Кызьы Инмар Иисусэз утиз

ИЕГОВА туж сюлмаське пичиос сярысь но соос сярысь, кинъёс асьсэды утьыны уг быгато. Куддыръя, соосты утён понна, Иегова паймымонзэ но лэсьтэ.

Кылсярысь, тон нюлэстӥ мынӥськод. Тани шӧдтэк шорысь азяд тылобурдо кылдэ. Солэн бурдыз сӧсырмемын, кадь. Тон тылобурдоез кутыны турттӥськод, нош со ки улысьтыд ик бызьыса кошке. Тон нош ик матазгес кариськиськод — нош со лобӟе. Малы со ассэ озьы возе? ~

Кыдёкын ик ӧвӧл, куакъёс пӧлын, солэн карез вылэм. Со кышказ, тон солэсь пиоссэ шедьтод шуыса. Соин ик со сӧсыр улэ аналскиз но тонэ карезлэсь палэнэ нуыны тыршиз. Нош кин милемыз утьыны быгатэ, кызьы тылобурдо пиоссэ уте? ~ Библиын Иегова ӵошатэмын ӧрӟиен, бадӟым кужмо тылобурдоен, кудӥз пиосыз сярысь сюлмаське (Кыкетӥ Закон 32:11, 12).

Иеговалэн яратоно пиез — со Иисус. Куке Иисус инмын улӥз, со кужмо кылчин вал. Солэн мугорыз Атаезлэн кадь вал. Инмын дыръяз Иисус ассэ утьыны быгатэ вал. Нош куке со музъем вылын вордӥськиз, со адями луиз. Соин ик сое утёно вал.

Инмарлэсь эриксэ быдэстон понна, Иисуслы будоно но сьӧлыктэм адями луоно вал. Шайтан сое тодэ вал. Соин ик со Иисусэз пичи дыръяз ик виыны тыршиз. Библиын верамын, кызьы Иегова аслэсьтыз Пизэ утиз. Потэ-а тодэмед со сярысь? ~ Соку кылзы.

Ӝоген Иисус вордӥськем бере Шайтан инмын, шундыӝужан палан, яркыт кизили ӝуатӥз. Астрологъёс — адямиос, кудъёсыз кизилиосты чаклало,— со кизили сьӧры трос сю иськемъёс мынӥзы. Тани со кизили соосты Иерусалиме вуттӥз. Иерусалиме лыктыса, со адямиос юазы, кытын Иудеялэн вуоно эксэез вордӥськыны кулэ шуыса. Адямиос, кудъёсыз тодо вал, мар со сярысь верамын Библиын, веразы соослы: «Эксэй Вифлеем карын вордӥськоз» (Матфей 2:1—6).

Куке Ирод, Иерусалимын кивалтӥсь лек эксэй, кылӥз, Вифлеемын выль эксэй вордӥськиз шуыса, со косӥз астрологъёсыз: «Мынэ но шедьтэ со пиналэз, нош шедьтӥды ке, мыным вералэ». Тодӥськод-а, малы Ирод сокем тыршиз Иисусэз шедьтыны? ~ Со вожъяськиз солы, соин ик солэн выль эксэез виемез потӥз!

Нош кызьы Иегова аслэсьтыз Пизэ утиз? ~ Иисусэз шедьтэмзы бере астрологъёс солы трос кузьымъёс кузьмазы. Собере Инмар астрологъёслы уйвӧт пыр вераз, Ирод доры мыныны уг яра ни шуыса. Соин ик соос мукет сюрестӥ бертӥзы, нош Иерусалиме ӧз пыралэ ни. Ирод со сярысь тодӥз но туж вожзэ поттӥз. Солэн туж потэ вал Иисусэз виемез, соин ик со Вифлеемысь вань пичи пиосты виылыны косӥз, кудъёсызлы кык арес тырмемын ӧй вал на! Но со дырлы Иисус Вифлеемын ӧй вал ни.

Тодӥськод-а малы Иисус Вифлеемын ӧй вал ни? ~ Малы ке шуоно астрологъёс Вифлеемысь кошкем бере Иегова Иосифлы, Мариялэн картэзлы, вераз: «Султы, басьты Нуныез, Солэсь Анайзэ но пегӟы Египетэ». Египетын Ирод Иисуслы номыр уродзэ лэсьтыны уг быгаты вал. Берлогес, кӧня ке аръёс ортчыса, Инмар нош ик уйвӧт пыр Иосифлы вераз, со, аслэсьтыз семьязэ басьтыса, Назаретэ мед мыноз шуыса, отчы, кытын Иисус утиськыны быгатысал (Матфей 2:7—23).

