Пуктэм ужпумъёс чертёжъёс выллем. Ӧжыт тыршид ке, малпамдэ быдэстыны быгатод
ЕГИТЪЁСЛЫ
12-тӥ визь-кенеш. Ужпумъёс пукты
МАЕ СО ВОЗЬМАТЭ
Ужпум пуктэм — со мар ке сярысь малпам гинэ яке мылкыд карем гинэ ӧвӧл. Пуктэм ужпумез быдэстон понна, ваньзэ умой-умой малпано, трос тыршоно но дась луоно мае ке воштыны.
Пӧртэм ужпумъёс вань. Вань сыӵе ужпумъёс, кудъёссэ быдэстон понна кӧня ке нунал яке кӧня ке арня кулэ луэ. Вань сыӵеосыз но, кудъёссэ быдэстон понна кӧня ке толэзь кулэ. Озьы ик вань на сыӵе ужпумъёс но, кудъёссэ быдэстон понна ар яке солэсь но тросгес дыр кулэ. Сыӵе ужпумъёсты быдэстон понна, пичиесь ужпумъёс пуктыны луэ.
МАЛЫ СО КУЛЭ
Ужпумъёс пуктыса но соосты быдэстыса, аслыд оскыны кутскиськод, эшъёсын кусыпъёсыд юнмало но шудогес луиськод.
Аслыд оскон. Пичиесь ужпумъёс пуктӥськод но соосты быдэстӥськод ке, оскыны кутскиськод, тон бадӟым ужпумъёсты быдэстыны быгатод шуыса. Озьы ик со юрттэ шуг-секытъёсты вормыны, кылсярысь, огъёзъёслэн зӥбемзылы пумит сылыны.
Эшъяськон. Котькинлэн эшъяськемез потэ, дыр, сыӵе адямиосын, кудъёсызлэн ужпумъёссы вань, кудъёсыз тодо, мар соослэн потэ, но тыршо сое быдэстыны. Одӥгез амал эшъёсын кусыпъёсыз юнматыны — со ӵош ужпумъёс пуктыны но ӵош тыршыны соосты быдэстыны.
Шумпотон. Куке ужпум пуктӥськод но сое быдэстӥськод, шумпотон басьтӥськод.
«Мон яратӥсько ужпумъёс пуктыны. Озьы мон шӧдӥсько, мынам уже вань но тэк пукыны дыры ӧвӧл шуыса. Нош пуктэм ужпумдэ быдэстӥськод ке, туж шумпотӥськод. Соку, лэсьтэм ужед шоры учкыса, вераськод: „Учкы ай, мынам ваньмыз пӧрмиз!“» (Кристофер).
БИБЛИЫСЬ ВИЗЬ-КЕНЕШ: «Кин тӧлэз чакласа-эскерыса улэ, со уз кизьы; кин пилем шоры учкыса улэ, со уз ара» (Екклесиаст 11:4).
МАР КАРЫНЫ ЛУОЗ
Улӥын гожтэм вамышъёс юрттозы тыныд ужпумъёс пуктыны но соосты быдэстыны.
Малпа, кыӵе ужпумъёс пуктоно. Гожты, кыӵе ужпумъёс тынад пуктэмед потэ. Нырысь гожты ужпумъёсты, кудъёссэ нырысь быдэстоно. Собере гожты сооссэ, кудъёссэ берлогес быдэстоно.
Малпа, кызьы пуктэм ужпумдэ быдэстод. Со понна котькуд ужпумедлы гожты:
кыӵе дыр куспын тон сое быдэстыны малпаськод;
мар со понна кароно;
кыӵе шуг-секытъёс кылдыны быгатозы но кызьы соосты вормоно.
Быдэстыны кутскы. Эн возьма, куке тон пыр-поч тодод, кызьы пуктэм ужпумдэ быдэстоно. Юа аслэсьтыд: «Мар мыным нырысь ик кароно, пуктэм ужпумме быдэстон понна?» — собере быдэстыны кутскы. Пусйы, мар карыны тон быгатӥд ини.
БИБЛИЫСЬ ВИЗЬ-КЕНЕШ: «Тыршись муртлэн малпанъёсыз ваньлык пала кыстӥсько» (Мадёнъёс 21:5).