ЭСКЕРОН ПОННА 15-ТӤ СТАТЬЯ
30-ТӤ КЫРӞАН Мынам Утисе, Атае но Эше
Милемлы «шумпотон — Инмарлэн матаз мыныны»!
«Мыным шумпотон — Инмарлэн матаз мыныны!» (ПС. 72:28).
МИ ТОДОМЫ
Кызьы ми быгатӥськомы Иеговалэн матаз мыныны но кыӵе милемлы пайда вае соин эшъяськон.
1, 2. а) Мар кароно, матысь эш шедьтон понна? б) Мае ми эскеромы та статьяын?
МАЛПАСЬКЫ матысь эшед сярысь. Кызьы тӥ эшъяськиды? Тӥ дырдэс ӵош ортчытъяды но вераськиды, вылды. Тон тодӥд солэн шуг-секытъёсыз сярысь, озьы ик со сярысь, мар солы кельше яке уг кельшы. Тонэ паймытӥзы, луоз, солэн умой сямъёсыз, кудъёссэ тынад но будэтэмед потӥз. Ваньмыз та тыныд юрттӥз эштэ яратыны.
2 Кинэн ке эшъяськон понна, дыр но кужым кулэ. Сое ик вераны луэ Иеговаен эшъяськон сярысь но. Милям сое яратэммы потэ ке, милемлы соин дырмес ортчытъяно но со сярысь тросгес тодоно. Та статьяын ми эскеромы, кызьы ми Инмарлэн матаз мыныны быгатӥськомы но кыӵе пайда вае соин эшъяськон.
3. Малы малпаськыны кулэ, кыӵе пайда вае Иеговаен эшъяськон? Вералэ пример.
3 Малпаськыны кулэ, кыӵе пайда вае Иеговаен эшъяськон (Пс. 62:7—9). Эскеромы тае пример вылын. Ваньзы тодо, пайдаё сиён сиёно, ялан спортэн выроно, тырмыт изёно но котькуд нунал тырмыт ву юоно шуыса. Но тросэз сое уг быдэсъяло, соин сэрен тазалыксы лябӟыны быгатэ. Нош адями малпаськиз ке, кыӵе пайда ваё сыӵе ужъёс, солы капчигес луоз соосты быдэсъяны. Ӵапак озьы ик ми тодӥськомы, Инмарен эшъяськыны — со умой шуыса. Но со тырмыт ӧвӧл. Ялан малпаськоно, кыӵе пайда со вае. Соку милям эшшо но юн мылкыдмы луоз Эшмылы матэ кариськыны (Пс. 118:27—30).
4. Кыӵе шӧдонъёс сярысь гожтэмын Псалтирьын 72:28?
4 Лыдӟе Псалтирез 72:28. 72-тӥ псаломез гожтӥз левит, кудӥз Иеговалэн храмаз крезьгурчи вал. Со трос аръёс ӵоже Иеговалы оскымон ужаз-тыршиз, вылды. Озьы ке но со вала вал: аслыз но, мукетъёсызлы но тодазы возёно, «Инмарлэн матаз мыныны» шумпотон вае шуыса. Ойдолэ эскеромы, малы со озьы.
ИНМАРЕН ЭШЪЯСЬКЫСА, МИ ШУДОГЕС ЛУИСЬКОМЫ
5. а) Малы, Иеговалы матэ кариськыса, ми шудогес луиськомы? б) Вералэ, кызьы тӥледыз утё пайдаё визь-кенешъёс, кудъёсыз гожтэмын Мадёнъёсын 2:6—16.
5 Иеговалы матэ кариськыса, ми шудогес луиськомы (Пс. 64:6). Малы? Библия пыр Инмар милемлы аслэсьтыз визьлыксэ сётэ. Солэсь кылзӥськыса, ми но визьлыкогес луиськомы. Со милемлы юрттэ кышкытлыкъёслэсь но бадӟым янгышъёслэсь палэнскыны. (Лыдӟе Мадёнъёсты 2:6—16.) Соин ик Библиын гожтэмын: «Визьлык шедьтэм мурт шудо, визь-нод басьтэм адями шудо» (Мад. 3:13).
6. Малы псаломез гожъясь шумпотонзэ ыштӥз?
