Пеймытлыклэсь палэнске — «югытлыклэн нылпиосыз кадь улэ»

1, 2. а) Кыӵе югдурез вал Павеллэн, куке со Ефесъёслы гожтэтсэ гожъяз но малы со соослы гожъяз? б) Кыӵе юанъёсты ми эскеромы?

КУКЕ Павел Римын одӥг коркан жильыетын пукиз, солэн агайёсызлэсь но сузэръёсызлэсь мылкыдзэс ӝутэмез потэ вал. Со соосын адӟиськыны уг быгаты вал, соин ик соослы гожтэтъёс гожъяз. Соос пӧлысь одӥгез — Ефесъёслы гожтэтэз, кудзэ со гожтӥз асьме вакытысь 60-тӥ яке 61-тӥ арын (Еф. 1:1; 4:1).

² Ефесын улӥсьёсын Павел тодматскиз ог дас ар солэсь азьвыл. Ефесын со кема дыр ӵоже улӥз. Со ӟеч иворез тодытӥз но дышетскисьёсты дасяз (Ап. уж. 19:1, 8—10; 20:20, 21). Павел агайёссэ но сузэръёссэ туж яратӥз, соин ик солэн потэ вал, соос Иеговалы оскымонэсь мед кылёзы шуыса. Нош малы Павел со зырӟем христианъёслы пеймытлык но югытлык сярысь гожъяз? Кызьы со герӟаськемын милемын туннэ? Ойдолэ эскеромы та юанъёсты.

ПЕЙМЫТЛЫКЫСЬ ЮГЫТЛЫКЕ

3. Маин ӵошатӥз Павел Ефесын улӥсьёсты?

³ Ефесысь христианъёслы Павел гожтӥз: «Куке но тӥ пеймытлык вал, нош табере... югытлык луиды» (Еф. 5:8). Тазьы Павел возьматӥз, соос туж зол воштӥськизы шуыса. Ойдолэ эскеромы, малы Павел вераз, Ефесын улӥсьёс «куке но... пеймытлык вал» шуыса.

4. Малы вераны луоз, Ефес карын улӥсьёс зэмос луисьтэм религиен сэрен пеймытлыкын уло вал шуыса?

⁴ Зэмос луисьтэм религия. Зэмлыкез тодэмзылэсь но христианъёс луэмзылэсь азьло Ефес карын улӥсьёс зэмос луисьтэм инмаръёслы йыбыртъязы но асьсэлэн сям-йылолъёссыя улӥзы. Ефес карын вал Артемидалэн храмез, кудӥз адямиослы туж паймымон потэ вал. Калык отчы ветлэ вал, сульдэръёслы-идолъёслы йыбыртъян понна. Адямиос трос коньдон потто вал, та храмлэсь но Артемидалэсь сульдэръёссэс вузаса (Ап. уж. 19:23—27). Со сяна, та карын тросэз улӥсьёс тунасько-пеллясько вал (Ап. уж. 19:19).

5. Малы вераны луоз, Ефес карын улӥсьёс азон-калгонэн сэрен пеймытлыкын улӥзы шуыса?

⁵ Азыса-калгыса улон. Ефесын улӥсьёс выемын вал азон-калгонэн герӟаськем ужъёс пӧлы. Театръёсын но религиозной праздникъёс дыръя юрӟым вераськонъёс вӧлмемын вал (Еф. 5:3). Тросэз сыӵе ужъёсын пичи но возьдаськытэк выризы (яке «вӧсь луэмзэс ӧз шӧдэ») (Еф. 4:17—19). Соос уг тодо вал, мае Иегова ӟечен лыдъя, нош мае — уродэн. Соин ик возьытлыксы соосты нокӧня но ӧз йырйы. Соос ӧз валалэ, соослэн ужъёссы Инмарез вӧсь каро шуыса. Тӥни малы Павел гожтӥз: «Соос визьмынызы сураськемын, Инмар бордын улонлэсь палэнскемын».

6. Малы Ефесын улӥсьёслы Павел вераз, соос «югытлык» луизы шуыса?

