ЭСКЕРОН ПОННА 7-ТӤ СТАТЬЯ
15-ТӤ КЫРӞАН Данъя Иеговалэсь Пизэ!
Кыӵе пайда вае тӥледлы Иеговалэн простить каремез?
«Тон дорын, Кузё-Инмаре, сьӧлыкез куштон инты» (ПС. 129:4).
МИ ТОДОМЫ
Библиысь куд-ог яркыт примеръёсты, кудъёсыз милемлы юрттозы эшшо но зол дунъяны Иеговалэсь простить каремзэ.
1. Малы адямиослэсь простить каремзэс валаны котьку ик капчи ӧвӧл?
«МОН тонэ простить карисько». Пуктэ син азяды, адями, кудзэ тӥ вӧсь кариды, тӥледлы та кылъёсты вера шуыса. Тае кылыса, тӥляд сюлэмды каньыл луоз, вылды. Но мар малпаса адями сое вера? Возьмато-а солэн кылъёсыз, со ваньмыз сярысь вунэтӥз но тӥляд кусыпъёсты тупазы шуыса? Яке луэм учыр сярысь адямилэн тодаз вайылэмез уг поты ни, но азьвыл кадь кусыпъёсты тӥляд уз луэ ни? Адӟиське, адямиослэсь простить каремзэс валаны котьку ик капчи ӧвӧл.
2. Мар Библиын вераське Иеговалэн простить каремез сярысь? (Озьы ик учке сноскаез.)
2 Псаломъёсты гожъясь Иегова сярысь шуиз: «Тон дорын, Кузё-Инмаре, сьӧлыкез куштон интыa, Тынэсьтыд кышканэн, Тонэ гажаса ми мед уломы» (Пс. 129:4). Иегова кадь простить карыны нокин но уг быгаты. Куке вераськон мынэ Инмарлэн простить каремез сярысь, Библиын куддыръя кутӥське еврей кыл, кудӥз ноку уг кутӥськы, куке вераськон мынэ адямиослэн простить каремзы сярысь.
3. Маин Иеговалэн простить каремез пӧртэм адямиослэн простить каремзылэсь? (Исаия 55:6, 7).
3 Простить карыкуз Иегова адямилэсь сьӧлыкъёссэ ӵуше. Инмарлэн но адямилэн кусыпъёссы тупатско. Ми туж тау кариськомы Иеговалы, со милемыз гажа-жаля но быдэсак простить каре шуыса. Со уг жадьы милемыз нош но нош простить карыны. (Лыдӟе Исаиялэсь 55:6, 7.)
4. Кызьы Иегова милемлы валаны юрттэ, мар со сыӵе зэмос простить карон?
4 Иеговалэн простить каремез милям простить кареммылэсь туж пӧртэм бере, быгатӥськомы-а ми валаны, мар со сыӵе зэмос простить карон? Быгатӥськомы. Иегова милемлы тае валэктэ яркыт примеръёс вылын. Куд-огъёссэ ми та статьяын эскеромы. Соос возьматозы, кызьы Иегова сьӧлыкъёсмес куштэ но кусыпъёсмес тупатэ. Со примеръёсты эскерыса, милям инмысь Атаймес яратонмы но солы тау карон мылкыдмы юнмалоз.
ИЕГОВА СЬӦЛЫКЕЗ КУШТЭ
5. Мар каре Иегова милям сьӧлыкъёсынымы, куке милемыз простить каре?
5 Ӵем дыръя Библиын сьӧлык ӵошатӥське секыт ныпъетэн. Тани мар вераз аслаз шӧдонъёсыз сярысь Давид эксэй: «Сьӧлыкъёсы йыр йылам тубизы ни, туж секыт ныпъет кадь монэ зӥбыса возё» (Пс. 37:5). Но ӧпкелись адямиослэсь сьӧлыкъёссэс Иегова куштэ (Пс. 24:18; 31:5). Еврей кыл, кудӥз та кылбуръёсын берыктэмын «куштыны» шуыса, возьматэ «ӝутыны» яке «нуыны» шуэмез. Пуктэ син азяды, кызьы Иегова пельпум вылысьтыды секыт ныпъетэз ӝутэ но сое нуэ.
«Сьӧлыкъёсме куштӥд» (Пс. 31:5)
6. Макем кыдёке Иегова сьӧлыкъёсмес нуэ?
