Возьмаськон башнялэн ОНЛАЙН-БИБЛИОТЕКАЕЗ
Возьмаськон башнялэн
ОНЛАЙН-БИБЛИОТЕКАЕЗ
удмурт
Ӝ
  • Ӝ
  • ӝ
  • Ӟ
  • ӟ
  • Ӥ
  • ӥ
  • Ӧ
  • ӧ
  • Ӵ
  • ӵ
  • БИБЛИЯ
  • ПУБЛИКАЦИОС
  • ПУМИСЬКОНЪЁС
  • w23 куартолэзь 20—25 б.
  • «Йахлэн гомась тылызлы» кысыны эн лэзе!

Та люкетлы видео ӧвӧл.

Вождэс эн вае, видеоез возьматыны ӧз луы.

  • «Йахлэн гомась тылызлы» кысыны эн лэзе!
  • Возьмаськон башня Иеговалэн Эксэйлыкез сярысь ивортэ (эскерон понна) 2023
  • Подзаголовокъёс
  • Та выллем материал
  • ИЕГОВАЕН КУСЫПЪЁСТЭС ЮНМАТЭ
  • ДЫРДЭС ӴОШЕН ОРТЧЫТЪЯЛЭ
  • ОГ-ОГДЭС ГАЖАЛЭ
  • Мар кароно, семьяды шудо мед луоз шуыса? (1-тӥ люкет)
    Пумтэм вапумъёс ӵоже шумпотыса улэ! Тодэ, мар вера Библия
  • Алигес кузпалъяськемъёс, Иеговалы ужан-тыршон улонады валтӥсез мед луоз
    Возьмаськон башня Иеговалэн Эксэйлыкез сярысь ивортэ (эскерон понна) 2021
  • «Кышномуртлы йыр — кузпалыз»
    Возьмаськон башня Иеговалэн Эксэйлыкез сярысь ивортэ (эскерон понна) 2021
Возьмаськон башня Иеговалэн Эксэйлыкез сярысь ивортэ (эскерон понна) 2023
w23 куартолэзь 20—25 б.

ЭСКЕРОН ПОННА СТАТЬЯ 23

«Йахлэн гомась тылызлы» кысыны эн лэзе!

«[Яратон] — кужмо ӝуась тыл, Йахлэн гомась тылыз» (КЫРӞ. 8:6, ВД).

131-ТӤ КЫРӞАН «Мае Инмар огазеяз»

ТА СТАТЬЯЫНa

1. Мар вера Библия зэмос яратон сярысь?

ЯРАТОН... «Со — кужмо ӝуась тыл, Йахлэн гомась тылыз. Бадӟым вуос уг быгато яратонэз кысыны, шуръёс но сое вуосынызы уз ӝокатэ» (Кырӟ. 8:6, 7, ВД)b. Кыӵе чебер кылъёс верамын зэмос яратон сярысь! Та кылъёс кузпалъёсты оскыто: соос пырак дауръёс ӵоже ог-огзэс яратыны быгато.

2. Мар карыны кулэ карт но кышно, яратонзы медаз сӥя шуыса?

2 Кузпалъёс вань улонзы ӵоже ог-огзэс мед яратозы шуыса, соослы мар ке но карыны кулэ. Учкомы таӵе примерез. Тылскем ялан ӝуалоз соку гинэ, куке отчы пу тыро. Нокин но пу ӧз тыры ке, тыл пумен кысоз. Кузпалъёс но ялан ог-огзэс яратозы соку гинэ, куке кусыпъёссэс юнматыны тыршо. Куддыръя кузпалъёс шӧдо, соослэн яратонзы сӥя шуыса. Со луыны быгатэ коньдонэн, тазалыкен яке нылпиоссэс будэтонэн герӟаськем шуг-секытъёсынызы сэрен. Соин ик, дуно картъёс но кышноос, мар тӥ карыны быгатӥськоды, «Йахлэн гомась тылыз» медаз кысы шуыса? Та статьяын ми эскеромы куинь визь-кенешъёсты, кудъёсыз юрттозы тӥледлы ог-огеныды юн кусыпъёс возьыны но шумпотыса улыныc.

