Иисус сямен, ӟырдыт мылкыдын тодытэ

1. Маин пӧртэм Иеговалэн ужась-тыршисьёсыз мукет адямиослэсь?

МАИН пӧртэм Иеговалэн ужась-тыршисьёсыз соослэсь, кинъёс асьсэды христианъёс шуыса нимало гинэ? Иеговалэн ужась-тыршисьёсызлэн тодытыны ӟырдыт мылкыдзы вань (Тит. 2:14). Но куддыръя милям тодытэммы нокӧня но уг поты. Оло нош, тӥ асьтэды шӧдӥськоды озьы ик, кызьы ассэ шӧдӥз одӥг тӧро. Со шуиз: «Куддыръя мынам тодытыны мылкыды чик но ӧвӧл».

2. Малы милям куддыръя тодытыны мылкыдмы сӥя?

² Оло нош, тодытон ужен ӵошатыса, мукет амалъёсын ужан-тыршон милемлы тросгес шумпотон вае. Малы? Малы ке шуоно ми соку ик адӟиськомы тыршеммылэсь емышсэ. Кылсярысь, куке ми Эксэйлык юртъёсты пуктӥськомы но эскериськомы-тупатъяськомы, инкуазь шимучыре сюремъёслы юрттӥськомы яке кызьы ке мукет сямен агайёслы но сузэръёслы юрттӥськиськомы, ми шӧдӥськомы, кулэ ужез быдэстӥмы шуыса. Ми шумпотӥськомы огкылысь ужаны но шӧдыны, тыршеммес дунъяло шуыса. Со дыре ик куддыръя ми трос аръёс ӵоже одӥг интыын тодытӥськомы но туж шер пумитаськомы адямиосты, кудъёсызлэн Библиез дышетэмзы потэ. Нош куд-огъёсыз милемлы пумитъясько но. Со сяна, ми тодӥськомы, та дуннелы пум матэктэмъя адямиос милемлы эшшо но зол пумитъяськозы шуыса (Матф. 10:22). Мар юрттоз милемлы, кимес лэзьытэк, эшшо но ӟырдыт мылкыдын тодытыны?

3. Мае тодыны луэ Иисус сярысь мадёнысь, кудӥз гожтэмын Лукалэсь 13:6—9?

³ Иисус милемлы адӟем карон возьматӥз, кызьы тодытон уж шоры учконо. Со тодытэмысь ноку ӧз дугды. Дыр ортчемъя со эшшо но тыршиз тодытыны. (Лыдӟе Лукалэсь 13:6—9.) Иисус ассэ ӵошатӥз виноград будэтӥсен, кудӥз куинь ар ӵоже смоква пуэз будэтӥз, со емыш мед ваёз шуыса. Иисус но куинь ар котыр еврейёслы тодытӥз, но тросэз солэн дышетскисьёсыз ӧз луэ. Виноград будэтӥсь смоква пуэз ӧз кора. Ӵапак озьы ик Иисус но адямиосты номырлы ярасьтэмъёсын ӧз лыдъя. Ужан-тыршонэзлэн берпуметӥ толэзьёсаз Иисус эшшо но тыршиз еврейёслэсь сюлэмъёссэс вырӟытыны.

4. Мар юрттӥз Иисуслы ӟеч иворез вераны?

⁴ Та статьяын ми эскеромы, мар юрттӥз Иисуслы ӟырдыт мылкыдын тодытыны, тужгес но музъем вылын улонэзлэн берпуметӥ ӝыны ар ӵоже. (Учке «Эскерон понна поттэм Библиез» (ӟуч), Лукалэсь 10:1, «после этого» кылъёслы ватсам малпанэз.) Иисуслэн верамезлэсь кылзӥськыса но солэсь адӟем карыса, ми но ӟырдыт мылкыдын тодытомы. Ойдолэ эскеромы, мар юрттӥз Иисуслы ӟеч иворез вераны: 1) со Иеговалэсь эриксэ улоназ нырысетӥ интые пуктӥз; 2) со Библиысь азьпалзэ ивортонъёсъя улӥз; 3) со Иеговалэсь юрттэт куриз; 4) со оскиз, кин ке но ӟеч иворез одно ик кылзоз шуыса.

