылон-уллянъёс дыръя но Инмарлы оскымон кылизы. Соослэн коньдонзы ӧй вал ке но, соос юн осконэн улӥзы но Иеговаен матысь кусыпъёс возизы. Табере соослэн асьсэлэн выль Вефильзы вал! Быдэс филиалын Эксэйлык кырӟанъёсты Африкаын улӥсь калыкъёслэн манерзыя кырӟазы. Соин ик пумиськон туж умой мылкыдын ортчиз но возьматӥз, Иегова оскымон ужась-тыршисьёссэ бакель каре шуыса.

Филиалэз пуктэм бере мон, Эксэйлык юртъёсты Иеговалы сӥзьыку, речьёс вералляй. Организацимы куанер шаеръёсын пуктӥськон ужъёсты нуэ, Малави шаерын но. Азьвыл кенешъёс пумиськылӥзы эвкалиптлэсь но тростниклэсь лэсьтэм липетъёс улын, нош пукизы горд сюйлэсь лэсьтэм скамьяос вылын. Нош собере агайёс шумпотыса гуръёсазы кирпичъёс лэсьтылӥзы но Эксэйлык юртъёс пуктылӥзы. Но пуконъёс интые соос азьло сямен ик скамьяос вылын пуко вал, малы ке шуоно скамья вылэ тросгес адямиос тэро.

Иегова аслэсьтыз калыксэ туж бакель каре! Тужгес но монэ паймытӥз, кызьы Африкаысь егит агайёс котьку дась вал трос ужаны-тыршыны. Иеговалэн организацияз дышетскыса но басьтэм тодон-валанзэс уже пыртыса, соос дышетскизы выль ужъёсты быдэсъяны. Соин ик соос Вефильлы но кенешъёслы эшшо но тросгес пайда вайыны быгатӥзы. Кылсярысь, куд-огъёсыз ёросэз чакласьёс луыса ужаны тыршыны кутскизы. Соос Иеговалэн ужась-тыршисьёсызлы осконзэс юнматыны юрттӥзы. Со агайёс пӧлысь тросэз кышнояськемын вал. Тодмооссы но ӵыжы-выжыоссы соосты нылпиос вордыны косӥзы ке но, соос кӧня ке дыр ӵоже нылпиостэк улӥзы, тросгес ужан-тыршон понна.

КУТЭМ УЖПУМЪЁСЫ СЯРЫСЬ УГ ЖАЛЯСЬКЫ

Африкаын ми 52 ар ӵоже ужамы-тыршимы, но берлогес мынам тазалыке уродмыны кутскиз. Кивалтӥсь кенеш лэзиз милемлы Великобритание берытскыны. Малавиысь кошкыны милемлы туж жаль вал. Но Британиысь Вефиль милемыз туж шуныт пумитаз но ми сярысь туж умой сюлмаське.

Мон оскисько, Иеговалэсь сюрессэ бырйыса, мон самой умой ужпум кутӥ шуыса! Ас тодэмъям улысал ке, мон уг тодӥськы, кытын али луысал. Иегова котьку тодӥз, мар мыным кароно, шонер сюрес вылтӥ мынон понна (Мад. 3:5, 6). Егит дыръям мон туж тырши бадӟым заводын ужаны. Но сое ӵошатыны ик уг луы соин, кыӵе ужъёсты мон быдэсъяй быдэс дунне вылысь Иеговалэн организацияз. Азьвыл но, али но Иеговалы ужан-тыршон — мон понна самой умой улон сюрес!