ИЕГОВАЕН КУСЫПЪЁСТЭС ЮНМАТЭ

Карт но кышно, китӥзы кутӥськыса, вӧсясько. Паллян палаз возьматэмын, кызьы Иосиф но Мария, китӥзы кутӥськыса, вӧсясько.

Иосиф но Мария сямен, картлы но кышнолы Иеговаен матысь кусыпъёс возьыны кулэ (Учке 3-тӥ абзацез.)

3. Кызьы Иеговаен матысь кусыпъёс кузпалъёслы юртто яратонзэс юнматыны? (Екклесиаст 4:12). (Озьы ик учке суредэз.)

3 «Йахлэн гомась тылыз» медаз кысы шуыса, картлы но, кышнолы но вань кужмысьтызы Иеговаен кусыпъёссэс юнматоно. Кызьы со семьязылы юрттоз? Куке кузпалъёс инмысь Атаенызы кусыпъёссэс дунъяло, соос, дась луыса, солэсь визь-кенешъёссэ улоназы пырто. Нош та юрттэ соослы вормыны шуг-секытъёссэс, кудъёсыз яратонзэс сӥятыны быгато. (Лыдӟе Екклесиастэз 4:12.) Соос, кинъёслэн Иеговаен юн кусыпъёссы, солэсь адӟем каро но солэн кадь сямъёсты будэтыны тыршо. Соос тыршо ог-огзылы ӟеч но чидась сямзэс возьматыны, озьы ик вань сюлмысьтызы ог-огзэс простить карыны (Еф. 4:32—5:1). Сыӵе семьяын яратон будэ. Лена, кудӥз 25 арлэсь но кемагес быземын ини, вера: «Сое, кинлэн Иеговаен матысь кусыпъёсыз вань, яратыны но гажаны капчигес».

4. Малы Иегова бырйиз Иосифез но Марияез Мессиялы анай-атай луыны?

4 Тани Библиысь пример. Куке Иегова вуоно Мессиялы анай-атай бырйиз, со саклыксэ висъяз Иосифлы но Мариялы, кудъёсыз Давидлэн выжыысьтыз потӥзы. Малы? Соослэн кыкназылэн ик Иеговаен юн кусыпъёссы вал. Инмар тодӥз, та кузпалъёс нырысь ик сое яратозы шуыса. Картъёс но кышноос, малы тӥ дышетскыны быгатӥськоды Иосифлэсь но Мариялэсь?

5. Малы картъёс дышетскыны быгато Иосифлэсь?

5 Иосиф дась вал Иеговалэсь кылзӥськыны, соин ик со умой карт луиз. Библиын верамын куинь учыръёс сярысь, куке солы, семьялэн йырызлы кадь, Инмар кивалтэт сётылӥз. Со котьку но ӝегатскытэк кылзӥськылӥз, со понна бадӟым воштӥськонъёс лэсьтоно вал ке но (Матф. 1:20, 24; 2:13—15, 19—21). Инмарлэсь кылзӥськыса, Иосиф Марияез утиз, сое юнматӥз но со сярысь сюлмаськиз. Та понна Мария сое эшшо но золгес яратӥз но гажаз, луоз. Дуно картъёс, кызьы тӥ Иосифлэсь адӟем карыны быгатӥськоды? Утчалэ Библиысь визь-кенешъёсты, кызьы семьяды сярысь сюлмаськоноd. Та визь-кенешъёсты уже кутыса — со понна бадӟым воштӥськонъёс лэсьтоно луиз ке но — тӥ кышнодылы яратондэс возьматоды но кусыпъёстэс юнматоды. Вануа́ту шаерысь сузэр, кудӥз 20 арлэсь но кемагес быземын ини, вера: «Куке картэ Иеговалэсь кивалтэтсэ утча но сое уже кутэ, мон сое эшшо но золгес гажасько. Мон номырлэсь уг кышкаськы но оскисько, со шонер ужпум кутӥз шуыса».

6. Малы кышноос дышетскыны быгато Мариялэсь?

