Егит агайёс, Марклэсь но Тимофейлэсь адӟем каре

1, 2. Мар люкетыны быгатэ вал Марклы но Тимофейлы Инмарлы тросгес ужаны-тыршыны?

ЕГИТ агайёс, потэ-а тӥляд Иеговалы но кенешысьтыды агайёслы но сузэръёслы тросгес лэсьтэмды? Ми оскиськомы, потэ шуыса. Ми туж шумпотӥськомы, трос егит пиосмуртъёс мукетъёсызлы ужаны-тыршыны дась шуыса! (Пс. 109:3). Озьы ке но тӥледлы мар ке но люкетыны быгатэ. Кылсярысь, тӥ уд тодӥське, мар азьпал улонлэсь возьмано. Яке тӥ малпаськоды, тӥляд номыр уз пӧрмы шуыса, соин ик куд-ог ужъёс борды уд басьтӥськиське. Сыӵе шӧдонъёс тросэзлы тодмо.

² Ӵапак озьы ик Марк но Тимофей воштӥськонъёслэсь кышказы яке малпазы, вылды, кыӵе ке ужъёсты быдэстыны уг тупало шуыса. Озьы ке но, кышкамзылы сётскытэк, соос мукетъёсызлы ужазы-тыршизы. Куке Павел но Варнава Маркез ӧтизы нырысетӥзэ пӧртэм шаеръёстӥ ветлыса тодытыны, Марк анаеныз умой, бадӟым коркан улэ вал, дыр (Ап. уж. 12:12, 13, 25). Озьы ке но Марк дась вал ваньзэ кельтыны, Иеговалы тросгес ужан-тыршон понна. Нырысь со Антиохияе кошкиз, нош собере Павелэн но Варнаваен ӵош мукет палэнын интыяськем интыосы ветлӥз (Ап. уж. 13:1—5). Тимофей но анай-атаеныз улэ вал, дыр, куке Павел сое ӧтиз соин ӵош тодытыны. Тимофей егит на вал, соин ик сюлмаське вал, дыр, со ужез быдэстыны уг тупа шуыса. (Ӵошатэ 1 Коринфъёслы 16:10, 11 но 1 Тимофейлы 4:12.) Озьы ке но со Павеллэн ӧтёнэзлы соглаш кариськиз но трос бакель каронъёс басьтӥз (Ап. уж. 16:3—5).

3. а) Кытысь ми тодӥськомы, Павел Маркез но Тимофеез яратӥз шуыса? (2 Тимофейлы 4:6, 9, 11). (Озьы ик учке суредъёсты.) б) Кыӵе юанъёсты ми эскеромы та статьяын?

³ Егит дыръязы ик Марк но Тимофей кенешын бадӟым ужъёс быдэсъязы. Павел со пиосмуртъёсты туж дунъяз. Берлогес, куке Павел тодэ вал ини, ӝоген кулоз шуыса, со куриз соосты ас дораз лыктыны. (Лыдӟе 2 Тимофейлы 4:6, 9, 11.) Малы Павел Маркез но Тимофеез яратӥз? Егит агайёс, кыӵе сямъёс тӥледлы будэтоно, Марк но Тимофей кадь луон понна? Кызьы тӥледлы юрттозы Павеллэн яратыса сётэм визь-кенешъёсыз?

МАРКЛЭСЬ АДӞЕМ КАРЕ — МУКЕТЪЁСЫЗЛЫ МЫЛЫСЬ-КЫДЫСЬ УЖАЛЭ-ТЫРШЕ

4, 5. Кытысь адӟиське, Марклэн мукетъёсызлы ужамез-тыршемез потэ вал шуыса?

⁴ Адями, кудӥз мукетъёсызлы ужа-тырше, соослы мылысь-кыдысь юрттэ но юрттэмысь уг дугды соку но, куке со капчи ӧвӧл. Марк та пумысен умой адӟем карон возьматӥз. Солы туж вӧсь луиз, вылды, куке Павел сое сьӧраз ӧз басьты кыкетӥзэ пӧртэм шаеръёстӥ ветлыса тодытыны (Ап. уж. 15:37, 38). Дугдӥз-а соин сэрен Марк агайёсызлы но сузэръёсызлы ужамысь-тыршемысь? Ӧз, ӧз дугды.

