Иеговалэсь адӟем каре но гажась-жалясь луэ

1. Мар вераз Иегова ачиз сярысь Моисейлы но маин со тунсыко луэ?

ОДӤГ пол Инмар ачиз сярысь Моисейлы вераз. Со вераз аслаз нимыз но куд-ог сямъёсыз сярысь. Нырысь со вераз адямиез яратӥсь но гажась-жалясь луэмез сярысь. (Лыдӟы Потонэз 34:5—7.) Иегова Моисейлы аслаз кужымез но визьлыкез сярысь вераны быгатысал, но со дыре Моисейлы Иеговалэн юрттэтэз кулэ вал (Пот. 33:13). Соин ик Инмар пусйиз, солэн вань шуыса сямъёсыз, кудъёсыз солэсь мылкыдзэ ӝуто ужась-тыршисьёсызлы мылысь-кыдысь юрттыны. Макем шумпоттэ, Инмар нырысь ик адямиез яратӥсь но гажась-жалясь луэмез сярысь вераз шуыса! Таяз статьяын ми пыр-поч вераськомы гажась-жалясь луон сярысь — жалян сярысь сое, кин курадӟе яке шуг-секытэ сюремын, но солы юрттыны мылкыд карон сярысь.

2, 3. а) Кытысь адӟиське, адямиос гажась-жалясь луыны быгато шуыса? б) Малы милемлы эскерыны кулэ, мар гожтэмын Библиын гажан-жалян сярысь?

² Адями Инмарлы укшатыса кылдытэмын вал. Нош Иегова гажась-жалясь бере, адямиос, зэмос Инмарез тодӥсьтэмъёсыз но, тунсыкъясько мукет адямиосын но соослэн улэм-вылэменызы (Ул.-выл. 1:27). Библиын трос учыръёс гожтэмын, ку адямиос гажась-жалясь луэмзэс возьматӥзы. Тодамы ваёмы кык калгись нылкышноос сярысь учырез. Соос Соломон доры лыктӥзы, со мед вералоз шуыса, кудӥз соос пӧлысь нунылэн анаез луэ. Куке Соломон нылкышноосты эскерыны малпаз но нуныез шори ӵогыны косӥз, зэмос анайлэн сюлмыз нёркак луиз. Со нунызэ жаляз, соин ик, сое утён понна, со дась вал нунызэ мукет кышномуртлы но сётыны (3 Экс. 3:23—27). Озьы ик тодамы ваёмы фараонлэсь нылзэ но, кудӥз Моисеез утиз. Со вала вал ке но, шедьтэм нуны еврейёслэн нунызы луэ шуыса, кудзэ улэп кельтыны уг яра, со жаляз сое но аслэсьтыз пизэ кадь будэтыны малпаз (Пот. 2:5, 6).

³ Малы милемлы малпаськыны кулэ со сярысь, вань-а милям гажан-жалян сяммы, ӧвӧл-а? Малы ке шуоно Библия ӧте милемыз Иеговалэсь адӟем карыны (Еф. 5:1). Ми мукетъёссэ гажаны-жаляны быгатӥськомы. Но ваньмы асьмеос Адамлэн тырбыдэстэм нылпиосыз луиськомы бере, ӵемгес асьме сярысь малпаськиськомы. Куддыръя милемлы секыт ужпум кутыны: мукетъёсызлы юрттыны яке «Котькудӥз ик ӟичы аслаз быжыз сярысь сюлмаське» веранъя лэсьтыны. Нош куд-огъёсыз ялан та выллем быръёнэн пумисько но зарни шорзэ шедьтыны тыршо. Мар юрттоз милемлы мукетъёсыз сярысь тросгес малпаськыны? Нырысетӥез, висъялэ дырдэс, эскерон понна, кызьы Иегова но мукет адямиос гажам-жалямзэс возьмато. Кыкетӥез, малпаське со вылын, кызьы тӥ Инмарлэсь адӟем карыны быгатӥськоды но кыӵе пайда со ваёз.

ИЕГОВА КОТЬКИНЛЭСЬ УМОЙ ГАЖАМ-ЖАЛЯМЗЭ ВОЗЬМАТЭ

4. а) Малы Иегова Содоме кылчинъёсты ыстӥз? б) Малы милемыз дышетэ Лот но солэн семьяез сярысь веран?

