Иисус кылзӥськись вал

Капчи-а тыныд котьку но анай-атаедлэсь кылзӥськыны?~ Ӧвӧл. Тодӥськод-а, кинлэсь кылзӥськиз Иисус?~ Со кылзӥськиз Иеговалэсь но, анай-атаезлэсь но. Солэн примерез юрттоз тыныд кылзӥськыны анаедлэсь но атаедлэсь соку но, куке со капчи ӧвӧл. Ойдо тросгес тодомы Иисус сярысь.

Музъем вылэ лыктэмезлэсь азьло, Иисус Атаеныз ӵош, Иеговаен, инмын улӥз. Музъем вылын но Иисуслэн атаез но анаез вал, Ио́сиф но Мари́я. Тодӥськод-а, кызьы соос Иисуслэн анай-атаез луизы?~

Со Иеговалэн паймымон ужез вал. Со лэсьтӥз озьы, Иисус Мария пушкын будыны мед быгатоз шуыса, кызьы мукет пиналъёс асьсэ анайзы пушкын будо. Укмыс толэзь пала ортчем бере, Иисус музъем вылын вордӥськиз. Озьы Мария но солэн Иосиф картэз Иисуслэн музъем вылысь анай-атаез луизы.

Куке Иисуслы 12 арес гинэ вал, одӥг учыр возьматӥз, макем зол со аслэсьтыз Иегова Атайзэ яратэ. Со луиз, куке Иисус но солэн ӵыжы-выжыосыз Иерусалиме Иеговалы йыбырттонэ ветлӥзы. Доразы бертыкузы Иосиф но Мария адӟизы, Иисус вӧзазы ӧвӧл шуыса. Соос сое нокытысь шедьтыны ӧз быгатэ. Тодӥськод-а, кытын со вал?~

Иосиф но Мария соку ик Иерусалиме берытскизы но Иисусэз котькытысь утчаны кутскизы. Соос туж сюлмаськизы, малы ке шуоно нокызьы но сое шедьтыны ӧз быгатэ. Нош куинь нунал ортчыса, соос сое храмысь шедьтӥзы! Тодӥськод-а, малы Иисус храмын вал?~ Малы ке шуоно отын со аслаз Атаез сярысь, Иегова сярысь, тросгес тодыны быгатэ вал. Иисус Иеговаез яратӥз но, тодэмез потӥз, кызьы сое шумпоттоно. Иисус бадӟым будэм бераз но Иеговалэсь кылзӥськиз, куддыръя солы секыт ке но вал. Инмарлэсь кылзӥськон понна со курадӟыны но дась вал. Нош кылзӥськиз-а со озьы ик Иосифлэсь но Мариялэсь?~ Библия вера, кылзӥськиз шуыса.

Малы дышетэ тонэ Иисуслэн примерез?~ Секыт ке но, анай-атайлэсь кылзӥськоно. Нош тон тыршод-а кылзӥськыны?~