Марк
10 Әйса у йәрдин кетип, Йордан дәриясиниң у йеқидики Йәһудийә чегарилириға кәлди. Униң алдиға йәнә көплигән инсанлар келишип, у адәттикидәк, уларни үгитишкә башлиди. 2 Шу вақитта пәрисийләр йениға келип, уни синаш мәхситидә әркишиниң аяли билән аҗришиши қанунлуқму, дәп сорашти. 3 Җававән у улардин: «Муса силәргә немә буйруған?»— дәп сориди. 4 Улар: «Муса пәйғәмбәр бизгә талақ хетини йезипла, аҗришишни рухсәт қилған»,— дейишти. 5 Әйса уларға: «Жүрәклириңларниң берәһимлигидин у силәргә мошу вәсийәтни йезип бәргән. 6 Амма, Худа бешида, “уларни әр вә аял қилип яратқан”. 7 Шу сәвәптин әр киши ата-анисини қалдуруп, 8 иккиси бир тән болиду”. Шуңлашқа улар әнди иккиси әмәс, бәлки бир тәндур. 9 Демәк, Худа бир боюнтуруқ астиға қошқанларни адәм айримисун!»— деди. 10 Улар қайта өйдә болғанда, шагиртлири бу тоғрисида сорашти. 11 Әйса уларға: «Ким аяли билән аҗришип, башқа биригә өйләнсә, у дәсләпки аялиға қарита нека вапалиғини бузған болиду 12 һәм әгәр аял киши еридин аҗришип, башқа биригә турмушқа чиқса, уму нека вапалиғини бузған болиду»,— дәп чүшәндүрди.
13 Адәмләр, Әйса қолини тәккүзсун дәп, униңға кичик балилирини әкеләтти. Шагиртлири буни көрүп, уларни сөкәтти. 14 Буни байқиған Әйсаниң аччиғи келип, уларға: «Балилар маңа келивәрсун. Уларниң алдини тосимаңлар, чүнки шуларға охшашларға Худа Падишалиғи мәнсүптур! 15 Силәргә һәқни ейтайки, ким Худа Падишалиғини кичик балидәк қобул қилмиса, у униңға кирәлмәйду»,— деди. 16 Мошу сөзләр билән у балиларни қучақлап, уларға қоллирини қоюп бәрикәтлиди.
17 У йолға чиққанда униң алдиға бир киши жүгрәп келип, тизлинип сориди: «Яхшилиқ бәргүчи Устаз, мәңгү һаятқа еришиш үчүн, мән немә қилишим керәк?» 18 Әйса униңға: «Сиз немишкә мени яхшилиқ бәргүчи дәйсән? Бир Худадин башқа һечким яхшилиқ Бәргүчи әмәс! 19 “Өлтүрмә, нека вапалиғини бузма, оғрилима, сахта гувалиқ қилма, алдима, ата-анаңни һөрмәтлә” дегән әмирләрни билисизғу»,— деди. 20 У киши: «Устаз, мән буниң һәммисигә өсмүр вақтимдин әмәл қилип келиватимән»,— дәп җавап бәрди. 21 Әйса униңға қаридидә һәм меһир-муһәббәт илкидә: «Сизгә бирнәрсә йетишмәйватиду: берип, бар нәрсиңизни сетип, пулни гадайларға тарқитиветиң, шу вақитта ғәзниңиз асманда болиду, андин келип маңа әгишиң»,— деди. 22 Лекин у киши бу сөзләрни аңлап, хапа болди вә қайғурған пети кетип қалди, чүнки у нурғун байлиққа егә еди.
23 Әйса әтрапидикиләргә қарап, өз шагиртлириға: «Пули барларға Худа Падишалиғиға кириш қандақ тәс болиду, һә!»— деди. 24 Бирақ шагиртлири униң гепигә һәйран болушти. Унда Әйса яңливаштин уларға: «Балилирим, Худа Падишалиғиға кириш немә дегән қийин! 25 Байниң Худа Падишалиғиға киришидин көрә, төгиниң жиңнә қулиғидин өтүши оңайдур»,— деди. 26 Лекин улар техиму һәйран қелишип: «Ундақта ким қутқузулушқа еришәләйду?»— дәп сориди. 27 Әйса уларға көз жүгәртип: «Адәмләргә бу мүмкин әмәс, лекин Худа үчүн барлиқ нәрсә мүмкиндур»,— деди. 28 Шу чағда Петрус: «Һә, бизчу? Мана, биз һәммә нәрсиләрни ташлап, кәйниңдин жүрдуқ»,— деди. 29 Әйса: «Силәргә һәқни ейтиватимәнки, кимду-ким мени һәм хуш хәвәрни дәп, өйини яки қериндашлирини, яки ата-анисини, яки балилирини, яки етиз-зиминлирини қалдурған болса, 30 уларниң барлиғи һазирниң өзидә тәқипләр билән биргә йүз һәссә артуқ өйләргә һәм қериндашларға, һәм аниларға, һәм балиларға, һәм етиз-зиминларға егә болиду. Келәчәктә болса, әбәдий һаятқа еришиду. 31 Лекин нурғунлиған дәсләпкиләр ахирқилар болиду, ахирқилар болса, дәсләпкиләрдин болиду»,— деди.
