Макем умой агайёсын но сузэръёсын эшъяськыны!

1, 2. Кызьы Иегова учке адямиос шоры но мае со возьма милесьтым?

ИЕГОВА чакла, кызьы ми асьмеды мукет адямиосын возиськомы. Иисус дышетӥз, милемлы матысь адямиосмес асьмеды асьмеос кадь яратоно шуыса (Матф. 22:37—39). Соин ик, адямиос Иеговалы ужало-тыршо-а, уг-а, ми соосын асьмеды лякытэн возиськомы. Озьы ми адӟем кариськомы Инмармылэсь, кудӥз «шундызэ уродъёс но, ӟечъёс но вылэ ӝужаны косэ, зорзэ шонер улӥсьёслы но, шонер улӥсьтэмъёслы но лэзе» (Матф. 5:45).

² Иегова вань адямиосты яратэ. Но тужгес но со яратэ соосты, кинъёс солэсь кылзӥсько (Иоанн 14:21). Инмарлэн потэ, ми солэсь адӟем мед каромы шуыса. Соин ик со милемыз ӧте: «Огдэс огды сюлмысь яратыса улэ» но «Гажаса ог-огеныды улэ» (1 Пётр 4:8; Рим. 12:10). Ӵем дыръя ӵапак озьы ми асьмеды возиськомы ӵыжы-выжыосынымы но эшъёсынымы.

3. Мае ми тодӥмы яратон сярысь та абзацысь?

³ Яратонэз ӵошатыны луэ коркан будӥсь сяськаен. Со мед будоз шуыса, со сярысь ялан сюлмаськыны кулэ. Ӵапак озьы ик, огмес огмы яратонмы медаз лябӟы шуыса, сое ялан юнматыны кулэ. Апостол Павел христианъёслы гожтӥз: «Куспады огдэс огды агай-вынъёс кадь яратыса улэ» (Евр. 13:1). Иеговалэн потэ, ми ог-огмес золгес но золгес мед яратомы шуыса. Та статьяысь ми тодомы, малы агайёсын но сузэръёсын эшъяськыны — со умой но мар милемлы юрттоз кусыпъёсмес юнматыны.

МАЛЫ ЭШЪЯСЬКОНО АГАЙЁСЫН НО СУЗЭРЪЁСЫН

4. Мар кароно, агайёсмес но сузэръёсмес яратонмы медаз сӥя шуыса? (Псалтирь 132:1). (Озьы ик учке суредъёсты.)

⁴ Лыдӟе Псалтирез 132:1. Псаломез гожъясь шуиз, агай-вынъёсын валче улыны — со «ӟеч» но «умой» шуыса. Ми соин быдэсак соглаш. Малпаське таӵе пример вылын. Куддыръя ми ум адӟиське, макем чебер писпу, кудӥз вӧзтӥ котькуд нунал ортчылӥськомы. Ӵапак озьы ик куддыръя ми ум адӟиське, макем паймымон, Инмарлэн калыкез огкылысь улэ шуыса. Ми агайёсмес но сузэръёсмес ӵем адӟиськомы — арняяз кӧня ке пол. Мар кароно, агайёсмес но сузэръёсмес яратон медаз сӥя шуыса? Ялан малпаськоно, макем дуно котькудӥз быдэс кенешлы но милемлы.

5. Мар карыны адямиослэн мылкыдзы ӝутске, ог-огмес яратэммес адӟыса?

