Инмарлэн кивалтэтэз сярысь юанэз тодады возе
«Мед тодозы, Тон Одӥгнад — Кузё-Инмар, быдэс музъем выллы Вылысь Инмар луиськод шуыса» (ПС. 82:19).
1, 2. а) Кыӵе юан вань адямиосын герӟаськемын? б) Малы та юан туж кулэ луэ?
ТРОСЭЗЛЫ адямиослы туннэ, коньдон сяна, номыр но дуно уг поты ни. Соос узырмон но ваньбурзэс утён сярысь гинэ малпаськыса уло. Мукетъёсыз понна нырысетӥ интыын луэ семьязы, тазалыксы но пуктэм ужпумъёссы.
2 Нош вань тужгес но кулэ луись юан, кудӥз вань адямиосын герӟаськемын. Со Иеговалэн кивалтыны правоез сярысь юан. Милемлы со сярысь вунэтыны уг яра. Но вань кышкытлык, ми сое вунэтомы шуыса. Малы? Ми быдэсак выйыны быгатомы котькуд нунал лэсьтоно ужъёсмы пӧлы но вунэтомы, Иеговалэн кивалтэтэзлы дурбасьтыны кулэ шуыса. Иеговалэн кивалтэтэзлы дурбасьтыны мылкыдмес сӥятыны быгато на шуг-секытъёс но, кудъёсыныз ми пумиськиськомы. Нош Инмарлэн кивалтэтэзлы, вань кужыммес поныса, дурбасьтӥмы ке, милемлы капчигес луоз шуг-секытъёсмес вормыны но милям Иеговаен кусыпъёсмы юнмалозы.
МАЛЫ ТА ЮАН ТУЖ КУЛЭ ЛУЭ?
3. Мар вераз Шайтан Инмарлэн кивалтэтэз сярысь?
3 Шайтан Дьяволлэн пумит ӝутскеменыз сэрен, Инмарлэн кивалтыны правоез вань-а шуыса юан ӝутэмын вал. Шайтан вераз, Инмар пӧяськись кивалтӥсь но солэн уг поты, кылдытэмъёсыз умой мед улозы шуыса. Дьяволлэн верамез потэ вал, адямиос асьсэос кивалтӥзы ке, трослы шудоесьгес луозы шуыса (Ул.-выл. 3:1—5). Со сяна, Шайтанлэн верамезъя, одӥг адями но Инмарлы зэмзэ ик оскымон ӧвӧл: бадӟым шуг-секытъёсын пумиськыса, ваньзы Инмар палась берытскозы (Иов 2:4, 5). Шайтанэн ӝутэм юанъёсын сэрен, Иегова адямиослы дыр сётӥз, соос асьсэ вылын мед шӧдозы шуыса, макем урод улон луоз, Инмар ӧз кивалты ке.
4. Малы Инмарлэн кивалтыны правоез сярысь юанлы валэктон шедьтоно?
4 Иегова тодэ вал, Шайтан пӧя шуыса. Малы соку Инмар солы дыр сётӥз тыршыны ассэ шонере поттыны? Та юанлы валэктон адямиосын но, кылчинъёсын но герӟаськемын. (Лыдӟы Псалтирез 82:19.) Адам но Ева пумит луизы Иеговалэсь кылзӥськыны, озьы ик пумит луизы соослэн тросэз нылпиоссы но. Соин ик кылчинъёслэн яке адямиослэн юанзы кылдыны быгатысал: оло нош, Дьявол шонерзэ вераз? Та юанлы валэктон шедьтытозь, калыкъёс, пӧртэм выжыос, семьяос но нимаз адямиос вискын тупаса улон уз луы. Нош куке Иегова возьматоз, солэн кивалтыны правоез вань шуыса, вань кылзӥськись кылдытэмъёс пырак улозы солэн шонерлыко кивалтэмез улсын. Быдэс Дунне вылын тупаса улон луоз (Еф. 1:9, 10).
