Йоһанниң 1-хети
3 Қараңлара, Худаниң балилири атилишимиз үчүн, Атимиз бизгә қандақ меһир-муһәббәт көрсәтти һәм биз һәқиқәтән Униң пәрзәнтлири! Дуния бизни билмәйду, сәвәви, Уни тонуп-билмиди. 2 Қәдирликләр, биз әнди Пәрвәрдигарниң балилири, амма қандақ болудиғинимиз техи ениқ әмәс. Биз у өзини ашкарилиғандила, униңға охшаш болудиғанлиғимизни билимиз, чүнки униң қандақлиғини көрүмиз. 3 Униңға үмүт бағлиған һәрқандақ адәм униңға охшап пак болуш үчүн, өзини тазилайду.
4 Гуна қиливатқан һәрқандақ инсан қанунсизлиқ қиливатқан болиду, чүнки гуна — бу Қанунни бузуштур. 5 Силәр шундақла билисиләрки, Мәсиһ бизни гуналиримиздин қутулдуруш үчүн кәлди, униңда болса гуна йоқтур. 6 Униң билән бирликтә болған киши гуна қилмайду. Ким гуна қилса, уни һәм көрмиди, һәм тонуп-билмиди. 7 Сөйүмлүк балилирим, һечким силәрни езиқтурмисун. Ким һәққаний иш қилса, Әйса һәққаний болғандәк, уму һәққаний. 8 Ким гуна қилса, — шу Иблистин, чүнки Иблис әң баштин гуна қилип кәлмәктә. Худа Оғли шуниң үчүн кәлдики, униң мәхсити — Иблисниң ишлирини бузуштур.
9 Худаниң пәрзәнтлири гуна қилип яшимайду, чүнки уларда Худаниң роһи бар. Уларниң гуналиқ ишларни қилиши мүмкин әмәс, сәвәви, улар Худадин туғулғанлардур. 10 Худаниң балилири билән Иблисниң балилирини мундақ билишкә болиду: һәрқандақ һәққаний иш қилмайдиған киши — Худадин әмәс һәм өз қериндишини сөймәйдиғанму худди шундақ. 11 Силәр әң баштин аңлиған вәсийәт мана бу: биз бир-биримизгә меһир-муһәббәт көрситишимиз лазим. 12 Биз Явузға мәнсүп болуп, өз инисини өлтүргән Қабилдәк болмаслиғимиз керәк. У немишкә уни өлтүрди? Сәвәви, униң ишлири явуз болди, инисиниң ишлири болса, һәққаний еди.
13 Қериндашлар, дуния силәрни өч көргинигә һәйран болмаңлар. 14 Биз өлүмдин һаятқа өткинимизни билимиз, чүнки қериндашлиримизни сөйүмиз. Ким қериндашларни сөймисә, у өлүмниң илкидә қалғандур. 15 Өз қериндишини өч көргән һәрқандақ киши — қатилдур вә силәр шуни билисиләрки, һечбир қатил мәңгүлүк һаятқа еришмәйду. 16 Биз меһир-муһәббәтни Әйса Мәсиһниң биз үчүн җенини пида қилғинидин билимиз, шуңлашқа бизму өз қериндашлиримиз үчүн җенимизни пида қилишқа тәйяр болушимиз шәрт. 17 Әгәр кимду-бирси муһтаҗсиз яшиса, лекин өз қериндишиниң муһтаҗлиғини көрүп, униңға һисдашлиқ қилиштин ваз кәчсә, униңда қандақму Рәббимизниң меһир-муһәббити болсун? 18 Балилирим, бир-биримизгә пәқәт тилимиз биләнла әмәс, бәлки ишимиз бойичә һәқиқәтән меһир-муһәббәт көрситәйли.
19 Шундақ қилип, биз һәқиқәттин екәнлигимизни биливалимиз һәм жүрәклиримизни Худаниң бизни сөйүдиғанлиғиға ишәндүримиз. 20 Һәтта жүрәклиримиз бизни қанчилик сотлисиму, ениқки, Худа бизниң жүригимиздин улуқ вә һәммини билиду. 21 Әзизлирим, әгәр жүрәклиримиз бизни әйиплимисә, биз Пәрвәрдигаримиз алдида сөз әркинлигигә егә. 22 Неминила сорисақ, Униңдин алимиз, чүнки Униң вәсийәтлирини орунлаватимиз вә Униңға яқидиған ишларни қиливатимиз. 23 Униң вәсийити мана бу: У бизгә буйруғандәк, биз Униң Оғли Әйса Мәсиһниң исмиға ишинишимиз вә бир-биримизгә меһир-муһәббәт көрситишимиз лазим. 24 Ким Худаниң әмирлирини орунлиса, у Униң билән бирликтә һәм Уму шу киши билән бирликтә. Бизму Яратқучи бизгә бәргән муқәддәс роһи арқилиқ, Униң биз билән бирликтә екәнлигини билимиз.