⁵ Пумиськонъёсамы нырысетӥзэ лыктыкузы, ӵем дыръя адямиос адӟо яратонэз, кудзэ ми ог-огмылы возьматӥськомы. Куд-огъёсыз, сое гинэ адӟыса, валало ини, зэмлыкез шедьтӥзы шуыса. Иисус вераз: «Куспады яратонды луиз ке, тӥ Мынам дышетскисьёсы шуыса, тӥледыз ваньмыз тодмалозы» (Иоанн 13:35). Тани Ча́йтра нылмуртлэн учырез, кудӥз университетын дышетскиз но Иеговалэн Адӟись-Ивортӥсьёсыныз Библиез дышетӥз. Сузэр сое улосысь конгрессэ ӧтиз. Нырысетӥ нуналаз ик Чайтра шуиз: «Анай-атае монэ ноку ӧз ӟыгыртылэ. Нош татын одӥг нунал куспын гинэ монэ 52 пол ӟыгыртӥзы! Аслаз ужась-тыршисьёсыз пыр Иегова мыным возьматӥз, монэ туж зол яратэ шуыса. Мынам потэ та семья пӧлы пыреме». Чайтра Библиез дышетыны азьланьтӥз но 2024-тӥ арын пылатӥськиз. Озьыен, ӵем дыръя, ӟеч ужъёсмес но ог-огмес яратэммес адӟыса гинэ, адямиослэн мылкыдзы ӝутске Иеговалэн ужась-тыршисьёсыз луыны (Матф. 5:16).

6. Малэсь милемыз уте агайёсынымы но сузэръёсынымы эшъяськон?

⁶ Агайёсын но сузэръёсын эшъяськон милемыз уте. Павел христианъёсты ӧтиз: «Нуналлы быдэ ог-огдэс дышетэ-нодъялэ [«ог-огдылэсь мылкыддэс ӝутэ», ВД]... сьӧлык улэ сюрыса, нокудды но тӥ пӧлысь медад лекоме вал» (Евр. 3:13). Куддыръя, ӝожомыса улэменымы сэрен, ми шонер сюрес вылысь кожыны быгатӥськомы. Нош сюлмаськись агай яке сузэр пыр Иегова милемлы юрттыны быгатэ (Пс. 72:2, 17, 23). Макем умой, милям сыӵе эшъёсмы вань шуыса!

7. Кызьы яратон юрттэ огкылысь улыны? (Колоссыослы 3:13, 14).

⁷ Быдэс дунне вылын агайёс но сузэръёс ог-огзылы яратэмзэс возьматыны тыршо. Со трос умой емышъёс вае (1 Иоанн 4:11). Кылсярысь, яратон милемлы юрттэ ог-огмылэсь тырмымтэосмес чиданы, нош со юрттэ огкылысь улыны (лыдӟе Колоссыослы 3:13, 14; Еф. 4:2—6). Иеговалэн Адӟись-Ивортӥсьёсызлэн гинэ сокем умой кусыпъёссы вань.

ГАЖАЛЭ АГАЙЁСТЫ НО СУЗЭРЪЁСТЫ

8. Кызьы Иегова милемлы юрттэ огкылысь улыны?

⁸ Ми ваньмы сьӧлыкоесь. Озьы ке но Иеговалэн юрттэменыз ми быдэс дунне вылысь агайёсынымы но сузэръёсынымы огкылысь улыны быгатӥськомы (1 Кор. 12:25). Библиын вераське, Иегова ог-огмес яратыны дышетэ шуыса (1 Фес. 4:9). Кызьы? Солэн Кылаз гожтэмын визь-кенешъёс со сярысь, мар кароно, агайёсынымы но сузэръёсынымы умой эшъёс луон понна. Со визь-кенешъёсты сак эскерыса но улонэ пыртыса, ми Инмарлы лэзиськомы милемыз дышетыны (Иак. 1:25; Евр. 4:12). Быдэс дунне вылысь Иеговалэн Адӟись-Ивортӥсьёсыз озьы ик лэсьто.

9. Мае тодыны луэ мукетъёсты гажан сярысь, Римъёслы 12:9—13 лыдӟыса?