5. Кызьы ми возьматыны быгатӥськомы, Иеговалэн кивалтэтэзлы дурбасьтӥськомы шуыса?
5 Ӝоген адӟиськоз, Инмарлэн кивалтыны правоез вань, нош Шайтан но адямиос кивалтыны уг быгато шуыса. Соослэн кивалтонзылы пум вуоз. Инмарлэн кивалтэтэз, кудӥныз со Мессия Эксэйлык пыр кивалтэ, пуктэм ужпумзэ быдэстоз. Нош Инмарлы оскымон адямиос возьматозы, вань шуыса сыӵе адямиос, кудъёсыз Инмарлэн кивалтэтэз палан сыло (Ис. 45:23, 24). Тӥляд но соос пӧлын луэмды потэ-а? Со понна котьку тодамы возёно Инмарлэн кивалтыны правоез сярысь юанэз но валано, макем со кулэ луэ.
СО, МАР УТИСЬКОНМЫЛЭСЬ ДУНОГЕС ЛУЭ
6. Макем кулэ возьматыны, Иеговалэн кивалтыны правоез вань шуыса?
6 Кызьы верамын вал ини, Иеговалэн кивалтыны правоез сярысь юан — туж кулэ луись юан, кудӥз вань адямиосын герӟаськемын. Иеговалэн кивалтыны правоез вань шуыса возьматыны, трослы кулэгес луэ милям шудбурмы но утиськонмы сярысь. Но со уг вера, Иегова милемыз уг яраты но солэн уг поты, ми мед утиськомы шуыса. Малы озьы вераны луоз?
7, 8. Кызьы Иеговалэн сётэм кылзэ быдэстонэз герӟаськемын кивалтыны правоеныз?
7 Иегова туж яратэ но дунъя адямиосты. Со дась луиз Пиезлэсь улонзэ сётыны, ми утиськыны но пырак дауръёс ӵоже улыны мед быгатомы шуыса (Иоанн 3:16; 1 Иоанн 4:9). Иегова сётэм кылзэ ӧз быдэсты ке, со возьматоз, Шайтанлэн Инмар пӧяське но шонерлыко уг кивалты шуыса верамез зэм вал шуыса. Со озьы ик шонере поттоз зэмлыкез серекъясьёсты но, кудъёсыз верало: «Солэн сӥзиськыса верам лыктонэз кытын? Атайёсмы кулӥзы ни, нош дунне кылдыны кутскем дырысен ваньмыз азьло кадь ик воштӥськытэк кыле» (2 Пётр 3:3, 4). Соин ик Иегова сюлмаськоз, солэн кивалтыны правоез вань шуыса возьматэмын мед луоз но со кылзӥськись адямиослы утиськыны луонлык мед сётоз шуыса. (Лыдӟы Исаиялэсь 55:10, 11.) Иегова яратыса кивалтэ. Соин ик ми оскыны быгатӥськомы, Иегова аслэсьтыз ужась-тыршисьёссэ котьку но яратоз но дунъялоз шуыса (Пот. 34:6).
8 Иеговалэн кивалтэтэз сярысь юан туж кулэ луэ ке но, со уг возьматы, Иегова милемыз но милесьтым утиськонмес уг дунъя шуыса. Ми валаськомы, кыӵе интыын сылэ Инмарлэн кивалтэтэз, нош кыӵе интыын — милям утиськонмы. Со юрттэ милемлы котьку тодамы возьыны Инмарлэн кивалтыны правоез сярысь юанэз но Иеговалэн шонерлыко кивалтэтэзлы дурбасьтыса улыны.
ИОВ АСЛЭСЬТЫЗ МАЛПАНЗЭ ВОШТЭ
9. Мар вераз Шайтан Иов сярысь? (Учке статья кутсконысь суредэз.)