6 Веранэз ӧвӧл, Иеговалэн эшъёсыз но куддыръя ӝожомыса уло. 72-тӥ псаломез гожъясь шумпотонзэ ыштӥз, куке шонертэм малпанъёсызлы сётскиз. Со урод адямиослы вожъяськыны кутскиз но солэн вожез потӥз, Инмарлэсь кылзӥськытэк но, соос майбыр уло шуыса. Со малпаз, лек но вылтӥяськись адямиос узыр, висьытэк но курадӟытэк уло шуыса (Пс. 72:2—7, 12). Соин сэрен псаломез гожъясьлэн мылкыдыз куашказ. Со малпаз, Иеговалы ужан-тыршон нокыӵе пайда уг вайы шуыса. Аслаз куректэмез сярысь со тазьы гожтӥз: «Мон... дун-шектэм луыса вылысь киосме юнме ӧй миськылы-а?» (Пс. 72:13).
7. Мар кароно, ӝожомыса улыкумы? (Озьы ик учке суредэз.)
7 Псаломез гожъясь ӝожомыса улӥз ке но, буйгатскон понна со мар ке но кариз. Со пыриз «Инмарлы вӧсяськон интые». Отын Иегова солы юрттӥз ваньмыз шоры шонер учкыны (Пс. 72:17—19). Куке ми ӝожомыса улӥськомы, Иегова, самой умой Эшмы, со сярысь тодэ. Ми быгатӥськомы солы вӧсяськыны но визь-кенеш курыны. Библиысь малпанъёс, озьы ик агайёслэн но сузэръёслэн ӟеч кылъёссы милемлы кужым сётыны быгато Иеговалы ужаны-тыршыны. Куректыса улыкумы но, Иегова милемыз буйгатоз но сюлэммес каньыл кароз (Пс. 93:19)a.
Левит, кудӥз 72-тӥ псаломез гожтӥз, «Инмарлы вӧсяськон интыын» сылэ. (Учке 7-тӥ абзацез.)
ИНМАРЕН ЭШЪЯСЬКЫСА, МИ ВАЛАСЬКОМЫ, МАЛЫ УЛӤСЬКОМЫ, НО МИЛЯМ ВУОНОЕЗЛЫ ОСКОНМЫ ВАНЬ
8. Кыӵе эшшо пайда вае Инмарен эшъяськон?
8 Кыӵе эшшо пайда вае Инмарен эшъяськон? Нырысетӥез, Иеговаен эшъяськыса, ми валаськомы, малы улӥськомы. Кыкетӥез, Инмарен эшъяськон милемлы вуоноезлы юн оскон сётэ (Иер. 29:11). Ойдолэ со сярысь пыр-почгес вераськомы.
9. Малы вераны луоз, Иеговаен эшъяськыса, ми валаськомы шуыса, малы улӥськомы?
9 Иеговаен эшъяськыса, ми валаськомы, малы улӥськомы. Туннэ тросэз уг оско, Инмар зэм но вань шуыса. Соин ик соос уг тодо, малы адямиос уло, но малпало, азьланяз адямиос музъем вылысь бырозы шуыса. Но, Библиез дышетыса, ми тодӥмы, «Инмар вань шуыса, Ассэ утчасьёслы Инмар мед-кузьым сётэ шуыса» (Евр. 11:6). Со сяна, ми шудоесь, малы ке шуоно лэсьтӥськомы сое, мар понна ми кылдытэмын вал,— инмысь Атаймылы ужаськомы-тыршиськомы (К. Зак. 10:12, 13).
10. Кыӵе улон возьма соосты, кинъёс Иеговалы оскиськыса уло? (Псалтирь 36:29).
10 Тросэзлэн азьпал улонлы нокыӵе осконзы ӧвӧл. Соос ужало, нылпиоссэс будэто но азьланезлы коньдон люкало. Соос уг тодо, кыӵе улон дасяз Инмар адямиослы. Нош ми тодӥськомы, Иегова аслаз калыкез сярысь сюлмаське шуыса (Пс. 24:3—5; 1 Тим. 6:17). Ми оскиськомы Инмармылы но Эшмылы. Ми тодӥськомы, со вань сётэм кылъёссэ быдэстоз шуыса. Азьланяз со милемлы трос кузьымъёс кузьмалоз. Но тужгес но ми возьмаськомы дырез, куке райын пырак дауръёс ӵоже Иеговалы ужаны-тыршыны быгатомы. (Лыдӟе Псалтирез 36:29.)
11. Кыӵе пайда вае тӥледлы Иеговаен эшъяськон но мае со шӧдэ, куке ми солы матэ кариськиськомы?
