Кызьы Иегова милемлы юрттэ шуг-секытъёсты чиданы

1. Малы милемлы юн луыны кулэ но кин милемлы юрттыны быгатэ? (1 Пётр 5:10).

ТА СЕКЫТ берпум нуналъёсы Иеговалэн ужась-тыршисьёсызлы юн луыны кулэ. Кинлэн ке но эмъяны луонтэм висёнэз вань. Кин ке но матысь адямиез кулэмен сэрен куректэ. Нош кинлы ке но семьяез яке кивалтӥсьёс пумитъясько (Матф. 10:18, 36, 37). Нош кыӵе шуг-секытъёсын пумиськиськод тон? Юн оскы, Иегова тыныд ваньзэ чиданы но юн луыны юрттоз шуыса. (Лыдӟе 1 Пётрлэсь 5:10.)

2. Кин милемлы юрттэ юнэсь луыны?

² Юн адями, уйылон-уллянъёс, визь сынаськонъёс но мукет шуг-секытъёс шоры учкытэк, шумпотыса Иеговалы ужа-тырше. Со оске, азьланяз ваньмыз умой луоз шуыса. Иегова ӧй юрттысал ке, ми пӧлысь нокин но шуг-секытъёсты чиданы ӧй быгатысал. «Мертантэм бадӟым кужым... Инмар бордысь потэ» (2 Кор. 4:7). Та статьяын ми эскеромы ньыль амалъёсты, кызьы Иегова милемлы юрттэ юнэсь луыны. Озьы ик ми тодомы, мар кароно, Иегова милемлы мед юрттоз шуыса.

ВӦСЯСЬКОН

3. Малы вераны луэ, вӧсяськон — паймымон кузьым шуыса?

³ Юн луыны юрттон понна, Иегова милемлы паймымон кузьым лэсьтӥз — со вӧсяськон. Сьӧлыко луэммы шоры учкытэк, милям Инмарен вераськеммы луэ (Евр. 4:16). Малпалэ гинэ: ми быгатӥськомы Иеговаен вераськыны котькыӵе дыре, котьмар сярысь но котькыӵе кылын. Кытын гинэ ми медам луэ, пытсэтын яке воксё огнамы, со милемыз кылэ (Иона 2:2, 3; Ап. уж. 16:25, 26). Сюлмаськеменымы сэрен тупась кылъёс но уг шедё ке, Иегова вала, мар милям вераммы потэ (Рим. 8:26, 27). Зэм но, вӧсяськон — паймымон кузьым!

4. Малы милям оскеммы луэ, Иегова милемлы ответ сётоз шуыса, куке ми сое куриськомы милемыз юнматыны?

⁴ Библиын вераське: «Солэн эрикезлы тэрытскыса, мае гинэ ум куриське, Со асьмеды кылзэ» (1 Иоанн 5:14). Нош быгатӥськомы-а ми Иеговаез курыны, шуг-секытъёс дыръя со милемлы юнэсь луыны мед юрттоз шуыса? Быгатӥськомы. Со Инмарлэн эрикезъя луэ. Малы озьы вераны луэ? Ми Инмарлы оскымонэсь луимы ке, со Шайтанлы ответ сётыны быгатоз (Мад. 27:11). Со сяна, Библиын гожтэмын, Инмарлэн потэ шуыса «солы сюлмынызы оскиськымонэсь луисьёсты ӟечкын» воземез (2 Пар. 16:9). Ми оскыны быгатӥськомы, милемыз юнматыны Иеговалэн кужымез но, мылкыдыз но вань шуыса (Ис. 30:18, ВД; 41:10; Лука 11:13).

5. Кызьы вӧсяськон милемлы буйгатскыны юрттэ? (Исаия 26:3).

⁵ Куке ми Иеговалы сюлмаськонъёсмы сярысь вераськомы, «Инмарлэн каньыллыкез», кудӥз «котькыӵе визьлэсь но вылӥын», милесьтым сюлэммес но визьмес уте (Флп. 4:7). Малпаськомы, мае со возьматэ. Иеговалэн ужась-тыршисьёсыз луисьтэм адямиос но шуг-секытъёсын пумиськыло. Соос пӧртэм сямен буйгатскыны тыршо. (Ӵошатэ Матфейлэсь 12:43—45.) Но каньыллыкез, кудзэ сётэ Иегова вӧсяськеммы бере, соослэн буйгатскеменызы ӵошатыны ик уг луы. Куке ми Иеговалы вӧсяськиськомы, со адӟе, ми быдэсак со вылэ оскиськиськомы шуыса. Соин ик со милемлы юрттэ тупаса но каньыл сюлмын улыны. (Лыдӟе Исаиялэсь 26:3.) Кызьы? Кылсярысь, со юрттэ тодамы вайыны Библиысь буйгатӥсь кылбуръёсты. Солы луыса ми шӧдӥськомы, Иегова милемыз яратэ но ми сярысь сюлмаське шуыса. Соку милям сюлэммы но визьмы каньыллыкен тырмо (Пс. 61:2, 3).

