Мар кароно, ужан-тыршон тросгес шумпотон мед ваёз шуыса

1. Малы куд-огъёсызлы ӟеч иворез вераны уг кельшы? (Озьы ик учке суредэз.)

ИЕГОВАЛЭН ужась-тыршисьёсыз ярато асьсэлэсь инмысь Атайзэс. Соослэн потэ со сярысь мукетъёсызлы верамзы. Тросэзлы кельше ӟеч иворез вераны. Нош куд-огъёсызлы уг кельшы. Малы? Кин ке но возьдаське. Кинлы ке но умой уг поты ӧтьытэк мукетъёсыз доры мыныны. Кин ке но кышка, сое уз кылзэ яке тышкаськозы шуыса. Вань сыӵеосыз но, кинъёс кышкало, соосты споръяськонэ кыскозы шуыса. Вань та агайёс но сузэръёс туж ярато Иеговаез. Но соослы секыт тодмотэм адямиосын Библия сярысь вераськыны. Озьы ке но соос валало, та уж туж кулэ шуыса, соин ик отчы пыриськыны тыршо. Иегова туж данъяське сыӵе агайёсын но сузэръёсын!

2. Малы ӝоже усёно ӧвӧл, куддыръя тӥ кышкаськоды ке ӟеч иворез вераны?

² Луо-а тӥляд сыӵе учыръёсты, куке тӥ кышкаськоды ӟеч иворез вераны? Луо ке, ӝоже эн усе. Тӥляд кышкамды возьматыны быгатэ, тӥ зӥбыт-востэм адями но тӥляд уг поты, тӥледлы трос саклык мед висъялозы шуыса. Озьы ик со возьматыны быгатэ, тӥляд споръяськемды уг поты шуыса. Зэм, номыр умоез ӧвӧл, тонэ тышкасько ке, тужгес но соку, куке тынад адямиослы умой ивор верамед потэ. Инмысь Атаймы ваньзэ адӟе но кылзэ сётэ юрттыны (Ис. 41:13). Та статьяын асьмеос эскеромы вить визь-кенешъёсты, кудъёсыз юрттозы кышканмес вормыны но шумпотыса ӟеч иворез вераны.

ИНМАРЛЭН КЫЛЫСЬТЫЗ ЮНМАТСКОН ШЕДЬТЭ

3. Мар юрттӥз Иеремиялы кышкатэк тодытыны?

³ Вашкала дыръёсы, куке Иеговалэн ужась-тыршисьёсызлы секыт ужез быдэстоно вал, соос Инмарлэн Кылысьтыз кужым шедьто вал. Кылсярысь, тодамы ваёмы Иеремия пророкез. Иегова косӥз сое тодытыны. Но Иеремия малпа вал, та ужез быдэстыны со уг тупа шуыса. Со вераз: «Мон уго егит ай, вераськыны уг быгатӥськы» (Иер. 1:6). Мар юрттӥз Иеремиялы кышканзэ вормыны? Инмарлэн Кылыз. Иеремия шуиз: «Лыосы пушкын ӝуась тыл кадь макеез вал, мон каньсырай, сое кутыса возьыса» (Иер. 20:8, 9). Инмарлэсь иворзэ веран понна, Иеремиялы кышкасьтэм луоно вал. Ивор, кудзэ Иегова оскиз солы вераны, Иеремиялы кужым сётӥз но кышкасьтэм луыны юрттӥз.

4. Кыӵе пайда вае Библиез лыдӟон но со вылын малпаськон? (Колоссыослы 1:9, 10).

⁴ Нырысетӥ даурысь христианъёсты но Инмарлэн Кылыз юнматӥз. Колоссы карысь агайёслы Павел вераз, Инмар сярысь тодон-валан басьтыса, соос Инмарлы ярамон улыны но ӟеч ужъёс лэсьтыны быгатозы шуыса. (Лыдӟе Колоссыослы 1:9, 10.) Со ӟеч ужъёс пӧлы пыре ӟеч иворез веран. Куке ми Библиез лыдӟиськомы но со вылын малпаськиськомы, милям Иеговалы осконмы юнма но ми умойгес валаськомы, макем кулэ адямиослы Эксэйлык сярысь вераны.

