«Исмиңдин әйминишим үчүн, қәлбимни пүтүн қилғайсән»

1. Худадин әйминиш немини билдүриду вә Йәһвани яхши көридиғанлар үчүн Униңдин әйминиш немә үчүн муһим?

ХУДАНИҢ хизмәтчилири Уни яхши көриду вә Униңдин әйминиду. Бәзиләргә бу қариму-қаршилиқтәк билиниду. Амма биз вәһимә пәйда қилидиған қорқунуч һәққидә әмәс, бәлки алаһидә бир қорқуш яки әйминиш һәққидә муһакимә қилимиз. Ундақта, Худадин әйминиш немини билдүриду? Худани қорқидиған яки әйминидиған адәмләр Уни чиң қәлбидин һөрмәтләйду. Улар Асмандики Атисиниң көңлини рәнҗитип қоюштин қорқиду, сәвәви Униң билән достлуқ мунасивитиниң бузулушини халимайду (Зәб. 111:10; Пәнд н. 8:13).

2. Давут падишаниң Зәбур 86:11-айәттики сөзлиригә асасән, қандақ икки нәрсини муһакимә қилимиз?

² Зәбур 86:11ни оқуңb. Мошу айәт тоғрилиқ ойлиғанда, садақәтмән Давут падиша Худадин әйминишниң муһимлиғини яхши чүшәнгәнлигини ейтқан. Һазир Давут дуасида ейтқанлирини биз өзүмизгә қандақ қоллинишқа болидиғанлиғини муһакимә қилимиз. Биринчи, немә үчүн Худаниң исмини чоңқур һөрмәтләшниң бирнәччә сәвәвини көрүп чиқимиз. Иккинчи, Худаниң исмидин әйминидиғанлиғимизни күндилик турмушимизда қандақ көрситәләйдиғанлиғимизни муһакимә қилимиз.

НЕМӘ ҮЧҮН БИЗ ХУДАНИҢ ИСМИДИН ӘЙМИНИШИМИЗ КЕРӘК?

3. Мусаниң Худаниң исмидин әйминишигә қандақ вақиә ярдәм бәргән?

³ Хариб теғидики қорам таш арисидики ғарда, Муса пәйғәмбәр түгүлүп олтуруп, Йәһва Худаниң улуқлиғиниң өткәнлигини көргәндә, немә һис қилғанлиғини тәсәввур қилип көрүң. Еһтимал, бу Әйсаниң келишидин авал йүз бәргән көрүнүшләр арисидики әң тәсирлик көрүнүш болған. Пәриштә ейтқан сөзләрни Муса аңлиған болуши мүмкин: «Йәһва, Йәһва — рәһимлик һәм һиммәтлик Худа, ғәзәплинишкә алдиримайдиған һәм сөйгү меһрибанлиққа вә һәқиқәткә толған, сөйгү меһрибанлиғини миңларға сақлайдиған, қанунсизлиқни, қилмишни вә гунани кәчүрүдиған, лекин һәргиз җазадин қутулдурмайдиған» (Чиқ. 33:17—23; 34:5—7). Шуңа Муса һәр қетим Худаниң исмини ишләткәндә, у бешидин өткүзгән вақиә һәққидә ойлиған. Кейин униң Худаниң хәлқи Исраилларни «шан-шөһрәтлик һәм һәйвәтлик исмидин» әйминиш керәклиги һәққидә агаһландурғанлиғи һәйран қаларлиқ әмәс (Қ. шәр. 28:58).

4. Бизниң Худаға техиму чоңқур һөрмәт-еһтирам көрситишимизгә немә ярдәм бериду?

⁴ Биз Йәһва Худаниң исми һәққидә ойлиғанда, Униң қандақ Шәхс екәнлиги тоғрисидиму ойлинип тәпәккүр қилишимиз керәк. Йәнә Униң күч-қудрити, даналиғи, адиллиғи вә меһир-муһәббити кәби есил пәзиләтлири һәққидиму ойлишимиз муһим. Униң барчә пәзиләтлири тоғрисида ойлиниш бизни Униңға техиму чоңқур һөрмәт-еһтирам көрситишкә дәвәт қилиду (Зәб. 77:11—15).