⁹ Кызьы Инмарлэн Кылыз юрттэ милемлы агайёсын но сузэръёсын умой эшъёс луыны? Учке, мар вераз та сярысь Павел Римъёслы 12:9—13 (лыдӟе). Висъялэ саклыктэс таӵе кылъёслы: «Мукетъёссэ асьтэ сярысь умоесьгес луо шуыса лыдъялэ». Кызьы ми сое возьматыны быгатӥськомы? Тырше мукетъёсызлы ӟеч ужъёс лэсьтыны. Кылсярысь, асьтэды соосын лякытэн возе, куно каре, шырыт сямоесь луэ но вань сюлмысьтыды простить каре (Еф. 4:32). Возьмано ӧвӧл, куке агай яке сузэр тӥледлы мар ке но ӟечсэ лэсьтоз. Асьтэос нырысетӥ вамыш лэсьтэ. Соку тӥ валалоды, мар сярысь вераз Иисус: «Басьтон сярысь, сётыны умойгес» (Ап. уж. 20:35).

10. Кызьы ми тыршисесь луыны быгатӥськомы, мукетъёсызлы гажанмес возьматыкумы? (Озьы ик учке суредэз.)

¹⁰ «Мукетъёссэ асьтэ сярысь умоесьгес луо шуыса лыдъялэ» верамез бере Павел шуиз: «Тыршыса, дугдылытэк... ужалэ». Тыршись адями ужзэ мылысь-кыдысь быдэстэ. Со сяна, Мадёнъёсын 3:27, 28 гожтэмын: «Киыдлэн лэсьтыны кужымез вань дыръя ёрмыса улӥсьёслы ӟеч уж лэсьтонлэсь эн палэнскы». Соин ик, ми адӟиськомы ке, агайлы яке сузэрлы юрттэт кулэ шуыса, ми соку ик соослы юрттыны тыршиськомы. Ми сое берлолы ум кельтӥське но ум малпаське, кин ке но мукетыз соослы юрттоз шуыса (1 Иоанн 3:17, 18).

11. Мар милемлы юрттоз агайёсынымы но сузэръёсынымы кусыпъёсмес юнматыны?

¹¹ Эшшо одӥгез амал, кызьы мукетъёсызлы гажанмес возьматыны луэ,— куке соос милемыз вӧсь каро, милемлы соосты простить кароно. Ефесъёслы 4:26 гожтэмын: «Шунды пуксьыса медаз вуы, йыркуръяськонды мед кысоз». Малы? 27-тӥ кылбур верамъя, озьы ми Шайтанлы инты ум кельтэ. Аслаз Кылыз пыр Иегова трос пол куре милемыз простить карыны. Колоссыослы 3:13 гожтэмын: «Ог-огдылы простить каре». Агайёсынымы но сузэръёсынымы кусыпъёсмес юнматон понна, дышетсконо соослэсь янгышъёссэс простить карыны но куатаськыса улэмысь дугдыны. Простить каримы ке, ми ог-огенымы тупаса но огмылкыдын уломы (Еф. 4:3).

12. Кызьы Иегова милемлы юрттэ ог-огмес простить карыны?

¹² Соосты, кинъёс милемыз вӧсь каризы, простить карыны капчи ӧвӧл. Но святой духлэн юрттэменыз ми быгатомы. «Гажаса ог-огеныды улэ» но «Тыршыса... ужалэ» кылъёс бере Библиын гожтэмын: «Духеныды ӝуатскыса, Кузё-Инмарлы ужалэ». Нош, ӟырдыт мылкыдын Иеговалы ужан-тыршон понна, милемлы святой дух кулэ. Соин ик ми вань сюлмысьтымы Иеговалэсь святой духсэ куриськомы (Лука 11:13).

«КУСПАДЫ ЛЮКИСЬКЫЛОНЪЁС МЕДАЗ ЛУЭ»

13. Малы ми куспын люкиськылонъёс кылдыны быгато?

¹³ Кенеше туж пӧртэм адямиос пыро (1 Тим. 2:3, 4). Соин сэрен куддыръя ми пӧртэм сямен учкиськомы дӥськут, вылтус, эмъяськон яке шутэтскон амалъёс шоры (Рим. 14:4; 1 Кор. 1:10). Ӧм ке чаклаське, ми куспын люкиськылонъёс кылдыны быгато. Соин ик милемлы асьмелэсь малпанъёсмес кужмысь ӵектоно ӧвӧл но малпано ӧвӧл, ми гинэ шонер малпаськомы шуыса. Озьы ми возьматомы, Инмар милемыз ог-огмес яратыны дышетӥз шуыса (Флп. 2:3).