11 Вань на трос мукет мугъёс, малы, Инмарен эшъяськыса, ми шудогес луиськомы. Кылсярысь, ми ӧпкелимы ке, Иегова кылзэ сётэ милемыз простить карыны (Ис. 1:18). Соин ик азьвыл лэсьтэм сьӧлыкъёсмы понна асьмеды йыръёно ӧвӧл ини (Пс. 31:1—5). Иеговалы матэ кариськыса, ми солэсь сюлэмзэ шумпоттӥськомы, озьы ик асьмеос но шумпотӥськомы (Мад. 23:15). Та ваньмыз ӧвӧл на. Тӥ тодады вайыны быгатӥськоды, вылды, кыӵе эшшо пайда вайиз тӥледлы Инмарен матысь эшъяськон. Нош мар карыны луэ, Инмарлы эшшо но матэ кариськон понна?
МАР МИЛЕМЛЫ ЮРТТОЗ ИНМАРЕН ЭШШО НО МАТЫСЬ ЭШЪЁС ЛУЫНЫ
12. Мар тӥ кариды ини, Инмарлы матэ кариськон понна?
12 Пылатӥськемдылэсь азьло тӥ трос лэсьтӥды ини, Инмарен эшъяськон понна. Тӥ Иегова но Иисус сярысь зэмлыкез тодӥды, сьӧлыкъёсты понна ӧпкелиды, Инмарлы юн оскиды но солэн эрикезъя улыны кутскиды. Нош, Иеговалы эшшо но матэ кариськон понна, азьланяз но озьы ик улоно (Кол. 2:6).
13. Кыӵе куинь визь-кенешъёс милемлы юрттозы Иеговаен эшшо но матысь эшъёс луыны?
13 Мар милемлы юрттоз Иеговаен эшшо но матысь эшъёс луыны? 1) Ялан Библиез лыдӟоно но эскероно. Инмар сярысь тросгес тодон-валан басьтыны тырмыт ӧвӧл. Милям потэ валаммы, мае возьма милесьтым Иегова, но солэн возетъёсызъя улэммы (Еф. 5:15—17). 2) Инмар милемлы пӧртэм амалъёсын яратэмзэ возьматэ. Со сярысь малпаськыса, осконмес юнматоно. 3) Милемлы азьланяз но адӟемпотостэм кароно сое, мар Иеговаез сантэма, но лек ужъёс лэсьтӥсьёсын эшъяськоно ӧвӧл (Пс. 1:1; 100:3).
14. Кызьы ми котькуд нунал Иеговаез шумпоттыны быгатӥськомы? (1 Коринфъёслы 10:31). (Озьы ик учке суредъёсты.)
14 Лыдӟе 1 Коринфъёслы 10:31. Котькуд нунал Иеговаез шумпоттыны тыршоно. Со шумпотэ, куке ми адямиослы ӟеч иворез вераськомы но кенешлэн пумиськонъёсаз ветлӥськомы. Со сяна, ми быгатӥськомы сое шумпоттыны нуналысь нуналэ лэсьтоно ужъёсынымы но. Кылсярысь, Иегова шумпотэ, куке ми котьку пӧяськытэк улӥськомы но дась мукетъёсызлы сётыны сое, мармы милям вань (2 Кор. 8:21; 9:7). Озьы ик Инмарлэн потэ, ми улонэз, солэсь кузьымзэ, мед дунъяломы шуыса. Соин ик ми чакласькомы, кӧня сииськомы-юиськомы, но тазалыкмес юнматыны тыршиськомы. Куке Иегова адӟе, ми ужъёсынымы сое шумпоттыны тыршиськомы шуыса, со милемыз эшшо но зол яратэ (Лука 16:10).
Иеговаез шумпоттон понна, трос амалъёс вань. Кылсярысь, со шумпотэ, куке ми, катъёслэсь кылзӥськыса, машинаез нуллӥськомы, мукетъёсызлы сётӥськомы сое, мармы милям вань, но тазалыкмес утиськомы, мугормес кыдатыса но шонер сиськыса. (Учке 14-тӥ абзацез.)
15. Кызьы асьмеды мукетъёсыныз возёно, Иеговаез шумпоттон понна?
15 Иегова котькинэн ассэ ӟеч возе — соосын но, кинъёс солэн ужась-тыршисьёсыз ӧвӧл (Матф. 5:45). Со возьма, ми солэсь адӟем каромы шуыса. Кылсярысь, Инмарлэн потэ, ужась-тыршисьёсыз «нокинэ но урод кылын медаз куаретэ, керӟегъяськыса-копаськыса медаз улэ, зӥбыт-востэм, вань адямиосын тупаса мед улозы» шуыса (Тит. 3:2). Соин ик, адямиос Иеговалы уг оско ке но, ми ум вылтӥяськиське но асьмеды соослэсь умойгес шуыса ум лыдъяське (2 Тим. 2:23—25). Асьмеды мукетъёсыныз котьку ӟеч но лякыт возьыса, ми Иеговалы эшшо но матэ кариськиськомы.