9 Иов книгаысь, кудӥз нырысетӥ гожтэмъёсыз пӧлысь луэ, адӟиське, валаны кулэ шуыса, мар нырысетӥ интыын луэ. Со книгаын гожтэмын Шайтанлэн кылъёсыз, кудӥз вераз, Иов бадӟым шуг-секытэн пумиськиз ке, Инмарлэсь берыктӥськоз шуыса. Шайтан ӵектӥз Инмарлы аслыз Иов вылэ курадӟонъёс лэзьыны. Иегова соглаш ӧз кариськы, нош Шайтанлы лэзиз Иовез эскерыны. Инмар вераз: «Маиз солэн вань, ваньмыз тынад киулад». (Лыдӟы Иов 1:7—12.) Вакчи дыр куспын Иов ыштӥз вань ляльчиоссэ, ваньбурзэ но яратоно нылпиоссэ. Шайтан ваньзэ тупатӥз озьы, палэнысен учкыса, мед адӟиськоз, вань та курадӟонъёс Инмар бордысь пото шуыса (Иов 1:13—19). Собере Шайтан Иов вылэ курадӟытӥсь, юрӟым висён лэзиз (Иов 2:7). Иовлы эшшо секытгес луиз на, куке со кышноезлэсь но эшъёсызлэсь сюлэмзэ вӧсь карись кылъёс кылӥз (Иов 2:9; 3:11; 16:2).
10. а) Кызьы Иов Инмарлы оскымон луэмзэ возьматӥз? б) Маин со янгыш вал?
10 Кытчы ваньмыз со вуттӥз? Ваньзы адӟизы, Шайтан пӧяса вераз шуыса. Иов Инмарлэсь ӧз берыктӥськы (Иов 27:5). Но со огдырлы вунэтӥз, мар зэмзэ ик кулэгес луэ. Со аслаз шонерлыкез сярысь ортчыт трос малпаськыны кутскиз но куриз, Инмар солы мед валэктоз шуыса, малы со курадӟе (Иов 7:20; 13:24). Иовез валаны луэ, малы ке шуоно со сомында чидаз. Иегова сое тупатоно кариськиз. Мар со солы вераз?
11, 12. Мае валаны юрттӥз Иегова Иовлы но кызьы Иов Инмарлэн кылъёсыз шоры учкиз?
11 Иов книгаын, 38—41-тӥ люкетъёсын, Иеговалэн Иовлы вазиськем кылъёсыз гожтэмын. Отын верамын ӧвӧл, Инмар Иовлэн курадӟемезлэсь мугзэ вераз шуыса. Иовен вераськыкуз, Иеговалэн ужпумез ӧй вал валэктыны, малы со курадӟе, малы ке шуоно Иеговалы ассэ шонере поттыны кулэ ӧй вал. Солэн потэ вал, Иов мед валалоз шуыса, макем пичи луэ адями, сое Ваньзэ быгатӥсь Инмарен ӵошатоно ке. Со сяна, со юрттӥз Иовлы адӟыны, вань шуыса юанъёс, кудъёсыз кулэгес луо. (Лыдӟы Иов 38:18—21.) Озьы Иов выльысь валаз, мар зэмзэ ик нырысетӥ интыын луыны кулэ.
12 Луоз-а вераны, Иегова, Иовез сомында чидамез бере тупатыны кутскеменыз, ассэ лек возиз шуыса? Уз, уз луы. Иов ачиз но озьы уг малпа вал. Со валаз, мар Инмарлэн верамез потэ вал, но тупатэмзэ санэ понӥз. Иов вераз: «Мон, сюй-тузон, пень пӧлы султыса, вань ярантэм вераськем кылъёсылэсь куштӥськисько, соос понна ӧкынӥсько». Макем пайдаё вал Инмарлэн шонерак но со дыре ик яратыса верам кылъёсыз! (Иов 42:1—6). Нош солэсь азьло Иовлы визь-кенеш сётӥз Елиуй нимо егит воргорон (Иов 32:5—10). Иов Иеговалэсь кылъёссэ санэ понэмез бере Инмар мукетъёсызлы возьматӥз, со Иовлэсь шуг-секытъёсын оскымон кылемзэ вылӥ дунъя шуыса (Иов 42:7, 8).