6 Мариялэн аслаз но Иеговаен матысь кусыпъёсыз но юн осконэз вал. Со умой тодӥз Священной Гожтэмезe. Озьы ик со дыр висъяз, со вылын малпаськон понна (Лука 2:19, 51). Оскыны луэ, Иеговаен матысь кусыпъёсызлы луыса Мария умой кышно луиз шуыса. Туннэ тросэз кышноос Мария сямен лэсьтыны тыршо. Кылсярысь, тани мар вераз Эмико́ сузэр: «Куке мон быземын ӧй вал на, мон ачим Инмарен кусыпъёсме юнматӥ. Собере мон бызи но, ваньмыз воштӥськиз. Табере картэ вӧсяське. Со котькуд нуналлы кылбурез лыдӟе но семьяен йыбыртонмес ортчытъя. Кыӵе ке но дыре мон шӧдӥ, осконме картэным ӵош гинэ юнматӥсько шуыса. Мон валай: мыным аслым но Иеговаен кусыпъёсме юнматоно. Соин ик мон дыр висъяны кутски вӧсяськон, Библиез лыдӟон но со вылын малпаськон понна» (Гал. 6:5). Дуно кышноос, тӥ Иеговаен кусыпъёстэс юнматӥськоды ке, картъёсты тӥледыз эшшо но золгес яратозы но тӥледыз ушъялозы (Мад. 31:30).

7. Малы кузпалъёс дышетскыны быгато Иосифлэсь но Мариялэсь со пумысен, кызьы Иеговалы йыбыртъяно?

7 Озьы ик Иосиф но Мария Иеговаен кусыпъёссэс ӵошен юнматъязы. Соос валазы, макем кулэ Иеговалы быдэс семьяен йыбыртъяны (Лука 2:22—24, 41; 4:16). Со капчи ӧй вал, дыр, тужгес но, куке нылпиоссы вордӥськизы. Но соослэн ваньмыз пӧрмиз. Кыӵе умой адӟем карон соос возьматӥзы туала кузпалъёслы! Тӥляд но нылпиосты вань ке, тӥледлы капчи ӧвӧл, дыр, кенешлэн пумиськонъёсаз ветлыны яке семьяен йыбыртонлы дырдэс висъяны. Нош ӵошен мае ке эскерон яке вӧсяськон понна, дыр шедьтыны эшшо но секытгес, вылды. Озьы ке но эн вунэтэ: Иеговалы ӵошен йыбыртъяса, тӥ Инмарлы но, ог-огдылы но матэ кариськиськоды. Соин ик Иеговалы йыбырттон улонады нырысетӥ интыын мед луоз.

8. Кыӵе визь-кенеш юрттоз семьяен йыбырттонзэс ортчытъяны кузпалъёслы, кудъёсызлэн шуг-секытъёссы вань?

8 Кузпалъёслэн шуг-секытъёссы вань ке, соослы капчи ӧвӧл, дыр, семьяен йыбырттонзэс ортчытъяны. Тӥляд но озьы ке, кутске пичиысен: эскере кӧня ке малпанъёсты, кудъёсыз кыкнадылы но шумпотон ваёзы. Та тӥлесьтыд кусыпъёстэс юнматоз но, Иеговалы йыбыртъяны мылкыдды будоз.

ДЫРДЭС ӴОШЕН ОРТЧЫТЪЯЛЭ

9. Малы картъёслы но кышноослы дырзэс ӵош ортчытъяны кулэ?

9 Картъёс но кышноос, тӥляд яратонды медаз кысы шуыса, дырдэс ӵош ортчытъялэ. Та юрттоз тӥледлы тодыны, мар сярысь малпаське но мае шӧдэ кузпалды (Ул.-выл. 2:24). Тани мае валазы Лилия но Руслан сюанзы бере ик, кудӥз 15 ар талэсь азьло вал. Лилия тодаз вае: «Ми ӧм быгатэ ог-огмылы дырмес висъяны сомында, кӧня милям потэ вал. Ужмы бере ми быдэсъямы корка котырысь ужъёсты, нош собере нылпиосмы но вордӥськизы. Ми валамы, ог-огмылы дыр ӧм висъялэ ке, кусыпъёсмы лябӟозы шуыса».

10. Кызьы кузпалъёс уже кутыны быгато возетэз, кудӥз гожтэмын Ефесъёслы 5:15, 16?

