Ибранийларға
2 Шу сәвәптин, биз һечқачан етиқаттин чәтнәп кәтмәслигимиз үчүн, аңлаватқан нәрсиләргә алаһидә диққәтлик болушимиз керәк. 2 Чүнки әгәр пәриштиләр арқилиқ ейтилған сөзләр өзгәрмәс болуп вә Муса қануниға қарши һәрқандақ қилмиш һәм итаәтсизлик адил җазаға тартилған болса, 3 у чағда биз шунчә бүйүк ниҗатқа етивар бәрмисәк, қандақму қутқузулалаймиз? Бу ниҗат һәққидә баштин Һакимдаримиз арқилиқ уқтурулған вә уни аңлиғанлар биз үчүн тәстиқлигән. 4 Шундақла һәтта Худаму карамәт-аламәтләр, мөҗүзиләр, қудрәтлик ишлар һәм Өз ирадиси бойичә муқәддәс роһни бәргәнлиги билән гувалиқ қилди.
5 Чүнки биз ейтиватқан кәлгүси йәрни Худа пәриштиләргә беқиндуруп бәрмигән. 6 Әксичә, бир киши бир вақитта мундақ дегәнди: «Сән есиңда тутқидәк, инсан немә у шунчә вә Сән униңға ғәмхорлуқ қилғидәк, инсан оғли немә шунчә? 7 Сән уни пәриштиләрдин сәл төвән қойдуң, шөһрәт һәм шәрәп билән униңға таҗ кийдүрүп, Өз қоллириңниң яратмилири үстидин һакимийәт бәрдиң. 8 Униң аяқ астиға һәммини беқиндурдуң». Униңға һәммини бойсундуруп, Худа һечнәрсини униңға беқинмиған һалда қалдурмиди. Амма, һазирчә биз техи барлиқ нәрсә униңға бойсунғанлиғини көрмидуқ. 9 Лекин шуни көрдуқки, пәриштиләрдин сәл төвән қоюлған Әйса азап тартип өлгини үчүн, шан-шөһрәт һәм шан-шәрәп билән мукапатланди. Рәббимизниң мол меһирлиги бойичә у һәммиси үчүн өлди.
10 Һәммә нәрсә Тәңри үчүн вә Униң түпәйлидин моҗуттур. Худа көплигән пәрзәнтлирини шөһрәткә әкелиш үчүн, уларниң қутқузушиниң Йолбашчисини азаплар арқилиқ камил қилишни орунлуқ көрди. 11 Чүнки муқәддәсләватқан һәм муқәддәслиниватқанларму ялғуз Атидин чиқти вә мошу сәвәптин, Әйса уларни «бурадәрлирим» дәп аташтин уялмайду. 12 У: «Мән Сениң исмиңни бурадәрлиримгә җакалаймән, җамаәттә Саңа мәдһийә күйләрни иҗра қилимән», 13 йәнә: «Униңға тайинимән» һәм шундақла: «Мән вә Йәһва маңа бәргән балилирим»,— дәйду.
14 Мәзкүр балилар қан вә тәндин болғачқа, уму шундақла қан вә тән яки инсан болуп, өзиниң өлүми түпәйли өлүмгә сәвәп болуватқан Иблис билән түгитиш үчүн, 15 өлүмдин қорқуп, пүткүл һаятида қуллуқта болғанларни азат қилишқа өлди. 16 У пәриштиләргә әмәс, бәлки Ибраһимниң әвладиға ярдәм бәрмәктә. 17 Шуңлашқа, у һәммә җәһәттин өзиниң бурадәрлиригә охшап, андин Худаға хизмәттә рәһимдиллик һәм садиқ башроһаний болуп, хәлиқниң гуналири үчүн яраштуруш қурбанлиғини әкелиши керәк еди. 18 Синақта болғанда азап тартқанлиғидин, у синақта болуватқанларға ярдәм беришкә қабилдур.