Яратон. Туж кулэ луись сям

АПОСТОЛ Павел святой духлэн кивалтэмез улсын гожтӥз укмыс сямъёс сярысь, кудъёссэ Инмарлэн духезлы луыса гинэ будэтыны луэ (Гал. 5:22, 23). Солэн верамезъя, та паймымон сямъёс одӥг быдэс луо — «духлэн емышез»a. Со емыш «выль адямилэн» тодметэз луэ (Кол. 3:10). Кызьы писпу емыш сётэ, сое умой утялто ке, озьы ик адями но духлэн емышез пӧлы пырись сямъёсты возьматэ, лэзе ке Инмарлы святой духеныз соин кивалтыны (Пс. 1:1—3).

Нырысетӥез сям, кудӥз духлэн емышез пӧлы пыре но кудӥз сярысь Павел гожтӥз,— со яратон. Макем кулэ луэ со сям? Павел вераз, солэн яратонэз ӧвӧл ке, соку со ваньлэсь ӧвӧлтэм маке гинэ луэ шуыса (1 Кор. 13:2). Нош мар со сыӵе яратон? Мар кароно, яратонмы мед луоз шуыса? Но кызьы сое котькуд нунал возьматоно?

МАР СО СЫӴЕ ЯРАТОН?

Капчи ӧвӧл валэктыны, мар со сыӵе «яратон», но Инмарлэн Кылаз верамын, кытысь сое адӟыны луэ. Библиысь ми тодӥськомы, яратон «кема чида, гажа-жаля», «зэмлыклы шумпотэ», «ваньмызлы дурбасьтэ, юн оске, чылкыт сюлмын оскиське, ваньзэ чида» шуыса. Адями яратэ ке, со мукетъёсыныз матысь кусыпъёс возе, мылысь-кыдысь сюлмаське соос сярысь но оскымон эш луэ. Нош адямилэн яратонэз ӧвӧл ке, со вожъяське, вылтӥяське, ачиз сярысь гинэ сюлмаське, керетэ, даллаше, мукетъёсызлы кӧтсэ ӝож каре но простить уг кары. Милям сыӵе адями луэммы уг поты. Соин ик ми тыршиськомы сыӵе яратон будэтыны, кудӥз «аслыз пайда уг утча» (1 Кор. 13:4—8).

ИЕГОВАЛЭН НО ИИСУСЛЭН АДӞЕМ КАРЫМОН ЯРАТОНЗЫ

Библиын верамын: «Инмар — со яратон» (1 Иоанн 4:8). Зэмзэ но, Инмарлэн вань ужъёсысьтыз яратэмез адӟиське. Со адямиосты юн яратэмзэ возьматӥз, куке Иисус Христосэз музъем вылэ ыстӥз, со асьмеос понна курадӟыса мед кулоз шуыса. Озьы Инмар быдӟым яратонзэ возьматӥз. Апостол Иоанн гожтӥз: «Инмар асьмемыз яратонзэ тазьы усьтӥз: Со Аслэсьтыз одӥг гинэ Пизэ дунне вылэ ыстӥз, Со пыр асьмеос улон мед басьтомы шуыса. Тани мар бордын яратон: Инмарез асьмеос ӧм, Со асьмеды яратӥз но Аслэсьтыз Пизэ асьмеды сьӧлыкъёсмылэсь мозмытон понна ыстӥз» (1 Иоанн 4:9, 10). Инмарлэн яратонэзлы луыса, милям сьӧлыкъёсмы куштэмын луыны быгато, вуоноезлы оскиськонмы луыны быгатэ но пырак улон басьтомы шуыса осконмы будэ.

Иисус дась луыса Инмарлэсь эриксэ быдэстӥз но озьы адямиосты яратэмзэ возьматӥз. Павел гожтӥз: «[Иисус] ватсаз: „Тани, Тынэсьтыд эриктэ быдэстыны Мон лыктӥ, Инмаре“. [...] Тани та эрикъя, Иисус Христослэсь одӥг пол Мугорзэ сётыса, асьмеос дун-сьӧлыктэм каремын» (Евр. 10:9, 10). Одӥг адями но ӧй быгатысал бадӟымгес яратонэз возьматыны. Иисус вераз: «Кин аслэсьтыз лулзэ аслаз эшъёсыз понна сётӥз ке, солэсь но бадӟымез яратон ӧвӧл ни» (Иоанн 15:13). Быгатӥськомы-а ми, сьӧлыко адямиос, Иегова но Иисус сямен ик яратонэз возьматыны? Быгатӥськомы! Ойдолэ эскеромы, кызьы сое возьматоно.

