ЭСКЕРОН ПОННА 4-ТӤ СТАТЬЯ
18-ТӤ КЫРӞАН Дун сётон понна тау кариськомы
Мар вера милемлы дун тырон Иегова но Иисус сярысь?
«Инмар асьмемыз яратонзэ тазьы усьтӥз: Со Аслэсьтыз одӥг гинэ Пизэ дунне вылэ ыстӥз» (1 ИОАНН 4:9).
МИ ТОДОМЫ
Иеговалэн но Иисуслэн кыӵе сямъёссы сярысь тодыны юрттэ дун тырон.
1. Малы кулэ котькуд ар Христослэсь кулонзэ Тодэ ваён ӝытанэ ветлыны?
ДУН ТЫРОН — Иеговалэн дуно кузьымез (2 Кор. 9:15). Инмар музъем вылэ аслэсьтыз Пизэ ыстӥз, кудӥз ми понна улонзэ сётӥз. Солы луыса ми быгатӥськомы Иеговалэн матысь эшъёсыз луыны но пырак улыны. Иегова ми понна Пизэ сётӥз, малы ке шуоно милемыз туж яратэ (Рим. 5:8). Тау карон мылкыдмы медаз сӥя шуыса, озьы ик медам вунэтэ шуыса, мар ми понна каризы Иегова но солэн Пиез, Иисус косӥз арлы быдэ солэсь кулонзэ Тодэ ваён ӝытанэз пусйылыны (Лука 22:19, 20).
2. Мае ми эскеромы та статьяын?
2 2025-тӥ арын Ӝытан ортчоз 12-тӥ оштолэзе, кӧснуналэ. Ми ваньмы тыршомы отчы лыктыны. Умой луоз Ӝытан азьын но со бере кӧня ке арня ӵоже малпаськыны со сярысь, мар ми понна лэсьтӥзы Иегова но Иисус. Та статьяысь ми тодомы, мар вера милемлы дун тырон Иегова но Иисус сярысь. Нош вуоно статьяысь ми тодомы, кыӵе бакель каронъёс сётэ дун тырон но кызьы ми со понна тау кареммес возьматыны быгатӥськомы.
МАР ВЕРА ДУН ТЫРОН ИЕГОВА СЯРЫСЬ
3. Кызьы одӥг адямилэн кулэмез трос миллион адямиосты сьӧлыклэсь но кулонлэсь мозмытыны быгатэ? (Озьы ик учке суредъёсты.)
3 Дун тырон возьматэ, Иегова шонерлыко шуыса (К. Зак. 32:4). Куке Адам Иеговалэсь ӧз кылзӥськы, со сьӧлыко луиз но кулӥз. Ваньмы ми — солэн нылпиосыз бере, милемлы солэсь сьӧлык выжиз, кудӥз сэрен ми кулӥськомы (Рим. 5:12). Милемыз сьӧлыклэсь но кулонлэсь мозмытон понна, Иегова музъем вылэ Иисусэз ыстӥз. Кызьы одӥг адямилэн кулэмез трос миллион адямиосты утьыны быгатэ? Апостол Павел валэктӥз: «Кызьы одӥг муртлэн [Адамлэн] кылзӥськымтэеныз сэрен трос адямиос сьӧлыко луизы, озьы ик Одӥг Адямилэн [Иисуслэн] кылзӥськонэз троссэ адямиосты шонер улӥсь кароз» (Рим. 5:19; 1 Тим. 2:6). Мукет сямен вераса, ми сьӧлыклэн но кулонлэн ляльчиосыз луимы, одӥг сьӧлыктэм адямилэн Инмарлэсь кылзӥськымтэеныз сэрен. Озьыен, сьӧлыклэсь но кулонлэсь мозмытскон понна, мукетыз сьӧлыктэм адями Инмарлы оскымон луыны кулэ.
Одӥг адями сэрен ми сьӧлыклэн но кулонлэн ляльчиосыз луимы. Мукетыз адями милемыз сьӧлыклэсь но кулонлэсь мозмытӥз. (Учке 3-тӥ абзацез.)