⁴ Иеговалэн гажась-жалясь луэмез трос учыръёсысь адӟиське. Малпаське со сярысь, кызьы со Лотэн ассэ возиз. Та шонерлыко адями туж куректэ вал, Содом но Гоморра каръёсын улӥсьёслэн азыса-калгыса улэменызы сэрен. Отысь адямиос Инмарез уг гажало вал, но Инмар соосты быдтыны судить кариз (2 Пётр 2:7, 8). Лотэз утён понна, со кылчинъёсты ыстӥз. Кылчинъёс Лотэз но солэсь семьязэ быдтыны дасям интыысь пегӟыны косӥзы. Библиын верамын, Лот ӧз дырты шуыса, но «Кузё-Инмар сое гажа-жаля бере, ... [кылчинъёс] сое, солэсь кышнозэ, кык нылъёссэ, китӥзы кутыса поттӥзы но город сьӧры султытӥзы» (Ул.-выл. 19:16). Та учыр возьматэ, Иегова умой тодэ шуыса, кыӵе шуг-секытъёсын пумисько солэн ужась-тыршисьёсыз (Ис. 63:7—9; Иак. 5:11; 2 Пётр 2:9).

5. Кызьы 1 Иоаннлэн 3:17 но Библиысь мукет кылбуръёс юртто милемлы гажась-жалясь луыны?

⁵ Иегова ачиз гинэ гажась-жалясь ӧвӧл, озьы ик со аслэсьтыз ужась-тыршисьёссэ но дышетэ, туж кулэ шуыса гажась-жалясь луыны. Эскеромы Израиль калыклы сётэм законъёс пӧлысь одӥгзэ. Мар кароно вал адямилы, кудӥз кинлэсь ке дӥськутсэ залоглы басьтӥз? (Лыдӟы Потонэз 22:26, 27.) Сюлэмтэм адями со дӥськутэз ас кияз кельтыны быгатысал, соку пунэм тыроно муртлы уйин номырин шобырскыны луысал. Нош Иегова аслэсьтыз ужась-тыршисьёссэ дышетӥз, сюлэмтэм вырыны уг яра шуыса. Туж кулэ гажась-жалясь луыны. Малы милемыз дышетэ возет, кудӥз вылэ та закон пыкиськемын? Быгатӥськомы ке юрттыны, ум юрттэ-а шуге-леке сюрем вын-агайлы яке сузэр-апайлы? (Иак. 2:15, 16; Кол. 3:12; лыдӟы 1 Иоаннлэсь 3:17.)

6. Малы милемыз дышетыны быгатэ Иеговалэн Израиль калыксэ жалямез?

⁶ Иегова Израиль калыкез жаля вал соку но, куке соиз сьӧлыка вал. 2 Паралипоменонын 36:15 верамын: «Атайёссылэн Инмарзы Кузё-Инмар вазь ӵукнаысен ик соос доры Аслэсьтыз адямиоссэ ыстылӥз, уго Солы Аслаз калыкез, Аслаз улон интыез жаль потэ вал». Ми но озьы ик жаляны кулэ ӧвӧл-а адямиосты, кудъёсыз быгато ӧпкельыны, сьӧлыкамысь дугдыны но Инмарлы ярамон луыны? Иеговалэн уг поты, солэн судъян нуналаз кин ке но бырыны мед шедёз шуыса (2 Пётр 3:9). Соин ик, та лек дуннеез быдтэмлэсь азьло, ойдолэ вераломы адямиослы Инмарлэн матэктӥсь судэз сярысь но юрттомы соослы Инмарлэсь гажан-жалянзэ ас вылазы шӧдыны.

7, 8. Малы одӥг семья оске, Иегова соосты гажаз-жаляз шуыса?