«ЯРАТОНЭН УЛЭ»

Павел ӧтиз христианъёсты: «Инмарлэн яратоно нылпиосыз луиськоды бере, Инмарлэсь адӟем карыса улэ. Яратонэн улэ, кызьы Христос асьмеды яратӥз но асьме понна Ассэ Инмарлы курбон сётӥз» (Еф. 5:1, 2). Ми яратонэн улӥськомы, куке улонлэн котькуд удысаз яратонмес возьматӥськомы. Ми яратӥськомы шуыса гинэ ум вераське, нош яратонмес ужъёс вылын возьматӥськомы. Иоанн гожтӥз: «Яратоно пиналъёсы! Кыл вылын, вераськыса гинэ ум, вае кутскоме уж вылын зэмзэ ик яратыса улыны» (1 Иоанн 3:18). Кылсярысь, ми Инмарез но матысьёсмес яратӥськомы ке, мукет адямиослы Эксэйлык сярысь ӟеч иворез вераломы (Матф. 24:14; Лука 10:27). Озьы ик, ми яратонэн улӥськомы, куке кема чидась, лякыт сямо луиськомы но мукетъёссэ прощать кариськомы. Библия ӧте: «Ог-огеныды лякытэсь, гажась-жалясесь луэ, огдылэсь огды сьӧлыкъёстэс куштэ, кызьы Инмар Христос пыр тӥлесьтыд сьӧлыкъёстэс куштӥз» (Еф. 4:32).

Нош ми кинэ ке зэмзэ ик яратӥськомы ке, со уг возьматы, ми солы ваньзэ прощать каромы шуыса. Кылсярысь, анай-атайёс, бӧрдӥсь пиналзэс буйгатон понна, солэсь вань куронъёссэ быдэсъяны быгатысалзы. Но анай-атайёс зэмзэ ик ярато ке пиналзэс, соос, кулэ луиз ке, чурыт луыны но быгатозы. Инмар сярысь но озьы ик вераны луоз: со яратӥсь Инмар, но со дыре ик «кинэ яратэ, сое ик вӧсь но каре» (Евр. 12:6). Со сяна, яратонэн улӥськомы ке, ми кулэ дыръя дась луиськомы мукетъёссэ тупатыны (Мад. 3:11, 12). Но милемлы тодамы возёно, ми но сьӧлыкоесь шуыса, но ӵем дыръя ум возьматӥське яратонэз озьы, кызьы кулэ. Соин ик милям вань, мар бордын ужаны. Мар кароно, тросгес яратонмес возьматон понна? Эскеромы куинь амалъёсты.

МАР КАРОНО, СЮЛМАМЫ ЯРАТОН МЕД ЛУОЗ ШУЫСА?

Нырысетӥез, куре Инмарлэсь святой духсэ, кудӥз яратонэз будэтыны юрттэ. Иисус вераз, Иегова «Солэсь курисьёслы» святой духсэ сётэ шуыса (Лука 11:13). Ми святой дух курыса вӧсяськиськомы но «Духлы тэрытскыса» улӥськомы ке, милям ужъёсысьтымы яратон умойгес но умойгес адӟиськоз (Гал. 5:16). Христиан кенешысь тӧроос вӧсяськыны быгато но курыны, святой дух соослы Библия вылэ пыкиськем визь-кенешъёсты яратыса сётъяны мед юрттоз шуыса. Нош соос, кинъёслэн нылпиоссы вань, Инмарлэсь курыны быгато, солэн духез нылпиоссэс, вожзэс поттытэк, яратыса визьманы мед юрттоз шуыса.

Кыкетӥез, малпаське со вылын, кызьы Иисус, сое урод кылын тышкаськыкузы но, яратэмзэ возьматӥз (1 Пётр 2:21, 23). Христослэсь примерзэ тодамы возьыны тужгес но кулэ соку, куке милемыз вӧсь каро яке милемлы пумит урод уж лэсьто. Сыӵе учыръёсы умой луоз юаны аслэсьтыд: «Нош мар карысал Иисус?» Та юан вылын малпаськон Ли нимо сузэрлы секыт югдурын малпаськыса ужпум кутыны юрттӥз. Со тодаз вае: «Одӥг пол ӵош ужасе мукет ужасьёсмылы мон сярысь но, мынам уже сярысь но электрон почта пыр урод кылъёс гожтыса ыстӥз. Со мынэсьтым сюлэмме туж вӧсь кариз. Соку мон юай аслэсьтым: „Кызьы та учырын мон Иисуслэсь адӟем карыны быгатӥсько?“ Малпаськыса со вылын, мар карысал Иисус, мон ужпум кутӥ ваньзэ кельтыны озьы, кызьы вань, но со пумысен мултэс сюлмаськытэк улыны. Кӧня ке дыр ортчыса, мон тодӥ, со ужасьмылэн тазалыкез туж урод вал но солы туж секыт вал шуыса. Мон малпай, со кылъёсты со, монэ вӧсь карон вылысь, ӧз гожты, дыр, шуыса. Мон малпаськи со вылын, кызьы Иисус яратонзэ возьматӥз, куке солы пумит урод уж лэсьто вал. Со юрттӥз мыным ӵош ужаселы яратонме возьматыны». Озьыен, ми Иисуслэсь адӟем кариськомы ке, ваньзэ яратыса лэсьтӥськомы.

