Зәбур
Мәдһийиләш нахшиси. Давутниң күйи.
א [Алеф]
145 Сени, Тәңрим вә Падишайим, мәдһийиәдә
Егиз йүксәлдүрүп, Сениң исмиңни
Әбәдий-әбәт мубарәкләймән.
ב [Бет]
2 Күндин-күнгә Сени шәрәпләп,
Исмиңни мәңгү тохтимай алқишлаймән.
ג [Гимел]
3 Йәһва улуқ һәм шөһрәткә лайиқ,
Униң улуқварлиғи әқилгә сиғмайду.
ד [Далет]
4 Әвлаттин-әвлатқа кишиләр Сениң
Паалийәтлириңни махтап-қоллап,
Қадирлиғиңни җакалайду.
ה [Хе]
5 Улар Сениң шөһритиңниң бүйүклиги
Һәққидә ейтиду, мәнму Сениң әҗайип
Ишлириң тоғрилиқ мулаһизә қилимән.
ו [Вав]
6 Улар мөҗүзилириңниң күчи тоғрисида
Вәз қилиду һәм мәнму Сениң
Улуқлуғиңни җараңлиқ җакалаймән.
ז [Зайин]
7 Ериқтики судәк махташ бүйүк меһриң һәм
Һәқиқитиң тоғрилиқ нахшиларда яңрайду.
ט [Хет]
8 Йәһва Худа мәрт һәм һисдашлиқ, узақ
Сәвирлик вә вапа муһәббәткә толған.
ט [Тет]
9 Йәһва һәммигә меһрибан вә Униң бар
Ишлирида рәһимдиллик ипадилиниду.
י [Йод]
10 Барчә әмәллириң Саңа, Йәһва,
Шөһрәт әкелиду вә муқәддәслириң Сени
Пүткүл дилидин мәдһийиләйду.
כ [Каф]
11 Улар Падишалиғиңниң шәрипи тоғрилиқ
Баян қилиду вә күч-ғәйритиң
Һәққидә тәпсилий ейтип бериду.
ל [Ламед]
12 Буни улар инсанлар Сениң
Қадирлиғиң вә Падишалиғиңниң мол
Абройи һәққидә билиши үчүн қилиду.
מ [Мем]
13 Сениң Падишалиғиң — һәммә әсирләр
Падишалиғи вә һөкүмранлиғиң мәңгүгә!
ס [Самех]
14 Йәһва жиқиливатқан инсанларни
Қоллап-қувәтләп, көңли сунған
Сәмимийләрни чоқум тикләйду.
ע [Айин]
15 Мәвҗудатниң көзлири Саңа қарағлиқ,
Уларға өз вақтида Сән озуқ берисән.
פ [Пе]
16 Қолуңни ечип, тирик җанларниң
Хаһишлирини Сән қанаәтләндүрисән.
צ [Цаде]
17 Йәһва барлиқ йоллирида һәққанийдур
Вә һәммә ишлирида муқәддәстур.
ק [Коф]
18 Йәһва Уни чақириватқан барлиғиға,
Һәқиқәттә чақириватқан барлиғиға йеқин.
ר [Реш]
19 Униңдин әйминидиғанларниң арзулирини
Орунлайду, налисини тиңшап, ниҗат бериду.
ש [Шин]
20 Йәһва Уни сөйгәнләрни қоғдайду,
Рәзилләрни болса, қирип ташлайду.
ת [Тав]
21 Йәһва Пәрвәрдигарни мән махтаймән,
Барлиқ тирик җан Униң хасийәтлик
Исмини та әбәт махтисун!