32 Улар Йерусалимға апиридиған йол билән көтирилди. Әйса уларниң алдида кетивататти. Шагиртлири һәҗәплинип, кәйнидә кетивататти. Улар билән жүргәнләр болса, қорқунуч илкидә еди. Әйса йәнә 12ни чәткә тартип, өзи билән болудиған вақиәләр һәққидә ейтишқа башлиди: 33 «Биз Йерусалимға көтүрүливатимиз вә инсан Оғли чоң роһанийлар һәм Тәврат устазлириниң қолиға берилиду. Улар уни өлүмгә мәһкүм қилип, башқа хәлиқләрдин болған кишиләргә тапшуриду. 34 Улар униң үстидин мәсхирә қилишиду, үзигә түкүриду, қамчилайду вә өлтүриду, лекин үч күндин кейин у тирилиду».
35 Әйсаниң қешиға Зәбәдийниң икки оғли Яқуп билән Йоһан келип, мундақ дейишти: «Устаз, илтимасимизни орунлап беришиңни халаймиз». 36 У улардин: «Силәр үчүн немә қилип беришимни халайсиләр?»— дәп сориди. 37 Улар җававән: «Сениң шан-шәрипиң вақтида биримизниң оң тәрипиңдә, йәнә биримизниң сол тәрипиңдә олтиришимизға рухсәт қилғин»,— деди. 38 Лекин Әйса улардин: «Немини сораватқиниңларни чүшәнмәйватисиләр. Мән ичиватқан қәдәһни ичәләмсиләр һәм мән чөмдүрүлидиған чөмдүрүштин өтәләмсиләр?»— дәп сориди. 39 Улар җававән: «Өтәләймиз»,— дейишти. Андин Әйса: «Мән ичиватқан қәдәһни ичисиләр һәм мән өтидиған чөмдүрүштин өтисиләр. 40 Амма, ким мениң оң тәрипимдә һәм ким сол тәрипимдә олтиришини мән йәшмәймән. Бу орунлар кимгә тәйярланған болса, шуларға тегиду»,— деди.
41 Қалған 10 шагирт буни аңлиғанда, Яқуп билән Йоһанға нәпрәтләнди. 42 Лекин Әйса уларни йениға чақиривелип, мундақ деди: «Силәр билисиләрки, хәлиқләрниң һөкүмдарлири дәп аталғанлар улар үстидин һөкүмранлиқ қилиду һәм улуқлири уларни езиду. 43 Силәрниң араңларда ундақ болмиши керәк. Әксичә, ким араңларда бүйүк болғуси кәлсә, у силәрниң чакариңлар болсун 44 вә ким араңларда биринчи болушни халиса, у һәммиси үчүн қул болуши лазим. 45 Чүнки инсан Оғлиму өзигә хизмәт қилиши үчүн кәлгини йоқ, әксичә, өзи башқиларға хизмәт қилип, нурғунлири үчүн җенини төләм ретидә бериветишкә кәлди».
46 Андин улар Ериха шәһиригә йетип кәлди. У шагиртлири һәм көплигән кишиләр билән Ерихадин чиқип кетиватқанда, йол бойида Тимәйниң оғли Бартимәй исимлиқ қарғу тиләмчи олтиратти. 47 У өтүп кетиватқан насирәлик Әйса екәнлигини аңлап: «Давутниң оғли Әйса, маңа рәһим қилғайсән!»— дәп вақириди. 48 Нурғун адәмләр уни теч болушқа мәҗбурлиди, бирақ у техиму қаттиғирақ: «Һәй, Давутниң оғли, маңа рәһим қилғайсән!»— дәп вақиравәрди. 49 Әйса тохтап: «Уни чақириңлар»,— деди. Қарғуға: «Қорқма, тур, у сени чақириватиду!»— дейишти. 50 У сиртқи кийимини ташлап, сәкрәп турдидә, Әйсаниң йениға кәлди. 51 Әйса униңдин: «Сениң үчүн немә қилип берәй?»— дәп сориди. Кор киши: «Устаз, көзүмни ечип бәргинә»,— деди. 52 Әйса униңға: «Тур, маң, етиқатиң сени сақайтти»,— деди. Шу заман униң көзлири ечилди вә у Әйсаниң арқисиға чүшүп раван болди.