6. Мар сярысь вӧсяськыны луэ? (Озьы ик учке суредэз.)

⁶ Мар тон карыны быгатӥськод. Шуг-секытъёс дыръя «сюлмаськонъёстэ Кузё-Инмар кие сёт» но, каньыллык курыса, солы вӧсяськы (Пс. 54:23). Озьы ик солэсь визьлык кур, шуг-секытэз сэрттон-пертчон понна (Мад. 2:10, 11). Эн вунэты Иеговалы тау шуыны (Флп. 4:6). Адӟыны тыршы, кызьы со тыныд секыт дыръя юрттэ, но юрттэмез понна тау шу. Шуг-секытъёсыныд сэрен эн вунэты бакель каронъёсыд сярысь, кудъёсыз тынад вань ини (Пс. 15:5, 6).

ИНМАРЛЭН КЫЛЫЗ

7. Кызьы Библиез эскерон юрттоз милемлы юнэсь луыны?

⁷ Юнэсь луыны юрттон понна, Иегова милемлы аслэсьтыз Кылзэ сётӥз. Библиын вань трос кылбуръёс, кудъёсыз милемыз оскыто, Инмар милемлы юрттоз шуыса. Тани соос пӧлысь одӥгез. Матфейлэсь 6:8 гожтэмын: «Атайды уго Солэсь куриськемдылэсь азьвыл ик тодэ, мар тӥледлы кулэ». Та кылъёсты вераз Иисус, нош со Иеговаез котькинлэсь умой тодэ. Соин ик, кыӵе гинэ шуг-секытъёсын ми медам пумиське, милям оскеммы луэ: Иегова тодэ, мар милемлы кулэ, но со милемлы одно ик юрттоз. Библиын вань трос мукет малпанъёс но, кудъёсыз милемлы юрттозы юнэсь луыны (Пс. 93:19).

8. a) Вералэ пример, кызьы Библиысь возетъёс милемлы юртто секыт дыръя юнэсь луыны. б) Мар милемлы юрттоз кулэ дыръяз кулэ возетэз тодамы вайыны?

⁸ Библиын вань возетъёс, кудъёсыз милемлы юртто секыт дыръя юнэсь луыны. Солэн визь-кенешъёсыз милемлы юртто визьмо ужпумъёс кутылыны (Мад. 2:6, 7). Кылсярысь, Библия вера, ӵуказе сярысь мултэс сюлмаськоно ӧвӧл шуыса. Со интые котькуд нунал Иегова вылэ оскиськыса улоно (Матф. 6:34). Ми дышимы ке котькуд нунал Библиез лыдӟыны но со вылын малпаськыны, милемлы капчигес луоз кулэ дыръяз кулэ возетэз тодамы вайыны.

9. Кызьы Библиысь учыръёс осконмес юнмато, Иегова ужась-тыршисьёсызлы юрттэ шуыса?

⁹ Озьы ик Библиын гожтэмын ми кадь адямиослэн учыръёссы, кудъёсыз Иегова вылэ оскиськизы но солэсь юрттэт басьтылӥзы (Иак. 5:17; Евр. 11:32—34). Со учыръёс вылын малпаськон осконмес юнматэ, Иегова — «милям утиськон интымы, кужыммы, шугадӟонъёс дыръя — ӝог юрттӥсьмы» шуыса (Пс. 45:2). Куке ми лыдӟиськомы, кызьы вашкала дыръя Иеговалэн ужась-тыршисьёсыз солы оскымон ужазы-тыршизы, милям но потэ, соос кадь, юн осконэн улэммы (Иак. 5:10, 11).

10. Кызьы тӥледлы юрттыны быгатэ Инмарлэн Кылыз?

