ЭСКЕРОН ПОННА 34-ТӤ СТАТЬЯ
3-ТӤ КЫРӞАН Тон милям утиськон интымы
Оскы, Иегова тонэ простить кариз шуыса
«Тон мынэсьтым вань сьӧлыкъёсме куштӥд» (ПС. 31:5).
МИ ТОДОМЫ
Библия оскытэ, ӧпкелимы ке, Иегова милемыз простить кароз шуыса. Малы талы оскыны кулэ?
1, 2. Мар ми шӧдӥськомы, куке Иегова сьӧлыкъёсмес простить каре? (Озьы ик учке вылбамысь суредэз.)
ДАВИД эксэй азьвыл сьӧлыкъёсыныз сэрен сюлмаське вал. Сое возьытлыкез йыръе вал (Пс. 39:13; 50:1, 2, 5). Но со вань сюлмысьтыз ӧпкелиз но валаз, Иеговалэн простить каремез бадӟым шумпотон вае шуыса (2 Экс. 12:13; Пс. 31:1).
2 Ми но туж шумпотӥськомы, куке Иегова милемлы гажан-жалянзэ возьматэ но сьӧлыкъёсмес простить каре. Милемыз туж буйгатэ малпан, Иегова бадӟым сьӧлыкъёсмес но простить карыны дась шуыса! Со понна милемлы вань сюлмысьтымы ӧпкелёно, янгышаммес валано но тыршоно азьланяз сыӵе янгышъёс лэсьтытэк улыны (Мад. 28:13; Ап. уж. 26:20; 1 Иоанн 1:9). Тужгес но ми шумпотӥськомы, простить каремез бере Иегова янгышъёсмес вунэтэ но соос понна кыл уг кутыты ни шуыса (Иез. 33:16).
Давид эксэй трос псаломъёсты гожтӥз со сярысь, кызьы Иегова простить каре. (Учке 1-тӥ но 2-тӥ абзацъёсты).
3, 4. а) Кыӵе шӧдонъёсыз вал одӥг сузэрлэн пылатӥськемез бере? б) Мае ми эскеромы та статьяын?
3 Куддыръя секыт оскыны, Иегова милемыз простить кариз шуыса. Озьы луиз Дже́ннифер сузэрен, кудӥз Иеговалэн Адӟись-Ивортӥсьёсызлэн семьяязы будӥз. Куке со быдэ вуэмын ӧй вал на, анай-атаезлэсь лушкемен со урод ужъёсын вырыны кутскиз. Аръёс ортчыса, Дженнифер Иегова доры берытскиз, быдэсак воштӥськиз но пылатӥськиз. Со вера: «Кенешысь кошкеме бере улонам валтӥсез луиз юон, коньдон но азон-калгон. Со вакытэ мон туж лек вал. Но берлогес мон ӧпкели но туж кури Иеговаез монэ простить карыны. Визьмыным мон валасько вал, Христослэн курбонэзлы луыса Инмарлэн син азяз чылкыт луыны быгатӥсько шуыса. Но сюлэмы солы уг оскы вал».
4 Оло нош, тыныд но секыт оскыны, азьвыл янгышъёсыд понна Иегова тонэ простить кариз шуыса. Соку Давид эксэез тодад вайылы. Со юн оскиз, Инмар сое простить кариз шуыса. Иеговалэн потэ, тынад но сыӵе осконэд мед луоз шуыса. Та статьяын ми эскеромы, малы оскыны кулэ, Иегова милемыз простить кариз шуыса, но мар со понна кароно.
МАЛЫ ОСКЫНЫ КУЛЭ, ИЕГОВА МИЛЕМЫЗ ПРОСТИТЬ КАРИЗ ШУЫСА
5. Кызьы Шайтан асьмеды пӧяны турттэ? Вералэ пример.
5 Ми оскимы ке, Иегова милемыз простить кариз шуыса, соку Шайтанлэн сьӧлтэтаз ум сюре. Ойдолэ тодамы возёмы: Шайтан котьмае лэсьтыны дась, ми Иеговалы ужамысь-тыршемысь мед дугдомы шуыса. Со понна со милемыз оскытыны тырше, сьӧлыкъёсмы туж бадӟымесь но Инмар милемыз ноку простить уз кары шуыса. Тодамы ваёмы, мар луиз вашкала дыръя Коринф карын. Одӥг пиосмурт азон-калгон сьӧлыке пыремез понна кенешлэсь палэнтэмын вал (1 Кор. 5:1, 5, 13). Берлогес со ӧпкелиз. Но Шайтанлэн потэ вал, агайёс но сузэръёс сое простить медаз каре — азьланяз но соин асьсэды чурыт мед возёзы но берытскемезлы медаз шумпотэ шуыса. Со сяна, Шайтанлэн потэ вал, ӧпкелись адями мед малпалоз, Инмар сое ноку простить уз кары шуыса,— со «укыр бадӟым куректонэн ёртэмын» мед луоз но Иеговалы ужамысь-тыршемысь мед дугдоз шуыса. Шайтан туннэ но ассэ озьы ик возе. Но «солэсь кескич малпанъёссэ-ужъёссэ тодытэк асьмеос ум улӥське» (2 Кор. 2:5—11).
