Үгәнгүчигә Худаниң хизмәтчиси болушқа ярдәм бериң

1, 2. а) Немишкә бәзибир Муқәддәс китап үгәнгүчилири Йәһва Худа тәрәптә туруштин иккилиниду? ә) Бу мақалидә немини көрүп чиқимиз?

ЙӘҺВА ГУВАЧИСИ болуштин авал сиздә қорқунуч болғанму? Бәлким, хизмәтдашлириңиз, достлириңиз яки уруқ-туққанлириңиз қарши чиқиду дәп қорққансиз. Йә болмиса, Йәһва Худаниң қаидә-өлчәмлири бойичә яшаш қийин дәп ойлиғансиз. Шундақ болса, сиз Йәһва Худаға хизмәт қилишни башлашқа қорқидиған Муқәддәс китап үгәнгүчисини яхши чүшинәләйсиз.

² Бу қорқунуч Йәһва Худаға хизмәт қилишқа кашила болидиғанлиғини Әйса яхши чүшәнгән (Мәт. 13:20—22). Лекин Әйса униң шагирти болушқа иккиләнгәнләрдин үмүт үзмигән. Әйса шагиртлириға гумани бар адәмләргә қандақ ярдәм беришни үгәткән. У шагиртлириға 1) роһий тәрәптин өсүшкә, 2) Йәһва Худани чин жүригидин яхши көрүшкә, 3) һаятида немини биринчи орунға қоюшни билишкә вә 4) қийинчилиқларға қарши турушқа ярдәм бәргән. Биз Әйса Мәсиһниң тәлим бериш усулидин немигә үгәнсәк болиду? «Мәңгү шат-хорам яшаң!» китавиниң ярдими билән үгәнгүчигә Йәһва Худа тәрәптә турушқа қандақ ярдәм берәләймиз?

РОҺИЙ ТӘРӘПТИН ӨСҮШКӘ НЕМӘ ТОСАЛҒУ БОЛУВАТҚАНЛИҒИНИ ЕНИҚЛАШҚА ЯРДӘМ БЕРИҢ

3. Никодимға Әйсаниң шагирти болушиға немә тосалғу болған?

³ Никодим йәһудий дин рәһбәрлириниң бири болғанлиқтин, униңға Әйсаниң шагирти болуш интайин қийин болған. Әйса алтә ай вәз қилғандин кейин, Никодим уни Худа әвәткәнлигини чүшәнгән (Йоһ. 3:1, 2). Бирақ «йәһудийлардин қорққанлиғи үчүн» у Әйсаниң қешиға қараңғу чүшкәндә келәтти (Йоһ. 7:13; 12:42). У Әйсаниң шагирти болсам, һоқуқтин вә байлиқтин айрилип қалимән дәп ойлиған болуши мүмкинa.

4. Әйса Мәсиһ Никодимға қандақ ярдәм бәргән?

⁴ Никодим Тәврат қанунини яхши билгән болсиму, Йәһва Худа униңдин немә тәләп қилғанлиғини чүшәнмигән. Әйса Мәсиһ униңға қандақ ярдәм бәргән? Әйса өз вақтини сәрип қилип, һәтта униң билән кечидә учришишқа тәйяр болған. Шундақла Әйса өзиниң шагирти болуш үчүн Никодимға немә қилиш керәклигини ениқ чүшәндүргән: у гуналириға товва қилип, чөмдүрүлүштин өтүши вә Худаниң Оғлиға ишиниши керәк еди (Йоһ. 3:5, 14—21).

5. Үгәнгүчиниң Йәһва Худаға хизмәт қилишиға немә тосалғу болуватқанлиғини чүшинишигә қандақ ярдәм берәләйсиз?