¹⁰ Мар тон карыны быгатӥськод. Котькуд нунал Инмарлэсь Кылзэ лыдӟы. Гожъя Библиысь кылбуръёсты, кудъёсыз тыныд тужгес но юртто. Тросэзлы кельше нуналэз кутскыны, «Библиез эскериськомы» брошюраез лыдӟыса. Ӵукна ик лыдӟид ке кылбурез но солы валэктонэз, лумбыт малпаськыны луэ Библиысь буйгатӥсь малпанъёс вылын. Тани мар луиз Мари́a нимо сузэренымы. Атаезлэсь но, анаезлэсь но рак шедьтӥзы. Мар солы юрттӥз кулытозязы ик соос сярысь сюлмаськыны? Со вера: «Ӵукналы быдэ мон лыдӟисько вал „Котькуд нунал Библиез эскериськомы“ брошюраысь кылбурез но мур малпаськисько вал со сярысь, мае мон отысь тодӥ. Со мыным юрттэ вал, шуг-секытъёсы сярысь малпаськем интые, Иегова сярысь но солэн паймымон кылсётонъёсыз сярысь малпаськыны» (Пс. 60:3).

АГАЙЁСМЫ НО СУЗЭРЪЁСМЫ

11. Мар тӥ шӧдӥськоды, куке малпаськиськоды агайёс но сузэръёс сярысь, кудъёсыз секыт дыръя юн кылизы?

¹¹ Ми быгатӥськомы секыт дыръя юн луыны агайёслы но сузэръёслы луыса, кудъёссэ кузьмаз милемлы Иегова. Ми тодӥськомы, огнамы ӧвӧл шуыса, малы ке шуоно таӵе ик курадӟонъёс милям агай-вынъёсмы но чидано луо (1 Пётр 5:9). Соин ик, кыӵе гинэ секыт милемлы медам луы, кин ке но со выллем шуг-секытъёс пыр потылӥз ини но Инмарлы оскымон кылиз. Озьыен, ми но быгатомы! (Ап. уж. 14:22).

12. Кызьы милемлы юртто агайёс но сузэръёс но кызьы ми соослы юрттыны быгатӥськомы? (2 Коринфъёслы 1:3, 4).

¹² Шуг-секытъёс дыръя агайёс но сузэръёс милемлы кылын но ужен юрттыны быгато. Малпаськомы апостол Павел сярысь. Куке со одӥг коркан жильыетын пукиз, огъя оскисьёсыз сое буйгато но уж вылын юртто вал. Аслаз гожтэтъёсаз со ӵем соослы тау шуэ, соосты нимынызы вераса (Флп. 2:25, 29, 30; Кол. 4:10, 11). Туннэ но, куке ми шуг-секытъёсын пумиськиськомы, агайёс но сузэръёс милемлы соку ик юртто. Нош соослы юрттэт кулэ ке, ми но юрттыны дыртӥськомы. (Лыдӟе 2 Коринфъёслы 1:3, 4.)

13. Мар юрттӥз Майя сузэрлы секыт дыръя юн кыльыны?

¹³ Тани кызьы агайёс но сузэръёс юрттӥзы Россиысь Майя сузэрлы. 2020-тӥ арын со дорын обыск ортчиз. Берлогес сое судить каризы мукетъёсызлы осконэз сярысь верамез понна. Майя вера: «Секыт дыръя агайёс но сузэръёс мыным жингырто, гожъяло но оскыто вал, монэ ярато шуыса». Со ватса: «Мон котьку тодӥсько вал, мынам бадӟым но яратӥсь семьяе вань шуыса. Нош 2020-тӥ арысен мон сое эшшо но умой валай».

14. Мар кароно, агайёс но сузэръёс милемлы юрттыны мед быгатозы шуыса? (Озьы ик учке суредэз.)

¹⁴ Мар тон карыны быгатӥськод. Тон али кыӵе ке шуг-секытэз чидано луиськод ке, тыныд тужгес но кулэ огъя оскисьёсыныд матысь кусыпъёс возьыны. Эн возьдаськы тӧроослэсь юрттэт курыны. Соос тыныд «тӧллэсь утиськон маке кадь... жобаськись куазьлэсь утись шобырет кадь» луозы (Ис. 32:2). Эн вунэты, агайёс но, сузэръёс но шуг-секытъёсын пумиськыло шуыса. Тыршы ӟеч уж лэсьтыны соослы, кинъёслы али секыт. Соку тон астэ умойгес шӧдод но аслэсьтыд шуг-секытъёстэ чиданы быгатод (Ап. уж. 20:35).

ВУОНОЕЗЛЫ ОСКОН

15. Кызьы вуоноезлы оскон юрттэ вал Иисуслы но кызьы со юрттэ милемлы? (Еврейёслы 12:2).

