ЭСКЕРОН ПОННА 37-ТӤ СТАТЬЯ
118-ТӤ КЫРӞАН «Милесьтым осконмес будэты»
Гожтэт, кудӥз милемлы юрттоз пумозяз юн осконэн улыны
«Асьмеос кутсконысеныз ик кабыл басьтэм осконмес пумозяз юн возьыны быгатӥмы» (ЕВР. 3:14).
МИ ТОДОМЫ
Еврейёслы гожтэтысь визь-кенешъёс туннэ но пайда вайыны быгато. Соос милемлы юрттозы та дуннелэн пумозяз юн осконэн улыны.
1, 2. а) Кыӵе югдур вал Иудеяын, куке апостол Павел Еврейёслы гожтэтсэ гожтӥз? б) Малы вераны луэ, Павеллэн гожтэтэз дырыз дыръя гожтэмын вал шуыса?
ИЕРУСАЛИМЫН но Иудеяын улӥсь христианъёс пӧртэм шуг-секытъёсын пумиськылӥзы. Кылсярысь, Иисуслэн кулэмез бере ик али гинэ кылдэм кенеш лек уйылон-уллянъёсын пумиськиз (Ап. уж. 8:1). Нош асьме вакытысь 46-тӥ арын сютэм вакыт кутскиз, кудӥз сэрен тросэз христианъёс куанермизы (Ап. уж. 11:27—30). Но вал вакыт, куке соос туж лек уйылон-уллянъёсын ӧз пумиськылэ. Кылсярысь, асьме вакытысь 61-тӥ ар котырын апостол Павел святой духлэн валтэмез улсын агайёсызлы но сузэръёсызлы гожтэт гожтӥз. Лыдэ басьтоно ке сое, мар соосты азьланяз возьма вал, гожтэт дырыз дыръя гожтэмын вал. Малы?
2 Матэктэ вал бадӟым куректон но Иерусалимлэн куашканэз, кудӥз сярысь Иисус азьло ик вераз вал (Лука 21:20). Павел но, Иудеяысь вын-агайёс но пыр-поч ӧз тодэ, ку со луоз. Но со дырозь кылем дыре кенеш солы дасяськыны быгатэ вал, осконэз но чиданэз будэтыса. Нош Павеллэн гожтэтэз соослы юрттыны быгатэ вал (Евр. 10:25; 12:1, 2).
3. Малы Еврейёслы гожтэт туннэ но христианъёслы юрттыны быгатэ?
3 Нырысетӥ даурен ӵошатыса, милемыз эшшо но бадӟым куректон возьма (Матф. 24:21; Усьт. 16:14, 16). Соин ик ойдолэ эскеромы, кызьы визь-кенешъёс, кудъёссэ Иегова Иудеяысь христианъёслы сётӥз, милемлы туннэ юрттыны быгато.
«ВАЕЛЭ ДУН-ШЕКТЭМЛЫКО БЫДЭ ВУОНЭ ДЫРТОМЕ»
4. Кыӵе шуг-секытъёссы вал Иудеяысь христианъёслэн? (Озьы ик учке суредэз.)
4 Иудеяысь христианъёслэн улонзы капчи ӧй вал. Кема дыр ӵоже еврейёс Инмарлэн быръем калыкез вал. Эксэйёсты, кудъёсыз Иерусалимын кивалтӥзы, ачиз Инмар пуктӥз. Озьы ик Иерусалимын вал храм, кудаз адямиос Иеговалы йыбыртъязы. Вань оскымон еврейёс улӥзы Моисейлэн законэзъя но религиозной кивалтӥсьёслэн куронъёссыя. Со куронъёс герӟаськемын вал сиёнэн, вандӥськон сямен но соин, кызьы астэ возёно мукет калыкъёсын. Но Иисуслэн кулэмез бере Моисейлэн законэзъя улыны но курбонъёс вайылыны кулэ ӧй вал ини. Еврейёслы, кудъёсыз христианъёс луизы, Иеговалы мукет сямен йыбыртъяно вал (Евр. 10:1, 4, 10). Соослы но, кинъёслэн юн осконзы вал, кылсярысь, апостол Пётрлы, сыӵе воштӥськонъёс секытэн сётскизы (Ап. уж. 10:9—14; Гал. 2:11—14). Со сяна, выль осконзы сэрен христианъёсты иудей религиозной кивалтӥсьёс уйылӥзы-уллязы.
