Адаләтсизликкә дуч кәлгәндә немә қилсақ болиду?

1, 2. Адәмләр адаләтсизликкә дуч кәлгәндә қандақ инкас қайтуриду вә биз немә тоғрилиқ әнсиришимиз мүмкин?

БИЗ адаләтсиз дунияда яшаватимиз. Адәмләр ихтисадий әһвали, җинси, миллити яки ирқи түпәйли адаләтсизликкә учраватиду. Улар тәбиәттики мәсилиләр яки ачкөз вә парихор адәмләр кесиридин азап чекиватиду. Мошу вә башқа адаләтсизликләр һәммимизгә тәсир қилмақта.

² Нурғун адәмләр бу дуниядики адаләтсизликни көрүп аччиқланмақта. Бу һәйран қаларлиқ әмәс, чүнки һәммимиз өзүмизни бехәтәр һис қилишни һәм бизгә адил муамилә қилинишни халаймиз. Шуниң үчүн бәзиләр мәсилини өз қоли билән һәл қилишқа уруниду. Улар имзаларни жиғишқа қатнишиду, нәмайишларға чиқиду яки «қийинчилиқларни һәл қилимән» дәп вәдә бәргән сәясәтчигә аваз бериду. Амма Худаниң хизмәтчилири сүпитидә биз бу дуниядин әмәс вә һәммә адаләтсизликни Худаниң Падишалиғи йоқ қилидиғанлиғиға ишинимиз (Йоһ. 17:16). Шундақ болсиму, адәмләрниң башқиларға адаләтсиз муамилә қилғанлиғини көргәндә, көңлүмиз йерим болиду, һәтта аччиқлинишимиз мүмкин. Бәлким, сиз: «Мән буниңға қандақ қаришим керәк? Һазир адаләтсизликни йоқ қилиш үчүн бирнәрсә қилалаймәнму?»— дәп әнсирәйдиғансиз. Бу соалларға җавап елиш үчүн, авал Йәһва Худа вә Әйса Мәсиһниң адаләтсизликкә қандақ қарайдиғанлиғини көрүп чиқайли.

ЙӘҺВА ХУДА ВӘ ӘЙСА МӘСИҺ АДАЛӘТСИЗЛИКТИН НӘПРӘТЛИНИДУ

3. Немә үчүн адаләтсизликни көргәндә чидап туралмаймиз? (Йәшая 5:7)

³ Муқәддәс китапта адаләтсизликни көргәндә чидап туралмайдиғанлиғимизниң сәвәви чүшәндүрүлгән. Биз Худаниң образида яритилған. Йәһва «һәқиқәт вә адиллиқни сөйиду» (Зәб. 33:5; Ярит. 1:26). Худайимиз һечкимгә адаләтсиз муамилә қилмайду вә инсанларниңму бир-биригә адаләтсизлик қилишини халимайду (Қ. шәр. 32:3, 4; Мика 6:8; Зәк. 7:9). Мәсилән, Йәшая пәйғәмбәрниң заманида бәзи исраиллар жутдашлириниң адаләтсиз муамилисигә учриғанда, Худа уларниң налә-пәрядлирини аңлиған (Йәшая 5:7ни оқуң). Йәһва Худа Униң Қануниға қайта-қайта бойсунмай, башқиларни хорлиған кишиләрни җазалиған (Йәшая 5:5, 13).

4. Әйса бирсиниң адаләтсиз муамилигә учриғанлиғиға қандақ қариған? (Рәсимгиму қараң.)

⁴ Йәһва Худаға охшаш, Әйсаму адаләтни яхши көрүп, адаләтсизликтин нәпрәтлиниду. Бир күни Әйса қоли қуруп кәткән кишини көргән вә униңға ич ағритип, қолини сақайтқан. Лекин буни көргән таш жүрәк дин рәһбәрлири қаттиқ ғәзәпләнгән. Чүнки уларниң ейтишичә, Әйса Шаббат күни тоғрилиқ қанунни бузған. Амма бағри таш пәрисийләрниң узақ вақит азапланған кишиниң сақайғанлиғи билән кари болмиған. Әйса буниңға қандақ қариған? У «уларниң жүрәк-бағрилириниң берәһимлигигә қаттиқ хапа» болди (Марк 3:1—6).

5. Адаләтсизликни көрүп аччиқлансақ, немә қилишимиз керәк?

⁵ Йәһва Худаму, Әйса Мәсиһму адәмләрниң башқиларға адаләтсиз муамилә қилғанлиғини көргәндә аччиқлиниду (Әфәс. 4:26). Бизниңму шундақ һис-туйғуда болушимиз тәбиий әһвал. Бирақ ғәзивимиз орунлуқ болсиму, адаләтсизликни йоқ қилиш қолумиздин кәлмәйдиғанлиғини унтумаслиғимиз керәк. Әмәлийәттә, узақ аччиқлинип жүрсәк, ағрип қелишимиз яки чүшкүнлүккә чүшүшимиз мүмкин (Зәб. 37:1, 8; Яқуп 1:20). Шуңа өзүмиз яки башқа бирси адаләтсиз муамилигә дуч кәлсә, немә қилишимиз керәк? Әйсадин үлгә алайли.