14. Мар милемлы котьку кароно но малы?

¹⁴ Со сяна, кенешын люкиськылонъёс медам луэ шуыса, ми котьку но мукетъёсызлэсь мылкыдзэс ӝутомы но соосты юнматомы (1 Фес. 5:11). Берло дыре тросэз, кинъёс кемалась ини пумиськонъёсы уг ветло яке кенешлэсь палэнтэмын вал, берытско. Ми солы туж шумпотӥськомы! (2 Кор. 2:8). Тани мар вераз сузэр, кудӥз 10 ар пумиськонъёсы ветлымтэез бере Эксэйлык юртэ лыктӥз: «Монэн пальпотыса но кизэс сётыса ӟечбуръяськизы» (Ап. уж. 3:19). Кызьы сузэр ассэ соку шӧдӥз? Со вера: «Иегова монэ китӥм кутӥз кадь но берен вуттӥз отчы, кытын мон шудо луо». Ми мукетъёсты юнматӥськомы ке, Христос ми пыр буйгатыны быгатэ соосты, кинъёс курадӟыса уло (Матф. 11:28, 29).

15. Мар эшшо милям кареммы луэ на, огкылысь улон понна? (Озьы ик учке суредэз.)

¹⁵ Мар эшшо милям кареммы луэ на, огкылысь улон понна? Чаклано, мае ми вераськомы. Иов книгаын 12:11 гожтэмын: «Пель-а кылъёсты уг кылы, кыл-а сиёнлэсь шӧмзэ уг шӧды?» Тае валан понна, пуктэ син азяды, тӥ сиён пӧрады шуыса. Пӧрам сиёндэс мукетъёсызлы ӵектэмдылэсь азьло нырысь тӥ сое асьтэос веръялоды. Ӵапак озьы ик мае ке верамлэсь азьло умой малпаськоно (Пс. 140:3). Милям потэ, кылъёсмы мукетъёсызлэсь мылкыдзэс мед ӝутозы, соосты мед юнматозы но соослы пайда мед ваёзы шуыса (Еф. 4:29).

16. Кинлы тужгес но чаклано, мае соос верало?

¹⁶ Картъёслы но анай-атайёслы тужгес но тыршоно, кылъёссы лякытэсь мед луозы шуыса (Кол. 3:19, 21; Тит. 2:4). Сое ик лэсьтоно тӧроослы но. Соос Иеговалэсь ыжъёссэ буйгатыны но юнматыны кулэ (Ис. 32:1, 2; Гал. 6:1). Соин ик Библиын гожтэмын: «Макем умой ас дыраз верам кыл!» (Мад. 15:23).

«УЖ ВЫЛЫН ЗЭМЗЭ ИК ЯРАТЫСА» УЛЭ

17. Мар милемлы юрттоз агайёсмес но сузэръёсмес вань сюлмысьтымы яратыны?

¹⁷ Апостол Иоанн милемыз ӧте «уж вылын зэмзэ ик яратыса улыны» (1 Иоанн 3:18). Милям потэ агайёсмес но сузэръёсмес вань сюлмысьтымы яратэммы. Мар со понна кароно? Агайёсынымы но сузэръёсынымы дырмес ӵош ортчытъяса, милям соосын кусыпъёсмы юнмало но ми соосты эшшо но зол яратӥськомы. Соин ик тырше дырдэс ӵош ортчытъяны. Кылсярысь, кенешлэн пумиськонъёсаз но тодытыкуды ог-огеныды вераськыны тырше но ог-огды доры куное ветлэ. Озьы ми возьматомы, Инмар милемыз ог-огмес яратыны дышетӥз шуыса (1 Фес. 4:9). Соку ми котьку но ас выламы шӧдомы, «макем ӟеч, макем умой агай-вынъёслы валче улыны» (Пс. 132:1).