⁷ Трос учыръёсысь адӟыны луэ, кызьы Инмар гажась-жалясь луэмзэ возьматэ. Тани мар луиз 90-тӥ аръёслэн кутсконаз Босниын, куке одӥг калыкысь адямиос мукет калыкысь адямиосты виылӥзы. Одӥг 12 аресъем пияш (нималомы сое Милан), солэн выныз, анаез, атаез но мукет Адӟись-Ивортӥсьёс автобусэн Сербие мыно вал. Соос мыно вал конгрессэ, кудаз Миланлэн анаез но атаез пылатӥськыны малпало вал. Но граница дорын солдатъёс Миланлэсь быдэс семьязэ автобусысь поттӥзы, малы ке шуоно соос мукет калыкысь вал, нош мукетъёсызлы кошкыны лэзизы. Миланэз но солэсь семьязэ границаын кык нунал возизы. Собере отысь офицер рация пыр командирезлэсь юаз, мар соосын кароно шуыса. Офицер туж матын сылэ вал, соин ик ваньзы кылӥзы командирезлэсь верамзэ: «Кытчы ке ну соосыз но ыб!»

⁸ Офицер солдатъёсыныз вераськыса сылыку, Миланлэн семьяез доры кык тодмотэм пиосмуртъёс лыктӥзы но шыпытэн веразы, соос но Адӟись-Ивортӥсьёс луо шуыса. Луэмез сярысь соос автобусын мынӥсьёслэсь кылӥллям. Та кык Адӟись-Ивортӥсьёс Миланэз но солэсь вынзэ соослэн машинаенызы границаез потыны ӧтизы, малы ке шуоно нылпиослэсь документъёссэс уг эскеро вал. Нош анаезлы но атаезлы ӵектӥзы, пограничной пунктэз палэнтӥ ортчыса, граница сьӧрын пумиськыны. Сыӵе ӵектонэз кылыса, Милан ӧз тоды: серекъяно-а солы, бӧрдоно-а. Миланлэн анай-атаез юазы: «Тӥ зэмзэ ик малпаськоды-а, соос милемыз огшоры кошкыны лэзёзы шуыса?» Озьы ке но, соос кылзӥськизы. Соос границаез потӥзы но нылпиосынызы пумиськизы, нош солдатъёс соосты ӧз ик адӟе кадь. Быдэс семья конгресс ортчон каре вуиз. Милан но солэн семьяез тодо вал, Иегова сюлворыса юрттэт куремзэс кылӥз шуыса. Библиысь ми тодӥськомы, вал шуыса сыӵе учыръёс но, куке Иегова та выллем амалэн аслэсьтыз ужась-тыршисьёссэ ӧз утьылы (Ап. уж. 7:58—60). Озьы ке но, Милан вера: «Мыным потӥз, кылчинъёс солдатъёслэсь синъёссэс ворсазы но Иегова милемыз утиз шуыса» (Пс. 96:10).

9. Мар каре вал Иисус, адямиослэсь кыӵе югдуре шедемзэс адӟыса? (Учке статья кутсконысь суредэз.)

⁹ Милемыз тросэзлы дышетыны быгатэ Христослэн примерез. Со гажаз-жаляз адямиосты, кудъёссэ пумитаз, малы ке шуоно соос пазьгиськем но «возьмаськисьтэк кылем ыжъёс кадь» вал. Мар каре вал Иисус, соосты адӟыса? Со соослы ӟеч иворез вера вал (Матф. 9:36; лыдӟы Марклэсь 6:34). Со туж пӧртэм луэ солэсь, кызьы фарисейёс адямиос шоры учкизы. Огшоры адямиослы юрттыны соослэн пичи но мылкыдзы ӧй вал (Матф. 12:9—14; 23:4; Иоанн 7:49). Тыршиськоды-а тӥ, Иисус сямен ик, адямиослы юрттыны но соослы Иегова сярысь вераны?

10, 11. Котьку но котькинэ гажаны-жаляны яра-а? Валэктэ.

¹⁰ Вераны кулэ, котькинэ но котьку гажаны-жаляны уг яра шуыса. Библиын гожтэм учыръёсын, кудъёссэ ми эскеримы, Инмар гажам-жалямзэ кулэ дыръяз возьматӥз. Нош тодамы ваёмы, мар луиз, куке Саул эксэй Агагез, Инмар калыклэсь тушмонзэ, но амалик калыклэсь самой умой пудо-животъёссэ жаляз. Саул малпа вал, вылды, гажась-жалясь луэмзэ возьматэ шуыса. Но Иегова лыдъяз, со ӧз кылзӥськы шуыса, соин ик Саул Иеговалы ӧз яра ни (1 Экс. 15:3, 9, 15). Зэм, Иегова — шонерлыко Судья. Со адямилэсь сюлэмзэ адӟе но тодэ, ку гажась-жалясь луыны яра (Бӧрд. 2:17; Иез. 5:11). Матэктэ ини со дыр, куке Иегова приговорзэ ялоз ваньмызлы, кинлэн солэсь кылзӥськемез уг поты (2 Фес. 1:6—10). Соку Иегова уз жаля ни соосты, кинъёсты со урод ужъёссы понна судъяз. Сыӵе адямиосты быдтэменыз Иегова возьматоз, со гажа-жаля шуыса шонер улӥсьёсты, кудъёссэ со улэп кельтоз.

