Петрусниң 2-хети
2 Амма Исраил хәлқи арисида сахта пәйғәмбәрләр болғинидәк, силәрниңму араңларда сахта устазлар болиду. Мундақ кишиләр билиндүрмәй етиқатқа нисбәтән мәзһәпчиликни киргүзүп, сетивалған Ғоҗайинидин үз өриду вә өзлирини тез келиватқан һалакәткә дучар қилиду. 2 Көплири уларниң әхлақсиз ишлириға тәқлит қилиду һәм буларниң кесиридин һәқиқәт йоли һақарәтлиниду. 3 Йәнә иккийүзлүк сөзләрни қилғач, башқисиниңкини халап, силәрни өз мәнпийәтлиридә пайдилиниду. Лекин уларниң үстидин аллиқачан чиқирилған һөкүм кечикмәйду вә уларниң һалак болуши муқәррәрдур.
4 Дәрһәқиқәт, Худа гунакар пәриштиләрни айимай, тартарға* ташлап, уларни мутләқ қараңғуниң чоңқурлуғиға қамап, сотлаш үчүн сақлаватиду. 5 У қедимий дунияни айимай, рәзилләрни топан сүйи билән ғәриқ қилғанда, һәққаний йолини хәвәрләп жүргән Нуһ пәйғәмбәрни вә униң билән биллә йәнә йәттә кишиниму сақлап қалған еди. 6 Худа Садом вә Гамора шәһәрлирини һөкүм қилип, күлгә айландурған вә шуниң билән һәққанийсизлар билән келәчәктә немә йүз беришини көрсәткән. 7 Яратқучиниң қанунидин үз өрүп, әхлақсиз мүҗәз-хулуқниң учиға чиққан адәмләрниң қилиқлиридин езилгән һәққаний киши Лутни қутқузған. 8 Чүнки уларниң арисида яшап, күндин-күнгә қанунсиз ишлирини көргинидин вә аңлиғинидин бу һәққаний кишиниң җени һәсрәт чәккән еди. 9 Дәрһәқиқәт, Йәһва Пәрвәрдигар Өзигә вападар кишиләрни синақлардин қандақ қутулдурушни, һәққанийсизларни болса, йоқ қилиш үчүн сот күнигичә қандақ сақлашни билиду. 10 Болупму тәнниң һәвәслиригә берилип, уни булғап, һакимийәткә һөрмәт көрсәтмигәнләр қирилиду.
Ушбу һакавур вә өз ирадилиқ сахта устазлар Худа тәрипидин шөһрәткә еришкәнләрдин әйминишниң орниға, уларни һақарәтләштин қорқмайду. 11 Һәтта улардин тәңдашсиз күчлигирәк вә қудрәтлигирәк пәриштиләрму Йәһвани һөрмәт қилғанлиғидин, мәзкүр сахта устазларни һақарәтлик сөзләр билән әйиплимәйду. 12 Бу адәмләр болса, тутувелинип өлтүрүлүш үчүн туғулған аңсиз һайванларға охшайду. Улар өзлири чүшәнмигән нәрсиләрни һақарәтлимәктә һәм шуңлашқа һалакәт йолида өлиду 13 вә бу қилмишлири билән өз бешини йәйду.
Мундақ адәмләр очуқтин-очуқ тән нәпсилирини қандуруштин ләззәтлиниду. Улар — дағлар вә жиркинчиликләр. Улар силәр билән зияпәт қиливетип, өзлириниң алдамчи тәлиматлирини тарқитиштин раһәтлиниду. 14 Көзлири вапасизлиққа тоймайду вә гуна қилиштин өзлирини туталмайду. Улар аҗиз кишиләрни езиқтуриду. Жүрәклири башқиларниңкини халашқа үгәнгән. Улар — ләнәткә учриған балилардур. 15 Тоғра йолни қалдуруп, улар адашқанлар. Улар һарам ишлар билән пул тепишни яхши көргән Беорниң оғли Балаамниң йолида маңғанлар. 16 Балаам қилған җинайити үчүн паш қилинди. Тилсиз ешәк адәм авази билән сөзләп, пәйғәмбәргә әқилсиз иш қилишқа йол қоймиди.
17 Бу кишиләр — сусиз булақлар вә қаттиқ боран һайдиған ямғурсиз булутлардур. Улар үчүн мутләқ зулмәт тәйярлинип қоюлған. 18 Уларниң сөзлири салмақлиқ көрүнгини билән улардин пайда йок. Бузуқчилиғи билән улар адашқан йолдин аран-аран қайтқан кишиләрни езиқтурмақта. 19 Уларға, әгәшкәнләргә, әркинликни вәдә қилип, өзлири болса әхлақсизлиқниң қуллиридур, чүнки инсан кимдин йеңилса, шуниң қули болиду. 20 Дәрһәқиқәт, әгәр улар Һакимдаримиз вә Ниҗаткаримиз Әйса Мәсиһ һәққидә тоғра билим елиш түпәйлидин булғанған дуниядин қечип қутулғандин кейин, йәнә әшу ишларға берилип йеңилса, уларниң ахирқи әһвали авалқидин бәттәр болиду. 21 Сәвәви, һәққанийлиқ йолини тоғра билгәндин кейин, уларға тапшурулған муқәддәс вәсийәттин үз өргәндин көрә, бу йолни билмигәнлиги әвзәлирәк еди. 22 Улар билән йүз бәргән вақиә дурус һекмәт сөзләрдә ейтилған: «Ишт өз қусуғиға, жуюлған чошқа патқақта еғинашқа қайтиду».