Оскы, Иегова тонэ яратэ шуыса

1. Малы тон ужпум кутӥд Иеговалы ужаны-тыршыны? (Озьы ик учке суредэз.)

ТОДӤСЬКОД НА-А тон, кызьы Иеговалы кылдэ сётӥд, солы вань улытозяд ужалод-тыршод шуыса? Тон сыӵе ужпум кутӥд, малы ке шуоно Инмарен тодматскид но сое яратӥд. Вӧсяськыкуд тон верад, солэн эрикез улонад валтӥсез луоз но тон сое вань сюлмыныд, вань лулыныд, вань визьмыныд, вань кужмыныд яратод шуыса (Марк 12:30). Дыр ортчемъя тон Иеговаез эшшо но юн яратӥд. Туннэ тынэсьтыд кин ке но юаз ке: «Тон зэмзэ ик Иеговаез яратӥськод-а?», тон шуод: «Туж яратӥсько! Иегова мон понна котькинлэсь но котьмалэсь дуно!»

2, 3. Малы ми юн оскыны кулэ но мае ми эскеромы та статьяын? (Иеремия 31:3).

² Ми оскиськомы ке но, Иеговаез яратӥськомы шуыса, оло нош, ми туж ик ум оскиське, со милемыз яратэ шуыса. Малы ке шуоно ми малпаськомы, вылды, ми кадь адямиез Иегова уз яраты шуыса. Сузэр, кудӥз пичи дыръяз яратонэз ӧз адӟы, вера: «Мон тодӥсько, Иеговаез яратӥсько шуыса. Но ӵем дыръя мынам кылдыло малпанъёсы, со монэ уг яраты шуыса». Мар юрттоз валаны, Иегова монэ яратэ-а, уг-а шуыса?

³ Иеговалэн потэ, тон быдэсак мед оскод, со тонэ яратэ шуыса. (Лыдӟе Иеремиялэсь 31:3.) Со тонэ ас дораз вайиз, малы ке шуоно со тонэ яратӥз. Куке тон солы аслэсьтыд улондэ сӥзид но пылатӥськид, со тыныд туж дуно мае ке кузьмаз — бырисьтэм яратонзэ. Иегова оскымон ужась-тыршисьёссэ, озьы ик тонэ но, нима аслаз люкетэныз, кудзэ со гажаса-жаляса утёз (Мал. 3:17). Инмарлэн потэ, тынад апостол Павеллэн кадь ик юн осконэд мед луоз шуыса. Павел гожтӥз: «Мон уго юн оскисько: кулон но, улон но, Кылчинъёс но, Кутсконъёс но, Кужымъёс но, туннэ нунал но, вуоноез но, ӝуждала но, мурдала но, нокыӵе но мукет кылдытэм маке но асьмемыз Инмарлэн яратонэзлэсь люкыны уз быгатэ» (Рим. 8:38, 39). Та статьяын ми эскеромы, малы асьмеды оскытыны кулэ, Иегова милемыз яратэ шуыса, но кызьы сое лэсьтоно.

МАЛЫ ОСКОНО, ИЕГОВА МИЛЕМЫЗ ЯРАТЭ ШУЫСА

4. Кыӵе амалэз Шайтан уже кутыны яратэ но мар кароно, Шайтанлэсь утиськон понна?

⁴ Оскон, Иегова милемыз яратэ шуыса, милемлы юрттоз Шайтанлэн «кескич ужъёсызлы пумит сылыны» (Еф. 6:11). Шайтан ваньзэ лэсьтыны дась, ми Инмарлы ужамысь-тыршемысь мед дугдомы шуыса. Одӥгез амал, кудзэ Шайтан уже кутыны яратэ,— со милемлы малпан пыӵатэ, Иегова милемыз уг яраты шуыса. Но со озьы ӧвӧл! Библиын Шайтан левен ӵошатӥське (1 Пётр 5:8, 9). Лев ляб пудо-животъёс вылэ урдскылэ. Ӵапак озьы ик Шайтан но возьма, куке ми лябӟомы. Кылсярысь, шуг-секытъёс, секытэсь тодэ вайылонъёс яке азьпал улон сярысь сюлмаськонъёс милемыз лябӟытыны быгато. Сыӵе вакытэ Шайтан одно ик ми вылэ урдскыны тыршоз (Мад. 24:10). Мар кароно, Шайтанлэсь утиськон понна? Осконмес юнматоно, Иегова милемыз яратэ шуыса (Иак. 4:7).