Иудей религиозной кивалтӥсьёслэсь кылзӥськем интые, христианъёслы зэмлыкъя улоно вал. (Учке 4-тӥ но 5-тӥ абзацъёсты.)
5. Кыӵе эшшо шуг-секытъёсын пумиськизы на Иудеяысь христианъёс?
5 Иудеяысь христианъёс вылэ кык паласен зӥбо вал. Одӥг паласен соослы пумитъяськизы иудей религиозной кивалтӥсьёс, нош мукет паласен — кенешысь куд-ог христианъёс. Религиозной кивалтӥсьёс христианъёс луись еврейёсты уйылыса-улляса возё вал. Нош кенешысь куд-ог еврейёс куро вал Моисейлэн законэзъя улыны, уйылон-уллянъёслэсь палэнскон понна, вылды (Гал. 6:12). Мар юрттыны быгатэ вал христианъёслы Иеговалы оскымон кыльыны?
6. Мар карыны ӧтиз Павел агайёссэ но сузэръёссэ? (Еврейёслы 5:14—6:1).
6 Аслаз гожтэтаз Павел агайёсты но сузэръёсты ӧтиз Инмарлэсь Кылзэ мур эскерыны. (Лыдӟе Еврейёслы 5:14—6:1.) Еврей Гожтэмъёсты кутыса, Павел валэктӥз, христианъёслэн Иеговалы йыбыртъямзы иудейёслэн йыбыртъямзылэсь трослы умойгес луэ шуысаa. Павеллэн потэ вал, христианъёс тросгес тодон-валан мед басьтозы но зэмлыкез умойгес мед валалозы шуыса. Та соослы юрттысал зэмос луисьтэм дышетонъёсты тодманы но соосты палэнтыны.
7. Кыӵе шуг-секытъёсын ми пумиськиськомы туннэ?
7 Нырысетӥ даурысь христианъёс сямен, ми но ялан кылӥськомы сое, мар Иеговалэн шонерлыко куронъёсызлы пумит мынэ. Тушмонъёсмы милемыз янгыше уськытон понна муг утчаса гинэ уло. Кылсярысь, соос милемыз тэргало азон-калгон пумысен Иеговалэн куронъёсызъя улэммы понна. Соослэн верамзыя, туэ озьы уг уло ини но сыӵе куронъёс туж чурытэсь (Мад. 17:15). Асьме нуналъёсы адямиослэн малпаськемзы но Инмарлэн малпаськемез пумен пӧртэм но пӧртэм луэ. Соин ик милемлы валаны кулэ, кытын зэмлык, нош кытын пӧяськон. Озьы ик номырлы лэзёно ӧвӧл милемыз кышкатыны но Иеговалэсь палэнтыны (Евр. 13:9).
8. Мар милемлы юрттоз быдэ вуэм христианъёс луыны?
8 Павел еврейёсты ӧтиз: «Ваелэ дун-шектэмлыко быдэ вуонэ дыртоме» (Евр. 6:1). Солэн визь-кенешезлэсь милемлы но кылзӥськоно. Милемлы Библиез мур эскероно но Иегова сямен малпаськыны дышетсконо. Тае вань улытозямы лэсьтоно, пылатӥськеммы дырозь гинэ ӧвӧл. Кемалась-а ми зэмлыкын, ӧвӧл-а, ваньмылы Инмарлэсь Кылзэ ялан лыдӟоно но эскероно (Пс. 1:2). Ас поннамы Библиез эскерон юрттоз милемлы осконмес юнматыны. Павел оскон сярысь аслаз гожтэтаз туж трос вера (Евр. 11:1, 6).
