Иеговалэн киыз вакчи ӧвӧл

1. Кызьы Моисей Иеговалы оскемзэ возьматӥз, израиль калыкез Египетысь поттыкуз?

ЕВРЕЙЁСЛЫ ГОЖТЭТЫН вераське Инмарлэн трос ужась-тыршисьёсыз сярысь, кудъёсызлэн юн осконзы вал. Соос пӧлысь одӥгез — Моисей (Евр. 3:2—5; 11:23—25). Израиль калыкез Египетысь поттыкуз, со туж юн осконзэ возьматӥз. Со ӧз кышка фараонлэсь но солэн ожгарчиосызлэсь. Иеговалы оскиськыса, Моисей калыкез Горд Кам зарезь пыр луоё кыр дуннее нуиз (Евр. 11:27—29). Израиль калык пӧлысь тросэз ӧз оске, Иегова соос сярысь сюлмаськыны быгатоз шуыса. Нош Моисей, номыр шоры учкытэк, аслаз Инмарезлы оскиз. Со юнме ӧз оскы, малы ке шуоно Иегова паймымон амалэн калыкезлы сиён но ву сётӥз, со медам кулы шуыса луоё кыр дуннеын, кытын номыр уг буды вал (Пот. 15:22—25; Пс. 77:23—25)a.

2. Малы Инмар Моисейлэсь юаз: «Кузё-Инмарлэн киыз вакчи шат?» (Лыдпусъёс 11:21—23).

² Израиль калыклэн Египетысь потэмез бере ар пала ортчыса, Иегова шуиз, солы сӥль сётоз шуыса. Моисейлэн юн осконэз вал ке но, со уг вала вал, кызьы Иегова луоё кыр дуннеын кӧня ке миллион адямиосты сӥлен сюдоз. Соин ик Инмар Моисейлэсь юаз: «Кузё-Инмарлэн киыз вакчи шат?» (Лыдӟе Лыдпусъёсты 11:21—23.) Татын «Кузё-Инмарлэн киыз» возьматэ Инмарлэсь святой духсэ — кужымез, кудӥныз Инмар аслэсьтыз эриксэ быдэстэ. Вераны луоз, Иегова Моисейлэсь юаз: «Зэм ик-а тон малпаськод, мон сётэм кылме быдэстыны уг быгаты шуыса?»

3. Малы умой луоз малпаськыны со сярысь, мар луиз Моисеен но израиль калыкен?

³ Тӥ куке но малпады-а, Иегова тӥ сярысь но тӥляд семьяды сярысь сюлмаськыны уз быгаты шуыса? Умой луоз, ваньмы малпаськимы ке со сярысь, мар луиз Моисеен но израиль калыкен. Ми тодомы, малы соос ӧз оске, Иегова соослы сиён сётыны быгатоз шуыса. Озьы ик ми эскеромы Библиысь возетъёсты, кудъёсыз осконмес юнматозы, Иеговалэн киыз вакчи ӧвӧл шуыса.

МАР ЛУИЗ МОИСЕЕН НО ИЗРАИЛЬ КАЛЫКЕН

4. Малы израиль калык пӧлысь тросэз оскемысь дугдӥзы, Иегова соос сярысь сюлмаськыны быгатоз шуыса?

⁴ Израиль калык но «пӧртэм выжыосысь адямиос» кӧня ке дыр ӵоже луоё кыр дуннеетӥ Сӥзем музъеме мыно вал ини (Пот. 12:38; К. Зак. 8:15). Мукет калыкысь адямиос, манна гинэ сиыса, жадизы но мукет сиён курыны кутскизы. Израиль калык но ӝожтӥськыны кутскиз. Соос верало вал, Египетын сием сиёнзылэсь мӧзмо шуыса (Лыд. 11:4—6). Калыклэн ӝожтӥськеменыз сэрен, Моисей малпаны кутскиз, со ваньзэс сӥлен сюдыны кулэ шуыса. Нош кытысь сӥль басьтыны, со уг тоды вал (Лыд. 11:13, 14).

5, 6. Мукет калыкъёслэн кыӵе мылкыдзы Израиль калыклы пыӵаз но малы со милемыз дышетэ?