⁵ Гәрчә үгәнгүчи Муқәддәс китапни яхши билсиму, биз униң Йәһва Худаға хизмәт қилишиға немә тосалғу болуватқанлиғини чүшинишигә ярдәм берәләймиз. Мәсилән, униң иши көп вақит алидиғанду яки туққанлири униң Йәһва гувачиси болушиға қаршиду. Шуңа Әйсадин үлгә елип, үгәнгүчиңизгә ярдәм бериш үчүн вақит чиқириң. Уни биллә сәйлә қилип яки бир йәрдә олтирип параңлишишқа чақирсиңиз болиду. Биллә вақит өткүзгәндә, у сизгә һаяти вә қийинчилиқлири тоғрилиқ көпирәк ейтип беридиғанду. Шундақла униңға һаятида қандақ өзгиришләрни қилалайдиғанлиғини көрситип бәрсиңиз болиду. Лекин у мошу өзгиришләрни сизни әмәс, Йәһва Худани хошал қилиш үчүн қилиши керәклигини есигә селиң.

6. Үгәнгүчиниң Муқәддәс китаптин үгәнгәнлирини әмәлийәттә қоллинишиға қандақ ярдәм берәләйсиз? (Коринтлиқларға 1-хәт 16:13)

⁶ Үгәнгүчи Йәһваниң униңға тоғра ишларни қилишқа ярдәм беридиғанлиғиға ишәнгәндә, у үгәнгәнлирини һаятида қоллиналайду (Коринтлиқларға 1-хәт 16:13ни оқуң). Сизни мәктәп муәллими билән селиштурушқа болиду. Сиз қайси муәллимни көпирәк яқтураттиңиз? Билим берипла қоймай, үгәнгәнлириңизни қилиш қолуңиздин келидиғанлиғиға ишәндүргән муәллимни яқтураттиңиз, шундақ әмәсму? Шуниңға охшаш, яхши тәлим бәргүчи адәмгә пәқәт Йәһва Худаниң тәләплирини үгитипла қоймай, Униң ярдими билән у һаятини өзгәртәләйдиғанлиғиға ишәндүриду.

ҮГӘНГҮЧИНИҢ ЙӘҺВАНИ ЧИН ЖҮРӘКТИН ЯХШИ КӨРҮШИГӘ ЯРДӘМ БЕРИҢ

7. Әйса Мәсиһ тиңшиғучилириниң Йәһва Худани техиму яхши көрүшигә қандақ ярдәм бәргән?

⁷ Йәһва Худани чин жүрәктин яхши көридиған киши үгәнгәнлиригә әмәл қилишни халайду. Әйса Мәсиһ буни билип, шагиртлириға Йәһвани техиму яхши көрүшкә ярдәм беридиған нәрсиләрни үгәткән. Мәсилән, у Йәһвани балилириға яхши нәрсини беридиған дада билән селиштурған (Мәт. 7:9—11). Бәлким, Әйсани тиңшиған бәзи адәмләрниң көйүмчан дадиси болмиғанду. Әйса интайин көп яман нәрсиләрни қилған оғлини қучақ йейип қарши алған ата тоғрилиқ мисални ейтип бәргәндә, улар қандақ һис-туйғуда болғанлиғини тәсәввур қилип көрүң. У тиңшиғучилириға Йәһваниң уларни қанчилик яхши көридиғанлиғини вә уларға ярдәм беришни халайдиғанлиғини чүшәндүргән (Луқа 15:20—24).

8. Үгәнгүчиниң Йәһва Худаға болған меһир-муһәббитини күчәйтишигә қандақ ярдәм берәләйсиз?

⁸ Сизму дәрис давамида Йәһваниң есил пәзиләтлири тоғрилиқ пат-пат сөзләп, үгәнгүчиниң Униңға болған меһир-муһәббитини күчәйтишигә ярдәм берәләйсиз. Һәр үгиништә оқуп-үгәнгәнлири Йәһваниң меһир-муһәббитини қандақ көрситидиғанлиғини тәкитләң. Әйсаниң төләм қурбанлиғи тоғрилиқ сөзләшкәндә, адәмгә төләмниң униң үчүн қандақ пайдиси бар екәнлигини көрүшкә ярдәм бериң (Рим. 5:8; Йоһ. 1-х. 4:10). Үгәнгүчи Йәһваниң униңға қандақ меһир-муһәббәт көрсәткәнлигини чүшәнгәндә, Худани техиму қаттиқ яхши көриду (Гал. 2:20).