Быгатӥськомы-а ми, шуг-секытъёс шоры учкытэк, нырысь ик Инмарлэн кивалтэтэз сярысь малпаськыны? (Учке 14-тӥ абзацез.)
13. Кызьы Иеговалэн кылъёсыз вылын малпаськон юрттӥз Иовлы курадӟонъёсыз бырем бере?
13 Иеговалэн кылъёсыз вылын малпаськон юрттӥз Иовлы курадӟонъёсыз бырем бере но. Малы озьы вераны луоз? «Иовлэсь берпум нуналъёссэ, азьвылъёсыз сярысь, Кузё-Инмар эшшо но бакельлыкогес кариз» ке но, Иовлы дыр кулэ вал, вылды, выльысь кужым люканы, азьланяз улон понна. Берлогес «солэн сизьым пиез но куинь нылыз вордскиз» (Иов 42:12—14). Озьы ке но, Иов мӧзме вал нылпиосызлэсь, кудъёссэ Шайтан быдтӥз. Солэн йыраз ялан бергазы, вылды, луэмез сярысь кӧшкемыт тодэ ваёнъёсыз. Бератаз со валаз ке но, малы курадӟиз, куддыръя со малпалляз, луоз: одно ик-а сое сокем курадӟытоно вал? Кыӵе гинэ малпанъёсыз солэн медаз кылдысалзы, со Инмарлэн верам кылъёсыз вылын малпаськыны быгатэ вал. Со юрттысал солы луэмез шоры шонер учкыны но озьы буйгатскон шедьтыны (Пс. 93:19).
14. Малы дышетэ милемыз Иовен луэм учыр?
14 Кыӵе пайда вае милемлы Иовлэн учырез? Со юрттэ милемлы валаны, мар улонын нырысетӥ интыын луыны кулэ, но буйгатскон шедьтыны. Иегова та учырез гожтӥз «асьмемыз визьман-дышетон понна». Чиданмы пыр но Священной Гожтэм пыр мылкыдмес ӝутыса, «асьмеос оскиськыса мед уломы шуыса» (Рим. 15:4). Та учыр тани малы милемыз дышетыны быгатоз: уг яра шуг-секытъёсмы пӧлы быдэсак выйыны но вунэтыны Иеговалэн кивалтэтэзлы дурбасьтыны. Озьы ик ойдолэ котьку тодамы возёмы: ми возьматыны быгатӥськомы, Иеговалэн кивалтыны правоез вань шуыса. Со понна милемлы, Иовлы сямен, секыт югдуръёс дыръя Инмарлы оскымон кылёно.
15. Шуг-секытъёс дыръя Инмарлы оскымон кыльыса, мае ми возьматӥськомы?
15 Ми тодамы возимы ке, макем дуно луэ Инмарлы милям оскымон кылеммы, со милемыз буйгатыны быгатоз. Малы? Ми валаськомы, курадӟонъёсмы юнме ӧвӧл шуыса. Ми курадӟиськомы ке, со уг возьматы, Иеговалы ми ум яраське шуыса, нош со луонлык сётэ возьматыны, ми Иеговалэн кивалтэтэз палан луиськомы шуыса (Мад. 27:11). Чидаммы милемыз Инмарлы ярамон каре. (Лыдӟы Римъёслы 5:3—5.) Иовлэн учырез возьматэ, Иегова «ӟеч сюлэмо, ваньзэ гажась-жалясь» шуыса (Иак. 5:11). Соин ик ми оскыны быгатӥськомы: со бакель кароз милемыз но ваньзэс, кинъёс солэн кивалтэтэзлы дурбасьто. Сыӵе оскон юрттоз милемлы «куасаськыны сётскисьтэмесь, ваньзэ чидасесь» луыны (Кол. 1:11).
КУЛЭ ЛУИСЬ ЮАНЭЗ ТОДАМЫ ВОЗИСЬКОМЫ
16. Малы милемлы тодамы возьыны кулэ, Иеговалэн кивалтыны правоез сярысь юан туж кулэ луэ шуыса?
