ОН БИРИНЧИ БАП
Немә үчүн дуния азап-оқубәтләргә толған?
1, 2. Көп адәмләр қандақ соалларни қоюшиду?
БИЗ һәр күни қорқунучлуқ хәвәрләрни аңлаймиз. Мәсилән, йәр тәврәшләр шәһәрләрни вәйран қилмақта, ата-анилар рак кесилидин өлүп кетип, балилар житим қалмақта вә террорчиларниң һуҗуми нурғун адәмләрниң өлүмигә сәвәп болмақта.
2 Адәмләр шундақ яман хәвәрләрни аңлиғанда: «Немә үчүн шундақ болуватиду?», «Немә үчүн бу дуния өчмәнликкә вә қайғу-һәсрәткә толуп кәтти?»— дәп соалларни қоюшиду. Сиз өзиңизму шундақ соаллар һәққидә ойлап көргәнму?
3, 4. а) Һабаккук пәйғәмбәр Худаға қандақ соалларни қойған? ә) Йәһва Худа униңға немә дәп җавап бәргән?
3 Муқәддәс китаптин иман-етиқади күчлүк кишиләрниңму шундақ соалларни қойғанлиғи һәққидә билимиз. Мәсилән, Һабаккук пәйғәмбәр Йәһва Худадин: «Сән немишкә маңа қәбиһликни көргүзисән, немишкә җапа-зулумға қарап турисән? Чүнки булаңчилиқ, зулум-зораванлиқ көз алдимдидур. Җәңги-җедәлләр бар, дәвалар көпәймәктә»,— дәп сориған (Һабаккук 1:3, КТ).
4 Һабаккук 2:2, 3-айәтләрдә Йәһва Худа Өз пәйғәмбиригә җавап бәргән. Шундақла Худа вәзийәтни түзәйдиғанлиғини вәдә қилған. Муқәддәс китапта: «У силәргә ғәмхорлуқ қилмақта»,— дәп йезилған. Демәк, Йәһва Худа адәмләрни бәк яхши көриду (Петрусниң 1-хети 5:7). Әгәр биз адәмләрниң азап чекишини халимисақ, Худа техиму халимайду (Йәшая 55:8, 9). Ундақта қайғу-һәсрәт немә үчүн шунчә көп? Бу һәққидә мошу баптин биләләймиз.
НЕМӘ ҮЧҮН ДУНИЯДА АЗАП-ОҚУБӘТЛӘР БӘК КӨП?
5. Дин устазлири азап-оқубәтләрниң сәвәвини қандақ чүшәндүриду? Муқәддәс китапта болса, немә йезилған?
5 Адәмләр азап-оқубәтләргә учриғанда, дин устазлири: «Буни Худа пешанисигә язған»,— дәйду. Башқилар болса қийинчилиққа дуч кәлгәндә, Худа адәмләрни синаватиду дәйду вә немә үчүн шундақ болғанлиғини өзлири билмәйду. Бәзилири болса, һәтта балилар өлгәндә, уларни Худа Өзигә елип кәтти дәп ойлайду. Бирақ бу бир ялғанчилиқ. Йәһва Худа азап-оқубәтләрниң сәвәпчиси әмәс. Муқәддәс китапта: «Худада наһәқлиқ йоқтур вә Пәрвәрдигар адилсиз болмайду»,— дейилгән (Аюп 34:10).
6. Немә үчүн көп адәмләр қайғу-һәсрәтләргә Худа әйипкар дейишиду?
6 Көп адәмләр дунияда болуватқан қайғу-һәсрәтләргә Худа әйипкар дейишиду. Чүнки улар дунияниң Һөкүмрани Худа, дәп ойлайду. Бирақ үчинчи бапта билгинимиздәк, бу дуния Шәйтанниң қол астида.
7, 8. Немә үчүн дунияда азап-оқубәтләр бәк көп?