6. Мар кароно, асьмеды янгыше уськытыса улэмысь дугдон понна?
6 Ми оскимы ке, Иегова милемыз простить кариз шуыса, соку асьмеды янгыше уськытыса ум улэ ни. Ӵем дыръя сьӧлыкаммы бере ми ӝоже усиськомы (Пс. 50:19). Со умой, малы ке шуоно соку милям мылкыдмы ӝутске воштӥськыны но асьмеды шонер возьыны (2 Кор. 7:10, 11). Но ми кемалась ини ӧпкелимы ке, озьы ке но асьмеды йырйыса улӥськомы ке, соку воксё катьтэммомы, вылды. Ми оскиськомы ке, Иегова милемыз простить кариз шуыса, ӝожомыса улоно ӧвӧл ни. Соку ми быгатомы Иеговалы ужаны-тыршыны озьы, кызьы солэн потэ,— чылкыт возьытлыкен но капчи сюлмын (Кол. 1:10, 11; 2 Тим. 1:3). Нош кызьы асьмеды оскытоно, Иегова милемыз простить кариз шуыса?
КЫЗЬЫ АСТЭ ОСКЫТОНО, ИЕГОВА МИЛЕМЫЗ ПРОСТИТЬ КАРИЗ ШУЫСА
7, 8. Мар вераз Иегова ачиз сярысь Моисейлы но мае со валаны юрттэ? (Потон 34:6, 7).
7 Малпаськы, мар вера ачиз сярысь Иегова. Кылсярысь, тодад вай, мар вераз Инмар Моисейлы Сӥнай гурезь вылынa. (Лыдӟе Потонэз 34:6, 7.) Иеговалэн трос умой сямъёсыз вань ке но, нырысь ик Инмар вераз, со «адямиез яратӥсь, гажась-жалясь» шуыса. Малпаськы: сыӵе Инмар простить кароз-а ужась-тыршисьсэ, кудӥз вань сюлмысьтыз ӧпкеле? Одно ик кароз. Озьы Иегова яратэмзэ но гажам-жалямзэ возьматэ.
8 Иегова ачиз сярысь шонертэмзэ ноку уз вера, малы ке шуоно со зэмлыклэн Инмарез (Пс. 30:6). Соин ик ми верам кылъёсызлы оскыны быгатӥськомы. Тон азьвыл сьӧлыкъёсыд понна астэ ялан йырйыса возиськод ке, малпаськы: «Оскисько-а мон, Иегова — „адямиез яратӥсь, гажась-жалясь“ Инмар шуыса, кудӥз простить каре котькинэ, кин ӧпкеле? Оскисько ке, соку мынам оскеме луэ, со монэ но простить кариз шуыса».
9. Мае тодыны луэ Иеговалэн простить каремез сярысь, Псалтирез 31:5 лыдӟыса?
9 Малпаськы кылбуръёс вылын, кудъёсаз Инмарлэн простить каремез сярысь вераське. Тани мар вераз Давид простить карон сярысь. (Лыдӟе Псалтирез 31:5.) Со гожтӥз: «Тон мынэсьтым вань сьӧлыкъёсме куштӥд». Давидэз простить карыса, вераны луоз, Иегова Давидлэсь сьӧлыкъёссэ басьтӥз, нуиз но куштӥз. Соку Давидэз сьӧлыкъёсыз ӧз зӥбе ни, солы капчигес луиз (Пс. 31:2—4). Ми но вань сюлмысьтымы ӧпкелимы ке, асьмеды йырйыса улоно ӧвӧл ни. Малы ке шуоно Иегова милемыз быдэсак простить кариз но сьӧлыкъёсмес нуиз.
10, 11. Мае тодыны луэ Иегова сярысь та кылъёсысь: «Тон дорын, Кузё-Инмаре, сьӧлыкез куштон инты»? (Псалтирь 129:4).