Куинетӥез, дышетске яратондэс возьматыны соку но, куке со капчи ӧвӧл. Сыӵе яратон зэмос христианъёслэн тодметсы луэ (Иоанн 13:34, 35). Библия ӧте милемыз сыӵе ик мылкыдын улыны, кыӵе мылкыдын улӥз Иисус Христос. Музъем вылэ лыктыса, со «Ассэ Ачиз покчи кариз, ляльчи кариськиз» но асьмеос понна кулӥз (Флп. 2:5—8). Иисуслэсь яратэмзэ адӟем кариськомы ке, соку милям малпанъёсмы но шӧдонъёсмы Иисуслэн кадь луозы, но милям мылкыдмы луоз мукетъёсызлэсь мыл потонъёссэс асьме мыл потонъёсмылэсь вылӥегес пуктыны. Сюлмамы яратонмес будэтыны тыршиськомы ке, кыӵе эшшо емышъёс со вае на?

УМОЙ ЕМЫШЪЁС

Ми яратонмес возьматӥськомы ке, со умой емышъёс вае. Эскеромы кык примеръёсты.

• КАЛЫККУСПО ВЫНЛЫК. Ми яратӥськомы ог-огмес, соин ик тодӥськомы, быдэс дунне вылысь кыӵе гинэ кенеше медам мынэ, милемыз котькытын шуныт пумиталозы шуыса. Макем шумпотоно тодыны, асьмемыз дунне вылысь вань вын-агайёсмы ярато шуыса! (1 Пётр 5:9). Кытысь ке эшшо шедьтыны луоз-а сыӵе яратонэз, кыӵеез вань Инмарлэн калыкез пӧлын?

• ТУПАСА УЛОН. Огмес огмы гажамы но яратӥмы ке, ми «одӥг духен тупаса, огмылкыдын улыны» быгатомы (Еф. 4:2, 3). Сыӵе тупаса улонэз ми нырысь ик адӟиськомы кенешлэн пумиськонъёсаз но конгрессъёсын. Тӥ соглаш луоды, дыр, сыӵе тупаса улон туж паймымон луэ шуыса, малы ке шуоно та дуннеысь адямиос, кудъёсыз пӧлын ми улӥськомы, тупаса улыны уг быгато (Пс. 118:165; Ис. 54:13). Мукетъёсыныз умой кусыпъёс возьыса, ми возьматӥськомы, макем юн ми соосты яратӥськомы, нош со туж шумпоттэ инмысь Атаймес (Пс. 132:1—3; Матф. 5:9).

ЯРАТОН ЮНМАТЭ

Апостол Павел гожтӥз, яратон кужым сётэ, яке юнматэ, шуыса (1 Кор. 8:1). Кызьы? Коринфъёслы нырысетӥ гожтэтэзлэн 13-тӥ люкетаз Павел валэктӥз, кызьы яратон юнматэ. Кылсярысь, со, кин яратэ, «аслыз пайда уг утча», нош мукетызлы утча (1 Кор. 10:24; 13:5). Со сяна, адями яратэ ке, со шӧдӥсь-валась, чидась, лякыт сямо луэ но мукетъёсызлэсь шӧдонъёссэс гажа. Яратон семья пушкын но кенешын кусыпъёсты юнматэ (Кол. 3:14, ВД).

Милям пӧртэм яратонмы луыны быгатэ, нош ваньмызлэсь дуноез — Инмарез яратон. Инмарез яратон огазея адямиосты, кудъёсыз пӧртэм кылын верасько но пӧртэм калыкысь луо, узыръёсты но, куанеръёсты но. Соос шумпотыса Иеговалы огкылысь ужало-тыршо (Соф. 3:9). Ойдолэ котькуд нунал со дуно сяммес возьматомы, кудӥз Инмарлэн святой духезлэн емышез пӧлы пыре но одӥгез валтӥсь сям луэ!