7 Муқәддәс китапта: «Пүткүл дуния Шәйтанниң һөкүми астида болмақта»,— дәп йезилған (Йоһанниң 1-хети 5:19). Бу дунияниң һөкүмрани Шәйтан рәһимсиз вә интайин вәһший. У пүткүл дунияни аздуриватиду (Вәһий 12:9). Көп адәмләр Шәйтанниң яман тәсиригә учрап кәткән. Мана бу дуния немә үчүн өчмәнлик, ялғанчилиқ вә зораванлиққа толуп кәткәнлигиниң бир сәвәви.
8 Азап-оқубәтниң йәнә бир сәвәви бар. Адәм ата билән Һава ана исиян көтәргәндин кейин, уларниң гуналири йәни яманлиқ қилиш һәвәслири балилириға өткән. Шу сәвәптин, адәмләр бир-бирини азап-оқубәтләргә дучар қилиду вә өзлирини башқилардин муһим, дәп қарайду. Улар өз ара җедәл-маҗира қилишиду, урушқа бариду вә башқиларни бозәк қилиду (Вәз 4:1; 8:9). Азап чекишниң йәнә башқа бир сәвәви — пурсәт вә шараит (Вәз 9:11). Демәк, адәм күтмигән вақитта вә күтмигән җайда болуп қалғанлиқтин қандақту бир яман нәрсигә учрап қелиши мүмкин.
9. Немә үчүн Худа азап-оқубәтләргә йол қойғанлиғиниң муһим сәвәви бар екәнлигигә ишәнсәк болиду?
9 Йәһва адәмләргә һеч қачан яманлиқ қилмайду. Адәмләр қиливатқан яманлиқларға, урушларға вә бир-биригә начар муамилидә болушиға Худа әйипкар әмәс. Шундақла Худа тәбиий апәтләрни, мәсилән, йәр тәврәшләр, қаттиқ боранлар вә кәлкүн сулирини әвәтмәйду. Бирақ сиз мундақ дәп сорайдиғансиз: «Әгәр Йәһва Худа Каинатта әң қудрәтлик шәхс болса, немә үчүн У азап-оқубәтләрни тохтатмайду?» Муқәддәс китапта Худа бизни бәк яхши көриду, дәп йезилған. Демәк, азап-оқубәтләргә йол қойғанлиғиниң чоқум муһим сәвәви бар (Йоһанниң 1-хети 4:8).
НЕМӘ СӘВӘПТИН ХУДА АЗАП-ОҚУБӘТЛӘРГӘ ЙОЛ ҚОЙИДУ?
10. Шәйтан Йәһва Худа һәққидә немә дегән?
10 Ерәм беғида Шәйтан Адәм ата билән Һава анини аздурған. У Худани яман башқурғучи дәп әйиплигән. Йәнә Худа адәмләрдин яхши бир нәрсини йошуруватиду дәп ейтқан. Шәйтан өзини, Йәһва Худаға қариғанда, яхширақ һөкүмранлиқ қилиду вә адәмләр Худасиз һаят кәчүрәләйду дегәнләргә ишәндүрүшни халиған (Яритилиш 3:2—5; 27-изаһәткә қараң).
11. Қандақ соалларға җавап елишимиз керәк?
11 Адәм ата билән Һава ана Йәһва Яратқучиниң сөзигә қулақ салмай, Униңға қарши чиққан. Улар немә яхши, немә яман екәнлигини өзүмиз қарар қилимиз, дәп ойлиған. Йәһва уларниң хата йолни таллиғанлиғини қандақ көрсәткән? Адәмләрни немә бәхитлик қилидиғанлиғини пәқәт Худа Өзи яхши билидиғанлиғини қандақ көрсәткән?
12, 13. а) Немә үчүн Йәһва Худа Адәм ата билән Һава анини дәрру йоқ қилмиған? ә) Йәһва немә үчүн Шәйтанниң һөкүмранлиқ қилишиға вә адәмләрниң өз һөкүмитини қурушиға рухсәт қилған?