5, 6. а) Худа исминиң мәнаси қандақ? ә) Чиқиш 3:13, 14 вә Йәшая 64:8-айәтләргә асасән, Йәһва Худа Өз мәхситини қандақ болғузалайду?

⁵ Биз Худа исминиң мәнаси тоғрилиқ немә билимиз? Көплигән алимлар Худаниң исминиң мәнаси «У болғузиду» дегәнни билдүридиғанлиғиға қошулиду. Бу чүшәнчә Униң ирадисини орунлашқа һечнәрсә тосалғулуқ қилалмайду вә һәрқандақ вәзийәтләрдә У халиғинини қилалайду дегәнләрни есимизгә салиду. У мәхситини қандақ әмәлгә ашуриду?

⁶ Йәһва Худа Өз мәхситини әмәлгә ашуруш үчүн ким болушқа тоғра кәлсә, шу болалайду (Чиқиш 3:13, 14ни оқуң). Әдәбиятлиримиз Худаниң ким екәнлиги тоғрисида ойлишимиз керәклигини бизниң есимизгә салиду. Йәһва Худа намукәммәл инсанларниң Униңға хизмәт қилиши вә Униң ирадисини орунлиши үчүн уларниң ким болушиға тоғра кәлсә, уларни шу болғузалайду (Йәшая 64:8ни оқуңc). Шундақ усуллар билән Йәһва Өз мәхситини әмәлгә ашуриду вә Униңға һечнемә тосалғулуқ қилалмайду (Йәшая 46:10, 11).

7. Асмандики Атимизға болған миннәтдарлиғимизни қандақ ашуралаймиз?

⁷ Асмандики Атимиз биз үчүн немә қилғанлиғи вә бизгә Униң ирадисини орунлашқа ярдәм бәргәнлиги тоғрилиқ пикир қилиш Униңға болған миннәтдарлиғимизни ашуралаймиз. Мәсилән, У яратқан әҗайип нәрсиләр тоғрисида ойлисақ, Униң биз үчүн қилған һәммә ишлири көңлүмизни қаттиқ һаяҗанға толдуриду (Зәб. 8:3, 4). Биз Йәһваниң Униң ирадисини орунлинишимизға ярдәм бәргәнлиги һәққидә ойлисақ, Униңға болған һөрмитимиз техиму ашиду. Йәһва Худаниң исми һәқиқәтән бәкму һәйвәтлик. Бу исим Асмандики Атимиз ким, У немә ишларни қилған вә немә ишларни қилиду, дегәнләрниң һәммисини өз ичигә алиду (Зәб. 89:7, 8).

«ЙӘҺВАНИҢ ИСМИНИ ҖАКАЛАЙМӘН»

8. Қанун шәрһи 32:2, 3-айәтләр Йәһва Худаниң Өз исмиға қандақ көзқарашта екәнлигини көрсәткән?

⁸ Исраиллар Вәдә қилинған зиминға кириш алдида, Йәһва Худа Өзи Мусаға нахша сөзлирини үгәткән (Қ. шәр. 31:19). У бу нахша сөзлирини адәмләргә үгәткән (Қанун шәрһи 32:2, 3ни оқуң). Бу шеир һәққидә ойлансақ, Йәһваниң исми шунчә бәк муқәддәс болсиму, У Өз исмини йошурушини халимайдиғанлиғини ениқ көрүп йетәләймиз. Тәңри Йәһва Өз исмини барчә инсан вә пәриштиләрниң билишини халайду. Мусаниң бу нахшида Худаниң исми һәққидә үгәткәнлирини аңлаш исраиллар үчүн немә дегән шан-шәрәп-һә! Мусаниң тәлимлири худди сим-сим ямғур өсүмлүкләрниң өсүшигә ярдәм бәргәндәк, уларниң етиқадини күчәйткән вә уларни илһамландурған. Бизму Мусаға охшаш тәлим бериватимизму?

9. Йәһваниң исминиң муқәддәс қилишиға һәссимизни қандақ қошалаймиз?