ЭН ЛЭЗЕ ЯНГЫШЪЁСТЫЛЫ ТӤЛЕДЫЗ ИЕГОВАЛЭСЬ ПАЛЭНТЫНЫ
16. Кыӵе шӧдонъёсыз вал 72-тӥ псаломез гожъясьлэн?
16 Куддыръя ми малпаськомы, Иегова милесьтым палэнскиз шуыса. Сыӵе ик шӧдонъёсыз вал 72-тӥ псаломез гожъясьлэн но. Со шуиз: «Ӧжытак гинэ пыдъёсы либрак ӧз луэ, ӧжытак гинэ пыдъёсы ӧз волегӟе» (Пс. 72:2). Озьы ик со вераз: «Сюлмы-кӧты инты шедьтытэк улыку... Тон азьын мон пудо выллем маке вал» (Пс. 72:21, 22). Малпаз-а псаломез гожъясь, Иегова сое уг яраты ни шуыса?
17. а) Мар кариз псаломез гожъясь, куке солы туж секыт вал? б) Малы ми солэсь дышетскиськомы? (Озьы ик учке суредъёсты.)
17 Ми ум тодӥське, малпаз-а, ӧз-а, псаломез гожъясь, Иегова солэсь палэнскиз шуыса. Кызьы гинэ медам луы, со ӧз лэзьы, вылды, сыӵе малпанъёслы йыраз кема берганы. Туж секыт дыръя но со вала вал, Инмарлы матэ кариськоно шуыса. Та адӟиське Иеговалы верам кылъёсысьтыз: «Нош мон котьку но Тонэн, Тон монэ бур китӥм кутыса возиськод. Визь-кенеш Тон мыным сётӥськод, данлыке монэ нуиськод» (Пс. 72:23, 24). Куке ми лябӟемын яке янгышъёсмы сэрен кимы лэзиське, милемлы но тодамы вайылоно, Иегова — юнматскон интымы шуыса (Пс. 72:26; 93:18). Ми шонер сюрес вылысь кожимы ке но, милям Иегова доры берытскеммы но юн оскеммы луэ, со милемыз простить карыны дась шуыса (Пс. 85:5). Туж секыт дыръя но Инмарлэсь палэнсконо ӧвӧл (Пс. 102:13, 14).
Ми шӧдӥськомы ке, осконмы лябӟе шуыса, милемлы Иеговаен кусыпъёсмес юнматоно, тросгес вӧсяськоно но кенешлэсь пумиськонъёссэ кельтылоно ӧвӧл. (Учке 17-тӥ абзацез.)
МИЛЯМ ПЫРАК ДАУРЪЁС ӴОЖЕ ИНМАРЕН ЭШЪЯСЬКЕММЫ ЛУЭ
18. Малы ми пырак дауръёс ӵоже Иеговалы матэ кариськыны быгатӥськомы?
18 Ми пырак дауръёс ӵоже Иеговалы матэ кариськыны быгатӥськомы. Ми котьку но со сярысь мае ке выльзэ тодыны быгатомы. Библия верамъя, Иеговалэн тодонэз но визьлыкез пыдэстэм (Рим. 11:33).
19. Мар верало азьпал улон сярысь 72-тӥ но 78-тӥ псаломъёс?
19 Псалтирьын 78:13 гожтэмын: «Ми, Тынад калыкед, возь вылысьтыд ыжъёсыд, пумтэм дауръёс ӵоже Тонэ данъяломы, выжыысь выжыосы Тонэ ушъяса вераломы». Тӥ но оскыны быгатӥськоды, Иеговалы матэ кариськиды ке, со тӥледыз котьку но бакель кароз шуыса. Псаломез гожъясь сямен, тӥ но вераны быгатоды, Инмар — пумтэм вапумъёс ӵожелы милям сюлэммылэн юнматскон интыез шуыса (Пс. 72:26).
32-ТӤ КЫРӞАН Ул Инмарен ӵош
a Соослы, кинъёс кема дыр ӵоже кыӵе ке мугъёсын сэрен сюлмаськыса яке ӝожомыса уло, оло нош, эмъясьёслы вазиськыны кулэ. Тросгес тодон понна, учке 2023-тӥ арын поттэм «Возьмаськон башняез», № 1.