⁵ Марк ужан-тыршонзэ азьланьтӥз Варнаваен, матысь ӵыжы-выжыеныз. 11 ар котыр ортчыса, куке Павел Римын одӥг коркан жильыетын пукиз, Марк соин ӵош вал но солы юрттӥськиз (Флм. 23, 24). Павел Марклы туж тау кариз но гожтӥз, со солы туж юрттэ шуыса (Кол. 4:10, 11).

6. Кыӵе пайда вайиз Марклы юн осконэн христианъёсын ужан-тыршон? (Учке сноскаез.)

⁶ Юн осконэн христианъёсын ужан-тыршон Марклы бадӟым пайда вайиз. Павелэн Римын кӧня ке дыр ӵоже улэмез бере Марк мынӥз апостол Пётр доры Вавилонэ. Соос сокем матысь эшъёс луизы, Пётр сое «Марк, мынам пие» шуыса нимаз (1 Пётр 5:13). Пётр егит эшезлы Иисуслэн улонэз но ужан-тыршонэз сярысь трос тунсыко малпанъёс вералляз, вылды. Туннэ ми соосты лыдӟыны быгатӥськомы Марклэсь ӟеч иворысьa.

7. Кызьы Сон У агай Марклэсь адӟем кариз? (Озьы ик учке суредэз.)

⁷ Озьыен, Марк мылысь-кыдысь мукетъёсызлы юрттӥськиз но юн осконэн агайёсын ужаз-тыршиз. Кызьы тӥ, егит агайёс, солэсь адӟем карыны быгатӥськоды? Тынад тросгес лэсьтэмед потэ ке, кылсярысь, кенешлы юрттӥсь яке тӧро луэмед потэ ке, но куронъёслы уд тупаськы на ке, мылкыдыд медаз куашка. Азьланяз но лэсьты Иегова понна сое, мае быгатӥськод, но агайёслы но сузэръёслы юрттӥськыны тыршы. Озьы лэсьтӥз Сон Уb агай, кудӥз али тӧро луыса ужа-тырше. Егитгес дыръяз со ассэ огъёзъёсыныз ӵошатэ вал. Соослы кенешын кыӵе ке ужъёс сётъяло вал, нош солы — уг. Соин сэрен агаймылэн кӧтыз ӝож луэ вал. Аслаз шӧдонъёсыз сярысь со тӧроослы вераз. Одӥгез солы визь-кенеш сётӥз мукетъёсызлы ӟеч ужъёс лэсьтыны, адямиос ӟеч ужъёссэ уз адӟе ке но. Сон У визь-кенешлэсь кылзӥськиз. Со арлыдоослы но мукетъёсызлы ӵектылӥз соосты аслаз машинаеныз Эксэйлык юртэ вайыны. Ортчемез шоры учкыса, со вера: «Мон умойгес валай, мар кароно, мукетъёсызлы ужан-тыршон понна. Агайёслы но сузэръёслы юрттӥськыса, мон туж бадӟым шумпотон басьтӥ».

ТИМОФЕЙЛЭСЬ АДӞЕМ КАРЕ — МУКЕТЪЁСЫЗ СЯРЫСЬ ЯРАТЫСА СЮЛМАСЬКЕ

8. Малы Павел бырйиз Тимофеез? (Филиппыослы 2:19—22).

⁸ Павеллы нош ик мыноно вал отчы, кытын со тодытӥз ини но кытын лек уйылон-уллянъёсын пумиськиз. Соин ик солы кышкасьтэм эшъёс кулэ вал. Нырысь Павел бырйиз Сӥла нимо юн осконэн агаез (Ап. уж. 15:22, 40). Собере Павел ӵектӥз Тимофейлы соин ӵош тодытыны. Малы Павел бырйиз Тимофеез? Нырысетӥез, адямиос Тимофей сярысь умойзэ веразы (Ап. уж. 16:1, 2). Кыкетӥез, Тимофей адямиос сярысь яратыса сюлмаськиз. (Лыдӟе Филиппыослы 2:19—22.)