ӘЙСА АДАЛӘТСИЗЛИККӘ ҚАНДАҚ ИНКАС ҚАЙТУРҒАН?

6. Әйсаниң заманида адәмләр қандақ адаләтсизликкә дуч кәлгән? (Рәсимгиму қараң.)

⁶ Әйса Мәсиһ нурғун кишиләрниң адаләтсизликкә учриғанлиғини көргән. Мәсилән, дин рәһбәрлири нурғун қаидиләрни ойлап чиқирип, адәмләрниң һаятини еғирлаштурған (Мәт. 23:2—4). Рим һөкүмитиму хәлиққә рәһимсиз муамилә қилған. Нурғун исраиллар мустәқил болушқа зар болған. Шуңа бәзилири, мәсилән зилотлар, римлиқларға қарши күрәш қилған. Лекин Әйса Мәсиһ Рим һөкүмитини ағдурмақчи болған һечқандақ топни қоллимиған. Хәлиқ уни падиша қилмақчи болғанлиғини билгәндә, Әйса шу йәрдин кетип қалған (Йоһ. 6:15).

7, 8. Әйса йәрдә болғанда немишкә адәмләрниң қийинчилиқлирини йоқ қилишқа тиришмиған? (Йоһан 18:36)

⁷ Әйса Мәсиһ адаләтсизликни йоқ қилиш үчүн сәясәткә арилашмиған. Немә үчүн? У һечбир инсанниң башқа адәмләрни башқуруш һоқуқиму, қудритиму йоқ екәнлигини билгән (Зәб. 146:3; Йәр. 10:23). Чүнки инсанлар азап-оқубәтләрниң түп йилтизини елип ташлалмайду. Бу дуния Шәйтан Иблисниң қол астида. У рәһимсиз болғанлиқтин, бу дуниядики нурғун адәмләрму уни доримақта (Йоһ. 8:44; Әфәс. 2:2). Намукәммәллик сәвәвидин дайим адил иш қилалмиғачқа, һәтта әң яхши вә ақ нийәтлик һөкүмранму адәмләрниң һәммә қийинчилиқлирини йоқ қилалмайду (Вәз 7:20).

⁸ Әйса дуниядики адаләтсизликниң түп йилтизини пәқәт Худа Падишалиғи қомуруп ташлалайдиғанлиғини чүшәнгән. Шу сәвәптин, у бар вақти вә күчини чиқирип, «Худаниң Падишалиғи һәққидики хуш хәвәрни җакалап, вәз қилди» (Луқа 8:1). У «адаләткә тәшна болғанларни» пат арида бу дуниядики зулумлуқ вә азап-оқубәтләрниң болмайдиғанлиғиға ишәндүргән (Мәт. 5:6, ЙД; Луқа 18:7, 8). Һечбир һөкүмәтниң бу өзгиришләрни қилишқа күчи йәтмәйду. Буни пәқәт Худаниң Падишалиғи әмәлгә ашуралайду. У болса, «бу дуниядин әмәс» (Йоһан 18:36ни оқуң).

АДАЛӘТСИЗЛИКНИ КӨРГӘНДӘ ӘЙСАНИ ҮЛГӘ ҚИЛИҢ

9. Немишкә пәқәт Худа Падишалиғи адаләтликни орниталайдиғанлиғиға ишинисиз?

⁹ Әйсаниң заманидиму көп адаләтсизлик болған. Амма биз ахир заманда яшаватқанлиқтин, техиму көп адаләтсизликкә учраватимиз. Мошу адаләтсизликниң сәвәпчиси Шәйтан. У адәмләрни яман ишларни қилишқа техичә дәвәт қилип кәлмәктә (Тим. 2-х. 3:1—5, 13; Вәһ. 12:12). Әйсаға охшаш, бизму пәқәт Худа Падишалиғиниң адаләтсизликни түп йилтизи билән йоқ қилидиғанлиғини билимиз. Биз Худа Падишалиғини қоллиғанлиқтин, тоқунушларға қатнашмаймиз яки һөкүмәтләр адаләтсизликни йоқ қилидиғанлиғиға ишәнмәймиз. Стейсиa қериндишимизниң мисалини көрүп чиқайли. Һәқиқәтни билиштин авал, Стейси дайим адаләтсизликкә қарши нәмайишларға қатнишатти. У мундақ дәйду: «Бу ишларниң пайдиси барму? Нәмайишларға чиққанда мән тоғра тәрәпни қоллаватимәнму? дәп гуман қилаттим. Амма һазир Худа Падишалиғи һәммә қийинчилиқларни һәл қилидиғанлиғини билимән. Йәһва Худа адаләтликни мениңдин яхширақ орниталайдиғанлиғиға ишинимән» (Зәб. 72:1, 4).