12 Йәһва Худа Адәм ата билән Һава анини дәрру йоқ қилмиған, әксинчә уларға пәрзәнт көрүшкә мүмкинчилик бәргән. Андин кейин уларниң балилириниң өзлири қарар қилишиға пурсәт яратқан. Шундақ қилип, Шәйтан мәйли қандақла қилмисун, Йәһва Өз ирадисини әмәлгә ашуруп, йәр-йүзини мукәммәл адәмләргә толдуриду (Яритилиш 1:28; Йәшая 55:10, 11).
13 Шәйтан миллионлиған пәриштиләрниң алдида Йәһва Худаға қарши чиққан еди (Аюп 38:7; Даниял 7:10). Шу сәвәптин, Йәһва Худа Шәйтанға өз сөзлирини дәлилләш үчүн вақит бәргән. Худа йәнә кишиләргә Шәйтанниң йолбашчилиғи астидики дунияда өзлириниң һөкүмитини қурушқа вә Худаниң ярдимисиз мувәппәқийәт қазинимиз, дегән пикирни дәлиллишигә рухсәт қилған.
14. Нәччә миң жиллар өтүп, немә ашкариланди?
14 Нәччә миң жилдин буян, адәмләр өзлири бир-бири үстидин һөкүмранлиқ қилип кәлмәктә, лекин улар мувәппәқийәткә йәтмиди. Шуңа, Шәйтан бир ялғанчи екәнлиги ашкарә болуп, адәмләр Худаниң ярдимигә муһтаҗ екәнлиги ениқланди. Бу һәққидә Йәрәмия пәйғәмбәр мундақ дегән: «Билимәнки, әй Пәрвәрдигар, адәмниң өз йолини бекитиши өз қолида әмәстур, меңиватқан адәмниң өзидә қәдәмлирини халиғанчә ташлаш қудрити болмастур» (Йәрәмия 10:23, КТ).
НЕМӘ СӘВӘПТИН ЙӘҺВА ШУНЧӘ УЗАҚ ЧИДАП КЕЛИВАТИДУ?
15, 16. а) Немә сәвәптин Йәһва азап-оқубәтләрниң шунчә узақ давамлишишиға йол қойған? ә) Йәһва Худа немә үчүн Шәйтан пәйда қилған қийинчилиқларни һәл қилмайватиду?
15 Немә сәвәптин Йәһва азап-оқубәтләрниң шунчә узақ давамлишиға йол қойған? Немә үчүн У яманлиқни йоқ қилмайду? Чүнки Шәйтанниң һөкүмранлиғи мувәппәқийәтлик болмайдиғанлиғини көрситиш үчүн вақит керәк еди. Адәмләр һәр түрлүк һакимийәтләрни қуруп көрди, амма һеч үнүм бәрмиди. Гәрчә илим-пән вә техника саһасида көп тәрәққиятлар болған болсиму, дунияда адаләтсизлик, кәмбәғәллик, җинайәт вә урушлар көпәймәктә. Һәқиқәтән, инсанлар Худаниң ярдимисиз мувәппәқийәт қазиналмайду.
16 Йәһва Худа немә үчүн Шәйтан пәйда қилған қийинчилиқларни һәл қилмайватиду? Сәвәви, әгәр Худа шундақ қилса, Шәйтанниң һөкүмранлиғини қоллиған болиду. Шу чағда, адәмләр өз-өзүмизгә һөкүмранлиқ қилалаймизкән, дәп ойлиши вә һәтта ишиниши мүмкин. Бирақ у бир ялғанчилиқ. Йәһва һәргизму ялған ейтмайду вә ялғанчилиқни қоллимайду (Ибранийларға 6:18).