9. Кытысь адӟиське, Тимофей агайёс но сузэръёс сярысь яратыса сюлмаськиз шуыса?

⁹ Павелэн ужаны-тыршыны кутскыкуз ик, Тимофей возьматӥз, мукетъёссэ аслэсьтыз вылӥегес пуктэ шуыса. Соин ик Павел сюлмаськытэк сое Верияе кельтӥз. Со тодӥз, Тимофей со карысь выль агайёс но сузэръёс сярысь умой сюлмаськоз шуыса (Ап. уж. 17:13, 14). Со сяна, Верияе кылиз Сӥла, кудӥзлэсь Тимофей тросэзлы дышетскыны быгатэ вал. Берлогес Павел Тимофеез келяз Фессалоникае. Но табере Тимофей огназ мынӥз. Отын но со агайёсты но сузэръёсты юнматылӥз (1 Фес. 3:2). Берло 15 аръёс ӵоже Тимофей агайёссэ но сузэръёссэ эшшо но юн яратӥз. Куддыръя со соосын ӵош бӧрдӥз но (Рим. 12:15; 2 Тим. 1:4). Кызьы тӥ, егит агайёс, Тимофейлэсь адӟем карыны быгатӥськоды?

10. Кызьы У Джэ агай дышетскиз мукетъёсыз сярысь тросгес сюлмаськыны?

¹⁰ Тани кызьы У Джэ агай дышетскиз мукетъёсыз сярысь тросгес сюлмаськыны. Егитгес дыръяз солы секыт вал вераськыны аслэсьтыз бадӟымгес агайёсын но сузэръёсын. Соин ик Эксэйлык юртын со соосын ӟечбуръяське но кошке вал. Одӥг тӧро агаймылы ӵектӥз агайёслы но сузэръёслы вераны сое, мар понна со соосты дунъя. Озьы ик тӧро солэсь мылкыдзэ ӝутӥз малпаськыны со сярысь, мар адямилы тунсыко потэ. У Джэ та визь-кенешъёсты уже кутӥз. Али со тӧро луыса ужа-тырше. Со вера: «Табере мыным секыт ӧвӧл пӧртэм аресъем адямиосын вераськыны. Соосын вераськыса, мон соослэн шуг-секытъёссы сярысь тодӥсько. Соин ик мыным капчигес соослы юрттыны».

11. Кызьы егит агайёс кенешысь мукетъёсыз сярысь тросгес сюлмаськыны быгато? (Озьы ик учке суредэз.)

¹¹ Егит агайёс, тӥ но быгатӥськоды мукетъёсыз сярысь тросгес сюлмаськыны. Пумиськонъёслэсь азьвыл но соос бере тырше вераськыны пӧртэм агайёсын но сузэръёсын — егитъёсын но, арлыдоосын но. Юалэ, кызьы соослэн ужъёссы мыно, нош собере кылзэ. Озьы тӥ умойгес валалоды, кыӵе юрттэт соослы кулэ. Шуом, тӥ тодӥды, арлыдо кузпалъёс уг тодо, кинэн тодытыны, яке соослы секыт валаны, кызьы JW Library^® приложениен ужано. Быгатӥськоды-а тӥ соосын тодытыны яке соослы валэктыны, кызьы приложенимес уже кутоно? Агайёслы но сузэръёслы юрттыса, тӥ быдэс кенешлы умой адӟем карон возьматоды.

КЫЛЗӤСЬКЕ ПАВЕЛЛЭН ЯРАТЫСА СЁТЭМ ВИЗЬ-КЕНЕШЪЁСЫЗЛЭСЬ

12. Кызьы Павеллэн кылъёсыз юрттыны быгато егит агайёслы?