⁵ Мукет калыкъёсысь адямиос тау ӧз каре со понна, мар соослы лэсьтӥз Иегова. Израиль калыклы но сыӵе ик мылкыд пыӵаз. Ми но сыӵе югдуре сюрыны быгатӥськомы. Тау карисьтэм адямиос пӧлын улыса, оло нош, милемлы но Иеговалэн бакель каронъёсыз шумпотон уз вае ини, ми мӧзмомы солэсь, мар милям азьвыл вал, яке вожъяськомы солы, мар мукетъёсызлэн вань. Нош ми дышетскимы ке котьку но шумпотыны солы, мармы милям вань, ми шудогес луомы.

⁶ Израиль калыклы Иеговалэсь кылсётонзэ тодаз возёно вал. Инмар соослы вераз, Сӥзем музъеме вуэмзы бере соос майбыр улозы шуыса. Та кылъёс, луоё кыр дуннеетӥ мыныкузы, быдэсмыны кулэ ӧй вал. Соос Сӥзем музъемын быдэсмыны кулэ вал. Ӵапак озьы ик милемлы но куректоно ӧвӧл со сярысь, мармы милям али ӧвӧл. Со интые саклыкмес висъяно, кыӵе кузьымъёс лэсьтоз милемлы Иегова азьланяз. Озьы ик милемлы малпаськоно Библиысь кылбуръёс вылын, кудъёсыз Иеговалы осконмес юнматозы.

7. Малы милям оскеммы луэ, Иеговалэн киыз вакчи ӧвӧл шуыса?

⁷ «Кузё-Инмарлэн киыз вакчи шат?» Малы Инмар таӵе юан сётӥз? Иеговалэн потэ вал, дыр, Моисей кык малпан вылын мед малпаськоз шуыса: 1) Иеговалэн мертантэм бадӟым кужымез вань; 2) кытын гинэ ужась-тыршисьёсыз медам луэ, со соослы юрттыны быгатэ. Луоё кыр дуннеын израиль калыкез сӥлен сюдыса, Инмар возьматӥз, «кужмо киын, вӧлъям суйын» соослы юрттэмез луэ шуыса (Пс. 135:11, 12). Соин ик, кыӵе гинэ шуг-секытэн ми медам пумиське, ойдолэ тодамы возёмы, Иегова ми сярысь сюлмаськоз шуыса (Пс. 137:6, 7).

8. Мар милемлы кароно, израиль калык сямен, медам янгышалэ шуыса? (Озьы ик учке суредэз.)

⁸ Ӝоген Иегова сётэм кылзэ быдэстӥз — со аслаз калыкезлы туж трос бӧдёноосты сётӥз. Но израиль калык Инмарлы та паймымон уж понна тау ӧз кары. Соос, кӧттырмостэм адямиос кадь, дугдылытэк нунал но ӝыны тылобурдоосты бичазы. Иеговалэн асьсэды гинэ яратӥсь, тэргаськись адямиослы вожез потӥз. Со соосты кылкутытӥз (Лыд. 11:31—34). Та учыр милемыз тросэзлы дышетэ. Милемлы чакласьконо, кӧттырмостэмесь медам луэ шуыса. Кӧня гинэ коньдонмы милям медам луы, ойдолэ нырысь ик тыршомы «ваньбур Инме» люканы, Иеговаен но Иисусэн кусыпъёсмес юнматыса (Матф. 6:19, 20; Лука 16:9). Соку Инмар улон понна ваньзэ кулэзэ милемлы одно ик сётоз.

9. Малы милям оскеммы луэ?

⁹ Иегова туннэ но кужмо киыныз аслаз ужась-тыршисьёсызлы юрттэ. Возьматэ-а со, ми сиёнлы яке коньдонлы ноку ум ёрме шуыса? Уг, уг возьматыb. Но Иегова котьку милемын ӵош луоз. Со милемлы котькыӵе шуг-секыт дыръя юрттоз. Кызьы милям возьматэммы луэ Инмарлы оскеммес, куке ми: 1) коньдонэн герӟаськем шуг-секытъёсын пумиськиськомы но 2) малпаськомы, кытысь коньдон басьтоно арлыдо луэммы бере?

КУКЕ КОНЬДОНЭН ГЕРӞАСЬКЕМ ШУГ-СЕКЫТЪЁСЫН ПУМИСЬКИСЬКОМЫ

10. Кытчы вуттыны быгато коньдонэн герӟаськем шуг-секытъёс?

