Йоһанниң 1-хети
2 Сөйүмлүк балилирим, мән силәргә һечқандақ гуна қилмаңлар дәп, бу хәтни йезиватимән. Әгәр кимду-бири гуна қилип қойса, биз Атимизда ярдәмчигә — адил Әйса Мәсиһкә егә. 2 У — бизниң гуналиримизниң кәчүрүм үчүн төләм қурбанлиғила әмәс, бәлки пүткүл дунияниң гуналири үчүнму. 3 Әгәр биз униң вәсийәтлиригә риайә қилсақ, унда уни тонуғинимизни билдүримиз. 4 Кимки: «Мән уни тонуп-билдим», дәп туруп, лекин униң әмирлирини орунлимиса, у ялғанчи вә униңда һәқиқәт йоқ. 5 Әгәр киши униң сөзигә әмәл қилса, униңда һәқикәтән Худаға дегән меһир-муһәббәт камаләткә йәткән болиду. Шундақ қилип, бизму униң билән бирликтә екәнлигимизни билимиз. 6 Кимки униң билән бирликтимән десә, Әйса қилғандәк иш қилиши лазим.
7 Қәдирданлирим, мән силәргә йеңи вәсийәт әмәс, бәлки авалдин силәрдә болған кона вәсийәт һәққидә йезиватимән. Бу кона вәсийәт — силәр аңлиған нәқ әшу сөз. 8 Шундақтиму мән силәргә йеңи вәсийәттәк бу тоғрисида язимән — Әйса бу вәсийәткә риайә қилған вә силәрму риайә қиливатисиләр, сәвәви, қараңғулуқ өтмәктә вә һәқиқий нур һазирдин чақнаватиду.
9 Ким йоруқлуқта жүриватимән дәп, амма қериндишини өч көрсә, у һазирғичә қараңғулуқта. 10 Ким өз қериндишини сөйсә, у йоруқлуқта яшаватиду һәм шуңлашқа путлашмайду. 11 Ким өз қериндишини өч көрсә, у техичә қараңғулуқта. У қараңғулуқта жүриватқанлиқтин вә қараңғулуқ уни қарғу қилғанлиқтин, у нәгә кетиватқанлиғини билмәйду.
12 Сөйүмлүк балилирим, мән силәргә шуни йезиватимәнки, силәрниң гуналириңлар Әйсаниң исми түпәйли кәчүрүлди. 13 Атилар, силәргә йезиватимәнки, сәвәви, әң бешидин мәвҗут болғучини тонуп-билдиңлар. Өсмүрләр, силәргә йезиватимән, чүнки силәр Явузни йәңдиңлар. Балилар, силәргә йезиватимәнки, сәвәви, силәр Атини тонуп-билдиңлар. 14 Атилар, силәргә йезиватимән, чүнки силәр әң баштин мәвҗут болғанни билисиләр. Жигитләр, силәргә йезиватимәнки, чүнки күчлүксиләр вә Рәббимизниң сөзи қәлбиңларда һәм силәр Шәйтанни йәңдиңлар.
15 Йә дунияни, йә дуниядики нәрсиләрни сөймәңлар. Ким дунияни сөйсә, униңда Атиға болған меһир-муһәббәт йоқтур. 16 Сәвәви, дуниядики һәммә нәрсә: тәнниң һәвәслири, көзниң һәвәслири вә өзиниң мал-мүлки билән махтиниш — Атидин әмәс, бәлки бу дуниядиндур. 17 Ушбу дунияму һәм униң һәвәслириму өтүп кетиду, амма Худаниң ирадисини орунлиғучи мәңгү яшайду.
18 Әзиз балилирим, бу ахирқи вақит-саат. Силәр дәҗҗалниң келишини аңлиғандиңлар вә әнди көплигән дәҗҗаллар пәйда болди. Шуңлашқа, бу ахирқи вақит-саат екәнлигини билимиз. 19 Улар бизниң аримиздин чиқип кәтти, амма биздәк әмәс еди. Әгәр бизгә охшаш болған болса, у чағда биз билән биргә қалатти. Амма уларниң бизгә охшаш әмәслигиниң намайән болуши үчүн, улар чиқип кәтти. 20 Силәр муқәддәс Худадин майлиниш шәрипигә егә болдуңлар һәм барлиғиңлар һәқиқәтни билисиләр. 21 Мән силәргә һәқиқәтни билмигиниңлар үчүн әмәс, бәлки билгиниңлар үчүн вә һәқиқәттин һечқандақ ялғанчилиқ чиқмайдиғанлиғи сәвәвидин йезиватимән.
22 Әйсаниң Мәсиһ екәнлигини рәт қилғучи, шу ялғанчи әмәсму? Бу һәм Атини, һәм Оғлини рәт қилғучи дәҗҗалдур. 23 Оғлини рәт қилғучини йә Оғли, йә Атиси мақуллимайду. Оғлини етирап қилғучини һәм Оғли, һәм Атиси мақуллайду. 24 Силәргә мунасивәтлик ейтсақ, әң бешида аңлиғиниңлар жүригиңларда қаливәрсун. Әгәр әң бешида аңлиғанлириңлар силәрдә қалса, шу чағда силәр һәм Оғли билән бирликтә, һәм Атиси билән бирликтә болалайсиләр. 25 Мана, Тәңримиз Өзи бизгә мәңгүлүк һаятни вәдә қилди.
26 Буни силәрни езиқтурушқа тиришиватқанлар тоғрисида йезиватимән. 27 Амма силәргә тегишлик Худадин алған майлиниш һәқтур һәм униңда ялғанчилиқ йоқтур вә майлиниш арқилиқ У силәрни һәммигә үгитиду. Шуңлашқа муқәддәс роһ силәрни қандақ үгәткән болса, силәр дәл шундақ Майлиғучи билән бирликтә қелиңлар. 28 Әнди, әзиз балилирим, биздә сөз әркинлиги болуши үчүн, Әйса билән бирликтә болуңлар вә у һазирлинидиған вақитта униңдин иза тартип жүрмәйли. 29 Әгәр силәр Худаниң һәққанийлиғини билсәңлар, һәрқандақ һәққаний иш қилғучи Униңдин туғулғанлиғини чүшинисиләр.