ИЕГОВАЛЭСЬ ЭРИКСЭ БЫДЭСЪЯН СО ПОННА САМОЙ ВАЛТӤСЕЗ ВАЛ

5. Кытысь адӟиське, Иеговалэсь эриксэ быдэсъян Иисус понна самой валтӥсез вал шуыса?

⁵ Иисус ӟырдыт мылкыдын «Инмар Эксэйлык сярысь Ӟеч Иворез» тодытӥз. Со тодэ вал, Инмар сое ӵапак со понна ыстӥз шуыса (Лука 4:43). Ужан-тыршон Иисуслэн улоназ нырысетӥ интыын вал. Музъем вылын улонэзлэн берпуметӥ толэзьёсаз но со адямиосты «городъёстӥ, гуртъёстӥ дышетыса» ветлӥз (Лука 13:22). Озьы ик со выль дышетскисьёсты дышетӥз, соос соин ӵош мед тодытозы шуыса (Лука 10:1).

6. Кыӵе уж Иеговалэн организацияз самой валтӥсез? (Озьы ик учке суредъёсты.)

⁶ Туннэ но ӟеч иворез тодытон — самой кулэ уж. Иеговалэн но Иисус Христослэн потэ, ми со ужез мед быдэсъяломы шуыса (Матф. 24:14; 28:19, 20). Иеговалэн организациысьтыз мукет ужъёс тодытон ужен герӟаськемын. Кылсярысь, ми Эксэйлык юртъёсты пуктӥськомы, отчы милемын ӵош Иеговалы йыбыртъяны мылкыд карись адямиосты ӧтён понна. Вефильын нуиськись уж но тодытон ужен герӟаськемын. Нош инкуазь шимучыръёс кылдыку, ми огъя оскисьёсмылы улон понна ваньзэ кулэзэ сётӥськомы, соос ӝоггес нош ик пумиськонъёсы ветлыны но тодытыны мед быгатозы шуыса. Ми ӧм ке вунэтэ, Иегова малпамъя, ӟеч иворез тодытон — самой кулэ уж шуыса, соку ӵемгес тодытыны тыршомы. Венгриысь Я́нош тӧро вера: «Мон тодам возьыны тыршисько, Иеговалэн организацияз ужъёс туж трос ке но, тодытон уж — соос пӧлысь валтӥсез шуыса».

7. Малы Иеговалэн потэ, ми азьланяз но мед тодытомы шуыса? (1 Тимофейлы 2:3, 4).

⁷ Мар милемлы юрттоз азьланяз но ӟырдыт мылкыдын тодытыны? Милемлы котькуд адями шоры Иеговалэн синмыныз учконо. Солэн потэ, тросгес адямиос ӟеч иворез мед кылозы но соя мед улозы шуыса. (Лыдӟе 1 Тимофейлы 2:3, 4.) Иегова милемыз дышетэ эшшо но быгатӥсь дышетӥсьёс луыны, малы ке шуоно ивор, кудзэ ми вераськомы, адямиослэсь улонзэс уте. Кылсярысь, «Яратэ адямиосты — дышетэ соосты» брошюра юрттэ милемлы, адямиосын вераськыку, соослэсь мылкыдзэс ӝутыны Библиез дышетыны но Христослэн дышетскисьёсыз луыны. Адямиос али Иеговалы ужаны-тыршыны ӧз кутске ке но, оскон вань, соос бадӟым куректон йылпумъяськытозь ужаны-тыршыны кутскозы шуыса. Оло нош, дыр ортчыса, соос милесьтым вераммес тодазы ваёзы но соослэн Иеговалы ужамзы-тыршемзы потоз. Но со понна милемлы азьланяз но тодытыны кулэ.

СО БИБЛИЫСЬ АЗЬПАЛЗЭ ИВОРТОНЪЁСЪЯ УЛӤЗ

8. Кыӵе азьпалзэ ивортонъёс Иисуслы юрттӥзы дырзэ визьмо уже кутыны?

⁸ Иисус вала вал, кызьы быдэсмозы Библиысь азьпалзэ ивортонъёс. Со тодэ вал, музъем вылын со куинь но ӝыны ар гинэ ужалоз-тыршоз шуыса (Дан. 9:26, 27). Озьы ик Иисус тодэ вал, со курадӟоз но кулоз шуыса (Лука 18:31—34). Ваньзэ тае тодаз возьыса, Иисус дырзэ визьмо уже кутӥз. Со ӟырдыт мылкыдын тодытыны тыршиз, солы оскем ужез пумозяз быдэстон понна.