17, 18. Шәйтан пәйда қилған барлиқ бузғунчилиқларни, Йәһва әслигә кәлтүрүш үчүн немә қилиду?
17 Исиянчи Шәйтан вә итаәтсиз инсанлар пәйда қилған бузғунчилиқларни Йәһва түзәп әслигә кәлтүрәләмду? Әлвәттә! Чүнки Худаниң қолидин һәммә нәрсә келиду. Йәһва авал Шәйтанниң ялғанчи екәнлигини пүтүнләй ашкарә қилип, андин кейин У дәсләптә ирадә қилғандәк, йәр йүзини җәннәт маканға айландуриду. Шу чағда һәммә өлүп кәткән кишиләр тирилдүрилиду (Йоһан 5:28, 29). Адәмләр һечқачан ағримайду вә өлмәйду. Әйса Шәйтанниң ишлирини йоқ қилип, у пәйда қилған барлиқ бузғунчилиқларни әслигә кәлтүриду (Йоһанниң 1-хети 3:8). Йәһва бизгә сәвир-тақәт көрситип, Уни тонуп-билишимиз вә Һөкүмран сүпитидә таллишимиз үчүн, имканийәт яритип бәргән. Буниңға биз бәкму миннәтдар (Петрусниң 2-хети 3:9, 10ни оқуң). Һазир биз азап-оқубәт чәксәкму, Худа бизниң бәрдашлиқ беришимизгә ярдәм бериду (Коринтлиқларға 1-хәт 10:13ни оқуң).
18 Йәһва бизни һечқачан Өзигә бойсунушқа мәҗбурлимайду. У һәммисигә таллаш әркинлигини һәдийә қилған. Һазир бу һәдийәниң нәқәдәр баһалиқ екәнлигини көрүп чиқайли.
ТАЛЛАШ ӘРКИНЛИГИНИ ҚАНДАҚ ҚОЛЛИНАЛАЙСИЗ?
19. Йәһва бизгә қандақ әҗайип һәдийәни бәргән? Немә үчүн биз бу һәдийә үчүн миннәтдар болушимиз керәк?
19 Йәһва һайванатларни туғма қабилийәт билән яратқан, адәмләрни болса, өзлири қандақ һаят кәчүрүшни қарар қилалиши үчүн, таллаш әркинлиги билән яратқан (Пәнд-нәсиһәтләр 30:24). Йәһвани хурсән қилидиған иш-һәрикәтләрни қилимизму яки қилмаймизму, буниңға өзүмиз қарар қилимиз. Биз робот әмәс. Шуңа ким болушни, қандақ адәмләр билән арилишишни вә қандақ һаят кәчүрүшни өзүмиз таллаймиз. Йәһва һаяттин һузурлинишимизни халайду.
20, 21. Әң яхши йол қайси?
20 Йәһва бизниң Уни сөйүшимизни халайду (Мәтта 22:37, 38). Мәсилән, ата балисиниң «Мән сизни яхши көрүмән», дегән сөзини мәҗбурий һалда әмәс, чин жүрәктин ейтқинини аңлиғанда интайин хошал болиду. Шуниңға охшаш, Йәһва бизгә таллаш әркинлигини бәргәнликтин, Уму бизниң чин жүрәктин Униңға хизмәт қилишимизни халайду. Шәйтан, Адәм ата вә Һава ана Худаниң һөкүмранлиғини рәт қилишни таллиған. Сизчу таллаш әркинлигиңизни қандақ ишләтмәкчисиз?
21 Йәһваға хизмәт қилишни таллаң. Бу әң яхши йол. Дунияниң җай-җайлирида миллионлиған адәмләр Шәйтанни әмәс, Худани хурсән қилишни таллиған (Пәнд-нәсиһәтләр 27:11). Азап-оқубәт болмайдиған йеңи дунияда яшаш үчүн, һазирниң өзидә немә қилишиңиз керәк? Келәрки бапта бу соалға җавап тапимиз.