Чиқиш
30 Хушпурақ исриқ көйдуруш үчүн қурбангаһ яса. Уни акация яғичидин яса. 2 У төрт булуңлуқ болуши лазим: узунлуғи бир җәйнәк, кәңлиги бир җәйнәк, егизлиги болса икки җәйнәктур. Униңдин мүңгүзләр чиқип туруши лазим. 3 Уни сап алтун билән қапла: униң үстини, тәрәплирини һәм мүңгүзлирини — вә өп-чөрисигә алтун пәвәз қилғин. 4 Шундақла униң үчүн икки алтун һалқа ясиғин. Уларни пәвәзниң астиға икки тәрипидин қадиғин. Қурбангаһни йөткәш үчүн чәңзиләрни һалқиларға өткүзүшкә уларни униң бир-биригә қарши тәрәплиридә қилғин. 5 Чәңзиләрни акация яғичидин ясап, алтун билән қаплиғин. 6 Қурбангаһни гува сандуғиниң йенидики пәрдиниң алдида қойғин. Мән у җайда, сандуқнин қапқисиниң алдида, саңа аян болумән.
7 Һарун униңда хушпурақлиқ исриқни көйдүрсун. У исриқни һәр әтигәнлиги шамданни тәйярлиғанда көйдүрсун. 8 Һарун уни шамданни яндурғанда, икки ахшими арисида көйдүрсун. Бу Йәһваниң алдида дайим көйдүрүшкә тегишлик исриқтур. Буни әвлаттин әвлатқа қилиш керәк. 9 Қурбангаһта қанунсиз исриқни, көйдүрмини яки нан һәдийәсини әкәлмәңлар вә униңға ичимлик һәдийәни қуймаңлар. 10 Һарун жилиға бир қетим қанни қурбангаһниң мүңгүзлиригә сүркәп, униң төлимини өткүзсун. Жилиға бир қетим у төләм үчүн әкелидиған һәдийәниң қени билән төләм өткүзиду. Буни әвлаттин әвлатқичә қилиш керәк. Бу Йәһва үчүн улуқ муқәддәсликтур».
11 Йәһва Муса билән гепини давамлаштуруп: 12 «Исраил оғуллириниң тизимини елиш вақтида уларни саниғанда, тизимлашта улар вабаға учримиши үчүн, уларниң һәрқайси өз җени үчүн Йәһваға төләм бәрсун. 13 Тизимға елишқа тегишликләрниң барлиғи мана, немә қилиши лазим: муқәддәс җайниң шекәллири* бойичә йерим шекәл бәрсун. 20 гер бир шекәлни тәркип қилиду. Йерим шекәл — Йәһваға ианидур. 14 Тизимлашқа тегишлик һәрбири 20 яштин башлап, Йәһваға ианә бериши лазим. 15 Бай киши Йәһваға ианини өз җениниң төлими үчүн артуғирақ, гадай киши бу баһадин камирак бәрмәслиги керәк. 16 Бу төләм күмүчи Исраил оғуллириниң пайдисиға, уларниң җанлириниң төлими болуши үчүн, Йәһваниң есиға селишқа сән Исраил оғуллиридин күмүчни елип, уни жиғин чедиридики хизмәткә бәргин»,— деди.
17 Андин Йәһва Мусаға: 18 «Жуюнуш үчүн мис дасни һәм астиға қойғучни ясиғин, уни жиғин чедириниң һәм қурбангаһниң арилиғиға қойғин вә униңға су қуйғин. 19 Һарун һәм оғуллири униңдики су билән пут-қолини жуйсун. 20 Улар жиғин чедириға яки Йәһваға көйдүрмә һәдийәни әкелиш хизмитини қилғач қурбангаһқа йеқинлашқанда, су билән жуюнсун. Болмиса, улар өлүп кетиду. 21 Улар өлүп кәтмәслиги үчүн, пут-қолини жуйсун. Бу тохтам улар үчүн мәңгүгә: Һарунға вә әвлаттин әвлатқа униң нәслигә»,— деди.
22 Йәһва сөзини давамлаштуруп, Мусаға: 23 «Сән болсаң есил хушпурақлиқларни алғин: 500 шекәл қатқан мурмәккини, икки һәссә азирақ — 250 шекәл татлиқ дарчинни, 250 шекәл шерин игирни, 24 500 қовзақдарчинни (барлиғи муқәддәс җайниң шекәллиридә) вә үч йерим литрға йеқин зәйтун мейини. 25 Улардин майлаш муқәддәс йеғини — майни ясиғин. Бу арилашмини майларни тәйярлиғучи ясайду. Бу майлаш муқәддәс мейи болиду.
26 Униң билән жиғин чедирини һәм гува сандуғини майлиғин, 27 шундақла үстәлни вә барлиқ униң затлирини, шамданни вә униң затлирини, исриқ көйдүридиған қурбангаһни, 28 көйдүрмиләр үчүн қурбангаһни вә барлиқ униң затлирини, дасни вә униң астиға қойғучни. 29 Уларниң улуқ муқәддәслик болуши үчүн, уларни муқәддәслә. Уларға тәккән һәрқандақ киши муқәддәс болуши шәрт. 30 Маңа роһанийлар болуп хизмәт қилиши үчүн, Һарун билән униң оғуллирини майла һәм муқәддәслигин.
31 Исраил оғуллириға йәнә мундақ дегин: “Бу нәрсә Мениң үчүн әвлаттин әвлатқичә муқәддәс майлаш мейи болиду. 32 Униң билән адәмниң тенини майлимаңлар, вә униңға тәркиви охшайдиған һечнәрсини қилмаңлар. У муқәддәстур. У силәр үчүн муқәддәслик болиду. 33 Кимду-ким униңға охшайдиған майни тәйярлиса яки уни башқа бирсигә сүркисә, у киши өз хәлқидин уҗуқтурилиду”»,— деди.
34 Йәһва Мусаға: «Хушпурақлиқларни алғин: стактиниң тамчилирини, онихни, хушбой галбанни вә таза мәстәкни. Һәммиси баравәр болуши лазим. 35 Булардин исриқни тәйярлиғин, йәни тузланған, таза, муқәддәс хушпурақлиқ арилашмини. Бу майлар тәйярлиғучиниң иши. 36 Униң бир қисмини ушшақ угитип, Мән саңа намайән болудиған жиғин чедиридики Шаһадәтнаминиң алдиға қойғин. У силәр үчүн улуқ муқәддәслик болуши лазим. 37 Өзәңлар үчүн бундақ тәркип билән исриқни қилмаңлар. У сениңда Йәһва үчүн муқәддәслик болиду. 38 Кимду-ким пуриғи билән бәһрилиниш үчүн, униңға охшаш исриқни ясиса, у киши өз хәлқидин йоқитилиду»,— деди.