6 Мукет пример возьматэ, макем кыдёке Иегова сьӧлыкъёсмес нуэ. Псалтирьын 102:12 гожтэмын: «Макем кыдёкын шундыӝужан шундыпуксёнысен, сокем кыдёке законлы пумит улэмъёсмес Со палэнтӥз». Шундыӝужан но шундыпуксён ог-огзылэсь туж кыдёкын, солэсь но кыдёкын соос ог-огзылэсь луыны уг быгато, озьы ик соос пумиськыны но уг быгато. Мукет сямен вераса, Инмар сьӧлыкъёсмес самой кыдёкысь интые нуэ. Озьы Иегова возьматэ, милемыз быдэсак простить каре шуыса.
«Макем кыдёкын шундыӝужан шундыпуксёнысен» (Пс. 102:12)
7. Мар каре Иегова милям сьӧлыкъёсынымы? (Михей 7:18, 19).
7 Нош мар каре Иегова сьӧлыкъёсынымы соосты нуэмез бере? Со соосты кытын ке но возе-а? Уг! Езекия эксэй Иегова сярысь гожтӥз: «Мынэсьтым вань сьӧлыкъёсме Аслад сюрлыэд сьӧры сэрпалтӥд» (Ис. 38:9, 17). Пуктэ син азяды, кызьы Иегова ӧпкелись адямилэсь сьӧлыкъёссэ басьтэ но адӟонтэм вылысь соосты сэрпалтэ. Озьы ик та кылъёсты тазьы берыктыны луэ: «Тон лэсьтӥд озьы, сьӧлыкъёсы ӧй но вал кадь». Та выллем малпан гожтэмын Михейлэсь 7:18, 19 (лыдӟе). Отын вераське, Иегова сьӧлыкъёсмес зарезь пыдсы сэрпалтэ шуыса. Вашкала дыръя зарезь пыдсы усем мае ке поттыны уг луы вал ини.
«Мынэсьтым вань сьӧлыкъёсме Аслад сюрлыэд сьӧры сэрпалтӥд» (Ис. 38:17)
«Зарезьлэн пыдэстэм гуаз Тон куштод милесьтым вань сьӧлыкъёсмес» (Мих. 7:19)
8. Мае ми тодӥмы статьямылэн нырысетӥ люкетысьтыз?
8 Кызьы возьмато та примеръёс, простить карыкуз Иегова сьӧлыкъёсмес быдэсак куштэ, возьытлыкмы милемыз медаз йырйы ини шуыса. Давид вераз: «Шудоесь, кинъёслэн законлы пумит улэмъёссы куштэмын, кинъёслэн сьӧлыкъёссы ӵушемын. Шудо со мурт, кинлы Кузё-Инмар сьӧлык уг гожты» (Рим. 4:6—8). Со зэмос простить карон!
ИЕГОВА СЬӦЛЫКЕЗ ӴУШЕ
9. Кыӵе пример валаны юрттэ, Иегова милемыз быдэсак простить каре шуыса?
9 Библиын вань мукет но примеръёс, кудъёсыз возьмато, кызьы мозмытӥсь курбонлы луыса Иегова ӧпкелись адямиослэсь сьӧлыкъёссэс ӵуше. Вераны луоз, со адямиез сьӧлыкъёсызлэсь чылкытатэ (Пс. 50:9; Ис. 4:4; Иер. 33:8). Тани кыӵе пайда вае сыӵе чылкытатон, Иеговалэн верамезъя: «Сьӧлыкъёсын нап-горд ке но луиды, тӥледыз лымы кадь тӧдьы каро; горд басма кадь ке но луиды, тӥледыз тӧдьы ыжгон кадь югыт каро» (Ис. 1:18). Дӥськут горд маин ке саптаськемын ке, сое быдтыны туж секыт. Озьы ке но Иегова милемыз оскытэ, милесьтым сьӧлыкъёсмес ӵушоз, соослэн пытьызы но уз кыльы ни шуыса.
«Сьӧлыкъёсын нап-горд ке но луиды, тӥледыз лымы кадь тӧдьы каро» (Ис. 1:18)
10. Кыӵе эшшо ӵошатон кутӥське на Библиын, возьматон понна, кызьы простить каре Иегова?
10 Кызьы вераськиз ини кылем статьяын, сьӧлыкъёсмес пунэм тыронъёсын ӵошатыны луэ на (Матф. 6:12; Лука 11:4). Ми вордӥськимы туж бадӟым пунэм тыронъёсын. Сьӧлыкаса пунэм тыронъёсмы эшшо но бадӟымесь луо. Но простить карыкуз Иегова пунэм тыронъёсмес ворса. Со кыл уг кутыты ини милемыз сьӧлыкъёс понна, кудъёссэ простить кариз. Куке адямилэсь пунэм тыронъёссэ ворсало, со шумпотэ, солэн сюлмыз каньыл луэ. Иегова милемыз простить кариз бере, ӵапак сыӵе ик шӧдонъёсмы милям но кылдо!
