Лыдӟисьёслэн юанъёссы
Быгатэ-а христиан мурт ас дораз пыӵал тӥрлык возьыны, кылсярысь, пистолет яке пыӵал, ассэ йыруж лэсьтӥсьёслэсь утён понна?
Христианъёслы, асьсэды утён амалъёс бырйыкузы, Библиысь возетъёсты лыдэ басьтыны кулэ. Отын верамын, йыруж лэсьтӥсьёслэсь утиськон понна, милемлы пистолетъёсты, пыӵалъёсты но мукет пыӵал тӥрлыкез уже кутыны уг яра шуыса. Ойдолэ эскеромы куд-огъёссэ со возетъёс пӧлысь.
Адямилэн улонэз Иеговалэн син азяз святой луэ. Псаломъёсты гожъясь Давид гожтӥз, Иегова дорын «улонлэн ошмесэз» шуыса (Пс. 35:10). Соин ик, христиан мурт, ассэ яке ваньбурзэ утён понна, мар ке но карыны малпа ке, солы ваньзэ чакласа лэсьтоно, соин сэрен нокин но бырыны медаз шедьы шуыса (К. Зак. 22:8; Пс. 50:16).
Зэмзэ но, котькыӵе арбериен, кудзэ адями ассэ утён понна уже кутэ, адямиез виыны луэ. Нош пыӵал тӥрлык ке вань, адямиез виыны эшшо но капчигес, тӥ нокинэ но виыны уд малпаське ке ноa. Со сяна, йыруж лэсьтӥсь, кудӥз сотэк но пӧсекъя, киысьтыды пыӵал тӥрлыкез адӟиз ке, соку югдур эшшо но кышкытгес луыны быгатоз, но кин ке бырыны но шедёз.
Кулон азяз уе Иисус Христос дышетскисьёссэ сьӧразы палаш, яке меч, басьтыны косыкуз, со сое асьсэды утён понна басьтыны ӧз косы (Лука 22:36, 38). Иисус дышетскисьёссэ сьӧразы меч басьтыны косӥз, малы ке шуоно солэн соосты дышетэмез потэ вал, ожтӥрлыкез адямилы пумит кутыны уг яра шуыса соку но, куке пумитэ ожтӥрлыкен пото (Лука 22:52). Куке Пётр, мечсэ поттыса, архиерейлэн ляльчиез вылэ урдскиз, Иисус солы вераз: «Мечтэ аслаз интыяз пон». Собере ватсаз на: «Ваньмыз меч кутэмъёс мечлэсь бырозы» (Матф. 26:51, 52). Та одӥгез валтӥсь возет, кудӥзлэсь христианъёс туннэ нуналэ но кылзӥсько.
Михейлэн 4:3 гожтэмъя, Инмарлэн ужась-тыршисьёсыз «мечъёссэс... усы-геры лэсьтыны ӵыжат[ӥ]зы, шибодыоссылэсь сюрло лэсьт[ӥ]зы». Зэмос христианъёс тупаса улэменызы тодмо луо. Соос кылзӥсько возетлэсь, кудзэ Инмар апостол Павел пыр сётӥз: «Нокинлы но уродлы пумит уродэн пунэмзэ эн берыктэ. [...] Быгатэмдыя вань адямиосын тупаса улэ» (Рим. 12:17, 18). Павел трос пол кышкыт югдуръёсы сюрылӥз ке но, озьы ик йырвандӥсьёсын но пумиськылӥз, со, ассэ утён понна, ноку но Библиысь возетъёсты ӧз тӥя (2 Кор. 11:26). Со Инмарлы оскиськиз но солэн визь-кенешъёсызлэсь кылзӥськиз, кудъёссэ Инмар аслаз Кылыз пыр сётӥз, но кудъёсыз «ожмаськон тӥрлыкъёслэсь ӟечгес» луо (Екк. 9:18).
Улон христианъёслы, ваньбур сярысь, трослы дуногес луэ. «Адямилэн улонэз ваньбурезлэн пачылэз бордысь уг поты» (Лука 12:15). Соин ик, ваньбурез талась кияз ожтӥрлыкен урдскиз ке, нош христиан мурт сое лякыт кылъёсын дугдытыны ӧз быгаты ке, соку лэсьтоно Иисусэн сётэм возетъя: «Выл дӥсьтэ талась муртлы эн люкеты дэремдэ но басьтыны». Со возетлэсь кылзӥськон понна, милемлы, оло, ваньзэ но сётоно луоз, мае куроз ваньбурез талась мурт (Лука 6:29; Матф. 5:39, 40)b. Но, веранэз ӧвӧл, умойгес луоз, ми каримы ке ваньзэ, сыӵе кышкыт югдур медаз кылды шуыса. Ми ваньбуренымы ум ке ушъяськиське но бускельёсмы тодо ке, ми Иеговалэн Адӟись-Ивортӥсьёсыз луиськомы но котькинэн тупаса улыны тыршиськомы шуыса, со милемыз утьыны быгатоз (1 Иоанн 2:16; Мад. 18:11).