5. Мар кароно, Библиез лыдӟон но эскерон тросгес пайда мед ваёз шуыса?

⁵ Инмарлэн Кылыз тросгес пайда ваёз, ми сое дыртытэк лыдӟимы, эскеримы но со вылын малпаськимы ке. Библиез лыдӟыкуды, тодмотэм кылбур пумиськыны быгатоз. Соку, азьлань лыдӟем интые, дугдэ но «Возьмаськон башнялэн онлайн-библиотекаысьтыз» утчалэ, кызьы та кылбур публикациосамы валэктӥське. Тӥ Библиез дыртытэк эскериды ке, осконды юнмалоз, ваньмыз, мар отын гожтэмын,— зэм шуыса (1 Фес. 5:21). Нош осконды юнмамъя, тӥляд мылкыдды но ӝутскоз мукет адямиосты Библиен тодматыны.

ТОДЫТОН УЖЛЫ УМОЙ ДАСЯСЬКЕ

6. Малы тодытон ужлы умой дасяськоно?

⁶ Тодытон ужлы умой дасяськиды ке, тӥ сокем уд сюлмаське но адямиосын вераськыны капчигес луоз. Дышетскисьёссэ ӟеч иворез вераны ыстэмезлэсь азьло Иисус пыр-поч вераз соослы, мар кароно но кызьы (Лука 10:1—11). Дышетскисьёс Иисуслэсь кылзӥськизы. Соин ик тодытон ужзы умой емышъёс но бадӟым шумпотон вайиз (Лука 10:17).

7. Кызьы дасяськоно тодытон ужлы? (Озьы ик учке суредэз.)

⁷ Кызьы дасяськоно тодытон ужлы? Тодытыны мынон азьын тани мар сярысь малпаське: «Мар тӥляд верамды потэ адямиослы? Кызьы тӥ сое ас кылъёсыныды вералоды? Мар вераны быгато адямиос? Мар тӥ вералоды соослэн пумитазы?» Та выллем юанъёс вылын малпаськон юрттоз тӥледлы адямиен сюлмаськытэк, пальпотыса но лякытэн вераськыны.

8. Малы Павел христианъёсты горд сюйлэсь лэсьтэм сосудъёсын ӵошатӥз?

⁸ Апостол Павел гожтӥз агайёслы но сузэръёслы: «Асьмеос горд сюйлэсь лэсьтэм сосудъёс гинэ луиськомы, нош соос пушкын табыдӟа узырлык возиське» (2 Кор. 4:7). Кыӵе узырлык сярысь вераськон мынэ? Со милям ужан-тыршонмы (2 Кор. 4:1). Со туж дуно, малы ке шуоно, Эксэйлык сярысь иворез вераса, ми адямиосты утиськомы. Нош кинъёс со горд сюйлэсь лэсьтэм сосудъёс? Со Инмарлэн ужась-тыршисьёсыз. Малы Павел соосты горд сюйлэсь лэсьтэм сосудъёсын ӵошатӥз? Нырысетӥ даурын вузкарисьёс горд сюйлэсь лэсьтэм сосудъёсын дуно товар нулло вал, кылсярысь, сиён, вина но коньдон. Асьмеос но адямиослы туж дунозэ вуттӥськомы — ӟеч иворез, кудзэ милемлы Иегова оскиз. Та иворез вераны милемлы Иегова кужым сётэ.

КЫШКАСЬТЭМ СЯМ КУРЫСА ВӦСЯСЬКЕ

9. Мар кароно, адямиосын вераськыны кышкаськомы ке? (Озьы ик учке суредэз.)