⁶ Но Ефесын улӥсьёс пӧлысь куд-огъёсыз пеймытлыкысь потӥзы. Павел гожтӥз: «Табере, Кузё-Инмар бордын улыса, югытлык луиды» (Еф. 5:8). Соос ужпум кутӥзы улыны Инмарлэн Кылызъя, кудӥз улон сюрессэс югдытӥз (Пс. 118:105). Та адямиос сульдэръёслы-идолъёслы йыбыртъямысь но азыса-калгыса улэмысь дугдӥзы. Соос кутскизы Инмарлэсь адӟем карыны но туж тыршизы сое шумпоттыса улыны (Еф. 5:1).

7. Мар огкадез вань милям но Ефесысь христианъёслэн?

⁷ Ми но зэмлыкез тодэммылэсь азьло пеймытлыкын улӥмы. Кин ке но зэмос луисьтэм религиен герӟаськем праздникъёсты пусйылӥз, кин ке но азыса-калгыса улӥз. Но куке ми тодӥмы, мае Иегова ӟечен лыдъя, нош мае — уродэн, ми воштӥськимы. Ми кутскимы Инмарлэсь кылзӥськыса но сое шумпоттыса улыны. Ми шудогес луимы (Ис. 48:17). Но та уг возьматы, ми выльысь пеймытлыке ум сюре шуыса. Милемлы тыршоно пеймытлыклэсь палэнын возиськыны но «югытлыклэн нылпиосыз кадь» улыны. Кызьы?

Image digitally reproduced with the permission of the Papyrology Collection, Graduate Library, University of Michigan, P.Mich.inv. 6238. Licensed under CC by 3.0

ПЕЙМЫТЛЫКЛЭСЬ ПАЛЭНСКЕ

8. Малэсь палэнсконо вал Ефесысь христианъёслы? (Ефесъёслы 5:3—5)

⁸ Лыдӟе Ефесъёслы 5:3—5. Пеймытлыклэсь палэнын возиськон понна, Ефесысь христианъёслы палэнсконо вал ужъёслэсь, кудъёсыз Иеговалы уг кельшо. Азон-калгонэн герӟаськем ужъёслэсь палэнскем сяна, соослы юрӟым, кырсь вераськонъёслэсь но палэнсконо вал. Павел Ефесысь христианъёслы тодазы вайытӥз, ассэ озьы возись мурт «Христослэн, Инмарлэн Эксэйлыказ люкет уз басьты» шуыса.

9. Малы кышкыт учкыны, кылзыны яке вераськыны со сярысь, мар азон-калгонэн герӟаськемын?

⁹ Милемлы но чакласьконо, «емыш сётӥсьтэм пеймытлыклэн ужъёсаз» медам пыриське шуыса (Еф. 5:11). Трос учыръёс возьмато, куке адями учке, кылзэ но вераське со сярысь, мар азон-калгонэн герӟаськемын, сьӧлык лэсьтыны туж капчи шуыса (Ул.-выл. 3:6; Иак. 1:14, 15). Одӥг шаерын трос Адӟись-Ивортӥсьёс мессенджерын одӥг чатын вераськыны кутскизы. Нырысь соос Иегова сярысь но зэмлык сярысь вераськизы. Пумен-пумен соос вераськыны кутскизы Иеговалы ярантэм ужъёс сярысь, ӵемгес секс сярысь. Берлогес куд-огъёсыз веразы, сыӵе юрӟым вераськонъёсын сэрен соос азон-калгон сьӧлыке пыризы шуыса.

10. Кызьы Шайтан милемыз пӧяны тырше? (Ефесъёслы 5:6).

¹⁰ Шайтанлэн дуннеез малпан пыӵатыны тырше, азыса-калгыса улонын номыр уродэз ӧвӧл шуыса (2 Пётр 2:19). Но ми талы ум паймиське, малы ке шуоно вашкала дырысен Шайтан адямиослэсь визьзэс сура-пожа, соос ӟечсэ уродэзлэсь висъяны медаз быгатэ шуыса (Ис. 5:20; 2 Кор. 4:4). Соин ик трос фильмъёс, передачаос но сайтъёс тырмытэмын сыӵе малпанъёсын, кудъёсыз Иеговалэн куронъёсызлы пумит мыно. Шайтанлэн потэ, ми мед малпаломы, азыса-калгыса улон сокем кышкыт ӧвӧл, озьы улыны шулдыргес шуыса. (Лыдӟе Ефесъёслы 5:6.)