«АСЬМЕОС ЛУЛЭЗ УТЁН ПОННА ОСКОН БОРДЫН СЫЛӤСЬЁС ПӦЛЫСЬ»
9. Малы Иудеяысь христианъёслы юн оскон кулэ вал?
9 Иудеяысь христианъёслы, матэктӥсь куректон пыр потон понна, юн оскон кулэ вал (Евр. 10:37—39). Иисус вераз, Иерусалимез ожгарчиос котыртозы шуыса. Соку дышетскисьёсызлы гурезьёсы пегӟоно вал. Та косонлэсь кылзӥськоно вал вань христианъёслы — соослы но, кудъёсыз городын улӥзы, озьы ик соослы но, кудъёсыз со котырын улӥзы (Лука 21:20—24). Вашкала дыръя, тушмонъёс урдскыку, адямиос пегӟо вал городэ, кудӥз юн борддоръёсын котыртэмын вал. Соин ик гурезьёсы пегӟоно шуыса кивалтэт валантэм потыны быгатэ вал но, Иисуслэсь кылзӥськон понна, юн оскон кулэ вал.
10. Мар карыны мылкыдзэс ӝутэ вал юн оскон христианъёсты? (Еврейёслы 13:17).
10 Озьы ик Иудеяысь христианъёслы осконо вал агайёслы, кудъёсыз пыр Иисус кенешен кивалтӥз. Тӧроос кенешлы пыр-поч кивалтэт сётӥзы, дыр, ку но кытчы пегӟоно. (Лыдӟе Еврейёслы 13:17.) Грек кыл, кудӥз Еврейёслы 13:17 «кылзӥськелэ» шуыса берыктэмын, уг возьматы, адями кин ке косэмъя гинэ кылзӥське шуыса. Со возьматэ: адями кылзӥське, малы ке шуоно оске солы, кин кивалтэт сётэ. Соин ик христианъёслы дышетсконо вал тӧроослы оскыны куректон вуэмлэсь азьло. Соос уйылон-уллянъёс ӧвӧлтэм дыръя тӧроослэсь кылзӥськысалзы ке, соослы капчигес луысал секыт дыръя но соослэсь кылзӥськыны.
11. Малы милемлы юн оскон кулэ?
11 Милемлы но юн оскон кулэ. Тросэзлэн кылэмзы ик уг поты, та дуннелы ӝоген пум вуоз шуыса. Талы оскеммы понна соос милемыз серем каро (2 Пётр 3:3, 4). Библиын бадӟым куректон сярысь гожтэмын ке но, троссэ ми ум тодӥське. Соин ик милемлы юн оскон кулэ, солэн дырыз одно ик вуоз но Иегова ми сярысь соку сюлмаськоз шуыса (Авв. 2:3).
12. Мар милемлы юрттоз бадӟым куректон пыр потыны?
12 Озьы ик милемлы осконмес юнматоно, Иегова «оскиськымон, визьмо ляльчи» пыр кивалтэт сётэ шуыса (Матф. 24:45). Бадӟым куректон дыръя милемлы валамон кивалтэт сётэмын луоз, дыр. Кылзӥськимы ке, ми утиськыны быгатомы. Соку югдурмы туж тупалоз нырысетӥ даурысь югдурлы, куке Иерусалимез рим ожгарчиос котыртӥзы. Али самой тупась дыр агайёслы осконмес юнматыны, кудъёсыз Иеговалэн организацияз кивалтон ужез нуо. Ми соослэсь али ӧм ке кылзӥське, азьланяз но ум кылзӥське, дыр.
13. Малы вераны луоз, визь-кенеш, кудӥз гожтэмын Еврейёслы 13:5, дырыз дыръя сётэмын вал шуыса?
