Осконэн улэ

1. Малы апостол Павел, ортчем улонэз шоры учкыса, шумпотэ вал?

АПОСТОЛ Павел тодэ вал, ӝоген сое казнить карозы шуыса. Но ортчем улонэз шоры учкыса, со шумпотэ вал. Павел шуиз: «Мон... ортчоно сюресме ортчи ни, но осконме ути» (2 Тим. 4:6—8). Павел аслэсьтыз улонзэ Иеговалы ужан-тыршонлы сӥзиз. Со тодэ вал, со шоры учкыса, Иегова шумпотэ шуыса. Милям но потэ умой ужпумъёс кутылэммы, ми Иеговалы ярамонэсь мед луомы шуыса. Мар милемлы юрттоз?

2. Кытысь адӟиськоз, ми осконэн улӥськомы шуыса?

² Ачиз сярысь но мукет оскымон христианъёс сярысь Павел шуиз: «Осконэн улӥськомы, адӟонэн ум улӥське» (2 Кор. 5:7). Мар сярысь вераз Павел? Адямиос, кудъёсызлэн осконзы ӧвӧл, ужпумъёс кутыкузы, лыдэ басьто сое гинэ, мае адӟо, кыло но шӧдо. Нош соос, кинъёс Иеговалы оско, ужпумъёс кутыкузы, котьку но солэсь малпанъёссэ лыдэ басьто. Озьы соос возьмато, Инмарлы но солэн визь-кенешъёсызлы оско шуыса (Пс. 118:66; Евр. 11:6).

3. Кыӵе пайда вае осконэн улон? (2 Коринфъёслы 4:18).

³ Валамон, куд-ог ужпумъёс кутыку, милемлы лыдэ басьтоно сое, мае ми адӟиськомы, кылӥськомы но шӧдӥськомы. Но секыт ужпумъёс кутыку, ми сое гинэ лыдэ басьтӥмы ке, со урод бервылъёсы вуттоз, дыр. Малы? Малы ке шуоно шӧдонъёсмы милемыз пӧяны быгато. Со сяна, ми лыдэ басьтӥмы ке сое гинэ, мае адӟиськомы, Иеговаез ӝоже уськытомы, вылды (Екк. 11:9; Матф. 24:37—39). Нош ми осконэн улӥськомы ке, соку «Инмарлы ярамон» луомы (Еф. 5:10). Инмарлэсь кылзӥськыса, ми шумпотыса но каньыл сюлмын уломы (Пс. 15:8, 9; Ис. 48:17, 18). Со сяна, осконэн улӥмы ке, милям пырак улыны юн осконмы луоз. (Лыдӟе 2 Коринфъёслы 4:18.)

4. Мар сярысь котькудмылы малпаськыны кулэ?

⁴ Котькудмылы аслэсьтыз юано: «Кызьы мон ужпумъёс кутӥсько? Мон лыдэ басьтӥсько сое гинэ, мае адӟисько, яке Иеговалы оскиськисько но солэн визь-кенешъёсызлэсь кылзӥськисько?» Ойдолэ тодомы, кызьы возьматыны луэ осконэн улэммес таӵе учыръёсын: куке уж бырйиськомы, кузпал утчаськомы яке организацилэсь кивалтэт басьтӥськомы. Ми тодомы, мае лыдэ басьтоно, визьмо ужпум кутон понна.

КУКЕ УЖ БЫРЙИСЬКОМЫ

5. Мае лыдэ басьтоно, уж бырйыку?

⁵ Котькудмылэн потэ, милям но, матысь адямиосмылэн но улон понна ваньмыз кулэез мед луоз шуыса (Екк. 7:12; 1 Тим. 5:8). Куд-ог ужан интыосын умой уждун тыро. Соку самой кулэзэ но басьтыны луэ, азьланезлы но люканы луэ. Нош куддыръя уждун самой кулэезлы гинэ тырме. Валамон, уж бырйыку, милям тодэммы потэ, кӧня милемлы коньдон тырозы. Но ми солы гинэ саклыкмес висъямы ке, ми возьматомы, улӥськомы шуыса соин гинэ, мае адӟиськомы.

6. Кызьы возьматыны луэ осконэн улэммес, уж бырйыку? (Еврейёслы 13:5).

