«Вань адямиосты» гажалэ-жалялэ

КУКЕ Иисус дышетскисьёссэ ӟеч ивор вераны дышетӥз, со вераз, сое ваньзы уз кылзэ шуыса (Лука 10:3, 5, 6). Куддыръя ужан-тыршонын милемлы урод кылъёс верало, нош кин ке но ассэ туж лек но возе. Соин сэрен куддыръя милемлы адямиосты гажаны-жаляны секыт.

Гажась-жалясь адями адӟе, маин мукетъёсызлы юрттыны кулэ, со соосты жаля но соослы юрттэмез потэ. Нош милемлы секыт ке гажаны-жаляны адямиосты, кудъёсызлы ми ӟеч иворез вераськомы, ужан-тыршонэ пыриськыны но адямиослы юрттыны мылкыдмы сӥяны быгатоз. Ужан-тыршонэ пыриськыны мылкыдэз тылскемен ӵошатыны луоз. Тылскем яркыт мед ӝуалоз шуыса, отчы пу тыроно. Со выллем ик, милям ӟеч иворез вераны мылкыдмы медаз кысы шуыса, милемлы гажан-жалян сям кулэ (1 Фес. 5:19).

Кызьы милемлы гажась-жалясь луоно, со капчи ӧвӧл ке но? Милемлы юрттоз Иеговалэн, Иисуслэн но апостол Павеллэн примерзы.

ИЕГОВАЛЭСЬ ГАЖАСЬ-ЖАЛЯСЬ ЛУЭМЗЭ АДӞЕМ КАРЕ

Трос дауръёс ӵоже ини адямиос Инмар сярысь пӧяса верало. Но Иегова «тау карисьтэмъёслы но, лекъёслы но ӟеч» (Лука 6:35). Солэн ӟеч луэмез чидамысьтыз адӟиське. Иеговалэн «вань адямиосты утиськытэмез» потэ (1 Тим. 2:3, 4). Инмар урод ужъёсты адӟемпотостэм каре ке но, со туж дунъя адямилэсь улонзэ, но солэн уг поты, кин ке но мед быроз шуыса (2 Пётр 3:9).

Иегова тодэ, Шайтан оскисьтэмъёслэсь визьзэс пеймытэн ӵоксаз шуыса (2 Кор. 4:3, 4). Троссэ пичи дырысенызы ик ини Инмар сярысь шонертэм дышето. Соин ик соослы зэмлыклы оскыны секыт. Иегова сыӵе адямиослы юрттыны тырше. Кытысь ми сое тодӥськомы?

Тодамы ваёмы, кызьы Иегова Ниневия карын улӥсьёс шоры учке вал. Соос жалянэз валасьтэм адямиос вал ке но, Иегова Ионалы вераз: «Мон-а ум жаля Ниневияез, бадӟым городэз? Отын сю кызь сюрс мурт улэ, соос уг быгато бурпалзэс паллян палзылэсь висъяны» (Иона 4:11). Иегова соосты туж жаля вал, малы ке шуоно соос со сярысь зэмлыкез уг тодо вал. Соин ик Иегова отчы Ионаез ыстӥз, со соосты мед алоз шуыса.

Ми тыршиськомы адямиос шоры Иегова сямен учкыны. Кылсярысь, ми тыршиськомы котькуд адямилы юрттыны, ивормы солэсь сюлэмзэ уз вырӟыты кадь потэ ке но.

ИИСУСЛЭСЬ ГАЖАСЬ-ЖАЛЯСЬ ЛУЭМЗЭ АДӞЕМ КАРЕ

Иисус, Атаез сямен, адямиосты жаля вал, малы ке шуоно соос возьмаськисьтэк кылем ыжъёс кадь катьтэммемын, пазьгиськемын вал (Матф. 9:36). Со вала вал, малы соос сокем урод югдуре шедизы: религиозной кивалтӥсьёс соосты зэмлыклы ӧз дышетэ но адями интыын ик ӧз лыдъялэ. Иисус тодэ вал, пӧртэм мугъёс луозы шуыса, малы тросэз адямиос солэсь иворзэ уз кылзэ, озьы ке но со адямиосты дышетэмысь ӧз дугды (Марк 4:1—9).