13 Гурезьёсы пегӟыны ӧтёнэз возьмакузы, христианъёслы огшоры улоно вал но коньдонэз яратоно ӧй вал. (Лыдӟе Еврейёслы 13:5.) Куд-огъёсыз сютэм но куанер улӥзы (Евр. 10:32—34). Куке но соос ӟеч ивор понна малэсь ке но куштӥськыны дась вал. Озьы ке но, дыр ортчыса, куд-огъёсыз коньдон но ваньбур люканы кутскизы. Но, Иерусалим куашкаку, коньдон соослы ӧй юрттысал (Иак. 5:3). Коньдонэз яратон соослы люкетысал коркаоссэс кельтыны но бызьыса кошкыны.
14. Кызьы ми учкомы коньдон но ваньбур шоры, милям юн осконмы луиз ке?
14 Ми оскиськомы ке, ӝоген Иегова та лек дуннеез быдтоз шуыса, ми ум малпалэ, коньдон но ваньбур — улонын валтӥсез шуыса. Бадӟым куректон дыръя коньдон нокыӵе пайда уз вайы. Библиын вераське, адямиос «азвесьсэс... ульчае зӥртозы» шуыса. Соос валалозы, «Кузё-Инмарлэн вожпотон нуналаз азвесьсы но, зарнизы но... соосты утьыны» уз быгаты шуыса (Иез. 7:19). Соин ик тросгес но тросгес коньдон поттыны тыршем интые, огшоры улоно. Ми валаськомы, асьмелэн но семьямылэн ваньмыз кулэез мед луоз шуыса, ужаны кулэ. Но милям потэ, Иеговалы ужан-тыршон улонамы валтӥсез мед луоз шуыса. Соин ик визьмо ӧй луысал пунэмаськыны яке кулэтэм арбериосты басьтылыны. Озьы ик чакласьконо, ваньбур улонамы валтӥсез медаз луы шуыса (Матф. 6:19, 24). Та дуннелэн пумыз матэктэмъя ваньмылы быръёно луоз, кин вылэ ми оскиськомы: Иегова вылэ яке ваньбурмы вылэ.
«ТӤ КОТЬМАЕ ЧИДАСА УЛЫНЫ КУЛЭ»
15. Малы Иудеяысь христианъёслы туж кулэ вал чидан?
15 Иудеяысь христианъёсты азьланяз шуг-секытъёс возьмазы, соин ик соослы чидан кулэ вал (Евр. 10:36). Кин ке но уйылон-уллянъёсын азьвыл пумиськылӥз ке но, тросэз соосын пумиськылэмын ӧй вал. Соин ик Павел тодазы вайытӥз, соослы уйылон-уллянъёслы дасяськоно но, Иисус сямен, кулытозязы оскымон луыны дась луоно шуыса (Евр. 12:4). Трос еврейёс лекъяськыса улӥзы, малы ке шуоно калыксы пӧлысь трос адямиос христианъёс луизы. Еврейёслы гожтэтэз гожтэмезлэсь кӧня ке арлы азьлогес Павел Иерусалиме лыктӥз. Отын 40-лэсь но тросгес еврейёс, «огазе люкаськыса, кескич сьӧд уж малпазы,— Инмар азьын кыл сётӥзы: Павелэз виытозязы, сиськытэк, юытэк улыны» (Ап. уж. 22:22; 23:12—14). Христианъёсты адӟемпотостэм каризы но уйылӥзы-уллязы ке но, соослы азьланяз но кулэ вал Инмарлы йыбыртъян понна огазе люкаськылыны, ӟеч иворез тодытыны но юн осконэн улыны.
16. Кызьы Еврейёслы гожтэт милемлы юрттэ шуг-секытъёс шоры шонер учкыны? (Еврейёслы 12:7).