¹⁰ Та дуннелэн пумыз матэктэмъя коньдонэн герӟаськем шуг-секытъёс эшшо но трос луозы. Кивалтӥсьёслэн кутэм ужпумъёссы, ожмаськонъёс, инкуазь шимучыръёс яке выль пандемияос сэрен ми быгатӥськомы малпамтэ шорысь трос коньдонмес, ужмес, ваньбурмес яке улон интымес ыштыны. Оло нош, семьямес сюдон-вордон понна, милемлы выль уж утчано яке мукет интые кошконо луоз. Кызьы сыӵе югдурын возьматоно, ми Иеговалы оскиськомы шуыса?

11. Мар юрттоз коньдонэн герӟаськем шуг-секытъёс пыр потыны? (Лука 12:29—31).

¹¹ Нырысь ик сюлмаськонъёсмы сярысь Иеговалы верано (Мад. 16:3). Солэсь визьлык куре, шонер ужпумъёс кутон понна, но юрттэт куре, мултэс сюлмаськытэк улон понна. (Лыдӟе Лукалэсь 12:29—31.) Иеговалы ялан вӧсяське, со тӥледлы мед юрттоз шуыса шумпотыны солы, марды тӥляд вань (1 Тим. 6:7, 8). Со сярысь, кызьы коньдонэн герӟаськем шуг-секытъёс пыр потоно, jw.org сайтамы трос статьяос но видеороликъёс вань. Отысь тӥ шедьтоды туж умой визь-кенешъёс, кудъёсыз тросэзлы юрттӥзы ини.

12. Кыӵе юанъёс христиан муртлы юрттозы, уж бырйыкуз, семьяез сярысь малпаськыны?

¹² Куд-огъёсыз соглаш кариськизы улон интызылэсь кыдёкын ужаны. Но берлогес соос валазы, со визьмо ӧй вал шуыса. Уже интыяськемлэсь азьло малпаське, кыӵе бервылъёсы со вуттыны быгатэ. Тӥледлы умой уждун тыризы ке но, малпаське, кызьы со шӧдӥськоз тӥляд но семьядылэн Иеговаен кусыпъёсты вылын (Лука 14:28). Юалэ асьтэлэсь: «Мон семьяелэсь кыдёкын улӥ ке, кызьы со шӧдӥськоз кусыпъёсмы вылын? Быгато-а мон вань пумиськонъёсы ветлыны, тодытыны, озьы ик агайёсын но сузэръёсын дырме ортчытъяны?» Тӥляд нылпиосты вань ке, таӵе юан вылын малпаське: «Мон нылпиосы вӧзын ӧй улы ке, быгато-а мон, „Кузё-Инмарлэн дышетонэз, валэктон-визьманъёсыз вылэ пыкиськыса“, соосты будэтыны?» (Еф. 6:4). Ужпум кутыкуды, Библиез гажасьтэм эшъёстылэсь но ӵыжы-выжыостылэсь кылзӥськем интые, кылзэ, мар вера Иеговаc. То́ни агайлы, кудӥз Шундыпуксёнпал Азиын улэ, кӧня ке умой ужан инты ӵектӥзы. Но со понна кунгож сьӧрын улоно вал. Вӧсяськыса но кышноеныз вераськыса, со ужпум кутӥз, нокытчы уз мыны шуыса. Со интые соос ужпум пуктӥзы коньдонзэс ӧжытгес быдтыны. Ортчемез шоры учкыса, со вера: «Мон шумпотӥсько, нокытчы ӧй мыны шуыса. Мон быгатӥ юрттыны кӧня ке адямиослы зэмлыкен тодматскыны, нош пимы но нылмы Иеговаез туж ярато. Семьямы валаз, возет, кудӥз гожтэмын Матфейлэсь 6:33, зэм но ужа шуыса. Ми Иисуслэн дышетэмезъя улӥмы ке, Иегова ми сярысь одно ик сюлмаськоз».

КУКЕ МАЛПАСЬКОМЫ, КЫТЫСЬ КОНЬДОН БАСЬТОНО АРЛЫДО ЛУЭММЫ БЕРЕ

13. Мар кароно али, арлыдо луэммы бере коньдонтэк медам кыле шуыса?

¹³ Оло нош, ми сюлмаськиськомы, кытысь коньдон басьтоно арлыдо луэммы бере. Кызьы возьматоно та удысын Иеговалы оскеммес? Библия мылкыдмес ӝутэ вуоноез сярысь азьло ик малпаськыны но тыршыса ужаны (Мад. 6:6—11). Быгатӥськоды ке, умой луоз азьпал улонлы кӧня ке коньдон люканы. Зэм но, коньдон кӧня ке утьыны быгатэ (Екк. 7:12). Но лэзёно ӧвӧл, коньдонэз поттон улонамы нырысетӥ интыын мед луоз шуыса.