¹² Павеллэн потэ вал, Тимофей улонын но, ужан-тыршонын но азинлыко мед луоз шуыса. Соин ик со солы кӧня ке пайдаё визь-кенешъёс сётӥз (1 Тим. 1:18; 2 Тим. 4:5). Павеллэн кылъёсыз тӥледлы но, егит агайёс, юрттыны быгато шудогес но азинлыкогес луыны. Мар со понна кароно? Пуктэ син азяды, Тимофейлы гожтэм кык гожтэтъёс тӥледлы гожтэмын вал шуыса. Малпаське, кыӵе визь-кенешъёсты тӥ улонады пыртыны быгатӥськоды. Эскеромы соос пӧлысь куд-огъёссэ.

13. Мар кароно, Иеговалы оскымон луон понна?

¹³ «Инмар азьын шонерлыко улонлы астэ кыдаты» (1 Тим. 4:7б). Павел Тимофейлы визь-кенеш сётӥз Иеговалы оскымон луыны но лэсьтыны сыӵе ужъёс, кудъёсыз Инмарез шумпоттозы. Инмарлы оскымон луонэн нокин уг вордӥськы. Сое будэтыны кулэ. Кызьы? «Астэ кыдаты» веракуз, Павел кутӥз сыӵе кыл, кудзэ лыдӟыку малпан кылдэ спортсмен сярысь, кудӥз мылысь-кыдысь вожвылъяськонлы дасяське. Вормон басьтон понна, солы тыршыны кулэ. Ӵапак озьы ик милемлы но тыршоно, Иеговалы матэгес кариськон понна.

14. Кыӵе милям ужпуммы луыны кулэ, Библиез лыдӟыкумы, но мар кароно, сое быдэстон понна?

¹⁴ Милемлы тыршоно котькуд нунал Библиез лыдӟыны. Со дыре ик тодамы возёно, малы ми сое лыдӟиськомы. Милям ужпуммы — Иеговалы матэгес кариськыны. Кылсярысь, малы ми дышетскиськомы, Иисус но узыр егит кузё сярысь лыдӟыса? (Марк 10:17—22). Со пиосмурт тодэ вал, Иисус — со Мессия шуыса. Но, Иисуслэн дышетскисез луон понна, солы оскон уг тырмы вал. Озьы ке но Иисус со пиосмуртэз яратӥз но соин лякытэн вераськиз. Иисуслэн потэ вал, со визьмо ужпум мед кутоз шуыса. Иисус со пиосмурт шоры Иегова сямен учкиз (Иоанн 14:9). Та учыр сярысь но аслад югдуред сярысь малпаськыса, юа аслэсьтыд: «Мар мыным кароно, Иеговалы матэгес кариськон понна но мукетъёсызлы тросгес ужан-тыршон понна?»

15. Малы егит агайёслы мукетъёсызлы умой адӟем карон возьматоно? (1 Тимофейлы 4:12, 13).

¹⁵ «Улонэд оскись калыклы адӟем карымон мед луоз». (Лыдӟе 1 Тимофейлы 4:12, 13.) Павел Тимофеез куриз тыршыны умой лыдӟиськыны но умой дышетӥсь луыны. Со сяна, Павеллэн потэ вал, Тимофей яратонзэ но осконзэ мед будэтоз, озьы ик дун-чылкыт мед улоз шуыса. Егит агайёс, кызьы тӥ малпаськоды, малы со кулэ? Малы ке шуоно лэсьтэм ужъёсмы верам кылъёсмылэсь дуногес. Шуом, тонэ куризы речь вераны но кылзӥсьёсыдлэсь мылкыдзэс ӝутыны эшшо но ӟырдыт мылкыдын тодытыны. Тон ачид мылысь-кыдысь ужад-тыршид ке, соку уд кышка мукетъёсызлы со сярысь вераны. Агайёс но сузэръёс визь-кенешедлэсь кылзӥськозы но тынэсьтыд адӟем карозы.

16. а) Кыӵе удысъёсын егит агай адӟем карымон луыны быгатэ? б) Мар кароно егит агайлы, вераськонэз адӟем карымон мед луоз шуыса?