⁹ Өйму-өй яки аммивий орунларда вәз қилғанда, Муқәддәс китаптин Худаниң исмини адәмләргә көрситәләймиз. Уларға Йәһва Худани мәдһийиләйдиған әҗайип әдәбиятларни, видеоларни вә торбетимиздики мәлуматларни көрситәләймиз. Ишта, мәктәптә, сәяһәт қилғанда, пурсәт тепип кишиләргә көйүмчан Атимиз Йәһва вә У қандақ Худа екәнлиги һәққидә ейталаймиз. Адәмләргә Яратқучимизниң келәчәктә инсанийәт вә йәр йүзи үчүн қилидиған әҗайип ишлири тоғрисида ейталаймиз. Йәһваниң бизни бәкму яхши көридиғанлиғини аңлиғанда, улар үчүн йеңилиқ болуши мүмкин. Башқиларға көйүмчан Атимиз тоғрисида һәқиқәтни ейтсақ, Униң исминиң муқәддәс қилишиға өз һәссимизни қошумиз. Биз адәмләрниң Худа тоғрисида илгири үгинип кәлгән тәлимлириниң сахтилиғини чүшинип йетишигә ярдәм берип, Униңға қилинған төһмәтни йоққа чиқиралаймиз. Биз Муқәддәс китаптин уларниң көңлини қанаәт тапқузидиған вә илһам тәсәлли беридиған тәлимләрни бериватимиз (Йәшая 65:13, 14).

10. Немә үчүн адәмләргә пәқәт Худаниң қанунлирини үгитипла қоймаслиғимиз керәк?

¹⁰ Адәмләр билән Муқәддәс китап тәтқиқ үгинишни өткүзгәндә, уларниң Йәһваниң исмини билишигә вә ишлитишигә ярдәм берәләймиз. Йәнә уларға Худаниң исмини толуқ чүшинишкә ярдәм беришни халаймиз. Әгәр биз пәқәт көрсәтмиләр, әхлақ-өлчәмләрни вә қаидә-түзүмләрни көрситип қойсақла, көзлигән мәхсәткә йетәләймизму? Яхши оқуғучи Худа қанунлири һәққидә үгинип, һәтта уларға қайил болуши мүмкин. Бирақ у Йәһва Худани яхши көргәчкә, Униңға итаәт қиламду? Есиңиздә болсунки, Һава ана Худаниң қанунини билгән, амма қанунни чиқарған Атини яхши көрмигән. Адәм атиму шундақ қилған (Ярит. 3:1—6). Шуңа биз адәмләргә Худаниң һәққаний тәләплири вә өлчәм-қаидилирини үгитипла қоймай, техиму көпирәк ишларни қилишимиз керәк.

11. Үгәнгүчиләргә Қанун чиқарғучини яхши көрүшкә қандақ үгәтсәк болиду?

¹¹ Йәһва Худаниң тәләплири вә өлчәм-қаидилири һәрдайим биз үчүн пайдилиқтур (Зәб. 119:97, 111, 112). Үгәнгүчиләр шу қанунларни Йәһва Худа бизни яхши көргәнликтин бәргәнлигини чүшәнмисә, қанунларниң пайдисини көрәлмәслиги мүмкин. Шуңа улардин мундақ соал сорисақ болиду: «Немә үчүн Худа Өз хизмәтчилиридин буни қилишни тәләп қилиду яки уни қилмаслиққа буйрийду? Бу Униң қандақ Шәхс екәнлигини көрситиду?» Әгәр биз үгәнгүчиләрниң Йәһва Худа тоғрисида ойлишиға һәм Униң Улуқ исмини яхши көрүшигә ярдәм бәрсәк, уларниң қәлбигә тәсир қилишимиз мүмкин. Бәлким, шу Қанунни чиқарғучиниму яхши көрәләйду (Зәб. 119:68). Шу чағда уларниң иман-етиқади күчийиду вә дуч келидиған синақларға бәрдашлиқ беришигә ярдәм берәләймиз (Кор. 1-х. 3:12—15).

БИЗ БОЛСАҚ ӘБӘДИЛ-ӘБӘТ ХУДАЙИМИЗ ЙӘҺВАНИҢ ИСМИ БИЛӘН МАҢИМИЗ

12. Қандақ әһвалда Давут өз қәлбини пүтүн сақлалмиған вә нәтиҗидә немә болған?