9. Кызьы Библиысь азьпалзэ ивортонъёс мылкыдмес ӝуто ӟырдыт мылкыдын тодытыны?

⁹ Библиысь азьпалзэ ивортонъёс милемлы но юрттыны быгато ӟырдыт мылкыдын тодытыны. Ми малпаськимы ке, кызьы соос туннэ ик ини быдэсмо, ми валаломы, та дуннелэн пумыз туж матын ини шуыса. Библия азьло ик пыр-поч вераз, кыӵеесь адямиос луозы берпум нуналъёсы но кыӵе югдур луоз дунне вылын. Ми адӟиськомы, кызьы Великобритания но Огазеяськем Штатъёс ожмасько Россиен но со пала кариськись шаеръёсын. Ми валаськомы, озьы быдэсме шуыса Данииллэн азьпалзэ ивортонэз, кудаз вераське «дыръёслэн пумазы» уйпал но лымшор эксэйёслэн ожмаськемзы сярысь (Дан. 11:40). Озьы ик ми валаськомы, бадӟым сульдэрлэн пыдъёсыз, кудъёсыз сярысь вераське Данииллэн книгаяз,— со Англо-Американской дунневыл держава шуыса (Дан. 2:43—45). Ми юн оскиськомы, ӝоген Инмарлэн Эксэйлыкез адями кивалтэтъёсты быдтоз шуыса. Библиысь азьпалзэ ивортонъёс возьмато, та дуннелэн пумыз вуытозь дыр туж ӧжыт кылемын ини шуыса. Тае валан милесьтым мылкыдмес ӝутэ ӟырдыт мылкыдын ӟеч иворез тодытыны.

10. Библиысь кыӵе эшшо азьпалзэ ивортонъёс мылкыдмес ӝуто тодытыны?

¹⁰ Озьы ик Библиысь азьпалзэ ивортонъёсын гожтэмын вуоноез сярысь туж умоесь кылсётонъёс. Милям потэ соос сярысь мукетъёсызлы но вераммы. Доминикан Республикаысь Кэ́рри сузэр вера: «Азьланяз Иегова милемлы туж умой улон дасяз. Туж потэ, со сярысь ваньзы мед тодозы шуыса!» Со ватса: «Туннэ адямиослэн улонзы туж секыт. Мон валасько, мыным но, соослы но со кылсётонъёс сярысь тодыны кулэ шуыса». Библиысь азьпалзэ ивортонъёс милемлы юртто пӧртэм адямиослы кышкатэк тодытыны, малы ке шуоно ми тодӥськомы, со Иеговалэн ужез шуыса. Венгриысь Ле́йла сузэр вера: «Исаиялэн 11:6—9 возьматэ, Иеговалэн юрттэменыз котькуд адями воштӥськыны быгатэ шуыса. Та мыным юрттэ ӟеч иворез вераны соослы но, кинъёс, мон малпамъя, сое уз кылзэ». Замбиысь Кри́стофер агай вера: «Азьпалзэ ивортон, кудӥз гожтэмын Марклэсь 13:10, возьматэ, ӟеч ивор быдэс дунне вылын верамын луоз шуыса. Мон туж шумпотӥсько, мон но та азьпалзэ ивортонэз быдэстыны юрттӥсько шуыса». Нош Библиысь кыӵе азьпалзэ ивортонъёс тынэсьтыд мылкыддэ ӝуто тодытыны?

СО ИЕГОВАЛЭСЬ ЮРТТЭТ КУРИЗ

11. Малы, ӟырдыт мылкыдын ужан-тыршон понна, Иисуслы Иеговалэн юрттэтэз кулэ вал? (Лука 12:49, 53).