4. Малы Иегова Адамлэн кылзӥськись нылпиосызлы уг быгаты вал лэзьыны пырак улыны?
4 Зэм-а Иисуслы, милемыз утён понна, кулыны кулэ вал? Уг быгаты вал-а Иегова сотэк но Адамлэн кылзӥськись нылпиосызлы лэзьыны пырак улыны? Сьӧлыко адямиос малпаны быгато, озьы ик кароно вал шуыса. Но со шонерлыко луысал-а? Соку Инмарлы Адамлэн сьӧлыкез шоры синзэ ворсано луысал. Нош шонерлыко Инмар озьы лэсьтыны уг быгаты.
5. Малы милям оскеммы луэ, Иегова котьку но ассэ шонерлыко возёз шуыса?
5 Мар луысал, Иегова Иисусэз музъем вылэ ӧй ыстысал ке, шонерлыко эсэпъёсыз шоры синзэ ворсасал ке но Адамлэн сьӧлыко нылпиосызлы пырак улыны лэзьысал ке? Соку адямиос малпасалзы, вылды: «Азьланяз Инмар ассэ шонерлыко возёз-а? Кылсярысь, сётэм кылъёссэ быдэстоз-а?» Милемлы со сярысь сюлмаськоно ӧвӧл, малы ке шуоно Иегова ассэ шонерлыко возиз туж секыт дыръя но — со аслэсьтыз яратоно Пизэ музъем вылэ ыстӥз. Соин ик ми оскыны быгатӥськомы, Инмар котьку но ассэ шонерлыко возёз шуыса.
6. Шонерлыко луэмез сяна, мар эшшо Иеговалэсь мылкыдзэ ӝутӥз Пизэ музъем вылэ ыстыны? (1 Иоанн 4:9, 10).
6 Озьыен, дун тырон возьматэ, Иегова шонерлыко шуыса. Со сяна, со валаны юрттэ, макем юн яратэ Иегова адямиосты (Иоанн 3:16; лыдӟе 1 Иоаннлэсь 4:9, 10). Иеговалэн потэ, ми пырак мед уломы шуыса. Со сяна, солэн потэ, ми солэн семьяяз мед пыромы шуыса. Куке Адам сьӧлыказ, Иегова сое семьяысьтыз улляз. Соин ик нокин но Инмарлэн семьяяз уг вордӥськы. Но дун тыронлы луыса Иегова сьӧлыкъёсмес простить каре. Соин ик адямиос, кудъёсыз Инмарлы оско но солэсь кылзӥсько, азьланяз солэн пиосыз но нылъёсыз луозы. Нош али милям Иеговаен но солэн калыкеныз матысь кусыпъёсмы луыны быгато. Зэм но, Иегова милемыз туж яратэ! (Рим. 5:10, 11).
7. Мар вера Иеговалэн яратонэз сярысь Иисуслэн туж зол курадӟемез?
7 Ми умойгес валаломы, макем юн яратэ милемыз Иегова, малпаськимы ке, макем вӧсь солы вал адӟыны яратоно Пиезлэсь курадӟемзэ. Шайтан вера, секыт дыръя одӥг адями но Инмарлы оскымон уз луы шуыса. Со озьы ӧвӧл шуыса возьматон понна, Иегова лэзиз, Пиез кулэмез азьын мед курадӟоз шуыса (Иов 2:1—5; 1 Пётр 2:21). Иегова адӟиз, кызьы религиозной кивалтӥсьёс Иисусэз серем каризы, кызьы ожгарчиос сое сюлоен жугизы, юбо борды кортӵогазы но курадӟыса кулыны кельтӥзы (Матф. 27:28—31, 39). Иегова быгатэ вал Иисусэз мозмытыны. Кылсярысь, куке адямиос шуизы: «Инмарлы Со ярано ке, табере Со мед мозмытоз Сое», Иегова зэм но Иисусэз мозмытыны быгатэ вал (Матф. 27:42, 43). Но соку дун тыремын ӧй луысал но милям вуоноезлы нокыӵе осконмы ӧй луысал. Соин ик Иегова лэзиз, Пиез самой кулытозяз мед курадӟоз шуыса.