5. Малы милемлы туж кулэ шӧдыны Иеговалэсь яратэмзэ?

⁵ Оскон, Иегова милемыз яратэ шуыса, юрттэ милемлы со доры матэгес кариськыны. Малпаське: милям кинэ ке яратэммы потэ, озьы ик милям потэ, милемыз но мед яратозы шуыса. Озьы милемыз Иегова кылдытӥз. Куке милемыз ярато, ми но яратӥськомы. Соин ик, ми шӧдӥськомы ке, Иегова милемыз яратэ шуыса, ми но сое яратӥськомы (1 Иоанн 4:19). Нош ми сое золгес яратӥськомы ке, со но милемыз золгес яратэ. Та сярысь гожтэмын Иаковлэн 4:8: «Инмарлы матэ кариське, Со но тӥляд матады лыктоз». Нош мар кароно, милемлы секыт ке оскыны, Иегова милемыз яратэ шуыса? Кызьы астэ оскытоно, со милемыз яратэ шуыса?

КЫЗЬЫ АСТЭ ОСКЫТОНО, ИЕГОВА МИЛЕМЫЗ ЯРАТЭ ШУЫСА

6. Мар кароно, ми ум ке оскиське, Иегова милемыз яратэ шуыса?

⁶ Ялан вӧсяськы, Иегова тыныд мед юрттоз шуыса валаны, малы со тонэ яратэ (Лука 18:1; Рим. 12:12). Иеговаез кур тыныд юрттыны ачид шоры солэн синмыныз учкыны. Кулэ ке, со сярысь котькуд нунал но трос пол кур. Ми асьмеды мар ке понна йырйиськомы ке, милемлы секыт, вылды, оскыны, Иегова милемыз яратэ шуыса. Но вунэтоно ӧвӧл, «Инмар асьмелэн сюлэммылэсь бадӟымгес» шуыса (1 Иоанн 3:19, 20). Со милемыз асьмеды асьмелэсь но умойгес тодэ. Со адӟе умой сямъёсмес, кудъёссэ ми асьмеос ум но адӟиське, дыр (1 Экс. 16:7; 2 Пар. 6:30). Соин ик кышкатэк Иеговалы сюлэмдэ усьты но солэсь юрттэт кур оскыны, со тонэ яратэ шуыса (Пс. 61:9). Нош собере уже кут визь-кенешъёсты, кудъёсыз сярысь азьланяз вераське.

7, 8. Кызьы Псалтирь книгаысь кылъёс милемыз оскыто, Иегова милемыз яратэ шуыса?

⁷ Оскы Иеговалэн верамезлы. Библия Инмарлэн святой духезлэн валтэмез улсын гожтэмын вал. Соин ик ваньмыз, мар отын гожтэмын,— зэм. Учкомы, мар гожтӥз Давид со сярысь, кызьы Иегова адямиос сярысь яратыса сюлмаське: «Сюлмынызы чигиськыса улӥсьёслы Кузё-Инмар матын улэ, духенызы зӥбыт муртъёсты Со уте» (Пс. 33:19). Куректыса улыку, малпан кылдыны быгатэ, тон воксё огнад кылид шуыса. Но со озьы ӧвӧл. Иегова тонэн, малы ке шуоно со тодэ, сыӵе вакытэ солэн юрттэтэз тыныд тужгес но кулэ шуыса. Мукет псаломын Давид гожтӥз: «Мынэсьтым синкылиосме Аслад тусьтыяд пон» (Пс. 55:9). Луоё кыр дуннеетӥ ветлӥсьлы котькуд шапык ву туж дуно потэ. Ӵапак озьы ик Иеговалы но синкылиосыд туж дуно пото. Со уг вунэты, ку тон куректыса но бӧрдыса улӥськод. Озьы ик Псалтирьын 138:3 гожтэмын: «Вань сюресъёсы но Тыныд азьвыл ик тодмо». Иегова тодэ вань сюресъёстэ, но тужгес но со адӟе умой ужъёстэ (Евр. 6:10). Малы? Малы ке шуоно со дунъя сое шумпоттыны тыршемдэa.