⁶ Ми осконэн улӥськомы ке, соку малпаськомы, кызьы ужмы Иеговаен кусыпъёсмы вылын шӧдӥськоз. Юалэ асьтэлэсь: «Кулэ луоз-а мыным уж дорын лэсьтыны сое, мае Иегова адӟемпотостэм каре?» (Мад. 6:16—19); «Соин сэрен уг кутскы-а мон кенешлэсь пумиськонъёссэ кельтылыны, ӧжытгес тодытыны но Библиез шергес лыдӟыны?»; «Со уже интыяськыса, быгато-а мон семьяелы тырмыт дыр висъяны?» (Флп. 1:10). Та юанъёс пӧлысь одӥгезлы ке но тӥ «бен» шуиды ке, тӥ визьмо лэсьтоды, со уже ӧд ке интыяське, мукетсэ шедьтыны секыт ке но. Ми осконэн улӥськомы. Соин ик кутэм ужпумъёсмы возьматыны кулэ юн оскеммес, Иегова ми сярысь сюлмаськоз шуыса (Матф. 6:33; лыдӟе Еврейёслы 13:5).

7, 8. Кызьы Лымшор Америкаысь одӥг агай осконэн улэмзэ возьматӥз? (Озьы ик учке суредэз.)

⁷ Тани кызьы Лымшор Америкаысь Хавье́рa агай осконэн улэмзэ возьматӥз. Со вера: «Уж дорам мыным ӵектӥзы вылӥегес инты басьтыны. Мынам уждунэ но кык поллы бадӟымгес луысал, уже но тунсыкогес луысал». Со дыре ик Хавьерлэн вань дырзэ сётыса ужаны-тыршыны кутскемез потэ вал. Со тодаз вае: «Монэ ӧтизы вуоно кузёеным вераськыны. Вераськемелэсь азьло мон, юрттэт курыса, вӧсяськи. Мон тодӥсько вал: Иегова тодэ, мар мон понна умойгес луоз. Веранэз ӧвӧл, мынам потэ вал вылӥегес инты но тросгес уждун басьтэме. Но мынам уг поты вал, уже Иеговалы тросгес ужаны-тыршыны мед люкетоз шуыса».

⁸ Хавьер азьланьтэ: «Кузёе вераз, ӵем дыръя мыным ӝытъёсы ужано луоз шуыса. Мон лякытэн валэктӥ, озьы ужаны уг быгаты шуыса, малы ке шуоно ӝытъёсы дырме Инмарлы ужан-тыршонлы сӥзисько». Хавьер со уже ӧз интыяськы. Кык арня ортчыса, со пионер луиз, нош берлогес, со арын ик, тупась уж шедьтӥз. Со вера: «Иегова вӧсяськонъёсме кылӥз но мыным уж шедьтӥз, кудӥз мыным туж тупа но юрттэ пионер луыса ужаны-тыршыны. Мон туж шумпотӥсько, табере Иеговалы но кенешлы тросгес лэсьтыны быгатӥсько шуыса».

9. Малы милемыз дышетэ Тео агайлэн учырез?

⁹ Нош мар кароно, ужмы сэрен Иеговаен кусыпъёсмы лябӟо ке? Тани Конгоысь Те́о агайлэн учырез. Со вера: «Мон туж умой уж шедьтӥ. Уждунэ куинь поллы бадӟымгес луиз. Монэ ваньзэ гажазы». Но трос ужаменыз сэрен, Тео ӵем дыръя кенешлэсь пумиськонъёссэ кельтылӥз. Со сяна, куддыръя ӵош ужасьёсыз сое пӧяськыны куро вал. Теолэн уж дорысьтыз кошкемез потэ вал, но со ужтэк кыльыны кышка вал. Мар солы юрттӥз? Со вера: «Монэ юнматӥзы кылъёс, кудъёсыз гожтэмын Аввакумлэн 3:17—19. Мон валай: мон коньдонтэк кыли ке но, Иегова быгатоз мон сярысь сюлмаськыны. Соин ик мон уж дорысьтым кошки». Тео азьланьтэ: «Ужан интыосысь тросэз кузёос малпало, умой уждун понна адями ваньмыз шоры синзэ ворсалоз шуыса, семьяез шоры но, Инмарлы йыбыртъян шоры но. Мон шумпотӥсько, Иеговаен но семьяеным юн кусыпъёсме утьыны быгатӥ шуыса. Ар ортчыса, Инмар юрттӥз мыным умой уж шедьтыны. Уждунэ бадӟым ӧвӧл ке но, улонлы тырме. Нош самой валтӥсез — мынам ужан-тыршонлы дыры кыле. Малпано ӧвӧл, Иеговаез улонад нырысетӥ интые пуктӥд ке, коньдонэн герӟаськем шуг-секытъёсыд ноку уз луэ шуыса. Но юн оскыны луэ, Иегова тонэ уз кельты шуыса». Озьыен, кутэм ужпумъёсмы мед возьматозы, ми Иеговалэн визь-кенешъёсызлы но кылсётонъёсызлы оскиськомы шуыса. Нош со милемыз бакель кароз.

КУКЕ КУЗПАЛ УТЧАСЬКОМЫ

10. Мае лыдэ басьтоно, кузпал утчаку, но мар сярысь со дыре ик тодамы возёно?