Адямиос, кудъёсызлы ми ӟеч иворез вераськомы, ивормес уг кылзо ке, милемлы валаны тыршоно, малы соос уг кылзо. Куд-огъёсызлэн Библия сярысь но христиан религиос сярысь кылэмзы ик уг поты, малы ке шуоно соос адӟо асьсэды христианъёс шуись адямиослэсь урод ужъёссэс. Мукетъёсыз милям осконмы сярысь пӧяса веранъёслы оскизы. Нош кинлэн ке но милемын вераськемез уг поты, бускельёсызлэн яке ӵыжы-выжыосызлэн серекъямзылэсь кышкаменыз.

Куддыръя адямиослэн, кудъёсызлы ми ӟеч иворез вераськомы, милемыз кылзэмзы уг поты, малы ке шуоно соос улоназы бадӟым шуг-секытъёсын пумиськизы, кудъёсыз сюлмазы мур яраос кельтӥзы. Тани мар вера миссионер луыса ужась-тыршись Ким сузэр: «Тросэз соос пӧлысь, кинъёслы ми ӟеч иворез вераськомы, война пыр потӥзы но вань улэм-вылэмзэс ыштӥзы. Соослэн нокыӵе осконзы ӧвӧл ни. Соос адямиослы осконзэс ыштӥзы, табере нокинлы но уг оско ни. Ми ӵем дыръя пумитаськомы соосты, кинъёс ивормес кылзыны чутрак пумит луо. Одӥг пол тодытыкум мон вылэ кизэс но ӝутӥзы».

Кызьы Ким, номыр шоры учкытэк, адямиосты гажаны-жаляны быгатэ? Со вера: «Куке монэ ултӥяло, мон тодам вайисько Мадёнъёсты 19:11, кытын гожтэмын: „Визьмын улон адямиез йыркуръяськыны дыг каре“. Мон тыршисько тодам возьыны сое, мар пыр соос потӥзы, но мыным капчигес соосты гажаны-жаляны. Со сяна, вань адямиос асьсэды лек уг возё. Куд-огъёсыз, кинъёс доры ми выльысь лыктӥськомы, шумпотыса милемыз кылзо».

Аслэсьтыд юаны луоз: «Кылзысал-а мон Эксэйлык сярысь иворез, луысал ке соос интыын, кинлы мон ӟеч иворез верасько?» Кылсярысь, тӥ трос пол Иеговалэн Адӟись-Ивортӥсьёсыз сярысь пӧяськонэз кылӥды. Соку тӥ но Адӟись-Ивортӥсьёсыз ӧд кылзысалды, вылды, но возьмасалды, тӥледыз гажалозы-жалялозы шуыса. Ойдолэ котьку тодамы возёмы Иисуслэсь кылъёссэ: «Котькытын но адямиослы озьы лэсьтэ, кызьы асьтэлы соослэсь лэсьтэмзэс кулэ кариськоды» (Матф. 7:12). Бен, милемлы адямилэсь шӧдонъёссэ валаны тыршоно, но тыршоно сое гажаны-жаляны, со капчи ӧвӧл ке но.

ПАВЕЛЛЭСЬ ГАЖАСЬ-ЖАЛЯСЬ ЛУЭМЗЭ АДӞЕМ КАРЕ

Апостол Павел гажа-жаля вал соосты но, кинъёс ӟеч иворез веракуз туж лекъяськизы. Малы? Со тодаз возе вал, кыӵе адями со ачиз вал зэмлыкез тодэмезлэсь азьвыл. Со гожтӥз, азьвыл со Инмарлы пумитъяськись, вӧсяськисьёсты улляса-ёртыса, ӝоже уськытъяса возись вал шуыса. Собере со вераз на: «Инмар монэ жаляз, уго мон та ужъёсты тодытэк-валатэк, осконэ ӧвӧлысь лэсьтылӥ» (1 Тим. 1:13). Павел вала вал, Иегова но Иисус сое туж жалязы шуыса. Куд-ог адямиос шоры учкыса, кудъёсызлы со ӟеч иворез вера вал, со адӟе вал, дыр, кыӵе вал со ачиз азьвыл.