⁸ Библиын вань мукет но буйгатӥсь кылбуръёс. Вераны луоз, Иегова шуэ: «Мынам потэ, тон мед тодод, мон тонэ туж яратӥсько но тон сярысь сюлмаськисько шуыса». Нош Шайтанлэн потэ, ми талы медам оске шуыса. Соин ик, куке тынад малпанэд кылдоз, Иегова тонэ уг яраты шуыса, дугды но малпаськы: «Кинлы мон оско — „ӧрекчаськонлэн атаезлы“ яке „зэмлыклэн Инмарезлы“?» (Иоанн 8:44; Пс. 30:6).

9. Мар карыны Иегова кылзэ сётэ соослы, кинъёс сое ярато? (Потон 20:5, 6).

⁹ Эн вунэты: тон Иеговаез яратӥд ке, со но тонэ котьку яратоз. Тодамы ваёмы, мар вераз Иегова Моисейлы но быдэс израиль калыклы. (Лыдӟе Потонэз 20:5, 6.) Инмар кылзэ сётӥз котьку яратыны соосты, кинъёс сое ярато. Ми оскыны быгатӥськомы, ми Инмарез яратӥмы ке, со но милемыз яратоз шуыса (Неем. 1:5). Соин ик, тынад малпанъёсыд кылдыло ке, Иегова тонэ уг яраты шуыса, дугды но юа аслэсьтыд: «Мон Иеговаез яратӥсько-а?» Собере малпаськы: тон Иеговаез яратӥськод но сое шумпоттыны тыршиськод бере, со но тонэ туж яратэ (Дан. 9:4; 1 Кор. 8:3). Мукет сямен вераса, тон Инмарез яратӥськод ке, соку малы тон малпаськод, со тонэ уг яраты шуыса? Со тонэ котьку яратоз но ноку уз кельты.

10, 11. Кызьы милемлы учконо дун тырон шоры? (Галатъёслы 2:20).

¹⁰ Малпаськы дун тырон сярысь. Иисус Христослэн мозмытӥсь курбонэз — со Иеговалэн адямиослы самой бадӟым кузьымез (Иоанн 3:16). Нош луэ-а вераны, Иисус тон понна кулӥз шуыса? Луэ. Тодамы ваёмы апостол Павелэз. Христиан мурт луэмезлэсь азьло со бадӟым сьӧлыкъёс лэсьтылӥз. Пылатӥськемез бере но со тырмымтэосыныз нюръяськиз (Рим. 7:24, 25; 1 Тим. 1:12—14). Озьы ке но со малпа вал, дун тырон — со кузьым шуыса, кудзэ Иегова солы лэсьтӥз. (Лыдӟе Галатъёслы 2:20.) Иегова Павеллэсь мылкыдзэ ӝутӥз та сярысь Библие гожтыны. Малы? Милемыз малы ке дышетон понна (Рим. 15:4). Иеговалэн потэ, тон но мед малпалод, дун тырон — со кузьым шуыса, кудзэ со тыныд лэсьтӥз. Дун тырон шоры озьы учкид ке, со оскондэ юнматоз, Иегова тонэ яратэ шуыса.