11. Кызьы Анжелалэн учырез возьматэ, визь-кенеш, кудӥз гожтэмын Ефесъёслы 5:7, туннэ но пайда вае шуыса? (Озьы ик учке суредъёсты.)

¹¹ Шайтан шумпотысал, ми эшъяськысалмы ке соосын, кинъёс Иеговаез уг ярато. Малы ке шуоно соку милемлы секытгес луысал Библиысь куронъёсъя улыны. Та сярысь тодыса, Павел Ефесысь христианъёсты ӧтиз палэнскыны соослэсь, кинъёс выро сыӵе ужъёсын, кудъёсыз Инмарлэн син азяз уродэсь луо (Еф. 5:7). Нош милемлы эшшо но чакласьконо, малы ке шуоно туннэ адямиос социальной сетьёс пыр но эшъясько. Азиысь Анже́лаa сузэр ас вылаз шӧдӥз, макем кышкыт луыны быгато социальной сетьёс. Сузэрмы вера: «Со зэмос сьӧлтэт. Мон ӧй но шӧды, кызьы урод ужъёс шоры мукет сямен учкыны кутски. Нырысь мынам кылдӥзы сыӵе эшъёсы, кудъёсыз Библиез ӧз гажалэ. Нош дыр ортчыса, мон малпаны кутски, ас мылпотэмея но Иеговалэсь кылзӥськытэк улонын номыр уродэз ӧвӧл шуыса». Шумпотыса вераны луэ, яратӥсь, сюлмаськись тӧроос Анжелалы дырыз дыръя юрттыны быгатӥзы шуыса. Со вера: «Али, социальной сетьёслы саклыкме висъям интые, мон вань саклыкме висъясько Иеговалы но солэн малпанъёсызлы».

12. Мар милемлы юрттоз Иеговалэн куронъёсызъя улыны?

¹² Та дунне азон-калгонэз уродэн уг лыдъя. Но ми озьы ум малпаське (Еф. 4:19, 20). Юалэ асьтэлэсь: «Тыршисько-а мон ӧжытгес дырме ортчытъяны ӵош ужасьёсыным, ӵош дышетскисьёсыным но мукетъёсыныз, кинъёс Библиысь куронъёсъя уг уло? Тыршисько-а мон Иеговалэсь кылзӥськыса улыны, соин сэрен монэ визьзэ ыштэм адямиен лыдъязы ке но?» Христиан кенешын но эшъёсты чакласькыса быръёно. Та сярысь вераз Павел 2 Тимофейлы 2:20—22. Милям потэ эшъяськеммы соосын гинэ, кинъёс милемлы юрттозы Иеговалы ужаны-тыршыны.

«ЮГЫТЛЫКЛЭН НЫЛПИОСЫЗ КАДЬ УЛЭ»

13. Мар кароно, «югытлыклэн нылпиосыз кадь» улон понна? (Ефесъёслы 5:7—9).

¹³ Павел христианъёслы вераз, пеймытлыклэсь палэнскем сяна, «югытлыклэн нылпиосыз кадь» улоно на шуыса. (Лыдӟе Ефесъёслы 5:7—9.) Мае та возьматэ? Вакчияк верано ке, уен-нуналэн зэмос христианъёс кадь улоно. Со понна малпаськыса лыдӟоно но эскероно Библиез, озьы ик со вылэ пыкиськыса гожтэм публикациосты. Но эшшо ик кулэ эскерыны Иисус Христослэсь улонзэ но дышетонъёссэ, малы ке шуоно со — «дуннелы югыт» (Иоанн 8:12; Мад. 6:23).

14. Кызьы милемлы юрттэ святой дух?

¹⁴ Со сяна, «югытлыклэн нылпиосыз» луон понна, милемлы святой дух кулэ. Малы? Малы ке шуоно сотэк ми ум быгатэ, та лек дуннеын улыса, Инмарлэн син азяз чылкытэсь луыны (1 Фес. 4:3—5, 7, 8). Та дуннеысь адямиос Инмар сямен уг малпасько. Нош святой дух юрттэ милемлы сыӵе малпаськон амаллэсь палэнскыны. Озьы ик со юрттэ милемлы ӟеч сямоесь луыны но шонерлыко улыны (Еф. 5:9).