«Пунэмъёсмес... кушты» (Матф. 6:12)
11. Кызьы валано Библиысь кылъёсты, сьӧлыкъёсмы ӵушемын луозы шуыса? (Апостолъёслэн ужъёссы 3:19).
11 Пунэм тыронъёсмес, яке сьӧлыкъёсмес, ворсам сяна, Иегова соосты ӵуше. (Лыдӟе Апостолъёслэсь ужъёссэс 3:19.) Пуктэ син азяды, кызьы адями, кудӥзлы тӥляд пунэм тыронды вань, гожтэмзэ басьтэ но пунэм тырондэс гожма. Но лыдпусъёс адӟисько на. Нош куке гожтэмез ӵушо, со воксё уг адӟиськы ини. Вашкала дыръя, суэз, сирез но вуэз сураса, чернила лэсьто вал. Кот басмаез басьтыса, чернилаен гожтэмез ӵушыны луэ вал. Чернилаен гожтэм пунэм тыронъёсты ӵушо вал ке, соосты быдэсак кушто вал. Мар солэсь азьвыл гожтэмын вал, уг адӟиськы вал ини, со ноку но гожтэмын ӧй вал кадь. Ӵапак озьы ик Иегова но, сьӧлыкъёсмес ворсам сяна, соосты быдэсак ӵуше. Та милемыз туж шумпоттэ! (Пс. 50:11).
«Тӥляд сьӧлыкъёсты мед ӵушиськозы шуыса» (Ап. уж. 3:19)
12. Мае тодыны луэ, сьӧд пилемъёс сярысь примерез эскерыса?
12 Вань на эшшо одӥг пример, кудӥз возьматэ, кызьы Иегова сьӧлыкъёсмес ӵуше. Со вера: «Мон законлы пумит улэмдэ ӵушо, мон сое пилемен ворсало, сьӧлыкъёстэ сьӧд пилемъёс сьӧры вато» (Ис. 44:22, ВД). Простить карыкуз Иегова сьӧлыкъёсмес сьӧд пилемъёс сьӧры ватэ кадь, соин ик соос милемлы но, солы но уг адӟисько ини.
«Мон законлы пумит улэмдэ ӵушо, мон сое пилемен ворсало» (Ис. 44:22, ВД)
13. Мае тӥ шӧдӥськоды, куке Иегова сьӧлыкъёстэс простить каре?
13 Куке Иегова милемыз простить каре, милемлы сьӧлыкъёсмы понна сюлмаськыса улоно ӧвӧл ини. Иисус Христослэн вирыз пунэм тыронъёсмес быдэсак ворса. Пунэм тыронъёсмы сярысь гожтэм но ӧвӧл ини. Озьы Иегова простить каре, куке ми ӧпкелиськомы.
ИЕГОВА МИЛЕМЫН УМОЙ КУСЫПЪЁС ТУПАТЭ
Инмысь Атаймы милемыз простить каре бере, ми соин эшъяськыны быгатӥськомы. (Учке 14-тӥ абзацез.)
14. Малы оскыны луэ, Иегова милемыз быдэсак простить каре шуыса? (Озьы ик учке суредъёсты.)
14 Иегова милемыз простить каре бере, ми соин эшъяськыны быгатӥськомы. Солэн простить каремез юрттэ милемлы сюлмаськытэк улыны. Милемлы кышкано ӧвӧл ини, Инмар, азьвыл сямен ик, милемлы вожзэ поттэ но милемыз кыл кутытыны малпа шуыса. Иегова сыӵе ӧвӧл! Со вера ке, милемыз простить каре шуыса, милям солы оскеммы луэ. Инмар Иеремия пророклы шуиз: «Соослэсь законлы пумит улэмъёссэс Мон кушто, азьланяз сьӧлыкъёссэс но тодам уг ни вайы» (Иер. 31:34). Та выллем кылъёсты гожтӥз апостол Павел но: «Законлы пумит улэмзэс тодам уг ни вайы» (Евр. 8:12). Кызьы валано, Иегова сьӧлыкъёсмес тодаз уз ни вайы шуыса?
«Сьӧлыкъёссэс... тодам уг ни вайы» (Иер. 31:34)
15. Кызьы валано, Иегова сьӧлыкъёсмес тодаз уз ни вайы шуыса?