Адӟиськод-а, кызьы Иегова Пизэ утиз? ~ Нош кин кельше тылобурдопиослы яке пичи Иисуслы? Тон ӧвӧл-а со? ~ Тыныд но уродзэ лэсьтыны тыршо. Тодӥськод-а, кин? ~

Библиын верамын, Шайтан, бурсӥсь лев кадь, милемыз сиыны турттыса ветлэ шуыса. Левъёс ӵем дыръя пӧйшуръёслэсь пиоссэс кутыны тыршо. Озьы ик Шайтан но периос нылпиосты кутыны тыршо (1 Пётр 5:8). Но Иегова Шайтанлэсь кужмогес. Со быгатэ аслэсьтыз нылпиоссэ утьыны. Озьы ик со быгатэ тупатыны ваньзэ уродзэ, мар кариз Шайтан.

Тодӥськод на-а, мар верамын вал та книгалэн 10-тӥ люкетаз? Мар карыны косо Шайтан но солэн периосыз? ~ Зэм, соос туртто косыны милемыз лэсьтыны сое, мар Инмарлы уг кельшы, кылсярысь, ӵош кӧлан сярысь законэз тӥяны. Кинъёс гинэ ӵош кӧланы быгато? ~ Шонер, бадӟымъёс гинэ — пиосмурт но кышномурт, кудъёсыз ог-огзылы карт но кышно луо.

Но, жаляса верано луэ, куддыръя бадӟымъёс пичи пиен яке пичи нылэн кӧло. Соослы со кельше. Собере со нылпиос солы дышо но, асьсэос но озьы ик лэсьто. Ӵапак озьы вал туж трос аръёс талэсь азьло Содом карын. Библиын верамын, со карын улӥсьёс, «егитъёс но, пересьёс но», Лотлэн куноосыныз кӧлыны туртто вал шуыса (Улон-вылон 19:4, 5).

Пичи дыръяз Иисусэз утёно вал. Тонэ но утёно, кызьы бадӟымъёслэсь, озьы ик пичиослэсь но, кудъёсызлэн тонэ сантэмамзы потоз. Ӵем дыръя сыӵе адямиос тыныд эш луыны тыршо. Соослэн уг поты, тон кинлы ке но мед вералод шуыса, мар соослэн тонэн лэсьтэмзы потэ. Но со адямиос, Шайтан но периос кадь, асьсэ сярысь гинэ малпасько. Соослы одӥгез гинэ кулэ — юрӟым мылкыдзэс быдэстыны. Со понна соослэн нылпиосын кӧлэмзы потэ. Нош озьы лэсьтыны уг яра!

Тодӥськод-а, мар соос карыны быгато, юрӟым мылкыдзэс быдэстон понна? ~ Соос быгато кутылыны яке маялляны тынэсьтыд макес вистэ. Но тон эн лэзьы нокинлы но озьы карыны: агай-выныдлы но, апай-сузэредлы но, мамаедлы но, папаедлы но!

Нош кызьы тыныд утиськоно сыӵе урод ужъёс лэсьтӥсь адямиослэсь? ~ Эн лэзьы нокинлы но тынэсьтыд кизяндэ кутылыны. Нош кин ке озьы лэсьтыны малпаз ке, бадӟым куараен но кышкатэк вера: «Дугды! Мон тон сярысь ваньзэ верало!» Нош со адями вераз ке, тон янгыш шуыса, эн оскы. Со озьы ӧвӧл! Мын но ваньзэ со сярысь вера. Со тонэ нокинлы но вераны ӧз лэзьы ке но, эн кылзӥськы солэсь. Озьы ик эн кылзы, со тыныд вераз ке: «Тон ӧд ке вера, мон тыныд кузьым басьто». Озьы луиз ке, тыныд ӝоггес кошконо со адями дорысь но ваньзэ со сярысь верано.

Кышкано ӧвӧл, нош сак луоно. Туж кулэ кылзӥськыны анайлэсь но атайлэсь, тужгес но соку, куке соослэн тонэ урод адямиослэсь утемзы потэ. Озьы ик, куке соос верало тыныд, кышкыт интыостӥ эн ветлы шуыса. Тон кылзӥськид ке, урод адямиос тыныд уродзэ лэсьтыны уз быгатэ.