9. Майклниң һаятини өзгәртишигә немә ярдәм бәрди?

⁹ Индонезиядә яшайдиған Майкл кичигидин һәқиқәтни билсиму, чөмдүрүлүштин өтмигән еди. Он сәккиз йешида у ишләш үчүн башқа дөләткә кетип, андин өйлиниш үчүн Индонезиягә қайтип кәлди. Амма кейин у аяли билән қизини қалдуруп, қайтидин чәт әлгә кәтти. Шу вақит давамида аяли билән қизи Муқәддәс китап үгинишини башлап, үгәнгәнлирини әмәлийәттә қолланди. Аписи қайтиш болғанда, Майкл дадисиға қараш үчүн вәтинигә қайтти вә Муқәддәс китапни үгинишкә келишти. «Мәңгү шат-хорам яшаң!» китавиниң 27-савиғидики «Чоңқурирақ қезиң» дегән рамкидики мәлумат Майклға қаттиқ тәсир қилди. У Йәһва Худаниң Оғлиниң қаттиқ азап чәккәнлигини көргәндә қандақ һис-туйғуда болғанлиғи тоғрилиқ ойлинип, көзигә яш алди. Майкл Йәһва Худа билән Әйса Мәсиһниң уни қанчилик яхши көридиғанлиғини чүшинип йәткәндә, жүриги миннәтдарлиққа толуп, у һаятини өзгәртти вә кейинирәк чөмдүрүлүштин өтти.

ҮГӘНГҮЧИГӘ ЙӘҺВА ХУДАНИ ҺАЯТИДА БИРИНЧИ ОРУНҒА ҚОЮШНИ ҮГИТИҢ

10. Әйса шагиртлириға Йәһва Худаға көпирәк хизмәт қилиш үчүн һаятини өзгәртишкә қандақ ярдәм бәргән? (Луқа 5:5—11) (Рәсимгиму қараң.)

¹⁰ Тунҗа шагиртлар Әйсаниң Мәсиһ екәнлигини дәрру чүшәнгән. Лекин улар Йәһва Худаға хизмәт қилиш үчүн қизғин вәз қилиш керәклигини техи чүшәнмигән еди. Әйса Петрус билән Әндәрни униң кәйнидин әгишишкә чақирғанда, улар аллиқачан униң шагиртлири болған еди (Мәт. 4:18, 19). Улар Яқуп вә Йоһан билән биллә белиқчи болуп, ишлири илгири басқан (Марк 1:16—20). Петрус билән Әндәр белиқчилиқни ташлиғанда, аилилирини қандақ асрайдиғанлиғини алдин-ала ойлаштуруп қойған. Улар немә сәвәптин вәз қилиш иши көп пул тепиштин муһимирақ дәп ойлиған? Луқа китавида йезилғандәк, Әйсаниң бир мөҗүзиси уларни Йәһваниң Өз садиқ хизмәтчилиригә ғәмхорлуқ қилидиғанлиғиға ишәндүргән (Луқа 5:5—11ни оқуң).

11. Үгәнгүчиниң ишәнчисини күчәйтиш үчүн униңға немиләрни ейтип берәләймиз?

¹¹ Биз Әйсадәк мөҗүзиләрни қилалмисақму, үгәнгүчигә Йәһва Худа Уни асасий орунға қойған кишиләрни қандақ қоллап-қувәтләйдиғанлиғини ейтип берәләймиз. Мәсилән, сиз учришишларға беришни башлиғанда Йәһваниң сизгә қандақ ярдәм бәргәнлиги есиңиздиму? Бәлким, башлиғиңизға учришиш күнлири немә үчүн қошумчә ишләлмәйдиғанлиғиңизни чүшәндүрүшкә тоғра кәлгәнду. Үгәнгүчиңизгә Йәһва Худаниң Уни һаятиңизда биринчи орунға қоюшқа қандақ ярдәм бәргәнлигини вә бу ишәнчиңизни қандақ күчәйткәнлигини ейтип бериң.