¹² Давут падишаниң Зәбур 86:11дики (КТ) «қәлбимни пүтүн қилғайсән» дегән сөзлири бәк муһим. Көңүлниң бәк асан бөлүнидиғанлиғини Давут өзи бешидин өткүзгән. Бир күни у өгүзидә туруп, башқа бириниң аяли жуюнуватқанлиғини көрүп қалған еди. Дәл шу чағда, Давутниң көңли бөлүнүп кәткәнму? У Йәһва Худаниң «хошнаңниң аялиға,... көзүңни қизартма», дегән әмирни билгән (Чиқ. 20:17, ЙД). Давут шуни билип туруп, у аялдин көзни үзмәй қаравәргән. Униң қәлби иккигә бөлүнүп, бир тәрәптә әшу аял Батшебани халиса, башқа тәрәптә Йәһва Худани хурсән қилишни халиған. Гәрчә у Йәһва Худани яхши көрүп, Униңдин әймәнгән болсиму, у өзиниң һәвәсигә берилип кәткән. Шу әһвалда у яман йолға кирип кәткән. Бу Йәһваниң исмиға дағ кәлтүргән. Йәнә у бегуна адәмләргә, һәтта өз аилисидикиләргә еғир зиян-зәһмәтләрни кәлтүрди (Сам. 2-яз. 11:1—5, 14—17; 12:7—12).

13. Давутниң қәлби қайтидин пүтүн болғанлиғини нәдин билимиз?

¹³ Йәһва Худа Давутни әдәпләп, тәрбийә бәргән. Кейин Давутниң Худа билән мунасивити әслигә кәлгән (Сам. 2-яз. 12:13; Зәб. 51:2—4, 17). Давут униң көңли бөлүнгән сәвәплик, қандақ азап чәккәнлигини вә қийинчилиқларни баштин кәчүргәнлигини әстин чиқармиған. Зәбур 86:11дики (КТ) Давутниң сөзлирини йәнә бир қетим оқайли: «Қәлбимни пүтүн қилғайсән». Йәһва Давутниң қәлбини пүтүн қилишиға ярдәм бәргәнму? Һә-ә, ярдәм бәргән. Кейинирәк Йәһва Давутниң көңли Униңға мутләқ садиқ болғанлиғини ейтқан (Пад. 1-яз. 11:4; 15:3).

14. Өзүмиздин қандақ соал соришимиз керәк вә немә үчүн?

¹⁴ Давутниң мисали бизгә тәсәлли бериду вә агаһландуриду. Давутниң өткүзгән еғир гунаси, Худаниң бүгүнки хизмәтчилири үчүн бир агаһландуруш. Биз йеқинда яки узун жиллар илгири Худаға хизмәт қилишни башлиған болайли, өзүмиздин мундақ соал соришимиз керәк: «Мән Шәйтанниң мениң қәлбимни бөлүветишигә қарши туралаймәнму?»

15. Тәнниң һәвәслирини қозғайдиған рәсимләрни көрүп қалғанда, Худадин әйминиш бизни қандақ қоғдайду?

¹⁵ Мәсилән, сиз телевизорда яки торбәттә тәнниң һәвәслирини қозғайдиған сүрәтләрни көрүп қалдиңиз дәйли. Бәлким, шу сүрәт яки фильм шәһванийлиқни тәрғип қилидиған мәзмунда әмәсқу, дәп ойлишиңиз мүмкин. Бирақ Шәйтан бу арқилиқ бизниң қәлбимизни иккигә бөлүвәтмәкчи әмәсму? (Кор. 2-х. 2:11). Бу сүрәт худди чоң көтәкләрни йеришта ишлитидиған кичик төмүр шинаға яки панаға охшайду. Шинаниң инчикә вә өткүр учи көтәккә қеқилиду. Кейин шинани уруп, чоңқур қаққансири, көтәк иккигә бөлүнүп кетиду. Тәнниң һәвәслирини қозғайдиған сүрәтләр әшу шинаниң өткүр учиға охшайду. Бешида уларға қарашниң һеч хәтири йоқтәк көрүнсиму, вақит өткәнсири адәмни Худаға қарши гуна қилишқа үндиши мүмкин. Шуңа намувапиқ һәрқандақ нәрсиниң қәлбиңизгә киривелишигә йол бәрмәң! Худаниң исмидин әйминиш үчүн қәлбиңизни пүтүн сақлаң!

