50-ТӤ УРОК
Мар кароно, семьяды шудо мед луоз шуыса? (2-тӥ люкет)
Нылпиос со — Иеговалэн кузьымез. Иегова возьма, анай-атайёс нылпиоссэс утёзы но соос сярысь сюлмаськозы шуыса. Иегова дышетэ анай-атайёсты, кызьы нылпиоссы сярысь сюлмаськоно. Озьы ик Иегова вера нылпиослы, мар соос карыны быгатозы, быдэс семьязы шудо мед луоз шуыса.
1. Кыӵе визь-кенеш сётэ Иегова анай-атайёслы?
Иеговалэн потэ, анай-атайёс нылпиоссэс мед яратозы но соосын тросгес дырзэс мед ортчытъялозы шуыса. Озьы ик Иегова возьма, анай-атайёс нылпиоссэс утёзы но Библиысь визь-кенешъёсъя будэтозы шуыса (Мадёнъёс 1:8). Со вера атайёслы: «Кузё-Инмарлэн дышетонэз, валэктон-визьманъёсыз вылэ пыкиськыса, соосты [нылпиостэс] будэтэ». (Лыдӟе Ефесъёслы 6:4.) Иегова анай-атайёслы визь-кенешъёс сётӥз, кызьы нылпиоссэс будэтыны. Со возьма, анай-атайёс со визь-кенешъёслэсь кылзӥськозы шуыса. Озьы ик Иеговалэн потэ, анай-атайёс асьсэос нылпиоссэс мед дышетозы но медаз возьмалэ, соосты кин ке мукетыз дышетоз шуыса.
2. Кыӵе визь-кенеш сётэ Иегова нылпиослы?
Иегова ӧте нылпиосты: «Котьмар ласянь но анай-атайёстылэсь кылзӥськисесь луэ». (Лыдӟе Колоссыослы 3:20.) Нылпиос анай-атайёссылэсь кылзӥськизы но соосты гажазы ке, соос шумпоттозы анай-атайёссэс но, Иеговаез но (Мадёнъёс 23:22—25). Нылпиослы умой пример возьматӥз Иисус. Солэн анаез но атаез сьӧлыко адямиос вал ке но, со соослэсь кылзӥськиз но гажаз соосты (Лука 2:51, 52).
3. Кызьы тӥляд семьяды Инмарлы матэ кариськыны быгатэ?
Тӥляд нылпиосты вань ке, веранэз ӧвӧл, тӥляд потэ, соос но, тӥ кадь ик, Иеговаез мед яратозы шуыса. Мар кароно со понна? Библиын верамын: «Та кылъёсты [Иеговалэсь кылъёссэ] нылпиосыдлы ялан вералля — гуртад пукыкуд но, сюрес кузя мыныкуд но» (Кыкетӥ Закон 6:7). Тӥ шӧдӥды, дыр, нылпиослы одӥг мае ке трос пол верано луэ, со соослэн йыразы мед кылёз шуыса. Соин ик эн кышкалэ нылпиостылы выльысь но выльысь вераны. Та кылбурысь адӟиське, нылпиостылы Иегова сярысь котькуд тупась учыре вераны кулэ шуыса. Котькуд арняе юри дыр висъялэ, быдэс семьяен ӵош Библиез лыдӟон но сое эскерон понна. Куке быдэс семья, ӵош люкаськыса, Библиез лыдӟе но сое эскере, со семьяен йыбырттон шуыса нимаське. Нош нылпиосты ӧвӧл ке, умой луоз кузпалэныды ӵош Библиез лыдӟыны.
МУРГЕС ЭСКЕРЕ
Ойдолэ тодомы, Библиысь кыӵе визь-кенешъёс юрттозы семьяысь котькудӥзлы шудо луыны но кышкатэк улыны.
4. Нылпиостэс яратыса будэтэ
Нылпиосты будэтыны капчи ӧвӧл. Кызьы Библия юрттыны быгатэ? Лыдӟе Иаковлэсь 1:19, 20 но та юанъёслы валэктонъёс сётэ:
Кызьы анай-атайёс, нылпиосынызы вераськыкузы, яратэмзэс возьматыны быгато?
Малы анай-атайёслы вожпотыкузы нылпиоссэс кылкутытыны уг яра?a
5. Нылпиостэс уте
Нылпиостэс утён понна, туж кулэ вераськыны соосын пиосмурт кышномуртэн кӧлан сярысь, со сярысь вераськыны тӥледлы секыт ке но. Учке ВИДЕОРОЛИКЕЗ но та юанъёслы валэктонъёс сётэ:
Малы куд-ог анай-атайёслы капчи ӧвӧл вераськыны нылпиосынызы пиосмурт кышномуртэн кӧлан сярысь?
Кызьы куд-ог анай-атайёс нылпиосынызы верасько ӵош кӧлан сярысь?
Библиын азьло ик верамын вал, адямиос пумен лекгес но лекгес луозы но эшшо но сӧриськозы шуыса. Озьы ик вань. Лыдӟе 2 Тимофейлы 3:1, 13 но та юанлы валэктон сётэ:
Со адямиос пӧлы, кудъёсыз сярысь верамын 13-тӥ кылбурын, озьы ик пыро нылпиосты эриктэмасьёс но. Малы анай-атайёслы туж кулэ вераськыны нылпиосынызы пиосмурт кышномуртэн кӧлан сярысь но валэктыны соослы, кызьы асьсэды эриктэмасьёслэсь утёно?