10. Немишкә нәмайишлар Әйсаниң Мәтта 5:43—48дә йезилған мәслиһитигә зит келиду? (Рәсимгиму қараң.)

¹⁰ Һөкүмәткә қарши чиқип, нәмайишларға чиқидиған адәмләр адәттә ғәзәпкә берилип, һәрқандақ қилмишларға бариду. Шу чағда өп-чөридики адәмләр көп азап тартиду. Әйса бизни бундақ қилишқа үгәтмигән (Әфәс. 4:31). Джеффри дегән бурадәр мундақ деди: «Течлиқ билән башланған нәмайишлар бирнәччә секундниң ичидә зораван тоқунушларға айлинип кетиши мүмкин». Бирақ Әйса Мәсиһ һәммә адәмләрни, һәтта биз билән келишмигәнләрниму, тәқип қилидиғанларниму яхши көрүшкә үгәткән (Мәтта 5:43—48ни оқуң). Әйса үгәткәндәк һәрикәт қилиш үчүн күч чиқиришимиз керәк.

11. Немишкә бәзидә Әйсаға охшаш иш тутуш қийин болуши мүмкин?

¹¹ Худа Падишалиғи адаләтсизликни йоқ қилидиғанлиғини билсәкму, өзүмиз адаләтсизликкә учриғанда, Әйсаға охшаш иш тутуш қийин болуши мүмкин. Мәсилән, адаләтсизликкә учриған Джания қериндаш мундақ дәйду: «Мән қаттиқ ғәзәпләндим. Бу маңа еғир кәлди вә мошу адәмләрниң җазалинишини халидим. Ирқчилиқ вә адәмләрни камситишқа қарши нәмайишларни қоллаш тоғрилиқ ойландим. Шундақ қилсам, өзүмни яхширақ һис қилимән дәп ойлиған едим». Амма вақит өтүп, Джания ой-пикрини өзгәртиш керәклигини чүшәнди. У йәнә: «Мән Йәһва Худаға әмәс, адәмләргә тайиниватқанлиғимни байқидим. Шуңа мән нәмайишлар билән мунасивәтлик һәммә топлардин чиқип кәттим»,— деди. Һәтта ғәзәплинишимизгә асас болсиму, бу дунияниң сәясий вә иҗтимаий мәсилилиридә ян бесиштин еһтиятчан болушимиз керәк (Йоһ. 15:19).

12. Қандақ мәлуматларни еливатқанлиғимизға диққәтчан болуш немә үчүн муһим?

¹² Адаләтсизликкә дуч кәлгәндә ғәзивимизни башқурушқа немә ярдәм берәләйду? Биз немә оқуп, немә көрүп, немә тиңшаватқанлиғимизға диққәтчан болушимиз керәк. Тордики бәзи хәвәрләрдә адәмләрни һәйран қалдуридиған вә һөкүмәтни яманлайдиған мәлуматлар ейтилиду. Көпинчә мухбирлар мәлуматни бурмилап ейтиду. Һәтта мәлумат раст болсиму, биз у тоғрилиқ давамлиқ оқувәрсәк, мәсилини һәл қилалмаймиз. Әксичә, техиму әнсирәймиз, яман болимиз вә аччиқлинимиз (Пәнд н. 24:10). Нәтиҗидә, Худа Падишалиғини һаятимизда биринчи орунға қоймай, дуниядики қийинчилиқларни пәқәт у йоқ қилидиғанлиғини унтуп қелишимиз мүмкин.

13. Муқәддәс китапни һәр күни оқуш адаләтсизликкә инкас қайтурушимизға қандақ ярдәм бериду?

¹³ Муқәддәс китапни һәр күни оқуш вә оқуғанлиримиз тоғрилиқ чоңқур ойлиниш өзүмиз яки башқилар адаләтсизликкә дуч кәлгәндә, тоғра инкас қайтурушимизға ярдәм бериду. Алия қериндишимиз бәзи адәмләрниң башқиларға залимлиқ қиливатқанлиғини көрүп, қаттиқ әнсиригән. Адаләтсизлик қилған адәмләр җазасиз қалғандәк туюлған. У мундақ деди: «Аюп 34:22—29 айәтләрни оқуғанда, Йәһва Худаниң һәммә адаләтсизликни йоқ қилидиғанлиғиға һәқиқәтән ишинимәнму дәп ойлинип қалдим. Бу айәттә һечким вә һечнәрсә Йәһваниң көзидин сирт қалмайдиғанлиғи йезилған. Неминиң адаләтлик, неминиң адаләтсиз екәнлигини Худадин башқа һечким билмәйду». Ундақта, Худа Падишалиғи һәммә мәсилиләрни йоқ қилғичә, биз немә қилишимиз керәк?

