Кык выль агайёс, кудъёсыз табере Кивалтӥсь кенешын ужало-тыршо
ВИРНУНАЛЭ, 2023-тӥ арын 18-тӥ толшоре, jw.org сайтын нимысьтыз ялон гожтэмын вал. Отын вераськиз, Гейдж Флигл но Джеффри Уиндер агайёс табере Иеговалэн Адӟись-Ивортӥсьёсызлэн Кивалтӥсь кенешазы ужалозы-тыршозы шуыса. Кыкез ик та агайёс трос аръёс ӵоже ини Иеговалы оскымон ужало-тыршо.
Гейдж Флигл но Надя кышноез
Флигл агай будӥз Иеговалэн Адӟись-Ивортӥсьёсызлэн семьяязы Огазеяськем Штатъёсын, Пенсильвания штатлэн шундыпуксён палаз. Со быдэ вуэмын ӧй вал на, куке соослэн семьязы улыны кошкиз пичи каре, кытын ивортӥсьёс уг тырмо вал. Кема ик дыр ӧз ортчы, 1988-тӥ арын 20-тӥ шуркынмонэ, со пылатӥськиз.
Флигл агайлэн атаез но анаез котьку солэсь мылкыдзэ ӝуто вал вань дырзэ сётыса ужаны-тыршыны. Соос дорын куноын ӵем луыло вал ёросэз чакласьёс но Вефильын ужась-тыршисьёс. Гейдж адӟе вал, та агайёс но сузэръёс туж шудоесь шуыса. Пылатӥськемез бере ар но ӧз ортчы, 1989-тӥ арын 1-тӥ куарусёнэ, со пионер луиз. Кык ар ортчыса, 1991-тӥ арын коньывуонэ, со аслэсьтыз ужпумзэ быдэстӥз, кудзэ 12 арес дыръяз пуктӥз вал,— Бруклинысь Вефильын ужаны-тыршыны кутскиз.
Вефильын Флигл агай тямыс ар ӵоже переплётной цехын ужаз-тыршиз, собере ужан-тыршонэз радъясь ёзэтын. Со вакытэ кӧня ке ар ӵоже со ӟуч кенешын ужаз-тыршиз. 2006-тӥ арын со Надя сузэрез кышно басьтӥз, собере Надя но Вефильын ужаны-тыршыны кутскиз. Соос ужазы-тыршизы португал кенешын, собере 10 арлэсь кемагес — испан кенешын. Трос аръёс ӵоже ужан-тыршонэз радъясь ёзэтын ужамез бере Флигл агай Дышетонъя комитетлэн бюрояз ужаны кутскиз, нош берлогес — Ужан-тыршонъя комитетлэн бюрояз. 2022-тӥ арын южтолэзе со Кивалтӥсь кенешлэн Ужан-тыршонъя комитетэзлэн юрттӥсез луиз.
Джеффри Уиндер но Анджела кышноез
Уиндер агай будӥз Иеговалэн Адӟись-Ивортӥсьёсызлэн семьяязы, Маррие́та карын (Огазеяськем Штатъёс, Калифорния штат). Со пылатӥськиз 1986-тӥ арын 29-тӥ южтолэзе. Пылатӥськемез бере мукет толэзяз ик со юрттӥсь пионер луыса ужаны-тыршыны кутскиз. Сыӵе ужан-тыршон солы туж кельшиз. Соин ик, кӧня ке толэзь ортчыса, 1986-тӥ арын 1-тӥ коньывуонэ, со пионер луиз.
Куке Джеффри агай быдэ вуэмын ӧй вал на, со куное ветлӥз кык агайёсыз доры, кудъёсыз соку Вефильын ужало-тыршо вал. Соос доры ветлэмез бере солэн но туж потӥз отын ужамез-тыршемез. Со малпаз, куке арлыдыз тупалоз Вефильын ужаны-тыршыны, со соку ик заявление гожтоз шуыса. 1990-тӥ арын куартолэзе сое Уолкиллысь Вефиле ӧтизы.
Отын Уиндер агай ужаз утялсконъя ёзэтын, фермаын но Вефильлэн бюрояз. 1997-тӥ арын со А́нджела сузэрез кышно басьтӥз. Со дырысен соос Вефильын ӵош ужало-тыршо. 2014-тӥ арын соосты ыстӥзы Уорвике, кытын Уиндер агай дунневыл валтӥсь кивалтонниез пуктон ужъёсы пыриськиз. 2016-тӥ арын соос кошкизы Паттерсонысь Возьмаськон башнялэн дышетскон центраз, кытын Уиндер агай аудио- но видеогожтэмъёсты поттонъя ёзэтын ужаз. Ньыль ар ортчыса, соос берытскизы Уорвике. Отын Уиндер агай Кадръёсъя комитетлэн бюрояз ужаны-тыршыны кутскиз. 2022-тӥ арын южтолэзе со Кивалтӥсь кенешлэн Кадръёсъя комитетэзлэн юрттӥсез луиз.
Ми туж тау кариськомы Иеговалы та адямиос понна, кудъёссэ со «саламъёс-кузьымъёс» кадь сётӥз. Озьы ик ми вӧсяськиськомы, ужамзы-тыршемзы понна Инмар соосты бакель мед кароз шуыса (Еф. 4:8).