¹¹ Иегова Иисусэз музъем вылэ ыстӥз, со ми понна аслэсьтыз улонзэ мед сётоз шуыса. Со понна ми инмысь Атаймылы туж бадӟым тау шуиськомы. Но Иисуслэн мукет ужпумез но вал: адямиослы Инмар сярысь зэмлыкез вераны (Иоанн 18:37). Кылсярысь, адямиос тодыны кулэ вал, Иегова аслэсьтыз нылпиоссэ туж яратэ шуыса.

КЫЗЬЫ ИИСУС ОСКЫНЫ ЮРТТЭ, ИЕГОВА МИЛЕМЫЗ ЯРАТЭ ШУЫСА

12. Малы оскыны луэ Иисуслэн Иегова сярысь верамезлы?

¹² Музъем вылын улыкуз, Иисуслы кельше вал адямиослы Иегова сярысь вераны (Лука 10:22). Иисуслэн верамезлы оскыны луэ. Малы? Малы ке шуоно со трос миллиард аръёс ӵоже инмын Инмарен ӵош улӥз (Кол. 1:15). Со ас вылаз шӧдӥз Иеговалэсь яратэмзэ, озьы ик адӟиз, кызьы Инмар кылчинъёслы но адямиослы яратэмзэ возьматэ. Иисус тодэ, Иегова оскымон пиоссэ но нылъёссэ туж яратэ шуыса. Кызьы Инмарлэн Пиез милемлы оскыны юрттэ, инмысь Атаймы милемыз яратэ шуыса?

13. Кызьы Иисус милемлы юрттэ Иегова шоры Атай шоры кадь учкыны?

¹³ Иисуслэн потэ, ми Иегова шоры со кадь мед учкомы шуыса. Евангелиосын Иисус Иеговаез трос пол Атаен нима. Дышетскисьёсыныз вераськыкуз, Иисус «Атайды» но «Инмысь Атайды» кылъёсты кутылӥз (Матф. 6:8, 26). Иисус музъем вылэ лыктэмлэсь азьло Иеговалэн ужась-тыршисьёсыз Иеговаез «Котькинлэсь кужмо», «Котькинлэсь вылӥ» но «Быдӟым Кылдытӥсь» шуыса нимало вал. Нош Иисус ӵем дыръя сое «Атай» шуыса нима вал. Та возьматэ вал, Инмарлэн аслаз ужась-тыршисьёсыныз туж матысь кусыпъёсыз шуыса. Валамон, Иисуслэн потэ, ми Иегова шоры мед учкомы шуыса Атай шоры кадь, кудӥз нылпиоссэ яратэ но соос сярысь сюлмаське. Ойдолэ эскеромы кык учыръёсты, куке Иисус «Атай» кылэз кутылӥз.

14. Кыӵе пример вылын Иисус возьматӥз, ми пӧлысь котькудӥз инмысь Атаймылы дуно потэ шуыса? (Матфей 10:29—31). (Озьы ик учке суредэз.)

¹⁴ Нырысь эскеромы Иисуслэсь кылъёссэ, кудъёсыз гожтэмын Матфейлэсь 10:29—31 (лыдӟе). Отын вераське пичи тылобурдоос сярысь. Соос Иеговаез яратыны но солы йыбыртъяны уг быгато ке но, Иегова котькудзэ адӟе. Уката но Иегова сюлмаське ми пӧлысь котькудӥз сярысь, малы ке шуоно ми сое яратӥськомы но солы ужаськомы-тыршиськомы! 30-тӥ кылбурын гожтэмын: «Тӥляд йырысьтыды йырсиосты но ваньмыз лыдъямын». Инмар сое но тодэ бере, милям оскеммы луэ, со ми сярысь туж сюлмаське шуыса. Зэм но, Иисуслэн туж потэ, ми мед тодомы, ми пӧлысь котькудӥз инмысь Атаймылы дуно потэ шуыса.