10 Лыдӟе Псалтирез 129:4. Давидлэсь кылъёссэ лыдӟыса, валаны луэ, Иегова простить карыны дась шуыса. Та возьматэ, ми янгышаськомы ке, Иегова вожзэ поттыны уг дырты но ӧпкелисьёсты простить каремез потэ шуыса. Малы Иегова сыӵе? Со псаломысь ик 7-тӥ кылбурын валэктӥське, «Кузё-Инмар дорын гажан-жалян» шуыса. Кызьы ми тодӥмы кылем статьяысь, Иегова милемыз бырисьтэм яратонэн яратэ. Сыӵе яратон Иеговалэсь мылкыдзэ ӝутэ быдэсак простить карыны котькинэ, кин ӧпкеле (Ис. 55:7). Тыныд секыт ке оскыны, Иегова тонэ простить кариз шуыса, малпаськы: «Оскисько-а мон, Иегова дась шуыса простить карыны котькинэ, кин ӧпкеле но куре сое гажаны-жаляны? Оскисько ке, соку мынам оскеме луэ, со монэ но простить кариз шуыса, куке мон сое кури монэ простить карыны».
11 Озьы ик милемыз буйгатэ малпан, Иегова умой вала шуыса, кызьы ми вылын шӧдӥське тырбыдэстэм луэммы (Пс. 138:1, 2). Ойдолэ эскеромы Давидлэсь эшшо одӥг псаломзэ. Со но милемыз оскытоз, Иегова простить карыны дась шуыса.
ЭН ВУНЭТЫ СОЕ, МАЕ ИЕГОВА ТОДАЗ ВОЗЕ
12, 13. Мае тодаз возе Иегова но кызьы со ми шоры учке? (Псалтирь 102:14).
12 Лыдӟе Псалтирез 102:14. Давид Иегова сярысь вера: «Асьмеос сюй-тузон луиськомы шуыса, Со тодаз возе». Та одӥгез муг, малы Иегова ӧпкелисьёсты простить карыны дась. Со котьку лыдэ басьтэ, ми тырбыдэстэмесь шуыса. Ойдолэ та кылъёсты пыр-почгес эскеромы.
13 Давид вераз, Иегова «асьмелэсь марлэсь кылдэммес тодэ» шуыса. Инмар Адамез «сюйысь-тузонысь» кылдытӥз. Со умой тодэ, мар кулэ адямиослы. Кылсярысь, милемлы кулэ сиськыны, изьыны но шоканы. Сотэк тырбыдэс адямиос но номыр лэсьтыны ӧй быгатысалзы (Ул.-выл. 2:7). Нош Адамлэн но Евалэн сьӧлыкамзы бере «асьмеос сюй-тузон луиськомы» шуыса кылъёс озьы ик возьматыны кутскизы, ми тырбыдэстэмесь вордӥськиськомы но шонертэм мылпотонъёсынымы нюръяськиськомы шуыса. Давидлэн верамезъя, «асьмеос сюй-тузон луиськомы» шуыса тодэм сяна, Иегова сое тодаз возе. Еврей кыл, кудӥз татын берыктэмын «тодаз возе» шуыса, возьматыны быгатэ малпанъёсты но, ужъёсты но. Озьыен, Псалтирез 102:14 тазьы валаны луэ: Иегова тодэ ми янгышаломы шуыса, но ми вань сюлмысьтымы ӧпкелимы ке, со милемыз гажалоз-жалялоз но простить кароз (Пс. 77:38, 39).
14. а) Кызьы Псалтирь 102:12 возьматэ, Иегова быдэсак простить каре шуыса? б) Кызьы Давидлэн учырысьтыз адӟиське, Иегова быдэсак простить каре шуыса? (Учке «Иегова простить каре но вунэтэ» рамкаез.)
14 Иегова быдэсак простить каре-а? (Лыдӟе Псалтирез 102:12.) Давидлэн верамезъя, «макем кыдёкын шундыӝужан шундыпуксёнысен», сокем кыдёке Иегова сьӧлыкъёсмес нуэ. Шундыӝужан но шундыпуксён ог-огзылэсь туж кыдёкын. Соос ноку уз пумиське. Мае та вера Иеговалэн простить каремез сярысь? Куке Иегова милемыз простить каре, со сьӧлыкъёсмес ми дорысь туж кыдёке нуэ. Инмар соосты сокем кыдёке нуэ, со соос сярысь тодаз уг вайылы ни, милемлы но соос сярысь тодамы уг вайытылы ни но соос понна милемыз кул уг кутыты ни (Иез. 18:21, 22; Ап. уж. 3:19, 20а).