БИЗ НЕМӘ ҚИЛАЛАЙМИЗ?

14. Һазир немә қилсақ болиду? (Колосилиқларға 3:10, 11)

¹⁴ Биз башқиларни өзгәртәлмәймиз. Амма өзүмизни өзгәртәләймиз. Биливалғинимиздәк, биз башқиларни яхши көрүп, Әйсадәк иш туталаймиз. Башқиларни яхши көрсәк, адаләтсизлик қилған адәмләрниму һөрмәт қилалаймиз (Мәт. 7:12; Рим. 12:17). Башқиларға меһрибан вә адил муамилә қилсақ, Йәһва биздин хурсән болиду. (Колосилиқларға 3:10, 11ни оқуң).

15. Адәмләргә Муқәддәс китаптики һәқиқәтләрни ейтип бәргәндә уларға қандақ ярдәм берәләймиз?

¹⁵ Адаләтсизликкә учраватқан адәмләргә қандақ ярдәм берәләймиз? Биз уларға Йәһва Худа тоғрилиқ ейтип бәрсәк болиду. Сәвәви Йәһва тоғрилиқ билимләр илгири аччиғи яман вә рәһимсиз болған адәмләргә меһрибан вә течлиқпәрвәр болушқа ярдәм бәргән (Йәшая 11:6, 7, 9). Җамал дегән қериндаш һәқиқәтни үгиништин авал һөкүмәтни ағдурмақчи болған топта болған. У мундақ деди: «Адәмләрни һечқандақ күч билән өзгәртиш мүмкин әмәс. Адәмни пәқәт Муқәддәс китаптики һәқиқәтләр өзгәртәләйду. Мениму өзгәрткән — Муқәддәс китап». Муқәддәс китаптики һәқиқәтләр Җамални һөкүмәткә қарши күрәш қилишни тохтитишқа дәвәт қилди. Адәмләргә Муқәддәс китапни үгинип өзгиришкә ярдәм бәргинимиздә, улар яман ишлирини ташлайду.

16. Немә үчүн башқиларға Худа Падишалиғи тоғрилиқ ейтишни халайсиз?

¹⁶ Әйсаға охшаш, бизму адәмләргә пәқәт Худа Падишалиғи адаләтсизликни пүтүнләй йоқ қилидиғанлиғини ейтишни халаймиз. Бу үмүт адаләтсизликкә дуч кәлгәнләрниң көңлигә тәсәлли бериду (Йәр. 29:11). Жуқурида тилға елинған Стейси мундақ деди: «Һәқиқәтни үгәнгиним башқилар яки өзүм адаләтсизликкә дуч кәлгәндә, хатирҗәм болушимға ярдәм бәрди. Йәһва Худа Муқәддәс китаптики хәвәр арқилиқ көңлүмизни көтириду». Муқәддәс китаптики тәсәлли беридиған хәвәрләрни башқилар билән бөлүшүшкә тәйяр болушимиз лазим. Мошу мақалидики Муқәддәс китапқа асасланған ойларниң раст екәнлигигә көз йәткүзсәк вә уларға ишәнсәк, мәктәптә яки ишта башқиларға Худа Падишалиғи тоғрилиқ һөрмәт билән ейталаймизb.

17. Адаләтсизликкә дуч кәлгинимиздә, Йәһва Худа бизгә қандақ ярдәм бериду?

¹⁷ Әпсуски, «бу дунияниң һөкүмдари» Шәйтан болғачқа, биз азап-оқубәтләрни баштин кәчүрүватимиз. Бирақ Йәһва Худа пат йеқинда Шәйтан һәм униң зулум дуниясини йоқ қилиду. Биз шу вақитни күтиватимиз. Шуңа биздә үмүт бар (Йоһ. 12:31). Мәсилән, Муқәддәс Язмиларда Худаниң азап-оқубәтләргә йол қойғанлиғиниң сәвәвила әмәс, биз адаләтсизликкә дуч кәлгәндә, У бизгә ғәмхорлуқ қилидиғанлиғиму ейтилған (Зәб. 34:17—19). Әйсаниң үлгисидин адаләтсизликкә қандақ инкас қайтурушни үгәндуқ. Пат йеқинда Худа Падишалиғи азап-оқубәтләрни йоқ қилиду вә адәмләр әнди һечқачан азап чәкмәйду (Пет. 2-х. 3:13). Мошу Падишалиқ тоғрилиқ қизғин вәз қилишни тохтатмайли һәм йәр йүзини адаләт вә һәққанийлиқ толдуридиған вақитни тәқәзалиқ билән күтәйли (Йәшая 9:7).