Куддыръя Павел зэмос луисьтэм дышетонъёслы юн оскись адямиосты пумиталляз. Кыӵе шӧдонъёсыз соку солэн кылдылӥзы? Одӥг пол Афиныысен, «сульдэръёсын-идолъёсын пачылмем городэз адӟыса, Павеллэн лулыз-сюлмыз куректыны кутскиз» (Ап. уж. 17:16). Озьы ке но со малпаз, со туж умой луонлык шуыса Афины карын улӥсьёслы зэмос Инмар сярысь вераны (Ап. уж. 17:22, 23). Пӧртэм адямиосын вераськыкуз, Павел пӧртэм амалъёсты уже кутэ вал, соос пӧлысь «кӧнязэ ке но утён понна» (1 Кор. 9:20—23).

Куке ми ӟеч иворез вераськомы соослы, кинъёс ми шоры умоен уг учко яке зэмос луисьтэм дышетонъёслы оско, ми Павеллэсь адӟем карыны быгатомы. Адямиослы шумпотон ивор вераку, лыдэ басьтоно сое, малы соос оско (Ис. 52:7). Дороти нимо сузэр вера: «Тросэз ми палан улӥсь адямиос оско, Инмар туж лек но ялан адямиосты курла шуыса. Сыӵе адямиосты мон ушъясько, соос Инмарлы юн оско шуыса. Нош собере саклыксэс висъясько солы, мар верамын Библиын Иеговалэн адямиосты яратэмез сярысь но кыӵе азьпал улон со милемлы сӥзе».

«УРОДЛЫКЕЗ ӞЕЧЛЫКЕН ВОРМЫ»

Та лек дуннелы пум вуэмъя куд-ог адямиос ивормы но ми шоры уродгес но уродгес учкыны кутско (2 Тим. 3:1, 13). Но уг яра лэзьыны, со милемлы адямиосты гажаны-жаляны мед люкетоз но шумпотонмес мед быдтоз шуыса. Иегова милемлы кужым сётоз уродлыкез ӟечлыкен вормыны (Рим. 12:21). Джессика, кудӥз пионер луыса ужа-тырше, вера: «Мон ӵемысь пумитасько адямиосты, кудъёсызлы зӥбыт-востэм сям уг тырмы но кудъёсыз милемыз но милесьтым ивормес серекъяло. Куддыръя со мынэсьтым туж вожме поттэ. Адямиен вераськыны кутскеме бере мон ас поннам Иеговалы вӧсяськисько но курисько сое юрттыны мыным адями шоры учкыны озьы ик, кызьы со учке. Соку мон умойтэм малпанъёсме палэнтӥсько но малпаны кутскисько, кызьы адямилы юрттыны».

Озьы ик милемлы кулэ юнматыны соосты, кинъёсын ми ӟеч иворез вераны мынӥськомы. «Тодытон ужын умойтэм учыр кылдэ ке,— шуэ Джессика,— мон солы саклыкме уг висъяськы, нош тыршисько мукетыз сярысь вераськыны. Кылсярысь, мон верасько, тодытон ужмы умой емышъёс вае шуыса, милемыз ваньзы уг кылзо ке но».

Иегова умой тодэ, кыӵе шуг-секытъёсын ми пумиськиськомы тодытон ужын. Макем со шумпотэ, луоз, ми солэсь жалясь луэмзэ адӟем кариськомы шуыса! (Лука 6:36). Но вуоз дыр, куке Иегова та дуннеысь адямиосты уз жаля ни. Оскыны быгатӥськомы, со тодэ, ку та лек дуннеез быдтоно. Нош али милемлы дась луыса ӟеч иворез верано (2 Тим. 4:2). Ойдолэ азьланяз но ужан-тыршонэ мылысь-кыдысь пыриськомы но «вань адямиосты» гажаломы-жаляломы!