10 Мар юрттоз тӥледлы ог-огдылы саклык висъяны? Азьло ик малпаське, ку тӥ дырдэс ӵошен ортчытоды. (Лыдӟе Ефесъёслы 5:15, 16.) Нигериысь Узо́нду агай вера: «Мон азьло ик малпаськисько, ку нунал куспын кышноеным дырме ортчыто. Нырысь мон та сярысь малпаськисько, нош собере мукет ужъёсме радъясько» (Флп. 1:10). Нош тани кызьы аслэсьтыз дырзэ радъя Анастасия, Молдоваысь ёросэз чакласьлэн кышноез. Со вера: «Куке картэ аслэсьтыз ужъёссэ быдэсъя, мон аслам ужъёсыным вырисько. Нош куке со ужъёссэ быдтэ, ми дырмес ӵошен ортчытъяськомы». Нош мар кароно, трос ужъёсыныды сэрен ог-огдылы дырдэс висъяны секыт ке?

Карт но кышно садын шумпотыса ӵош ужало. Паллян палаз возьматэмын, кызьы Акила но Прискилла шумпотыса ӵош ужало, палаткаосты лэсьтыса.

Картъёс но кышноос, мар тӥ ӵошен карыны быгатӥськоды? (Учке 11-тӥ но 12-тӥ абзацъёсты.)

11. Кыӵе ужъёсты Акила но Прискилла ӵошен быдэсъязы?

11 Кузпалъёс тросэзлы дышетскыны быгато Акилалэсь но Прискиллалэсь, кудъёссэ нырысетӥ даурын тросэз христианъёс яратӥзы (Рим. 16:3, 4). Библиын соос сярысь трос уг вераськы ке но, ми тодӥськомы, соос ӵошен ужазы, тодытӥзы но мукетъёсызлы юрттӥзы шуыса (Ап. уж. 18:2, 3, 24—26). Учконо ке, Библиын Акила и Прискилла сярысь нимаз ноку уг вераськы.

12. Мар кароно картлы но кышнолы, тросгес дырзэс ӵош ортчытъян понна? (Озьы ик учке суредэз.)

12 Кызьы кузпалъёс Акилалэсь но Прискиллалэсь адӟем карыны быгато? Малпаське лэсьтоно ужъёсты сярысь. Соос трос, дыр. Быгатысалды-а тӥ мае ке ӵош быдэсъяны? Кылсярысь, Акила но Прискилла ӵош тодытӥзы. Нош тӥ ӵош тодытон понна дырдэс висъяськоды-а? Со сяна, Акила но Прискилла ӵош ужазы. Тӥ пӧртэм интыосын ӵош ужаськоды ке но, быгатысалды-а тӥ корка котырысь ужъёстэс ӵош быдэсъяны? (Екк. 4:9). Тӥ мае ке ӵош лэсьтӥды ке, тӥледлы капчигес луоз шӧдыны, тӥ одӥг команда шуыса. Озьы ик ог-огеныды тросгес вераськыны быгатоды. Роберт но Линда 50 арлэсь но кемагес кузпалъяськемын ини. Роберт вера: «Вераны кулэ, ӵош шутэтскыны милям туж ик трос дырмы ӧвӧл. Куке мон тусьты-пуньы миськисько, нош кышное сое ӵушылэ, яке бакчаямы уриськисько, нош кышное вӧзам ужа, мон туж шумпотӥсько! Ужъёсмес ӵош быдэсъякумы, ми ог-огмылы матэгес кариськиськомы но яратонмы юнма».

13. Мар карыны быгато карт но кышно, кусыпъёссэс юнматон понна?

13 Тодады возе: кышнолы но картлы, кусыпъёссэс юнматон понна, ӵош луыны гинэ тырмыт ӧвӧл. Бразилиысь одӥг кышномурт вера: «Туннэ милям туж трос ужъёсмы. Соин ик адямиос малпаны быгато, ми одӥг коркан улӥськомы бере, ми дырмес ӵошен ортчытъяськомы ини шуыса. Но мон валай: ог-огеныды ӵош луыны гинэ тырмыт ӧвӧл. Озьы ик кузпалыдлы саклык висъяны но туж кулэ». Учке, мар каро Бру́но агай но Таи́с кышноез. Бруно вера: «Куке ми дырмес ӵош ортчытъяськомы, ми телефонъёсмес палэнэ понӥськомы но шумпотыса ог-огенымы вераськиськомы».

14. Мар карыны быгато кузпалъёс, соослы дырзэс ӵош ортчытъяны уг кельшы ке?