¹⁵ Юнэсь луыны юрттон понна, Иегова милемлы вуоноезлы оскон кузьмаз (Рим. 15:13). Тодамы ваёмы, кызьы вуоноезлы оскон Иисуслы юрттӥз музъем вылын улонэзлэсь самой секыт нуналзэ чиданы. (Лыдӟе Еврейёслы 12:2.) Иисус тодэ вал, оскымон кыльыса, со Иеговалэсь ӟеч нимзэ утёз шуыса. Озьы ик со возьма вал дырез, куке Атаез доры берытскоз, Эксэй луоз но вынъёсыныз ӵош музъемен кивалтоз. Ӵапак озьы ик милемлы но Инмарлэн выль дуннеяз пырак улыны оскон юрттэ чиданы котькыӵе шуг-секытъёсты, кудъёсыныз ми Шайтанлэн дуннеяз пумиськылӥськомы.

16. Кызьы вуоноезлы оскон юрттӥз одӥг сузэрлы но малы тӥледыз дышето солэн кылъёсыз?

¹⁶ Тани кызьы вуоноезлы оскон юрттӥз Россиысь Алла сузэрлы. Солэсь картсэ арестовать каризы но следственной изоляторе пуктӥзы. Куке Аллалэсь юазы, мар сое юнматэ, со шуиз: «Тужгес но вӧсяськон но азьпал улон сярысь малпаськон. Со сяна, мон тодам возьыны тыршисько, таин улон ӧз быры шуыса. Иегова одно ик вормоз, ми но соин ӵош».

17. Кызьы милям тау кареммес возьматэммы луэ вуоноезлы оскон понна, кудзэ кузьмаз милемлы Иегова? (Озьы ик учке суредэз.)

¹⁷ Мар тон карыны быгатӥськод. Дыр висъя, азьпал улон сярысь малпаськон понна, кудзэ дасяз тыныд Иегова. Син азяд пукты, кызьы тон шумпотыса выль дуннеын улӥськод! Со улонэн ӵошатыса, вань шуг-секытъёс, кудъёсыныз ми али пумиськылӥськомы, вакчиесь но капчиесь (2 Кор. 4:17). Озьы ик котькуд тупась учыре аслад осконэд сярысь мукетъёсызлы вера. Малпаськы адямиос сярысь, кудъёсыз Иеговалэн ужась-тыршисьёсыз ӧвӧл на. Соослэн но трос шуг-секытъёссы вань. Но соос Инмарлэн паймымон кылсётонъёсыз сярысь уг тодо. Оло нош, тонэн вакчияк гинэ вераськыса, соослэн потоз Инмарлэн Эксэйлыкез сярысь тросгес тодэмзы.

18. Малы милям оскеммы луэ Иеговалэн кылсётонъёсызлы?

¹⁸ Иов трос шуг-секытъёсын пумиськиз. Юн кыльыса, со Иеговалы шуиз: «Тодӥсько, мар лэсьтыны Тынад мылкыдыд вань, Тон сое ваньзэ лэсьтыны быгатӥськод, сое дугдытыны уг луы» (Иов 42:2). Иов валаз: номыр уг быгаты Иеговалы люкетыны аслэсьтыз кылсётонъёссэ быдэстыны. Секыт дыръя та малпан милемыз но юнматыны быгатэ. Эскеромы таӵе примерез. Шуом, кышномурт кема дыр ӵоже ини секыт висе. Солэн мылкыдыз воксё куашказ ини, малы ке шуоно со трос эмъясьёс доры ветлӥз, но нокин солы юрттыны ӧз быгаты. Но собере со туж умой эмъясез шедьтэ. Эмъясь вера, малы со висе, но валэктэ, кызьы сое эмъялоз. Кышномурт ӧз бурмы на ке но, эмъясьлэсь верамзэ кылыса, солы умойгес ини. Вуоноезлы оскон сое юнматӥз, малы ке шуоно со тодэ, одно ик бурмоз шуыса. Ми но ваньзэ чиданы быгатомы, малы ке шуоно оскиськомы, рай сярысь Инмарлэн кылсётонэз одно ик быдэсмоз шуыса.

19. Мар милемлы юрттоз секыт дыръя юн луыны?

¹⁹ Та статьяын ми эскеримы, кызьы Иегова милемлы юрттэ секыт дыръя юн луыны. Со милемлы кузьмаз вӧсяськонэз, Библиез, агайёсты но сузэръёсты, озьы ик вуоноезлы оскон. Иеговалэсь юрттэмзэ ӧм палэнтэ ке, со милемлы юрттоз котькыӵе шуг-секытъёс пыр потыны (2 Кор. 4:7). Соку ми ас синмынымы адӟомы, кызьы Шайтанлэн дуннеез быдтэмын луоз.