16 Иеговалэн кивалтыны правоез сярысь юан туж кулэ луэ шуыса, котьку тодамы возьыны капчи ӧвӧл. Куддыръя милемлы шуг-секытъёс ноку но уз быре кадь потэ. Шуг-секытъёс сярысь гинэ малпаськыса улӥмы ке, пичиесь шуг-секытъёс но вормыны луонтэмесь кадь потозы. Соин ик милемлы ялан тодамы возьыны кулэ, шуг-секытъёсын пумиськыкумы, Инмарлэн кивалтэтэз палан луыны кулэ шуыса.
17. Кызьы Иеговалэн сётэм ужаз ялан пыриськон юрттэ милемлы Иеговалэн кивалтэтэз сярысь юанэз тодамы возьыны?
17 Ми Иеговалэн сётэм ужаз ялан пыриськимы ке, со юрттоз милемлы тодамы возьыны Инмарлэн кивалтэтэз сярысь юанэз. Эскеромы Рене нимо сузэрмылэсь примерзэ. Сое инсульт шуккиз, со ялан кыстӥськись висёнэн курадӟиз, со сяна, солэн рак вал. Больницаын кылльыкуз, со вера вал ӟеч иворез ваньмызлы отын ужасьёслы, озьы ик висисьёслы но соос доры лыктӥсьёслы. Одӥг пол, кык но ӝыны арня куспын гинэ, со 80 час ӟеч иворез вераз. Кулонзэ тодыса но, Рене тодаз возиз Иеговалэн кивалтыны правоез сярысь юанэз. Со солы чиданы кужым сётӥз, шуыны луоз.
18. Кызьы одӥг сузэрмылэн учырысьтыз адӟиське, кыӵе пайда вае Иеговалэн кивалтэтэзлы дурбасьтон?
18 Котькуд нунал шуг-секытъёсын пумиськыса но, умойтэм учыръёсы сюрыса но, ми Иеговалэн кивалтэтэзлы дурбасьтыны быгатӥськомы. Одӥг пол Дженнифер нимо сузэрмылы куинь нунал аэропортын ортчытоно луиз. Со бертыны потэмын вал, но солэсь рейссэ ялан мукет дырлы выжтылӥзы. Соин сэрен Дженнифер туж жадемын вал но ассэ огназ кельтэмын кадь шӧдӥз — сыӵе дыръя туж капчи астэ жаляны кутскыны. Иеговалы вӧсяськыса, со куриз возьматыны, кызьы со ӟеч иворез вераны быгатоз соослы, кинъёс сыӵе ик секыт югдуре шедемын. Мар луиз собере? Дженнифер тросэзлы ӟеч иворез вераны быгатӥз но трос публикациос сётъяз. Со вера: «Мон секыт югдуре шеди ке но, Иегова монэ бакель кариз но кужым сётӥз, мон солэсь нимзэ данъяны мед быгато шуыса». Кызьы адӟиське, Дженнифер Иегова сярысь уг вунэты вал.
19. Маин пӧртэм луо зэмос ужась-тыршисьёс?
19 Иеговалэн калыкез гинэ зэмзэ ик вала, макем кулэ луэ Иеговалэн кивалтэтэз. Соин со пӧртэм луэ зэмос луисьтэм ужась-тыршисьёслэсь. Инмарлэн калыкез кемалась ини солэн кивалтэтэзлы дурбасьтэ. Котькуд христиан муртлы ассэ эскерыны кулэ, луэ-а со Инмарлэн кивалтэтэз палан шуыса.
20. Кызьы учке Иегова солэн кивалтэтэзлы дурбасьтэммы шоры?
20 Котьку оске: Иегова туж дунъя, шуг-секытъёс дыръя оскымон но юн кыльыса, тӥ солэн кивалтэтэзлы дурбасьтӥськоды шуыса (Пс. 17:26). Мукет статьяысь ми тодомы, малы Иеговалэн кивалтэтэзлы дурбасьтоно но мар кароно со понна?