¹¹ Веранэз ӧвӧл: милям правомы ӧвӧл судъяны, кин быдтыны ярамон луэ, нош кин — уг. Судъям интые, милемлы кароно ваньзэ, мае быгатӥськомы, адямиослы юрттон понна. Кызьы ми уж вылын возьматыны быгатӥськомы, матысьёсмес гажаськомы-жаляськомы шуыса? Ойдолэ эскеромы куд-ог луонлыкъёсты.

КЫЗЬЫ ГАЖАСЬ-ЖАЛЯСЬ ЛУЫНЫ ДЫШЕТСКОНО НО СОЕ ВОЗЬМАТОНО

12. Вералэ одӥгзэ амалэз, кызьы мукетъёсызлы гажам-жаляммес возьматыны луэ.

¹² Нуналлы быдэ лэсьтоно ужъёсты быдэсъяны юрттэ. Солы, кинлэн Иисуслэсь адӟем каремез потэ, матысь адямиоссэ но христиан луись вын-агайёссэ гажано-жаляно. Со одӥгез валтӥсь курон (Иоанн 13:34, 35; 1 Пётр 3:8). «Гажан-жалян» кыллэн одӥгез валатонэз возьматэ, ми курадӟись адямиен ӵош курадӟиськомы шуыса. Гажась-жалясь адями курадӟись адямиез буйгатыны тырше, кылсярысь, солы шуг-секытъёссэ вормыны юрттыса. Утчалэ юрттыны луонлыкез! Кылсярысь, кинлы ке юрттыны луоз дорысьтыз ужъёссэ лэсьтыны яке кыӵе ке куронзэ быдэстыны (Матф. 7:12).

13. Инмарлэн ужась-тыршисьёсызлэн кыӵе сямъёссы тужгес но яркыт адӟисько, куке инкуазь шимучыръёс луо?

¹³ Инкуазь шимучыръёсы сюремъёслы юрттэ. Адӟыса, кыӵе югдуръёсын уло инкуазь шимучыръёсы сюрем адямиос, тросэз соосты жаляны кутско. Иеговалэн Адӟись-Ивортӥсьёсыз тодмо луо инкуазь шимучыръёсы сюрем адямиослы юрттыны дась луэменызы (1 Пётр 2:17). Япониысь одӥг сузэр улэ вал интыын, кудаз 2011-тӥ арын туж юн музъем зуркан но цунами вал. Со вера, сое туж буйгатӥз шуыса, макем трос кужым понӥзы Япониысь но мукет шаеръёсысь ас мылкыд каремзыя ужасьёс, куашкатэм юртъёсты тупатон понна. Со гожтэ: «Ваньмыз со юрттӥз мыным адӟыны Иеговалэсь но мукет Адӟись-Ивортӥсьёслэсь сюлмаськемзэс. Озьы ик со возьматӥз мыным, быдэс дуннеысь вын-агайёс но сузэр-апайёс ми сярысь вӧсясько шуыса».

14. Кызьы тӥ арлыдоослы но висисьёслы юрттыны быгатысалды?