14 Мар кароно, тӥледлы дырдэс ӵош ортчытъяны уг кельшы ке? Оло нош, тӥ пӧртэм ужъёсын тунсыкъяськиськоды яке ог-огдылэсь вождэс поттӥськоды. Мар тӥ карыны быгатӥськоды? Тодамы ваёмы тылскемез, кудӥз сярысь ми вераськимы ини. Тылскем соку ик ӝуаны уг кутскы. Нырысь пичи шелепъёсты кенжыто, собере гинэ отчы бадӟым писъёсты тыро. Озьы ик тӥ но тырше котькуд нунал ӧжыт ке но дырдэс ӵош ортчытъяны. Лэсьтэ сыӵе ужъёсты, кудъёсыз тӥледлы кыкнадылы но кельшо, нош эн лэсьтэ сое, маин сэрен тӥляд споръяськонъёсты кылдо (Иак. 3:18). Ӧжыт ке но дырдэс ӵош ортчытъяса, тӥ быгатоды яратондэс выльысь кенжытыны.

ОГ-ОГДЭС ГАЖАЛЭ

15. Кызьы гажан кузпалъёслы юрттоз азьланяз но ог-огзэс яратыса улыны?

15 Тылскем мед ӝуалоз шуыса, солы омыр кулэ. Озьы ик кузпалъёс ог-огзэс мед яратозы шуыса, соослы ог-огзэс гажаны кулэ. Карт но кышно ог-огзэс гажало ке, соослэн яратонзы уз кысы. Тодады возе: тӥ малпаськоды ке, кузпалдэс гажаськоды шуыса, туж кулэ, со гажамдэс мед шӧдоз шуыса. Аре́т но Пе́нни 25 арлэсь но кемагес кузпалъяськемын ини. Пенни сузэр вера: «Ми ог-огмес гажаськомы. Соин ик милям юн кусыпъёсмы. Ми котьку но капчиен вераськыны быгатӥськомы, малы ке шуоно тодӥськомы, ог-огмылэсь малпанмес дунъяськомы шуыса». Нош мар карыны быгатӥськоды тӥ, кузпалды гажамдэс мед шӧдоз шуыса? Ойдолэ эскеромы Авраамлэсь но Сарралэсь примерзэс.

Кышно аслаз шӧдонъёсыз сярысь картэзлы вера, нош со сое кылзэ. Паллян палаз возьматэмын, кызьы Сарра аслаз шӧдонъёсыз сярысь Авраамлы вера, нош со сое сак кылзэ.

Картлы кышноезлэсь шӧдонъёссэ гажаны кулэ, сое сак кылзыса (Учке 16-тӥ абзацез.)

16. Малы картъёс дышетскыны быгато Авраамлэсь? (1 Пётр 3:7). (Озьы ик учке суредэз.)

16 Авраам Сарраез гажаз. Со солэсь малпанъёссэ но шӧдонъёссэ лыдэ басьтӥз. Одӥг пол Сарра куректыса улӥз но, вожез потыса, Авраамез янгыше уськытӥз. Нош Авраам вожзэ поттӥз-а? Ӧз. Со тодӥз, Сарра кылзӥськись но зӥбыт-востэм кышно шуыса. Авраам сое кылзӥз но шуг-секытэз сэрттыны-пертчыны тыршиз (Ул.-выл. 16:5, 6). Малы та дышетэ картъёсты? Быдэс семьяды понна тӥ ужпум кутыны кулэ (1 Кор. 11:3). Озьы ке но, кышнодылэсь малпанзэ лыдэ басьтыса, тӥ солы яратэмдэс возьматоды. Та тужгес но кулэ, куке ужпумды кышноеныды но герӟаськемын (1 Кор. 13:4, 5). Куддыръя, маин ке сэрен сюлмаськыса, кышнодылэн аслаз шӧдонъёсыз сярысь кинлы ке верамез потоз, вылды. Возьматоды-а тӥ кышнодылы гажамдэс, сое сак кылзыса? (Лыдӟе 1 Пётрлэсь 3:7.) Анжела но Дмитрий ог 30 ар ӵоже кузпалъяськемын ини. Анжела валэктэ, малы со оске, картэз сое гажа шуыса: «Куке мынам мылкыды куашкамын яке мыным шӧдонъёсы сярысь кинлы ке вераны кулэ, Дима котьку дась монэ кылзыны. Со чидаса кылзэ монэ соку но, куке мон асме киям кутыны уг быгатӥськы».