15. Мар кароно, ми асьмеды азьвыл янгышъёсмы понна йырйыса улӥськомы ке?
15 Кызьы милям уже кутэммы луэ 102-тӥ псаломысь Давидлэсь кылъёссэ? Тӥ асьтэды азьвыл сьӧлыкъёсты понна йырйыса улӥськоды ке, юалэ асьтэлэсь: «Уг вунэтӥськы-а мон сое, мае Иегова тодаз возе? Кылсярысь, уг вунэтӥськы-а мон, Иегова тырбыдэстэм луэме сярысь тодаз возе но вань ӧпкелисьёсты, озьы ик монэ но, простить каре шуыса? Тодам уг возиськы-а мон сое, мае Иегова вунэтӥз ини,— кылсярысь, сьӧлыкъёсме, кудъёссэ со мыным простить кариз ини но кудъёсыз понна со монэ ноку кыл уз кутыты ини?» Иегова азьвыл сьӧлыкъёсмы сярысь малпаськыса уг улы. Милемлы но соос сярысь малпаськыса улоно ӧвӧл ни (Пс. 129:3). Ми оскимы ке, Иегова милемыз простить кариз шуыса, соку быгатомы асьмеды асьмеос простить карыны но азьлань мыныны.
16. Малы азьвыл сьӧлыкъёсмы понна асьмеды ялан йыръёно ӧвӧл? Вералэ пример. (Озьы ик учке суредэз.)
16 Эскеромы таӵе примерез. Машинаен мыныку, куддыръя учконо берез адӟон понна синучконэ. Со юрттоз авариослэсь палэнскыны. Но саклык висъяно азьпал сюреслы. Милемлы но куддыръя умой луоз малпаськыны азьвыл янгышъёсмы сярысь, тодэ ваён понна, малы соос милемыз дышетӥзы, но азьланяз соослэсь палэнскон понна. Но ми ялан соос сярысь малпаськимы ке, соку шумпотонмес ыштомы но Иеговалы ужаны-тыршыны кужыммы уз тырмы. Соин ик ойдолэ азьлань учкомы, малы ке шуоно ми мынӥськомы выль дуннее нуись сюрес вылтӥ, кытын номыр уродэз тодэ уз лыкты ни.
Машинаез нуисьлы азьпала учконо — берез адӟон понна синучконэ ялан учконо ӧвӧл. Милемлы но, азьвыл янгышъёсмы сярысь малпаськыса улэм интые, тросгес малпаськоно вуоно бакель каронъёс сярысь. (Учке 16-тӥ абзацез.)
АЗЬЛАНЯЗ НО СЮЛЭМДЭ ОСКЫТЫ
17. Малы азьланяз но сюлэммес оскытоно, Иегова милемыз яратэ но котьку простить карыны дась шуыса?
17 Азьланяз но сюлэммес оскытоно, Иегова милемыз яратэ но котьку простить карыны дась шуыса (1 Иоанн 3:19). Малы со кулэ? Малы ке шуоно Шайтан милемыз оскытыны тыршоз, Иегова милемыз уг яраты но простить уз кары шуыса. Солэн потэ милемыз Иеговалы ужамысь-тыршемысь дугдытэмез. Шайтан тодэ, солэн дырыз туж ӧжыт кылемын ини шуыса. Соин со ми вылэ эшшо но зол йыркуръяськоз (Усьт. 12:12). Но ми солы ум сётске!
18. Кызьы сюлэммес оскытоно, Иегова милемыз яратэ но котьку простить карыны дась шуыса?
18 Кылем статьяысь визь-кенешъёс оскыны юртто, Иегова милемыз яратэ шуыса. Нош кызьы сюлэммес оскытоно, Иегова милемыз простить кариз шуыса? Саклыктэ висъя, мар вера Иегова ачиз сярысь Библиын. Малпаськы кылбуръёс вылын, кудъёсаз вераське солэн простить каремез сярысь. Эн вунэты, со тырбыдэстэм луэмед сярысь тодэ но тонэ гажалоз-жалялоз шуыса. Тодад возь, Иегова быдэсак простить каре шуыса. Иеговалэсь гажам-жалямзэ ас вылад шӧдыса, Давид сямен, тон вераны быгатод: «Тау, Иегова, „Тон мынэсьтым вань сьӧлыкъёсме куштӥд“ шуыса!» (Пс. 31:5).
1-ТӤ КЫРӞАН Иеговалэн сямъёсыз
a Учке 2009-тӥ арын 1-тӥ куартолэзь понна поттэм «Возьмаськон башняысь» «Приближайтесь к Богу. Что о себе рассказал Иегова» статьяез.