Христианъёс вын-агайёссылэсь но сузэр-апайёссылэсь шӧдонъёссэс гажало (Рим. 14:21). Христиан мурт, йыруж лэсьтӥсьёслэсь утиськон понна, дораз пыӵал тӥрлык возе шуыса тодмо луиз ке, кенешысь кин ке солы туж паймыны быгатоз яке соин сэрен солэн осконэз но лябӟоз. Яратон милесьтым мылкыдмес ӝутэ нырысь ик малпаськыны мукетъёсыз сярысь, со понна милемлы куштӥськоно луэ ке но солэсь, малы милям правомы вань кадь потэ (1 Кор. 10:32, 33; 13:4, 5).
Христианъёс асьсэды адӟем карымон возьыны тыршо (2 Кор. 4:2; 1 Пётр 5:2, 3). Христиан муртлы тӧроос Библиысь визь-кенеш сётӥзы ке, йыруж лэсьтӥсьёслэсь утиськон понна дораз пыӵал тӥрлык возёно ӧвӧл шуыса, нош со ӧз ке кылзӥськы, сыӵе адямиез ассэ адӟем карымон возе шуыны уз луы. Соин ик сыӵе христиан мурт кенешын кыӵе ке ужез быдэсъян понна куронъёслы уг тупа. Со возетэз ик кутыны луоз, христиан мурт уж дораз ожтӥрлык нуллэ ке. Солы умойгес луоз мукет уж утчаныc.
Христиан мурт ачиз бырйыны кулэ, кызьы со ассэ, аслэсьтыз семьязэ яке ваньбурзэ утёз, озьы ик, кызьы со ачиз быръе, кытын но кин луыса со ужалоз. Но сыӵе ужпумъёс кутыку, лыдэ басьтыны кулэ Библиысь возетъёсты, кудъёсыз Инмарлэсь визьлыксэ но милемыз яратэмзэ возьмато. Христианъёс, кудъёсызлэн Инмарен матысь кусыпъёссы но кудъёсыз гажало Библиысь возетъёсты, йыруж лэсьтӥсьёслэсь асьсэды утён понна, ас доразы пыӵал тӥрлык уз возе. Соос тодо, Инмарлы оскиськись но Библиысь возетъёслэсь кылзӥськись адямиос азьланяз тупаса улозы но номыр но соослы кышкытлык уз вайы ни шуыса (Пс. 96:10; Мад. 1:33; 2:6, 7).
Быдӟым куректон дыръя христианъёс Иегова вылэ оскиськозы, нош, киязы ожтӥрлык кутыса, асьсэды утьыны уз тырше
a Христиан мурт ужпум кутыны быгатоз пыӵал тӥрлык басьтыны (кылсярысь, винтовка яке пыӵал), пӧйшураса сиён поттон понна яке кыр пӧйшуръёслэсь утиськон понна. Нош куке пыӵал тӥрлык уже уг кутӥськы, умойгес луоз сое разрядить карыса, оло нош сэрттыса но, возьыны кыӵе ке оскымон интыын тунгон улын. Со шаеръёсын, кудъёсаз катъя пыӵал тӥрлык возьыны уг яра яке кивалтӥсьёс чаклало, кызьы со уже кутӥське но возиське, христианъёслы кылзӥськыны кулэ (Рим. 13:1).
b Со сярысь, мар кароно, эриктэмасьлэн ки улаз медам сюре шуыса, гожтэмын 1993-тӥ арын 8-тӥ оштолэзь понна поттэм «Сайкалэ!» журналын «Как это можно предотвратить» статьяын.
c Тросгес тодон понна, быгатэ-а христиан мурт соглаш кариськыны уже, кудаз ожтӥрлык нуллыны кулэ, луоз лыдӟыны 2005-тӥ арын 1-тӥ шуркынмонэ поттэм «Возьмаськон башняез», 31-тӥ бам, но 1984-тӥ арын 1-тӥ тулыспалэ поттэм «Возьмаськон башняез», 18—19-тӥ бамъёс.