15. Мае тодыны луэ инмысь Атаймы сярысь Иисуслэн кылъёсысьтыз, кудъёсыз гожтэмын Иоаннлэсь 6:44?

¹⁵ Тани кыкетӥ учыр, куке Иисус «Атай» кылэз кутӥз. (Лыдӟе Иоаннлэсь 6:44.) Инмар тонэ ачиз ас дораз вайиз — со тыныд юрттӥз асэныз тодматскыны но сое яратыны. Малы? Малы ке шуоно тынэсьтыд умой сюлэмдэ адӟиз (Ап. уж. 13:48, ВД). Куке Иисус вераз кылъёсты, кудъёсыз гожтэмын Иоаннлэсь 6:44, со вераз, вылды, Иеговалэсь кылъёссэ, кудъёсыз гожтэмын Иеремиялэн 31:3. Отын Иегова аслаз калыкезлы шуиз: «Бырисьтэм яратонэн Мон тонэ яратӥ». (Ӵошатэ Осиялэсь 11:4.) Малпаськы: малы Иеговалэн яратонэз бырисьтэм шуыса нимамын? Инмысь Атаймы тынэсьтыд умойзэ адӟиз, озьы ик али но адӟе на, тон сое аслэсьтыд уд адӟиськы ке но.

16. а) Малы дышетӥз Иисус но малы милям солы оскеммы луэ? б) Мар юрттоз валаны, Иегова — самой умой Атай шуыса? (Озьы ик учке «Атай, кудӥз ваньмылы кулэ» рамкаез.)

¹⁶ Куке Иисус Иеговаез милям Атаенымы нима, вераны луоз, со шуэ: «Иегова мынам гинэ Атае ӧвӧл — со тынад но Атаед. Со тонэ туж яратэ». Соин ик, куддыръя тынад малпанъёсыд кылдыло ке, Иегова тонэ уг яраты шуыса, соку ик тодад вай, малы дышетӥз Иисус. Малы ке шуоно со Атаймес котькинлэсь умой тодэ но ноку уг пӧяськы (1 Пётр 2:22).

ОСКОНДЭ ЮНМАТЫ, ИЕГОВА ТОНЭ ЯРАТЭ ШУЫСА

17. Малы милемлы азьланяз но осконмес юнматоно, Иегова милемыз яратэ шуыса?

¹⁷ Милемлы азьланяз но осконмес юнматоно, Иегова милемыз яратэ шуыса. Кызьы ми тодӥмы ни, Шайтан, кескич тушмонмы, ваньзэ лэсьтыны дась, милемыз Иеговалы ужамысь-тыршемысь дугдытон понна. Солэн потэ, ми мед лябӟомы но солы мед сётскомы шуыса. Соин ик со азьланяз но милемыз оскытыны тыршоз, Иегова милемыз уг яраты шуыса. Но ми Шайтанлэн пӧяськонэзлы ум оске! (Иов 27:5).

18. Кызьы ми быгатӥськомы юнматыны осконмес, Иегова милемыз яратэ шуыса?

¹⁸ Кызьы тон быгатӥськод оскондэ юнматыны, Инмар тонэ яратэ шуыса? Ялан вӧсяськы но Иеговалэсь юрттэт кур ачид шоры солэн синъёсыныз учкыны. Библиысь кылбуръёсты лыдӟы, кудъёсаз вераське, кызьы со ужась-тыршисьёссэ яратэ но соос сярысь сюлмаське. Тодад вайылы, тон Иеговаез яратӥд ке, со тонэ котьку яратоз шуыса. Дун тырон шоры учкы кузьым шоры кадь, кудзэ Инмар тыныд лэсьтӥз. Оскы Иисуслэн кылъёсызлы, Иегова — тынад инмысь Атаед шуыса. Соку, тынэсьтыд юазы ке: «Тон оскиськод-а, Иегова тонэ яратэ шуыса?», тон юн осконэн шуод: «Бен, оскисько! Мон котькуд нунал солы яратэмме возьматыны тыршисько!»