12. а) Үгинишкә һәр түрлүк қериндашларни чақириш немә үчүн пайдилиқ? ә) Видеоларниң ярдими билән үгәнгүчигә Йәһва Худани һаятида биринчи орунға қоюшқа қандақ ярдәм берәләйсиз? Мисал кәлтүрүң.

¹² Шундақла башқа қериндашлар һаятида Худаға хизмәт қилишни биринчи орунға қоюш үчүн қандақ өзгиришләрни қилғанлиғини үгәнгүчиңизгә ейтип бәрсә яхши болиду. Шуңа үгинишкә һәр түрлүк қериндашларни чақиришқа тиришиң. Улардин һәқиқәтни қандақ тонуғанлиғини вә Йәһва Худаға хизмәт қилишни һаятида биринчи орунға қандақ қойғанлиғини сорисиңиз болиду. Буниңдин башқа, «Мәңгү шат-хорам яшаң!» китавиниң «Чоңқурирақ қезиң» яки «Издинип көрүң» дегән қисмидики видеоларни үгәнгүчи билән көрүп чиқиң. Мәсилән, 37-дәрисни үгиниватқанда, «Йәһва бизгә ғәмхорлуқ қилиду» дегән видеодики принципларға диққәт ағдуруң.

ҮГӘНГҮЧИГӘ ҚАРШИЛИҚНИ ЙЕҢИШКӘ ЯРДӘМ БЕРИҢ

13. Әйса шагиртлириниң қаршилиққа тәйяр болушиға қандақ ярдәм бәргән?

¹³ Әйса шагиртлирини агаһландуруп, улар башқиларниң, һәтта уруқ-туққанлириниң қаршилиғиға дуч келидиғанлиғини қайта-қайта ейтқан (Мәт. 5:11; 10:22, 36). Әйсаниң өлтүрүлүшигә аз вақит қалғанда, у шагиртлириға дүшмәнлири уларни Йәһва Худаға хизмәт қилғанлиғи үчүн өлтүрүши мүмкинлигини ейтқан (Мәт. 24:9; Йоһ. 15:20; 16:2). У уларни еһтиятчанлиқ билән вәз қилишқа дәвәт қилған. Әйса уларни қарши чиққанлар билән талаш-тартиш қилмай, ойлинип сөзләшкә вә һәрикәт қилишқа дәвәт қилған.

14. Үгәнгүчиләрни қаршилиқларға қандақ тәйярлисақ болиду? (Тимотийға 2-хәт 3:12)

¹⁴ Әйсаға охшаш, бизму үгәнгүчигә бәзи хизмәтдашлири, достлири яки уруқ-туққанлири униңға қандақ қаршилиқ билдүрүши мүмкинлигини ейтсақ болиду (Тимотийға 2-хәт 3:12ни оқуң). У һазир Муқәддәс китап өлчәмлири бойичә яшаватқанлиғи үчүн хизмәтдашлири уни заңлиқ қилиши мүмкин. Үгәнгүчиниң уруқ-туққанлири болса, униң Муқәддәс китаптин үгәнгәнлири билән келишмәй, униңға бесим қилиши еһтимал. Үгәнгүчини қаршилиқ тоғрилиқ алдин-ала агаһландурсақ яхши. Шу чағда у қаршилиққа дуч кәлгәндә һәйран қалмайду вә немә қилиш яки ейтишни билиду.

15. Үгәнгүчи аилисиниң қаршилиғиға дуч кәлгәндә униңға қандақ ярдәм берәләйсиз?