8. Кытысь ми тодӥськомы, Пиезлэсь курадӟемзэ адӟыны Иеговалы туж вӧсь вал шуыса? (Озьы ик учке суредэз.)
8 Малпано ӧвӧл, Иеговалэн мертантэм кужымез вань бере, солэн шӧдонъёсыз ӧвӧл шуыса. Ми Инмар кадь кылдытэмын. Со милемыз шӧдонъёсын кылдытӥз. Озьыен, солэн аслаз но шӧдонъёсыз вань. Кылсярысь, Библиын вераське, Инмарлэн «сюлмыз ӝоже усиз» шуыса (Ул.-выл. 6:6). Озьы ик тодамы ваёмы Авраамлэн но Исааклэн улонысьтызы учырез. Иегова Авраамез косӥз одӥг гинэ пизэ курбонлы вайыны (Ул.-выл. 22:9—12; Евр. 11:17—19). Авраамлы чидантэм вӧсь вал, дыр, куке со, пуртсэ кияз кутыса, пизэ ӝогак вандыны дасяськиз. Нош макем вӧсь вал Иеговалы адӟыны, кызьы Пиез, лек адямиослэн ки улазы сюрыса, кулэ вал! (Учке jw.org сайтысь «Подражайте их вере. Авраам (часть 2)» видеороликез.)
Иеговалы вӧсь вал адӟыны Пиезлэсь курадӟемзэ. (Учке 8-тӥ абзацез.)
9. Мае тодыны луэ Иеговалэн яратонэз сярысь, Римъёслы 8:32, 38, 39 лыдӟыса?
9 Дун тырон возьматэ, нокин но — матысь эшъёсмы но, ӵыжы-выжыосмы но — милемыз Иегова кадь уг яраты шуыса. (Лыдӟе Римъёслы 8:32, 38, 39.) Иегова милемыз асьмелэсь асьмеды но золгес яратэ. Потэ-а тӥляд пырак улэмды? Иеговалэн эшшо но зол потэ, тӥ пырак мед улоды шуыса. Потэ-а тӥляд, сьӧлыкъёсты простить каремын мед луозы шуыса? Иеговалэн эшшо но зол потэ тӥледыз простить каремез! Со понна со милемыз куре кузьымзэ басьтыны, осконмес возьматыны но кылзӥськыны. Ми понна дун тырыса, Инмар возьматӥз, макем юн со милемыз яратэ. Нош выль дуннеын со эшшо возьматоз на, милемыз яратэ шуыса (Екк. 3:11, ВД).
МАР ВЕРА ДУН ТЫРОН ИИСУС СЯРЫСЬ
10. а) Мар понна сюлмаськиз Иисус кулэмез азьын? б) Кызьы Иисус Иеговалэсь ӟеч нимзэ утиз? (Озьы ик учке «Аслэсьтыз улонзэ сётыса, Иисус Иеговалэсь ӟеч нимзэ утиз» рамкаез.)
10 Иисус сюлмаськиз, Атаезлэн ӟеч нимыз мед луоз шуыса (Иоанн 14:31). Иисус тодэ вал, сое Инмарез сантэмасез но йыруж лэсьтӥсез кадь казнить карозы шуыса. Со туж сюлмаське вал, соин сэрен Атаезлэсь нимзэ сапталоз шуыса. Соин ик со вӧсяськиз: «Атае! Луоно ке, Мон вӧзтӥ мед ортчысал та чаша» (Матф. 26:39). Кулытозяз ик Иеговалы оскымон кыльыса, Иисус Атаезлэсь ӟеч нимзэ утиз.
11. Кытысь адӟиське, Иисус адямиосты туж яратэ вал шуыса? (Иоанн 13:1).