16. Езиқтурушларға дуч кәлгәндә, өзүңизгә қандақ соалларни қоюшиңиз керәк?

¹⁶ Шәйтан бизни езиқтуруш үчүн һәвәсләрни қозғайдиған сүрәтләрдин ташқири, башқиму нәрсиләрни қоллиниду. Униңға қандақ инкас қайтуримиз? Бу унчә бәк яман әмәс дәп ойлаш асан. Мәсилән, биз мундақ ойлишимиз мүмкин: «Мени мошу ишларни қилғиним үчүн җамаәттин чиқармайду, шуңа бу анчә еғир хаталиқ әмәсқу». Бундақ ойлаш бәкму хата. Буниң орниға өзүмизгә мундақ соалларни қойсақ болиду: «Шәйтан мошу езиқтуруш арқилиқ мениң жүригимни иккигә бөлүветишкә тиришиватамду? Натоғра һәвәсләргә берилсәм, Йәһва Худаниң исмиға дағ тәккүзимәнму? Бу иш-һәрикәтләр мени Худаға йеқинлаштурамду яки Униңдин жирақлаштурамду?» Мошуниңға охшаш соаллар һәққидә чоңқур ойлиниң. Өзүңизни алдимай, соалларға чин жүрәктин җавап бериш үчүн даналиқ сорап дуа қилиң (Яқуп 1:5). Бундақ иш тутуш сизни һимайә қилиду вә сизниң езиқтурушларни Әйсадәк қәтъий рәт қилишиңизға ярдәм бериду. У өз вақтида: «Йоқал, Шәйтан!»— дегән еди (Мәт. 4:10).

17. Немә үчүн иккигә бөлүнгән жүрәк бир тийинға яримайду? Мисал кәлтүрүң.

¹⁷ Иккигә бөлүнгән жүрәк бир тийинға яримайду. Бир спорт командисиниң бир-бири билән чиқишалмайдиған әзалири бар дәйли. Уларниң бәзилири өзиниңла шан-шөһрәткә еришишини халайду. Башқилири болса, қаидә бойичә ойнашни халимайду, йәнә бирлири тренерни һөрмәйтлимәйду. Шундақ командиниң ғәлибә қазиниши қийин. Әксинчә, иттипақлашқан командиниң ғәлибә қазиниши еһтимал чоң. Әгәр ой-хияллириңиз, хаһишлириңиз вә һис-туйғулириңиз бир йәрдин чиқса вә Йәһва Худаниң тәләплиригә мас кәлсә, қәлбиңиз худди әшу иттипақлашқан командиға охшаш болиду. Есиңиздә болсунки, Шәйтан сизниң қәлбиңизни бөлүвәтмәкчи. У сизниң ой-пикирлириңизниң, арзу-һәвәслириңизниң вә һис-туйғулириңизниң Йәһва Худаниң өлчәмлиригә қарши болушини халайду. Лекин Йәһва Худаға хизмәт қилиш үчүн қәлбиңиз пүтүн болуши керәк (Мәт. 22:36—38). Шәйтанниң қәлбиңизни бөлүветишигә һәргизму йол бәрмәң!

18. Мика 4:5-айәттики сөзләргә асасән, немә қилишқа бәл бағлидиңиз?

¹⁸ Худди Давуқа охшаш Йәһва Худаға дуа қилиң: «Исмиңдин әйминишим үчүн, қәлбимни пүтүн қилғайсән». Мошу дуаниң сөзлиригә лайиқ һаят кәчүрүш үчүн қолуңиздин кәлгәнниң һәммисини қилиң. Һәр күни кичик яки чоң қарарларни қилғиниңизда Йәһва Худаниң муқәддәс исмидин әйминидиғанлиғиңиз көрүнсун. Шундақ қилсиңиз, Йәһва гувачиси сүпитидә сиз Униң исмиға дағ кәлтүрүштин сақлиналайсиз (Пәнд н. 27:11). Шундила, һәммимиз Мика пәйғәмбәргә охшаш мундақ ейталаймиз: «Биз болсақ әбәдил-әбәт Худайимиз Йәһваниң исми билән маңимиз» (Мика 4:5, ЙД).