¹¹ Иисус тодэ вал, Иегова солы ӟырдыт мылкыдын ужаны-тыршыны юрттоз шуыса. Иисус котьку но адямиосын лякытэн но гажаса вераськиз. Озьы ке но со тодэ вал, Эксэйлык сярысь ӟеч ивор ваньмызлы уз кельшы шуыса: кинлэн ке но, сое кылыса, вожез потоз, нош кин ке но сое дугдытыны турттоз. (Лыдӟе Лукалэсь 12:49, 53.) Религиозной кивалтӥсьёс Иисуслэсь верамзэ адӟемпотостэм каро вал. Соос сое трос пол виыны турттӥзы (Иоанн 8:59; 10:31, 39). Но Иисус тодытэмысь ӧз дугды, малы ке шуоно тодӥз, Иегова соин шуыса. Иисус вераз: «Мон одӥгнам ӧвӧл, Монэн ӵош Монэ ыстӥсь Атае. [...] Атае Монэ огнаме ӧз кельты, Мон уго котьку но сое лэсьтӥсько, мар Солы ярано» (Иоанн 8:16, 29).

12. Кызьы Иисус дышетскисьёссэ дасяз, уйылон-уллянъёс дыръя соос тодытэмысь медаз дугдэ шуыса?

¹² Иисус дышетскисьёсызлы тодазы вайытэ вал, соослы Иегова юрттоз шуыса. Со трос пол соослы вералляз, уйылон-уллянъёс дыръя но Иегова соосты уз кельты шуыса (Матф. 10:18—20; Лука 12:11, 12). Со дыре ик Иисус дышетскисьёссэ ӧте вал чакласькыса улыны (Матф. 10:16; Лука 10:3). Со соосты дышетэ вал, Эксэйлык сярысь иворез нокинлы кужмысь ӵектоно ӧвӧл шуыса (Лука 10:10, 11). Озьы ик Иисус дышетскисьёсызлы шуиз, уйылон-уллянъёс кутскизы ке, бызьыса кошконо шуыса (Матф. 10:23). Иисус ӟырдыт мылкыдын тодытӥз но Иеговалы оскиськиз ке но, быгатэмезъя со кышкыт учыръёслэсь палэнскыны тыршиз (Иоанн 11:53, 54).

13. Малы милям оскеммы луэ, Иегова милемлы тодытыны юрттоз шуыса?

¹³ Туннэ ми ӵем пумиськылӥськомы уйылон-уллянъёсын (Усьт. 12:17). Азьланяз но тодытон понна, милемлы Иеговалэн юрттэтэз кулэ. Малы ми оскиськомы, Иегова милемлы юрттоз шуыса? Тодамы ваёмы Иисуслэсь вӧсяськонзэ, кудӥз гожтэмын Иоаннлэсь 17-тӥ люкетын. Иисус Иеговаез куриз апостолъёссэ утьыны. Иегова солэсь куронзэ быдэстӥз. Апостолъёслэн ужъёссы книгаын гожтэмын трос учыръёс, кудъёсыз возьмато, уйылон-уллянъёс дыръя но Инмар апостолъёслы ӟырдыт мылкыдын тодытыны юрттӥз шуыса. Вӧсяськыкуз Иисус Иеговаез куриз, апостолъёссэ сяна, утьыны соосты но, кинъёс соослэн кылъёссылы оскозы. Озьыен, со куриз утьыны тонэ но. Иегова али но Иисуслэн вӧсяськонэзлы ответ сётэ. Иегова апостолъёслы юрттӥз бере, со тыныд но юрттоз (Иоанн 17:11, 15, 20).

14. Малы ми оскиськомы, нокыӵе шуг-секытъёс тодытыны мылкыдмес уз сӥятэ шуыса? (Озьы ик учке суредэз.)

¹⁴ Пум матэктэмъя ӟеч иворез вераны эшшо но секыт луоз, вылды. Но Иисус милемыз оскытӥз, азьланяз но та ужез ӟырдыт мылкыдын тодытон понна, милемлы кулэ луись юрттэт сётэмын луоз шуыса (Лука 21:12—15). Нырысетӥ даурын Иисус но солэн дышетскисьёсыз сямен, ми адямиослы бырйыны лэзиськомы: милемыз кылзоно-а, ӧвӧл-а. Ми нокинэн ум споръяськиське. Куд-ог шаеръёсын агайёслы но сузэръёслы тодытыны люкето. Озьы ке но соос ӟеч иворез верало, малы ке шуоно, ас вылазы оскиськем интые, Иеговалы оскисько. Инмар нырысетӥ даурын ужась-тыршисьёсызлы юрттӥз бере, со милемлы но юрттоз ужмес пумозяз вуттыны (2 Тим. 4:17). Милям оскеммы луэ, Иеговалы оскиськимы ке, тодытыны мылкыдмы уз сӥя шуыса.