Тодӥськоды-а тӥ?
Иеговалэн Адӟись-Ивортӥсьёсыз трос публикациос поттӥзы, кудъёсыз юртто анай-атайёслы нылпиосынызы вераськыны ӵош кӧлан сярысь но утьыны соосты эриктэмасьёслэсь. Кылсярысь:
«Уте асьтэлэсь нылпиостэс» (видеоролик);
«Кызьы нылпилы ӵош кӧлан сярысь валэктоно» («Сайкалэ!» № 5, 2016-тӥ ар).
6. Анай-атайёстэс гажалэ
Нылпиослы анай-атаенызы гажаса вераськоно. Учке ВИДЕОРОЛИКЕЗ но юанъёслы валэктонъёс сётэ.
Малы анай-атаен гажаса вераськоно?
Кызьы анай-атаен вераськыку, гажаммес возьматоно?
Лыдӟе Мадёнъёсты 1:8 но та юанлы валэктон сётэ:
Кызьы ассэ возёно нылпилы, куке анаез яке атаез вера солы, мар кароно?
7. Иеговалы быдэс семьяеныды йыбыртъялэ
Иеговалэн Адӟись-Ивортӥсьёсыз котькуд арняе быдэс семьяенызы ӵош люкасько но семьяен йыбырттон ортчытъяло. Мар карыны луэ семьяен йыбырттон дыръя? Учке ВИДЕОРОЛИКЕЗ но та юанъёслы валэктонъёс сётэ:
Мар кароно, семьяен йыбырттонэз котькуд арняе ортчытон понна?
Мар карыны быгато анай-атайёс, семьяен йыбырттон тунсыко но пайдаё мед луоз шуыса? (Учке уроклэн кутсконысьтыз туспуктэмез.)
Малы куддыръя тӥледлы секыт луэ ӵош люкаськыса Библиез эскерыны?
Вашкала дыръёсы Иеговалэн потэ вал, израиль семьяос, ӵош люкаськыса, Священной Гожтэмъёсысь малпанъёсты мед эскерозы шуыса. Лыдӟе Кыкетӥ Законэз 6:6, 7 но та юанлы валэктон сётэ:
Кызьы та визь-кенешез тӥ ас семьяяды кутыны быгатоды?
Семьяен йыбырттонэз ортчытон понна ӵектонъёс:
Ӵош дасяське кенешлэн пумиськонъёсызлы.
Ӵош лыдӟе Библиысь кыӵе ке учырез яке люкетэз, кудӥз тунсыко луоз быдэс семьядылы. Собере ог-огдылы малпанъёстэс вералэ.
Тӥляд пичи нылпиосты вань ке, скачать каре но печатлалэ jw.org сайтысь нылпиослы дасям ужъёсты.
Семьяяды быдэ вуымтэ пиналъёс вань ке, ӵош лыдӟе jw.org сайтысь кудзэ ке егитъёслы дасям статьяез.
Быръе Библиысь кыӵе ке учырез но соя нылпиосыныды ӵош сценка пуктэ.
Ӵош учке jw.org сайтысь видеороликез но ог-огдылы малпанъёстэс вералэ.
КИН КЕ НО ВЕРАНЫ БЫГАТОЗ: «Библиез нылпиослы валаны туж секыт».
Мар тӥ верасалды?
ТОДЭ ВАЁН
Иеговалэн потэ, анай-атайёс нылпиоссэс мед яратозы, мед дышетозы но соосты мед утёзы шуыса. Нылпиослэсь Иегова возьма, соос анай-атайёссэс гажалозы но соослэсь кылзӥськозы шуыса. Нош анай-атайёслэсь но нылпиослэсь Иегова возьма, соос ӵош солы йыбыртъялозы шуыса.
Мае тон тодӥд?
Кызьы анай-атайёс нылпиоссэс дышетыны но утьыны быгато?
Кызьы нылпиос анай-атайзылы гажамзэс возьматозы?
Малы кулэ котькуд арняе семьяен йыбырттонэз ортчытъяны?
ТРОСГЕС ТОДЭ
Кыӵе визь-кенешъёс юрттозы пиналъёстылы бадӟым будэмзы бере?
«Куать сямъёс, кудъёсызлы нылпиостэс дышетоно» («Сайкалэ!» № 2, 2019-тӥ ар)
Кыӵе визь-кенеш сётэ Библия арлыдо анай-атайёссы сярысь сюлмаськисьёслы?
Учке но тодэ, кызьы одӥг пиосмурт умой атай луиз.
Лыдӟе но тодэ, мар юрттоз атайлы пиеныз умой кусыпъёс тупатыны.
a Библия верамъя, нылпиосты будэтон пӧлы пыре дышетон, визьнодан но кылкутытон. Но нылпиосты кылкутытыку, уг яра соосты ултӥяны но жугыны (Мадёнъёс 4:1).