¹⁰ Семья — со Иеговалэн кузьымез. Соин ик семья кылдытыны мылкыд урод ӧвӧл. Кузпал утчакуз, сузэрb учкоз, кыӵе агайлэн сямъёсыз, вылтусыз но мар со сярысь мукетъёсыз малпало. Озьы ик солэн тодэмез потоз, кызьы со коньдонзэ кутэ но кызьы ассэ ӵыжы-выжыосыныз возе. Со сяна, сузэр малпаськоз, кызьы ассэ со агай вӧзын шӧдэ. Веранэз ӧвӧл, ваньмыз та туж кулэ. Но сузэр тае гинэ лыдэ басьтӥз ке, со улэ, луоз, соин гинэ, мае адӟе.

11. Кызьы возьматоно осконэн улэммес, кузпал бырйыкумы? (1 Коринфъёслы 7:39).

¹¹ Иегова туж данъяське сузэръёсынымы но агайёсынымы, кудъёсыз, кузпал бырйыкузы, солэн визь-кенешъёсызлэсь кылзӥсько! Кылсярысь, соос уг дырто туж егит дыръязы семья кылдытыны (1 Кор. 7:36). Кузпал бырйыкузы, соос саклыксэс висъяло сямъёслы, кудъёссэ Иеговалэн умой картъёслэсь но кышноослэсь адӟемез потэ (Мад. 31:10—13, 26—28; Еф. 5:33; 1 Тим. 5:8). Нош куке Адӟись-Ивортӥсь луисьтэм адями соослы саклыксэ висъя, соос сое палэнто. Сыӵе агайёс но сузэръёс тодазы возё, «Кузё-Инмарлы оскись муртэн» гинэ кузпалъяськоно шуыса. (Лыдӟе 1 Коринфъёслы 7:39.) Со агайёс но сузэръёс осконэн уло но тодо, Иегова соос сярысь котькинлэсь умой сюлмаськоз шуыса (Пс. 54:23).

12. Малы тӥледыз дышетэ Розалэн учырез?

¹² Тани Роза сузэрлэн учырез, кудӥз Колумбиын пионер луыса ужа-тырше вал. Уж дораз со ӵем пумиськылӥз одӥг Адӟись-Ивортӥсь луисьтэм пиосмуртэн. Со пиосмурт солы саклыксэ висъяны кутскиз. Розалы но со кельше вал. Роза вера: «Со пиосмурт мыным туж умой потэ вал. Со котькинлы юрттыны яратэ вал. Мыным кельше вал, кызьы со ассэ монэн возе. Мон малпасько вал, умой кузпал ӵапак сыӵе луыны кулэ шуыса. Но со пиосмурт Иеговалэн Адӟись-Ивортӥсез ӧй вал». Роза азьланьтэ: «Мыным кельше вал, со пиосмурт мыным саклыксэ висъя шуыса, соин ик сое палэнтыны секыт вал. Со вакытэ мыным ӧжыт мӧзмыт вал но мынам быземе потэ вал. Нош кенешысь тупась агай шедьтэме уг луы вал». Роза ӧз улы соин гинэ, мае со адӟиз. Со малпаськиз со сярысь, кызьы кутэм ужпумез Иеговаен кусыпъёсыз вылын шӧдӥськоз. Соин ик Роза со пиосмуртэн кусып воземысь дугдӥз но ужан-тыршонлы саклыксэ висъяз. Ӝоген сое Эксэйлыкез тодытӥсьёслы школае ӧтизы. Али со нимысьтыз пионер луыса ужа-тырше. Роза вера: «Иегова мыным трос кузьымъёс кузьмаз но сюлэмме шумпотонэн тырмытӥз». Куд-ог ужпумъёсты кутыны туж секыт. Тужгес но палэнтоно ке сое, мар милемлы дуно потэ. Но ми осконэн улӥськомы ке, Иегова милемыз одно ик бакель кароз!

КУКЕ ОРГАНИЗАЦИЛЭСЬ КИВАЛТЭТ БАСЬТӤСЬКОМЫ

13. Кызьы ми асьмеды возьыны быгатӥськомы, кивалтэт басьтыку?

¹³ Кенешъёсысь но ёросъёсысь тӧроос, филиал но Кивалтӥсь кенеш ӵем дыръя милемлы кивалтэт сёто, кудӥз Иеговалы ужан-тыршонэн герӟаськемын. Кызьы ми асьмеды возёмы, ум ке валаське, малы сыӵе яке таӵе ужпум кутэмын вал? Малпаломы-а ми, кутэм ужпум улонмес секытгес гинэ кароз шуыса? Яке кутскомы-а саклыкмес висъяны кивалтэт сётӥсь агайёслэн тырмымтэоссылы?