¹⁵ Үгәнгүчиңиз аилисиниң қаршилиғиға дуч кәлсә, улар униң Муқәддәс китапни үгиниватқанлиғиға немә сәвәптин аччиқлиниватқанлиғини чүшинишигә ярдәм бериң. Бәлким, туққанлири Йәһва гувачилири уни алдаватиду яки улар яман адәмләр дәп ойлайдиғанду. Һәтта Әйсаниң аилисиму униңға қарши чиқип, «у есидин адишипту» дәп ойлиған (Марк 3:21; Йоһ. 7:5). Үгәнгүчини чидамлиқ болуп, аилә әзалири вә башқиларға мулайимлиқ вә меһрибанлиқ билән сөзләшкә үгитиң.

16. Үгәнгүчигә Муқәддәс китап тоғрилиқ мулайимлиқ билән башқиларға ейтип беришкә қандақ ярдәм берәләймиз?

¹⁶ Үгәнгүчиниң уруқ-туққанлири Муқәддәс китапқа қизиқсиму, у уларға билгән мәлуматниң һәммисини бирдин ейтмиса яхши. Чүнки үгәнгүчи үгинивалғанларниң һәммисини ейтип бәрсә, уруқ-туққанлириниң бешини қаймуқтуруп, кейин улар һәқиқәт тоғрилиқ аңлашни халимайдиғанду. Шуңа у үгәнгәнлирини аддий сөз билән чүшәндүрүшкә дәвәт қилиң (Кол. 4:6). Шундақ қилса, бәлким уруқ-туққини Муқәддәс китап тоғрилиқ көпирәк билишни халайдиғанду. У уруқ-туққанлирини jw.org торбетимизгә киришкә дәвәт қилалайду. Шу чағда улар халиған вақтида өзигә қизиқ мәлуматларни оқалайду.

17. Үгәнгүчиниң Йәһва гувачилири тоғрилиқ соалларға җавап беришкә тәйярлинишиға қандақ ярдәм берәләйсиз? (Рәсимгиму қараң.)

¹⁷ Торбетимиздики «Көпчиликни қизиқтуридиған соаллар» дегән бир қатар мақалиләрни қоллинип, үгәнгүчиниң хизмәтдашлири вә уруқ-туққанлириниң соаллириға аддий җавап беришкә тәйярлинишиға ярдәм берәләйсиз (Тим. 2-х. 2:24, 25). «Мәңгү шат-хорам яшаң!» китавиниң һәрбир дәрисниң ахиридики «Бәзиләр мундақ дәйду» дегән рамкини көрүп чиқишни унтумаң. Үгәнгүчини немигә ишинидиғанлиғини өз сөзлири билән чүшәндүрүшкә дәвәт қилиң. Керәк болса, униңға Муқәддәс китаптики һәқиқәтләрни техиму яхши чүшәндүрүшигә ярдәм бериң. Вақит чиқирип үгәнгүчи билән тәйярлиқ қилсиңиз, униңға ишәнчисини қоғдаш асанирақ болиду.

18. Үгәнгүчини вәз ейтқучи болушқа қандақ дәвәт қилалайсиз? (Мәтта 10:27)

¹⁸ Әйса Мәсиһ шагиртлирини хуш хәвәрни әл алдида җакалашқа үндигән (Мәтта 10:27ни оқуң). Үгәнгүчи вәз қилишни башлиғанда, Йәһва Худаниң ярдимини һис қилиду вә Униңға техиму көп тайинишни үгиниду. Шундақ мәхсәт қоюшиға қандақ ярдәм берәләйсиз? Мәхсус вәз ейтиш паалийити орунлаштурулғанда, үгәнгүчини вәз ейтқучи болуш үчүн немә қилиш керәклиги тоғрилиқ ойлинишқа дәвәт қилиң. Униңға шундақ паалийәтләр вақтида вәз қилишни башлаш асанирақ екәнлигини чүшәндүрүң. Үгәнгүчи қоялайдиған йәнә бир мәхсәт — һәптә арилиғидики учришишта тапшуруқлар билән чиқиш. Тапшуруқлар билән чиққанда у Муқәддәс китап тәлимлирини техиму яхширақ чүшәндүрүшкә үгиниду.