¹⁶ Кыӵе удысъёсын егит агайёс адӟем карымон луыны быгато? Со сярысь гожтэмын 1 Тимофейлы 4:12. Быгатӥськод-а тон, ас поннад Библиез эскерыкуд, котькуд удысэз пыр-поч эскерыны? Шуом, тон ужпум кутӥд, вераськонэд адӟем карымон мед луоз шуыса. Малпаськы, мар тынад верамед луэ, кинэ ке юнматон понна. Тон анай-атаеныд улӥськод на ке, быгатӥськод-а тон соослы ӵемгес тау шуыны ваньмыз понна, мае соос тыныд лэсьто? Быгатӥськод-а тон тау шуыны соослы, кинъёс пумиськонын кыӵе ке пункт дасязы? Озьы ик тыршы пумиськонын ас кылъёсыныд валэктонъёс сётъяны. Тон тыршид ке, вераськонэд адӟем карымон мед луоз шуыса, мукетъёсыз но тынэсьтыд азинсконъёстэ адӟозы (1 Тим. 4:15).

17. Мар юрттоз егит агайлы тросгес Иеговалы ужаны-тыршыны? (2 Тимофейлы 2:22).

¹⁷ «Егит дыр мугор куронъёслэсь палэнскылы. ...Шонерлыко... улыны тыршы». (Лыдӟе 2 Тимофейлы 2:22.) Павел Тимофеез куриз палэнскыны ваньмызлэсь, мар солы люкетыны быгатэ вал Иеговалы тросгес ужаны-тыршыны но соин кусыпъёссэ лябӟытыны. Куд-ог ужъёс уродэсь ӧвӧл. Но куддыръя соосын сэрен Иеговалы дыр ӧжыт кыле. Малпаськы, кӧня тынад дырыд кошке спортлы, интернетлы яке видеошудонъёслы. Быгатӥськод-а тон со ужъёслы висъям дыр пӧлысь кӧнязэке Иеговалы, озьы ик агайёслы но сузэръёслы висъяны? Кылсярысь, быгатӥськод-а тон юрттыны Эксэйлык юртэз утялтыны яке стендэн тодытыны? Сыӵе ужъёсы пыриськыса, тон выль эшъёс шедьтод, дыр, кудъёсыз тыныд юрттозы тросгес ужаны-тыршыны но пуктэм ужпумъёстэ быдэстыны.

МУКЕТЪЁСЫЗЛЫ УЖАН-ТЫРШОН БАКЕЛЬ КАРОНЪЁС ВАЕ

18. Малы вераны луоз, Марклэн но Тимофейлэн улонзы шумпотонэн тырмемын вал шуыса?

¹⁸ Марк но Тимофей троссэ кельтӥзы, мукетъёсызлы ужан-тыршон понна. Озьы ке но соослэн улонзы шумпотонэн тырмемын вал (Ап. уж. 20:35). Марк пӧртэм шаеръёсы ветлӥз но отын агайёссэ но сузэръёссэ юнматылӥз. Озьы ик со тунсыко гожъяз Иисуслэн улонэз но ужан-тыршонэз сярысь. Тимофей Павеллы юрттӥз кенешъёс кылдытыны, озьы ик агайёсты но сузэръёсты юнматыны. Та егит агайёслэсь вань сюлмысьтызы ужам-тыршемзэс адӟыса, Иегова туж шумпотэ вал.

19. Малы егит агайёслы кылзӥськоно Павеллэн кылъёсызлэсь, кудъёссэ со Тимофейлы гожтӥз, но кыӵе бакель каронъёс соос басьтозы?

¹⁹ Павеллэн гожтэтъёсыз возьмато, со Тимофеез туж яратэ вал шуыса. Та гожтэтъёсты гожтыны Павеллэсь мылкыдзэ ӝутӥз Иегова. Озьыен, со гожтэтъёс возьмато, кызьы Инмар учке тӥ шоры, егит агайёс. Со тӥледыз туж яратэ но солэн потэ, тӥ шудоесь мед луоды шуыса. Соин ик кылзӥське Павеллэн яратыса сётэм визь-кенешъёсызлэсь но мылкыддэс ӝуатэ мукетъёсызлы тросгес ужаны-тыршыны. Со али ик ини тӥледлы трос шумпотон сётоз но «вуоно улонлы ӟеч инъет» поноз (1 Тим. 6:18, 19).