⁹ Куддыръя милемлы адямиосын вераськыны секыт, малы ке шуоно ми кышкаськомы, соос мае ке уродзэ вералозы яке лэсьтозы шуыса. Мар юрттоз кышканмес вормыны? Тодэ ваёно апостолъёсты. Куке соослы ӟеч иворез вераны ӧз лэзе, соос кышканлы ӧз сётске. Соос вӧсяськизы Иеговалы: «Аслад ляльчиосыдлы чик кышкатэк Тынэсьтыд кылдэ вераны луонлык сёт». Инмар вӧсяськемзылы соку ик ответ сётӥз (Ап. уж. 4:18, 29, 31). Ми но адямиосын вераськыны кышкаськомы ке, Иеговалы вӧсяськоно. Куре Иеговаез адямиосты яратондэс будэтыны, соослы ӟеч иворез вераны медад кышкалэ шуыса.

10. Кызьы Иегова юрттэ милемлы ӟеч иворез вераны? (Исаия 43:10—12).

¹⁰ Иегова лэзиз милемлы солэн Адӟись-Ивортӥсьёсыз луыны. Со кылзэ сётэ юрттыны милемлы кышкасьтэм луыны. (Лыдӟе Исаиялэсь 43:10—12.) Эскеромы, кызьы со милемлы юрттэ. Нырысетӥез, ӟеч иворез веракумы, ми огнамы ӧвӧл, милемын — Иисус (Матф. 28:18—20). Кыкетӥез, Иегова аслэсьтыз кылчинъёссэ ыстэ, милемлы юрттон понна (Усьт. 14:6). Куинетӥез, Иегова святой духсэ сётэ, кудӥз юрттэ тодамы вайыны сое, мае ми тодӥськомы ини (Иоанн 14:25, 26). Ньылетӥез, милям вань оскымон эшъёсмы — агайёс но сузэръёс. Иеговалэн юрттэменыз но яратӥсь агайёслэн но сузэръёслэн юрттэменызы ми ваньзэ быгатомы!

АДЯМИОСЪЯ ТУПАТСКЕ НО ШУМПОТОНДЭС ЭН ЫШТЭ

11. Мар кароно, тросгес адямиосты шедьтон понна? (Озьы ик учке суредэз.)

¹¹ Адямиосты дорысьтызы уд ке шедьтӥське но соин сэрен киосты лэзисько ке, юалэ асьтэлэсь: «Кытын али адямиос? Оло нош, соос уж доразы яке магазинъёсын?» (Ап. уж. 16:13). Соку умойгес луоз ӟеч иворез вераны урамын. Отысь тӥ тросгес адямиосты шедьтоды. Джо́шуа нимо агай вера: «Мыным кельше тодытыны магазинъёсын но парковкаосын». Тросгес адямиосты шедьтон понна, Джо́шуа но солэн Бри́джит кышноез тыршо адямиос доры мыныны ӝыт но арнянуналэ нуназе (Еф. 5:15, 16).

12. Мар кароно, адямиослы ӟеч ивор туж ик тунсыко уг поты ке?

¹² Адямиослы ӟеч ивор туж ик тунсыко уг поты ке, тырше валаны, малы соос оско но мар соосты сюлмаськытэ. Тани мар каро Джошуа но Бриджит кузпалъёс. Соос адямиослы буклетысьтымы нырысетӥ бамзэ возьмато но отысь печатлам юанэз сёто. Кылсярысь, «Мар луэ тӥ понна Библия?» буклетэз кутыса, соос верало: «Куд-огъёсыз оско, Библия — Инмарлэн Кылыз шуыса. Мукетъёсыз солы туж ик уг оско. Нош тӥ мар малпаськоды?» Талы луыса та кузпалъёслэн адямиосын туж умой вераськемзы луэ.

13. Малы ми шумпотонмес ум ыштӥське, адямиос милемыз уг кылзо ке но? (Мадёнъёс 27:11).

¹³ Милемыз кылзо-а, уг-а, ми тодытыны тыршиськомы. Малы ке шуоно та ужез милемлы сётӥз Иегова но солэн Пиез (Ап. уж. 10:42). Нокинэн вераськыны ӧм быгатэ ке но, ми шумпотонмес ум ыштэ, малы ке шуоно тодӥськомы, ми шоры учкыса, инмысь Атаймы шумпотэ шуыса. (Лыдӟе Мадёнъёсты 27:11.)

14. Малы ми шумпотыны быгатӥськомы, тунсыкъяськись адямиез, ми — ӧм, нош мукет ивортӥсь шедьтӥз ке?

