Мар со сыӵе Инмарлэн Эксэйлыкез?
Библиысь валэктон
Инмарлэн Эксэйлыкез — со зэмос кивалтэт, кудзэ Иегова Инмар кылдытӥз. Библиын «Инмар Эксэйлык» озьы ик нимаське «Ин Эксэйлык» шуыса, малы ке шуоно со инмысен кивалтэ (Марк 1:14, 15; Матфей 4:17). Инмар Эксэйлыклэн но адями кивалтэтъёслэн трос огкадез вань, озьы ке но со соослэсь котьма ласянь умойгес луэ.
Кивалтӥсьёс. Инмар та Эксэйлыке Иисус Христосэз Эксэй карыса пуктӥз. Со солы собыдӟа кивалтэт сётӥз, кыӵеез одӥг адямилэн но ӧй вал (Матфей 28:18). Иисус аслэсьтыз кивалтэтсэ пайда ваён понна гинэ кутэ, малы ке шуоно со возьматӥз ини, оскымон но гажась-жалясь Кивалтӥсь луэ шуыса (Матфей 4:23; Марк 1:40, 41; 6:31—34; Лука 7:11—17). Инмарлэн кивалтэмез улсын Иисус вань калыкъёс пӧлысь адямиосты бырйиз, соос соин ӵош инмысен музъемен мед кивалтозы шуыса (Усьтӥськон 5:9, 10).
Кивалтон дыр. Адями кивалтэтъёсын ӵошатыса, кудъёсыз лыкто но кошко, Инмарлэн Эксэйлыкез «пумтэм вапумъёс ӵоже сылоз» (Даниил 2:44).
Кивалтэт улсын улӥсьёс. Котькудӥз, кин Инмарлэсь куронъёссэ быдэсъя, Инмар Эксэйлыклэн кивалтэмез улсын улыны быгатэ, кыӵе гинэ калыкысь но кытын гинэ вордӥськемын со медаз луы (Апостолъёслэн ужъёссы 10:34, 35).
Катъёс. Инмар Эксэйлыклэн катъёсыз (яке курон-косонъёсыз) урод ужъёсты лэсьтыны уг лэзё. Озьы ик соос дышето вылӥ эсэпъёсъя улыны. Кылсярысь, Библиын гожтэмын: «„Инмардэ Кузё-Инмарез вань сюлмыныд, вань лулыныд, вань визьмыныд яраты“. Та нырысетӥез но ваньмызлэсь бадӟымез курон-косон. Кыкетӥез но таиз кадь ик: „Матысьтэ астэ ачид кадь ик яраты“» (Матфей 22:37—39). Инмарез но матысьтэ яратон Инмар Эксэйлыклэн кивалтэмез улсын улӥсьёслэсь мылкыдзэс ӝутэ мукетъёсызлы пайда вайыны.
Дышетон. Инмарлэн Эксэйлыкез вылӥ эсэпъёсты гинэ уг пукты, озьы ик со дышетэ, кызьы соосъя улыны (Исаия 48:17, 18).
Ужпум. Инмар Эксэйлыкын кивалтӥсьёс уг тыршо узырмыны соослы луыса, кинъёсын кивалтозы. Та Эксэйлык быдэстоз Инмарлэсь эриксэ, озьы ик солэсь кылсётонзэ: Сое яратӥсьёс пырак дауръёс ӵоже рай музъем вылын улозы (Исаия 35:1, 5, 6; Матфей 6:10; Усьтӥськон 21:1—4).