14. Мар милемлы юрттоз кылзӥськыны кивалтэтлэсь, кудзэ Иеговалэн организациез сётэ? (Еврейёслы 13:17).

¹⁴ Ми оскиськомы, Иегова аслаз организациеныз кивалтэ но милесьтым югдурмес туж умой тодэ шуыса. Соин ик, кивалтэт басьтыкумы, ми солэсь соку ик шумпотыса кылзӥськиськомы. (Лыдӟе Еврейёслы 13:17.) Ми валаськомы, кылзӥськыса кенешлы огкылысь улыны юрттӥськомы шуыса (Еф. 4:2, 3). Валамон, кивалтэт сётӥсь агайёс тырбыдэстэмесь. Но ми соослэсь кылзӥськимы ке, Иегова милемыз бакель кароз (1 Экс. 15:22). Нош кивалтэтэз зэм но кӧня ке тупатыны кулэ ке, ас дыраз Инмар сое одно ик тупатоз (Мих. 7:7).

15, 16. Мар юрттӥз одӥг агайлы кылзӥськыны кивалтэтлэсь, кудӥзлэсь нырысь солы кылзӥськыны секыт вал? (Озьы ик учке суредэз.)

¹⁵ Тани кыӵе югдур кылдӥз Перу шаерын. Со возьматэ, оскон но организацилэн кивалтэтэзлэсь кылзӥськон бадӟым пайда ваё шуыса. Та шаерын, испан кыл сяна, вӧлмемын на трос мукет кылъёс, кылсярысь, кечуа кыл. Трос аръёс ӵоже агайёс но сузэръёс кечуа кылын вераськись адямиосты утчазы котькытысь, кытын кенешсы тодытэ. Но берлогес, выль законлэсь кылзӥськон понна, соослы тодытон амалзэс воштоно луиз (Рим. 13:1). Куд-огъёсыз сюлмаськизы, соин сэрен тодытон уж калленгес мыноз шуыса. Но кылзӥськемзы бере соос адӟизы, Иегова соосты бакель каре шуыса.

¹⁶ Одӥг кечуа кенешысь Ке́вин тӧро вал соос пӧлын, кинъёслы секыт вал кылзӥськыны басьтэм кивалтэтлэсь. Со валэктэ: «Мон малпасько вал: „Кызьы ми табере утчаломы кечуа кылын вераськись адямиосты?“». Мар кариз Кевин? Со вера: «Мон тодам вайи Мадёнъёсты 3:5 но малпаськи Моисей сярысь. Иегова сое косӥз израиль калыкез Египетысь поттыны но Горд Кам зарезь дуре вуттыны. Малпан кылдыны быгатэ вал, сыӵе интыын соос египет калыклэсь утиськыны нокызьы уз быгатэ шуыса. Озьы ке но Моисей Иеговалэсь кылзӥськиз. Со понна Инмар сое бакель кариз, израиль калыкез паймымон амалэн мозмытыса» (Пот. 14:1, 2, 9—11, 21, 22). Кевин дась луыса кылзӥськиз но выль сямен тодытыны кутскиз. Кыӵе пайда со вайиз? Кевин азьланьтэ: «Туж паймоно кадь, кызьы Иегова милемыз бакель кариз. Азьвыл ми трос ветлӥськомы вал, но одӥг-кык адямиен гинэ вераськиськомы вал. Нош табере ми тодытӥськомы отын гинэ, кытын кечуа кылын вераськись трос адямиос уло. Ми тросгес тунсыкъяськись адямиосты пумитаськомы, тросгес адямиосын Библиез дышетӥськомы, пумиськонъёсамы но тросгес адямиос ветло». Озьыен, ми осконэн улӥськомы ке, Иегова милемыз одно ик бакель кароз.

17. Малы тӥледыз дышетӥз та статья?

¹⁷ Ми эскеримы, кызьы осконэн улоно, уж бырйыку, кузпал утчаку но организацилэсь кивалтэт басьтыку. Но милемлы Иеговалэсь малпанъёссэ лыдэ басьтоно мукет удысъёсын но. Кылсярысь, куке ми малпаськомы, кыӵе фильм учкыны, кызьы шутэтскыны, кытын дышетскыны яке кызьы нылпиосмес будэтыны. Кыӵе гинэ ужпум кутоно медам луы, улоно ӧвӧл соин гинэ, мае ми адӟиськомы. Тодамы возёно Иеговалэн шӧдонъёсыз, солэн визь-кенешъёсыз но ми сярысь сюлмаськыны сётэм кылыз сярысь. Соку ми быгатомы вапумъёсысь вапумъёс ӵоже Иегова Инмарлы ужаны-тыршыны! (Мих. 4:5).