11 Озьы ик дун тырон валаны юрттэ, Иисус адямиос сярысь сюлмаське шуыса, тужгес но дышетскисьёсыз сярысь (Мад. 8:31; лыдӟе Иоаннлэсь 13:1). Иисус тодэ вал, музъем вылын быдэстоно куд-ог ужъёсыз туж секытэсь луозы шуыса. Кылсярысь, солы курадӟыса кулыны кулэ вал. Озьы ке но Иисус соосты кулэ шуыса гинэ ӧз быдэсъя. Со вань сюлмысьтыз ӟеч иворез тодытӥз, дышетскисьёсты дасяз но мукетъёсызлы юрттӥськиз. Нош кулон нуналаз со дыр шедьтӥз апостолъёсызлэсь пыдзэс миськыны, соослы трос ӟеч кылъёс вераны но соосты дышетыны (Иоанн 13:12—15). Юбо вылын курадӟыкуз но, Иисус вӧзаз кортӵогам йыруж лэсьтӥсьлы вуоноезлы оскон сётӥз, нош Иоаннэз куриз Мария сярысь сюлмаськыны (Лука 23:42, 43, ВД; Иоанн 19:26, 27). Адямиос понна улонзэ сётыса но соосын ассэ лякыт возьыса, Иисус возьматӥз, макем юн со соосты яратэ.
12. Мар каре ми понна Иисус али?
12 Аслэсьтыз улонзэ сётыса, Иисус ми понна туж трос лэсьтӥз ини. Озьы ке но со али но милемлы трос ӟечсэ лэсьтэ (Рим. 6:10). Кызьы? Со трос дырзэ но кужымзэ висъя, адямиос дун тыронлэсь бакель каронъёссэ басьтыны мед быгатозы шуыса. Мар каре Иисус али? Со Эксэй, Быдӟым священник но кенешлэн йырыз луыса ужа-тырше (1 Кор. 15:25; Еф. 5:23; Евр. 2:17). Со кыл кутэ зырӟем христианъёсты но туж-туж трос калыкез люкан понна, кудӥз йылпумъяськоз бадӟым куректонлэн пумыз азьын (Матф. 25:32; Марк 13:27)a. Озьы ик со чакла, та берпум нуналъёсы Иеговалэн ужась-тыршисьёсызлэн духовной сиёнзы мед луоз шуыса (Матф. 24:45). Сюрс ар ӵоже кивалтыкуз но, Иисус ми сярысь сюлмаськоз. Озьыен, Иегова аслэсьтыз Пизэ ми понна кулон вылысь гинэ ӧз сёты, нош трос мукетсэ лэсьтон понна но сётӥз!
АЗЬЛАНЯЗ НО ТЫРШЕ ВЫЛЬЗЭ ТОДЫНЫ
13. Мар юрттоз эшшо но трос тодыны Иеговалэн но Иисус Христослэн яратонзы сярысь?
13 Ми быгатомы эшшо но трос тодыны Иеговалэн но Иисус Христослэн яратонзы сярысь, малпаськимы ке, мар соос ми понна лэсьтӥзы. Кылсярысь, тырше та арын Ӝытан азьын но собере дыр висъяны, одӥг яке кӧня ке Евангелиосты сак лыдӟон понна. Лыдӟиськыны пуксьыкуды, туж трос лыдӟыны эн турттэ. Со интые дыртытэк лыдӟиське но ужпум пуктэ эшшо но трос мугъёс шедьтыны Иеговаез но Иисусэз яратыны. Мае ке выльзэ тодӥды ке, одно ик сое мукетъёсызлы вералэ!
14. Кызьы эскерон юрттэ милемлы тросгес тодыны дун тырон но мукетыз сярысь? (Псалтирь 118:97). (Озьы ик учке суредэз.)