СО ЮН ОСКИЗ, ӞЕЧ ИВОРЕЗ ОДНО ИК КИН КЕ НО КЫЛЗОЗ ШУЫСА

15. Кытысь адӟиське Иисуслэн оскемез, ӟеч иворез одно ик кин ке но кылзоз шуыса?

¹⁵ Иисус оске вал, ӟеч иворез одно ик кин ке но кылзоз шуыса. Та солы юрттэ вал азьланяз но ӟырдыт мылкыдын тодытыны. Кылсярысь, тани мар луиз асьме вакытысь 30-тӥ арлэн пумаз. Иисус адӟиз, трос адямиос сое шумпотыса кылзо шуыса. Сыӵе адямиосты Иисус ӵошатӥз араны вуэм бусыен (Иоанн 4:35). Ар котыр ортчыса, Иисус дышетскисьёсызлы шуиз: «Аран трос» (Матф. 9:37, 38). Берлогес со нош ик шуиз: «Аран трос» — но ватсаз: «Аранлэн Кузёезлэсь вӧсяськыса куре, Аслаз аран дораз ужасьёсты мед ыстоз шуыса» (Лука 10:2). Иисус котьку оскиз, Эксэйлык сярысь ӟеч иворез кылзӥсь адямиос одно ик луозы шуыса. Соосты шедьтыку, со туж шумпотэ вал (Лука 10:21).

16. Кызьы Иисуслэн мадёнъёсыз ужан-тыршонмы шоры шонер учкыны юртто? (Лука 13:18—21). (Озьы ик учке суредэз.)

¹⁶ Иисус дышетскисьёсызлы юрттӥз ужан-тыршонзы шоры шонер учкыны. Со соослы вераз, ужзы туж азинлыко луоз шуыса. Тае валан понна, эскеромы Иисуслэсь кык мадёнъёссэ. (Лыдӟе Лукалэсь 13:18—21.) Одӥг мадёназ Иисус Эксэйлык сярысь ӟеч иворез ӵошатӥз пичи горчица кидысэн, кудӥз бадӟым писпу луиз. Со возьматэ вал, Эксэйлык сярысь иворез трос адямиос кылзозы но солэсь вӧлмемзэ нокин уз дугдыты шуыса. Мукетаз мадёназ Иисус вераз нянь шӧм сярысь. Со возьматэ вал, Эксэйлык сярысь ивор быдэс дунне вылын вӧлмоз шуыса. Со адямиослэсь мылкыдзэс ӝутоз воштӥськыны, мукет адямиос воштӥськемзэс соку ик уз адӟе ке но. Озьы Иисус дышетскисьёссэ оскытӥз, ивор, кудзэ соос вӧлмыто, туж трос адямиослы пайда ваёз шуыса.

17. Мар эшшо милемлы юрттэ ужан-тыршонмы шоры шонер учкыны?

¹⁷ Куке ми адӟиськомы, макем умой емышъёс вае ужан-тыршонмы, милям эшшо но зол потэ ӟеч иворез вераммы. Котькуд ар трос миллион адямиос милемын ӵош Библиез дышето но Тодэ ваён ӝытанэ лыкто. Трос сюрс адямиос пылатӥсько но милемын ӵош тодытыны кутско. Ми ум тодӥське, кӧня эшшо адями Эксэйлык сярысь иворез кылзоз на. Но ми тодӥськомы, Иегова туж-туж трос калык люка шуыса, кудзэ со бадӟым куректон дыръя утёз (Усьт. 7:9, 14). Иегова, Аранлэн Кузёез, адӟе, бусыос быдэсак арамын ӧвӧл на шуыса. Соин ик ми азьланяз но тодытомы.

18. Мар возьматэ, ми Христослэн дышетскисьёсыз шуыса?

¹⁸ Иисуслэн зэмос дышетскисьёсыз котьку но ӟырдыт мылкыдын тодыто вал. Апостолъёслэсь кышкасьтэм луэмзэс адӟыса, адямиос валало вал, соос «Иисусэн огазьын ветлӥсьёс вал шуыса» (Ап. уж. 4:13). Иисус Христос сямен, милям но потэ кышкасьтэмесь луэммы но ӟырдыт мылкыдын тодытэммы.