¹⁴ Арлыдоослы но висисьёслы юрттэ. Секыт адӟыны, макем курадӟо адямиос, Адамлэн сьӧлыкамезлы луыса. Ми ӵыдытэк витиськомы со дырез, куке адямиос уз висе но уз пересьме ни, но вӧсяськиськомы, Инмарлэн Эксэйлыкез мед лыктоз шуыса. Со сяна, ми али ик ини лэсьтӥськомы ваньзэ, мае быгатӥськомы, адямиослы юрттон понна. Одӥг гожъяськись аслаз книгаяз гожтӥз учырез, кудӥз солэн арлыдо анаеныз луиз. Анаез Альцгеймерлэн висёнэныз курадӟе вал. Одӥг пол со дӥськутсэ наштаз но сое воштыны медэ вал. Ӵапак со дыре ӧсэ кин ке жингыртӥз. Со Адӟись-Ивортӥсьёс вылӥллям — кык сузэръёс, кудъёсыз ялан сое чакланы пырало вал. Соос юазы, солы маин ке юрттыны кулэ ӧвӧл-а шуыса. Кышномурт шуиз: «Мон кепыр вайисько со сярысь курыны, но зэмзэ верано ке, кулэ». Сузэръёс юрттӥзы солы, нош собере чай пӧзьтӥзы но ӧжытак соин вераськыса пукизы на. Со кышномуртлэн пиез туж тау кариз сузэръёслы. Со гожтӥз: «Мон йырысьтым шляпаме куштӥсько та Адӟись-Ивортӥсьёс азьын. Мар сярысь соос иворто, сое ик соос лэсьто». Тӥ но адӟиськоды ке арлыдоосты но висисьёсты, уд жаляське-а тӥ соосты, но уг поты-а тӥляд но быгатэмдыя соослы юрттэмды? (Флп. 2:3, 4).

15. Малы тодытон уж — со мукетъёсызлы гажам-жаляммес возьматыны луонлык?

¹⁵ Адямиослы Иегова сярысь тодыны юрттэ. Туннэ адямиос пӧртэм шуг-секытъёсын пумисько. Сое адӟыса, милям соослы юрттэммы потэ. Самой умой амал, кызьы ми соослы юрттыны быгатӥськомы,— со Инмар сярысь вераны но со сярысь, мар кароз солэн Эксэйлыкез адямиос понна. Со сяна, ми быгатӥськомы на юрттыны соослы адӟыны, кыӵе пайда ваёз соослы Инмарлэн эсэпъёсызлэсь кылзӥськыса улон (Ис. 48:17, 18). Быгатысалды-а тӥ тодытон уже тросгес пыриськыны? Со уж Иеговаез данъя но милемлы луонлык сётэ мукетъёсызлы гажам-жаляммес возьматыны (1 Тим. 2:3, 4).

КЫӴЕ ПАЙДА ВАЕ МИЛЕМЛЫ ГАЖАН-ЖАЛЯН

16. Кыӵе пайда вае адямилы гажась-жалясь луэмез?

¹⁶ Психологъёс верало, ми мукетъёссэ гажаськомы-жаляськомы ке, со тазалыкмылы но мукет адямиосын кусыпъёсмылы пайда вае шуыса. Мукетъёсызлы юрттыса, ми шумпотон басьтӥськомы, милям эшъёсмы трос луо но йырамы урод малпанъёс шергес лыкто. Озьыен, мукетъёсызлы юрттыса, ми асьмелы юрттӥськомы (Еф. 4:31, 32). Куке ми яратэменымы мукетъёсызлы юрттӥськомы, милям возьытлыкмы чылкыт луэ, малы ке шуоно тодӥськомы, ми Инмарлэн возетъёсызъя лэсьтӥськомы шуыса. Гажан-жалян сям юрттэ умой анай-атай, умой кузпал но умой эш луыны. Со адямилы, кудӥз ачиз мылысь-кыдысь мукетъёссэ жаля но юрттэ соослы, ӝоггес юрттозы, солы юрттэт кулэ луиз ке. (Лыдӟы Матфейлэсь 5:7; Лукалэсь 6:38.)

17. Мар луэ валтӥсь мугез, малы ми гажась-жалясь луиськомы?

¹⁷ Зэм, гажась-жалясь луон милемлы пайда вае. Но пайда басьтон понна гинэ, милемлы гажась-жалясь луоно ӧвӧл. Ми тыршиськомы адӟем карыны Иеговалэсь, Кин бордысь яратон но гажан-жалян потэ, но данъяны сое (Мад. 14:31). Со ласянь Иегова милемлы туж умой пример возьматэ. Ойдолэ гажась-жалясь луомы но лэсьтомы ваньзэ, мае быгатӥськомы, ог-огмылы яратонмес будэтон понна но мукет адямиосын умой кусыпъёс возён понна! (Гал. 6:10; 1 Иоанн 4:16).