¹⁴ Нош малы ми шумпотыны быгатӥськомы, тунсыкъяськись адямиез, ми — ӧм, нош мукетыз ивортӥсь шедьтӥз ке? Одӥг «Возьмаськон башняын» милям ужмы ӵошатэмын вал ышем нылпиез утчанэн. Нылпиез трос адями утча, но ӵем дыръя шедьтэ кин ке одӥгез гинэ. Нош шумпото ваньзы ӵош. Озьы ик тодытон ужын но. Адямиосты зэмлыклы дышетон — со огъя уж. Кенешын котькудӥз тырше тунсыкъяськись адямиез шедьтыны. Нош куке сыӵе адями сюре но кенешлэн пумиськонъёсаз ветлыны кутске, ми ваньмы шумпотӥськомы.

ИЕГОВАЕЗ НО АДЯМИОСТЫ ЯРАТЭ

15. Кызьы кылъёс, кудъёсыз гожтэмын Матфейлэсь 22:37—39, юрттозы милемлы тодытон ужлэсь тросгес шумпотон басьтыны? (Озьы ик учке суредэз.)

¹⁵ Тодытон уж тросгес шумпотон ваёз, ми тодамы возимы ке, макем ми яратӥськомы Иеговаез но адямиосты. (Лыдӟе Матфейлэсь 22:37—39.) Малпалэ ай, кыӵе шумпотэ Иегова, куке адӟе, ми ӟеч иворез вераськомы шуыса! Нош макем шумпотозы адямиос, куке Библиез дышетыны кутскозы! Озьы ик эн вунэтэ, соос, кинъёс ӟеч иворез кылзозы, пырак улыны быгатозы шуыса (Иоанн 6:40; 1 Тим. 4:16).

16. Мар кароно, ужан-тыршонлэсь шумпотон басьтон понна, дорысьтымы потаны ум быгатӥське ке но?

¹⁶ Оло нош, кыӵе ке муген тӥ али дорысьтыды уд потаське. Озьы ке но тӥ быгатӥськоды Иеговаез но адямиосты яратэмдэс возьматыны. Ковид пандемия дыръя Самве́л но Да́ния кузпалъёс дорысьтызы потаны ӧз быгатэ. Со секыт вакытэ соос телефон пыр тодытӥзы, гожтэтъёс гожъязы но зум пыр Библия дышетонъёс ортчытъязы. Самве́л, больницаын раклэсь эмъяськыкуз, адямиосын вераськылӥз. Со вера: «Шуг-секытъёсын сэрен воксё медам катьтэмме шуыса, милемлы Иеговалы ужан-тыршонлэсь шумпотон басьтоно». Та кузпалъёслэн вань со шуг-секытъёссы вылэ эшшо одӥгез ватсаськиз на. Дания усиз но куинь толэзь валес вылысьтыз султылытэк кыллиз. Нош собере эшшо ӝыны ар коляскаен ветлоно луиз. Со вера: «Соку мон лэсьтӥ сое, мае быгатӥ. Мон вераськи ми доры ветлӥсь эмъясен но мукет адямиосын. Озьы ик мон тодытӥ медицинской фирмаысь одӥг кышномуртлы. Милям соин умой вераськонъёсмы вал». Самвел но Дания азьвыл мында лэсьтыны уг быгато вал ке но, соос тыршизы лэсьтыны сое, мае быгатӥзы. Со соослы бадӟым шумпотон вайиз.

17. Ку та статьяысь визь-кенешъёс тросгес пайда ваёзы?

¹⁷ Та статьяысь визь-кенешъёс тросгес пайда ваёзы, ми соосты ваньзэ уже кутӥмы ке. Со луэ сиёнэз пӧрам кадь. Сиён ческыт мед пӧрмоз шуыса, отчы ваньзэ кулэзэ пононо, номыре вунэтоно ӧвӧл. Та статьяысь вань визь-кенешъёсты уже кутӥмы ке, милемлы капчигес луоз кышканмес вормыны но ужан-тыршонлэсь тросгес шумпотон басьтыны.