ҮГӘНГҮЧИГӘ ИШИНИДИҒАНЛИҒИҢИЗНИ КӨРСИТИҢ

19. Әйса шагиртлириға ишинидиғанлиғини қандақ көрсәткән вә биз уни қандақ үлгә қилалаймиз?

¹⁹ Асманға көтирилиштин авал Әйса шагиртлириға бир күни улар қайтидин биллә болидиғанлиғини ейтқан. Улар Әйса билән биллә асманда болидиғанлиғини чүшәнмигән еди. Әгәшкүчилири һәммисини чүшәнмигән болсиму, Әйса уларниң Йәһва Худани хошал қилишни халайдиғанлиғиға ишәнгән (Йоһ. 14:1—5, 8). У уларниң асманда яшайдиғанлиғини чүшиниши үчүн бираз вақит керәклигини чүшәнгән (Йоһ. 16:12). Әйсадин үлгә елип, бизму үгәнгүчиләргә уларниң Йәһвани хошал қилишқа халайдиғанлиғиға ишәнчимиз камил екәнлигини көрситәйли.

20. Малавидики қериндишимиз үгәнгүчисигә ишәнч қилғанлиғини қандақ көрсәткән?

²⁰ Үгәнгүчиңиз тоғра ишни қилишни халайдиғанлиғиға гуман қилмаң. Малавидики Чифундо қериндишимиз католик динидики Алинафи дегән яш аял билән «Мәңгү шат-хорам яшаң!» китавини тәтқиқ қилишни башлиған. 14-дәрисни муһакимә қилип болғандин кейин Чифундо бутлар тоғрисида немә ойлайдиғанлиғини сориған. Алинафи буниңға хапа болуп: «Бу мениң қарарим»,— дәп җавап бәрди. Буниңдин кейин Чифундо Алинафи үгинишни тохтитиду дәп ойлиған. Лекин қериндишимиз Алинафиниң уни бир вақитта чүшинидиғанлиғиға үмүтини үзмәй, тәтқиқ қилишни чидамлиқ билән давамлаштурған. Бирнәччә айдин кейин Чифундо униң билән 34-дәрисни өтүватқанда мундақ соал қойди: «Һазирғичә Муқәддәс китап вә һәқ Худа Йәһва һәққидә үгиниш сизгә қандақ ярдәм бәрди?» Чифундо Алинафи тоғрилиқ мундақ дегән: «У нурғун яхши нәрсиләрни ейтти. Уларниң бири: “Гувачилар Муқәддәс китапқа зит болған нәрсиләрни қилмайду” ». Буниңдин бираз вақит өтүп, Алинафи бутлирини ташлиғандин кейин чөмдүрүлүштин өтти.

21. Үгәнгүчиниң Йәһва Худаға хизмәт қилишни башлишиға қандақ ярдәм берәләймиз?

²¹ Һәтта Йәһва Худа өстүрүватқан болсиму, бизму үгәнгүчиләрниң роһий җәһәттин өсүшигә өз үлишимизни қошуватимиз (Кор. 1-х. 3:7). Биз пәқәт Худа улардин немиләрни тәләп қилидиғанлиғини үгитипла қоймай, уларниң Йәһвани чин жүригидин яхши көрүшигиму ярдәм беримиз. Шундақла биз уни Худаға болған меһир-муһәббити һаятида биринчи орунда туридиғанлиғини көрситишкә дәвәт қилимиз. Үгәнгүчи қийинчилиқларға дуч кәлгәндә, биз уни Йәһва Худаға тайинишқа үгитимиз. Үгәнгүчиниң Худани хошал қилидиған ишларни қилишни халайдиғанлиғиға ишәнчлик екәнлигини көрсәткинимиздә, униң Йәһва Худаға хизмәт қилишни башлишиға ярдәм берәләймиз.