15. Мар кароно, святой духез басьтон понна? (Ефесъёслы 5:19, 20).

¹⁵ Одӥгез амал, кызьы святой духез басьтыны луэ,— со сярысь вӧсяськыны. Иисус вераз, Иегова «Солэсь курисьёслы Святой Духез сётоз» шуыса (Лука 11:13). Озьы ик ми святой духез басьтӥськомы, куке христиан пумиськонъёсын ваньмы ӵош Иеговаез данъяськомы. (Лыдӟе Ефесъёслы 5:19, 20.) Святой духлэн юрттэмезлы луыса, ми Инмарез шумпоттыса улыны быгатӥськомы.

16. Мар юрттоз визьмо ужпум кутыны? (Ефесъёслы 5:10, 17).

¹⁶ Кулэ луись ужпумъёсты кутон азьын «Инмарлэсь эриксэ валаны» тыршоно. (Лыдӟе Ефесъёслы 5:10, 17.) Нош кызьы валано Инмарлэсь эриксэ? Шедьтоно Библиысь возетъёсты, кудъёсыз милям учыренымы герӟаськемын. Соосты лыдэ басьтӥмы ке, ми визьмо ужпум кутыны быгатомы.

17. Мар кароно, дырез визьмо кутон понна? (Ефесъёслы 5:15, 16). (Озьы ик учке суредэз.)

¹⁷ Ефесысь христианъёслы Павел вераз, дырез юнме быдтоно ӧвӧл шуыса. (Лыдӟе Ефесъёслы 5:15, 16.) Нош Шайтанлэн потэ, ми та дуннеысь ужъёс пӧлы йырынымы валче мед выёмы но Инмарлы ужан-тыршонлы дырмы медаз кыльы ни шуыса (1 Иоанн 5:19). Куд-ог христианъёс малпаны быгато, коньдон, дышетскон яке уж Иеговалы ужан-тыршонлэсь кулэгес шуыса. Но озьы малпаськыса, соос возьматозы, та дуннеысь адямиос кадь малпаськыны кутскизы шуыса. Валамон, коньдон, дышетскон яке уж ас понназ урод ӧвӧл. Но соослы улонын нырысетӥ инты висъяно ӧвӧл. «Югытлыклэн нылпиосыз кадь» улон понна, милемлы дырмес визьмо кутоно, яке зэмзэ ик кулэ луись ужъёслы нырысетӥ инты висъяно.

18. Мар кариз Доналд, дырзэ визьмо кутон понна?

¹⁸ Малпалэ, кызьы тӥ эшшо но трос Иеговалы ужаны-тыршыны быгатӥськоды. Ӵапак таӵе мылкыдыз вал Лымшор Африкаысь До́налд агайлэн. Со вера: «Мон аслам югдуръёсы сярысь малпаськи но, Иеговаез туж кури юрттыны мыным солы эшшо но трос ужаны-тыршыны. Мон вӧсяськи уж сярысь, кудӥз юрттысал мыным ӵемгес тодытыны. Иеговалэн юрттэменыз, мон сыӵе уж шедьтыны быгатӥ. Табере ми кышноеным, шумпотыса но вань дырмес сётыса, Иеговалы ужаськомы-тыршиськомы».

19. Мар милемлы юрттоз «югытлыклэн нылпиосыз» кадь улыны?

¹⁹ Павеллэн гожтэтэз Ефесысь христианъёслы Иеговалы оскымон кыльыны юрттӥз, луоз. Солэн гожтэтысьтыз Иеговалэн визь-кенешъёсыз милемлы но пайда ваёзы. Милемлы но шутэтскон амалъёсты но эшъёсты визьмо быръёно. Озьы ик ялан Библиез эскероно, со улон сюресмес мед югдытоз шуыса. Со сяна, милемлы кулэ святой дух, кудӥз юрттэ умой сямъёсты будэтыны. Павеллэн кылъёсызлэсь кылзӥськыса, ми быгатомы визьмо ужпумъёс кутыны, кудъёсыз Иеговалы ярамонэсь луозы. Ваньмыз та юрттоз милемлы та дуннелэн пеймытлыкезлэсь палэнскыны но «югытлыклэн нылпиосыз кадь» улыны.