14. Кызьы кылъёс, кудъёсыз гожтэмын Еврейёслы 13:5, милемлы юртто азьпал улон сярысь мултэс сюлмаськытэк улыны?

¹⁴ Одӥг мадёназ Иисус пусйиз, адями, кудӥз коньдон люка но «Инмар азьын узырлык люкатэк» улэ, визьмо уг лэсьты шуыса (Лука 12:16—21). Одӥг адями но уг тоды, мар соин ӵуказе луоз (Мад. 23:4, 5; Иак. 4:13—15). Нош дышетскисьёсызлы Иисус эшшо одӥг шуг-секыт сярысь вераз — милемлы дась луоно вань ваньбурмес ыштыны (Лука 14:33). Нырысетӥ даурын, куке Иудеяысь христианъёс кельтӥзы ваньзэ, марзы соослэн вал, соос шумпотонзэс ӧз ыштэ (Евр. 10:34). Асьме нуналъёсы трос агайёс политикае пыриськымтэзы понна ужзэс ыштӥзы (Усьт. 13:16, 17). Мар ваньзылы соослы юрттӥз шуг-секытсы пыр потыны? Соос юн оскизы, Иегова таӵе сётэм кылзэ быдэстоз шуыса: «Уг кельты тонэ, уг кушты тонэ». (Лыдӟе Еврейёслы 13:5.) Озьыен, арлыдо луэммы бере коньдонтэк медам кыле шуыса, милемлы лэсьтоно ваньзэ, мае быгатӥськомы, нош кылемзэ Иегова кие сётоно. Ми оскиськомы, шуг-секытъёс дыръя но Инмар ми сярысь сюлмаськыны быгатоз шуыса.

15. Мае возьманы быгато ас нылпиоссылэсь арлыдо луэмзы бере христиан луись анай-атайёс? (Озьы ик учке суредэз.)

¹⁵ Куд-ог калыкъёсын лыдъяло, нылпиос арлыдо анай-атайзылы коньдонэн юрттӥськозы шуыса. Но Библия вера, «анай-атайёс нылпиослы ваньбур люканы кулэ» шуыса (2 Кор. 12:14). Веранэз ӧвӧл, арлыдо анай-атайёслы юрттэт кулэ ке, тросэз нылпиос шумпотыса соослы юрттозы (1 Тим. 5:4). Но христиан луись анай-атайёс валало, мар вае зэмос шуд. Соос уг малпало арлыдо луэмзы бере нылпиоссылэсь коньдон кыскыны. Соос нылпиоссылы юрттыны тыршо Иеговалэн ужась-тыршисьёсыз луыны (3 Иоанн 4).

16. Кызьы анай-атайёс нылпиоссэс дышетыны быгато быдэ вуэмзы бере улон-вылон понна асьсэлы коньдон поттыны? (Ефесъёслы 4:28).

¹⁶ Анай-атайёс, кызьы тӥ быгатӥськоды нылпиостэс дышетыны быдэ вуэмзы бере улон-вылон понна асьсэлы коньдон поттыны? Асьтэлэн ужъёсыныды возьматэ, котьку но Иеговалы оскиськоно шуыса. Пичи дыръязы ик соосты дышетэ тыршыса ужаны (Мад. 29:21; лыдӟе Ефесъёслы 4:28). Нош школаын дышетскыкузы, соослэсь мылкыдзэс ӝутэ рос-прос дышетскыны. Тӥ Библиез эскериськоды ке но Инмарлэн возетъёсызъя улӥськоды ке, тӥ быгатоды нылпиостылы юрттыны тупась образование бырйыны. Коньдон поттыны дышетэм сяна, анай-атайёс тыршо нылпиоссылы юрттыны тодытон ужез яратыны, озьы ик пионеръёс луыны.

17. Мар сярысь милемлы котьку но тодамы возёно?

¹⁷ Иеговалэн оскымон ужась-тыршисьёсыз юн оско, Инмар быгатэ но солэн потэ шуыса соослы улон понна ваньзэ кулэзэ сётэмез. Та дуннелэн пумыз матэктэмъя милемлы эшшо но кулэ луоз Инмар вылэ оскиськыны. Ойдолэ котьку тодамы возёмы, Иегова ми сярысь сюлмаськыны быгатэ шуыса, малы ке шуоно солэн киыз вакчи ӧвӧл!