14 Тӥ кемалась пылатӥськемын ке ини, тӥ малпаськоды, вылды, Инмарлэн шонерлыкез, яратонэз сярысь но дун тырон сярысь ваньзэ тодӥськоды ини шуыса. Но зэмзэ верано ке, та темаосты эскерыса, котьку мае ке выльзэ тодыны луэ! Соин ик публикациосмыя эскерон ортчытэ. Тӥ адӟоды, отысь туж трос выльзэ шедьтыны луэ шуыса. Библиез лыдӟыкуды, тӥледлы тодмотэм кылбур пумиськиз ке, эскере сое. Собере нунал ӵоже малпаське, мае тӥ тодӥды эскеронды дыръя но мар со вера Иегова, Иисус но соослэн яратонзы сярысь. (Лыдӟе Псалтирез 118:97.)
Ми кемалась пылатӥськемын ке но ини, малпано ӧвӧл, дун тырон сярысь ваньзэ тодӥськомы ини шуыса. Та темаез эскерыса, ми эшшо но зол дунъяломы, мае ми понна лэсьтӥзы Иегова но Иисус. (Учке 14-тӥ абзацез.)
15. Малы азьланяз но тыршоно Библиысь марӟанъёсты утчаны?
15 Мылкыдды медаз куашка, Библиез котькуд лыдӟыкуды но эскерыкуды, тӥ мае ке выльзэ но тунсыкозэ уд ке шедьтӥське. Тӥледыз зарниез утчасен ӵошатыны луэ. Куддыръя, со трос часъёс но нуналъёс утча, но номыре уг шедьты. Озьы ке но со кизэ уг лэзьы. Со туж шумпотэ, куке солы пичи ке но зарни пыры сюре. Нош Библиысь зэмлык трослы дуногес! (Пс. 118:127; Мад. 8:10). Соин ик чидась луэ, азьланяз но Библиез лыдӟе но со пушкы ватэм марӟанъёсты утчалэ (Пс. 1:2).
16. Кызьы ми Иеговалэсь но Иисуслэсь адӟем карыны быгатӥськомы?
16 Тырше уже кутыны сое, мае тӥ тодӥды, Библиез эскерыкуды. Кылсярысь, Иеговалэсь адӟем карыса, котькинэн асьтэды шонерлыко возе. Иисуслэсь адӟем карыса, инмысь Атайдэс но адямиосты яратэ. Озьы ик дась луэ Иеговалэн нимыз понна курадӟыны но мукет адямиос понна малэсь ке куштӥськыны. Со сяна, мукет адямиос но дун тыронлы оскыны мед быгатозы шуыса, вералэ соослы со сярысь, мар соос понна лэсьтӥз Иегова.
17. Мае ми эскеромы вуоно статьяын?
17 Дун тырон сярысь тросгес тодыса но сое дунъяса, ми эшшо но зол яратомы Иеговаез но солэсь Пизэ. Соос но милемыз эшшо но юн яратозы (Иоанн 14:21; Иак. 4:8). Соин ик ойдолэ дун тырон сярысь мае ке выльзэ тодыны тыршомы, Библиез эскерыса но уже кутыса ваньзэ, мае сётэ Иеговалэн организациез. Вуоно статьяын ми эскеромы, кыӵе бакель каронъёс сётэ дун тырон но кызьы милям возьматэммы луэ, Иеговалэсь яратонзэ дунъяськомы шуыса.
107-ТӤ КЫРӞАН Яратыны дышетэ Инмармы
a «Инмысьсэ» люкан, кудӥз сярысь вераз Павел Ефесъёслы 1:10, пӧртэм «быръем адямиосты» люканлэсь, кудӥз сярысь вераз Иисус Матфейлэсь 24:31 но Марклэсь 13:27. Павел вераз дыр сярысь, куке Иегова, святой духен зырӟыса, быръе соосты, кинъёс Иисусэн ӵош кивалтозы. Нош Иисус вераз дыр сярысь, куке музъем вылэ кылем зырӟем христианъёс бадӟым куректонлэн пумыз азьын инме люкамын луозы.