16 Мар юрттыны быгатэ вал Иудеяысь христианъёслы шуг-секытъёсты чиданы? Соос шоры шонер учкон. Павел валэктӥз, куддыръя Инмар шуг-секытъёсты уг быдты шуыса, христианъёсты малы ке но дышетон понна. (Лыдӟе Еврейёслы 12:7.) Кылсярысь, секыт дыръя адями христиан сямъёсты будэтыны быгатэ. Иудеяысь христианъёс малпасалзы ке, кыӵе пайда соослы вайыны быгато шуг-секытъёс, соослы капчигес луысал ваньзэ чиданы (Евр. 12:11).
17. Малы дышетскиз Павел, уйылон-уллянъёсын пумиськыса?
17 Павел ӧтиз агайёсты но сузэръёсты шуг-секытъёсты чиданы. Со быгатэ вал та пумысен умой визь-кенеш сётыны. Малы? Куке но со ачиз христианъёсты уйылӥз-улляз, нош христиан мурт луэмез бере сое ассэ уйылӥзы-уллязы. Павел трос бадӟым шуг-секытъёсын пумиськылӥз (2 Кор. 11:23—25). Соин ик со тодэ вал, мар кароно, соосты чидан понна: ас вылад оскиськем интые, Иегова вылэ оскиськоно. Павел юн осконэн шуиз: «Уг кышка, Кузё-Инмар мон палан» (Евр. 13:6).
18. Мар ваньмес азьланяз возьма но мар милемлы кароно али?
18 Куд-ог агайёсмы али уйылон-уллянъёсын пумисько. Кызьы милям соослы юрттэммы луэ? Соос понна вӧсяськоно но быгатэммыя уж вылын юрттоно (Евр. 10:33). Библиын гожтэмын: «Ваньзэс Иисус Христос бордын шонерлыко улыны кутскисьёсты улляса-ӝикатыса возьыны кутскозы» (2 Тим. 3:12). Соин ик котькудмылы уйылон-уллянъёслы дасяськоно. Ойдолэ Иегова вылэ быдэсак оскиськомы но юн оскомы, маин гинэ ми медам пумиське, со милемлы юрттоз шуыса. Пуктэм дыре со котькуд оскымон ужась-тыршисьсэ вань шуг-секытъёслэсь мозмытоз (2 Фес. 1:7, 8).
19. Мар милемлы юрттоз бадӟым куректонлы дасяськыны? (Озьы ик учке суредэз.)
19 Озьыен, Павеллэн гожтэтэз нырысетӥ даурысь христианъёслы юрттӥз матэктӥсь куректонлы дасяськыны. Павел агайёсты ӧтиз Гожтэмъёсты мур эскерыны. Соку соос быгатысалзы зэмос луисьтэм дышетонъёсты тодманы но соосты палэнтыны. Озьы ик соослы осконзэс юнматоно вал. Со соослы юрттысал соку ик кылзӥськыны Иисуслэсь но соослэсь, кинъёсты со пуктӥз кенешен кивалтыны. Со сяна, Павел христианъёслы юрттӥз чидан сямзэс будэтыны. Со понна соослы шуг-секытъёс шоры шонер учконо вал но тодазы возёно вал, соос пыр Иегова малы ке но дышетыны быгатэ шуыса. Ойдолэ ми но та визь-кенешъёсты улонамы пыртомы. Соку ми быгатомы пумозяз Инмарлы оскымонэсь кыльыны (Евр. 3:14).
Иегова христианъёсты чидамзы понна бакель кариз. Иудеяысь пегӟемзы бере но соос ӵош люкаськылэмысь ӧз дугдэ. Малы та милемыз дышетэ? (Учке 19-тӥ абзацез.)
126-ТӤ КЫРӞАН Сазь но, сак но, юн но тӥ луэ!
a Нырысетӥ люкетын Павел сизьым пол Еврей Гожтэмъёсысь кылъёсты вера, возьматон понна, христианъёслэн йыбыртъян амалзы иудейёслэн йыбыртъян амалзылэсь трослы умойгес шуыса (Евр. 1:5—13).