15 Библиын «тодэ вайыны» кыл котьку ик уг возьматы азьвыл луэм учыр сярысь малпамез. Со возьматыны быгатэ мае ке лэсьтэмез. Кылсярысь, йыруж лэсьтӥсь, кудӥз Иисус вӧзын кортӵогамын вал, Иисусэз куриз: «Аслад Эксэйлыкад вуид ке, монэ буре вай» (Лука 23:42). Йыруж лэсьтӥсь ӧз куры со сярысь малпаны. Со куриз со понна мае ке но лэсьтыны. Соин ик Иисус кылзэ сётӥз со адямиез улӟытыны (Лука 23:43, ВД). Озьыен, куке Иегова вера, сьӧлыкъёсмес тодаз уг ни вайы шуыса, со возьматэ, милемыз простить кариз шуыса. Али но, азьланяз но Инмар милемыз кыл уз кутыты ини.
16. Маин ӵошатэ Библия Иеговалэсь простить каремзэ?
16 Эскеромы эшшо одӥг яркыт примерез. Со милемлы юрттоз дунъяны эрикез, кудзэ сётэ Иеговалэн простить каремез. Сьӧлыко луэменымы сэрен Библия милемыз «сьӧлыклэн ляльчиосыз» шуыса нима. Но Иегова милемыз простить каре бере, ми сьӧлыклэсь мозмытскимы (Рим. 6:17, 22; Усьт. 1:5). Ми шӧдӥськомы сое ик, мае шӧдэ адями, кудӥз мозмытскиз пытсэтын кема дыр ӵоже пукемез бере.
«Тӥ сьӧлыклэсь мозмытскиды» (Рим. 6:22)
17. Кызьы валано, Иеговалэн простить каремез милемыз бурмытэ шуыса? (Исаия 53:5).
17 Лыдӟе Исаиялэсь 53:5. Ми сьӧлыкоесь бере, Библия милемыз ӵошатэ адямиен, кудӥзлэн кулонэ вуттӥсь висёнэз вань. Но Иисуслэн мозмытӥсь курбонэзлы луыса Иегова милемыз бурмытӥз (1 Пётр 2:24). Сьӧлык Иеговаен кусыпъёсмес сӧре, нош Иисуслэн кулэмез луонлык сётэ нош ик Инмарен эшъяськыны. Куке адями зол висемез бере бурме, со туж шумпотэ. Ӵапак озьы ик ми но туж шумпотӥськомы, куке Иеговаен кусыпъёсмы тупатско но ми нош ик солы ярамонэсь луиськомы.
«Солэн яраосыз-гижлоосыз пыр ми бурмимы» (Ис. 53:5)
ДУНЪЯЛЭ ИЕГОВАЛЭСЬ ПРОСТИТЬ КАРЕМЗЭ
18. Мае ми тодӥмы, Иеговалэн простить каремез сярысь Библиысь примеръёсты эскерыса? (Озьы ик учке «Кызьы Иегова простить каре» рамкаез.)
18 Мае ми тодӥмы, Иеговалэн простить каремез сярысь примеръёсты эскерыса? Сьӧлыкъёсмес простить карыкуз, Иегова милемыз быдэсак простить каре. Милям оскеммы луэ, азьланяз соос понна со милемыз кыл уз кутыты ини шуыса. Соин ик милям инмысь Атаенымы умой кусыпъёсмы луыны быгато. Со дыре ик ми тодамы возиськомы, простить карон — со Иеговалэн кузьымез шуыса. Со милемыз ӟеч ужъёсмы понна простить уг кары. Иегова милемыз простить каре, малы ке шуоно милемыз яратэ но гажа-жаля (Рим. 3:24).
19. а) Мар понна тӥ Иеговалы тау кариськоды? (Римъёслы 4:8). б) Мае ми эскеромы вуоно статьяын?
19 Лыдӟе Римъёслы 4:8. Ми туж тау кариськомы Иеговалы милемыз простить каремез понна! (Пс. 129:4). Но со понна мар ке но кароно. Иисус шуиз: «Адямиослы сьӧлыкамъёссэс ӧд ке куштэ, Инмысь Атайды но тӥлесьтыд сьӧлыкамъёстэс уз кушты» (Матф. 6:14, 15). Соин ик туж кулэ Иеговалэсь адӟем карыны но мукетъёсты простить карыны. Вуоно статьяысь ми тодомы, мар со понна кароно.
46-ТӤ КЫРӞАН Туж тау, Иегова
a Нырысь ик Библиын та интыын гожтэмын вал еврей кылъёс, кудъёссэ берыктыны луэ «тон дорын зэмос простить карон» шуыса. Озьы простить карыны Иегова гинэ быгатэ.