17. Малы кышноос дышетскыны быгато Сарралэсь? (1 Пётр 3:5, 6).

17 Сарра Авраамез гажаз, соин ик солэн кутэм ужпумъёсыныз котьку соглаш вал (Ул.-выл. 12:5). Одӥг пол Авраам сое куриз, ужъёссэ кельтыса, трос нянь пыжыны, возьмамтэ куноосты куно карон понна (Ул.-выл. 18:6). Сарра соку ик соглаш луиз. Дуно кышноос, быгатӥськоды-а тӥ Сарралэсь адӟем карыны, карттылэн кутэм ужпумъёсыныз соглаш луыса? Озьы тӥ кусыпъёстэс юнматоды. (Лыдӟе 1 Пётрлэсь 3:5, 6.) Дмитрий, кудӥз сярысь кылем абзацын вераськиз ини, валэктэ, малы со оске, кышноез сое гажа шуыса: «Мон туж дунъясько, куке Анжела кутэм ужпумъёсыным соглаш луэ, озьы ик соку но, куке милям малпанъёсмы пӧртэмесь. Кутэм ужпуме визьмо ӧвӧл ке, со монэ уг пыкылы». Макем капчи яратыны сое, кин тӥледыз гажа!

18. Малы картлы но кышнолы ог-огзэс яратыны кулэ?

18 Шайтанлэн потэ, христиан семьяосын яратон мед кысоз шуыса. Со тодэ, карт но кышно ог-огзэс яратэмысь дугдӥзы ке, соос Иеговалэсь палэнскыны кутскозы шуыса. Нош зэмос яратон ноку уг кысы! Соин ик яратонды мед луоз сыӵе ик, кудӥз сярысь гожтэмын Кырӟанъёсын книгаын. Лэсьтэ ваньзэ, Иегова тӥляд семьяяды нырысетӥ интыын мед луоз шуыса. Ог-огдылы дырдэс висъялэ. Лыдэ басьтэ, мае кузпалды шӧдэ но мар солы кулэ. Соку тӥляд семьяды дан ваёз Иеговалы, кудӥз бордысь зэмос яратон потэ, но яратонды ноку уз кысы!

КЫЗЬЫ ТӤ ВАЛЭКТЫСАЛДЫ?

  • Кызьы Иеговаен матысь кусыпъёс кузпалъёслы шумпотыса улыны юртто?

  • Мар юрттоз картлы но кышнолы дырзэс ӵош ортчытъяны?

  • Кызьы карт но кышно ог-огзылы гажанзэс возьматыны быгато?

132-ТӤ КЫРӞАН Табере ми одӥг лулмугор

a Кузпалъяськон — со Иеговалэн кузьымез. Картъёс но кышноос ог-огзэс туж юн яратыны быгато. Но куддыръя соослэн яратонзы лябӟыны но быгатэ. Та статья кузпалъёслы юрттоз ог-огзэс яратыса но шумпотыса улыны.

b Зэмос яратон, кудӥз дыр ортчемъя но шуг-секытъёс дыръя уг лябӟы, «Йахлэн гомась тылыз» шуыса нимаське, малы ке шуоно сыӵе яратон Иегова бордысь потэ.

c Та визь-кенешъёс пайдаё луозы соослы но, кинъёслэн кузпалзы Иеговалэн Адӟись-Ивортӥсез ӧвӧл (1 Пётр 3:1, 2; 1 Кор. 7:12—14).

d Трос пайдаё визь-кенешъёс гожтэмын статьяосын, кудъёссэ шедьтыны луэ jw.org сайтысь но JW Library® приложениысь «Помощь семье» серияысь.

e Учке «Соослэсь оскемзэс адӟем каре» книгаез, 17-тӥ люкет, 15-тӥ абзац (ӟуч).

    Удмурт кылын публикациос (2000—2025)
    Потоно
    Пыроно
    • удмурт
    • Келяно
    • Настройкаос
    • Copyright © 2025 Watch Tower Bible and Tract Society of Pennsylvania
    • Уже кутон условиос
    • Конфиденциальность сярысь политика
    • Настройки конфиденциальности
    • JW.ORG
    • Пыроно
    Келяно