Худа инсанларни немә үчүн яратқан?

1. Худа инсанларни қандақ алаһидә мәхсәт билән яратқан?

ХУДА инсанларни алаһидә бир мәхсәт билән яратқан. У әң биринчи әр-аял Адәм ата билән Һава анини яритип, уларни әҗайип баққа орунлаштурған. Худа дәсләптә уларниң ағримай, қеримай вә өлмәй, мукәммәл вә бәхитлик һаят кәчүрүп, бала-чақилиқ болушини, пүткүл йәр йүзини җәннәткә айландурушини вә җаниварларға ғәмхорлуқ қилишини халиған (Яритилиш 1:28; 2:8, 9, 15; 6-изаһәткә қараң).

2. а) Худа Өз мәхситини чоқум орунлайдиғанлиғини нәдин билимиз? ә) Худа кимниң қанчә узақ яшишини мәхсәт қилған?

² Худа мәхсәт қилғандәк, пүткүл йәр йүзи җәннәткә айлинидиған күн келәмду? Йәһва Худа мундақ дегән: «Мән буни шәкилләндүргән, Мән буниму вуҗудқа чиқиримән» (Йәшая 46:9—11; 55:11, КТ). Һә, У мәхситини чоқум орунлайду, Униңға һечнәрсә тосалғу болалмайду. Йәһва Худа йәрни «бекар яратмай», бәлки бир бәлгүлүк мәхсәт билән яратқан (Йәшая 45:18). У адәмләрниң пүткүл йәр йүзидә яшишини мәхсәт қилған. Сизниңчә, Худа қандақ адәмләрниң, қанчә узақ вақит яшишини халиған? Муқәддәс китап: «Һәққанийлар йәрни мирасқа елип, униңда әбәдил-әбәт яшайду»,— дәйду (Зәбур 37:29; Вәһий 21:3, 4).

3. Инсанларниң кесәл болуп өлүп кетиватқанлиғини көргәндә, биздә қандақ соаллар пәйда болуши мүмкин?

³ Лекин бүгүнки күндә ағримайдиған вә өлмәйдиған адәм йоқ. Көп җайларда адәмләр бир-бирини өлтүрүп, уруш қиливатиду. Буларниң һечқайсиси Худаниң нийити болмиған. Ундақта бу дуния немишкә азап-оқубәткә толған? Худаниң мәхсити немишкә орунланмайватиду? Бу соалларға пәқәт Муқәддәс китапла җавап берәләйду.

ХУДАНИҢ ДҮШМИНИ

4, 5. а) Ерәм бағда ким илан арқилиқ Һава ана билән сөзләшкән? ә) Сәмимий адәм қандақ қилип оғри болуп қалиду?

⁴ Муқәддәс китап «Иблис яки Шәйтан дәп атилидиған» Худаниң дүшмини бар екәнлигини ейтиду. Шәйтан Ерәм бағда Һава ана билән сөзлишиш үчүн иланни пайдиланған (Вәһий 12:9; Яритилиш 3:1). У Һава аниға иланниң өзи сөзләватқандәк қилип көрсәткән еди (7-изаһәткә қараң).

⁵ Ундақта Иблис Шәйтанни Худа яратқанму? Яқ! Худа Адәм ата билән Һава ана үчүн йәр йүзини яратқанда, Шәйтан асманда пәриштә болған. Лекин кейинирәк яман тәрәпкә өзгиришни башлап, ахирида Шәйтанға айланған (Аюп 38:4, 7). Пәриштиниң мошундақ өзгирип кетиши мүмкинму? Һә, мүмкин. Буни бир мисал билән селиштурушқа болиду. Сәмимий адәм қандақ қилип оғри болуп қалиду? У оғри болуп туғулмайду, бирақ өзигә тегишлик әмәс нәрсигә еришишни арзу қилип, шу тоғрилиқ давамлиқ ойлавәрсә, униң һарам ойи күндин күнгә күчийип, ахирида пурсәт болсила, у оғурлайду. Шундақ қилип, сәмимий бир адәмму оғриға айлиниду (Яқуп 1:13—15ни оқуң; 8-изаһәткә қараң).

6. Бир яхши пәриштә қандақ қилип Худаниң дүшминигә айланған?

⁶ Кейинирәк Шәйтанға айланған әшу пәриштә дәл шундақ болған. Йәһва Худа Адәм ата вә Һава анини яратқанда, уларға: «Әвлат көрүп көпийиңлар, йәр йүзини толтуруңлар»,— дегән (Яритилиш 1:27, 28). Шу чағда пәриштә: «Бу адәмләрниң һәммиси Худаға әмәс, маңа ибадәт қилса яхши болатти!»— дәп ойлиған болуши мүмкин. У мошу һәққидә көпирәк ойлиғансири, Худаға тегишлик нәрсигә еришишни арзу қилған. Бу пәриштә адәмләрниң униңға ибадәт қилишини халиған. Шуңа, у Һава аниға ялған гәп қилип, уни аздурған еди (Яритилиш 3:1—5ни оқуң). Нәтиҗидә, у Иблис Шәйтанға айлинип, Худаниң дүшмини болған.

7. а) Немә үчүн Адәм ата билән Һава ана өлүп кәткән? ә) Немишкә биз қериймиз һәм өлүмиз?

⁷ Худа Адәм ата билән Һава аниниң бағдики бир дәрәқниң мевисини йейишини мәнъий қилған еди. Әгәр улар шу мевини йесә, өлүп кетәтти. Улар Худаниң буйруғиға бойсунмай, шу мевини йегән (Яритилиш 2:17; 3:6). Улар Йәһваға қарши гуна қилип, нәтиҗидә Худа ейтқандәк, ахирида өлүп кәткән еди (Яритилиш 3:17—19). Уларниң балилириму гунакар болуп туғулғачқа, өлүп кәткән (Римлиқларға 5:12ни оқуң). Немә үчүн Адәм ата билән Һава аниниң балилири гунакар болуп қалғанлиғини чүшиниш үчүн, бир мисални қараштурайли. Әгәр тонурниң ичидә оюлған җай болса, шу җайға яққан нанларниң һәммиси қийсиқ болуп чиқиду. Шуниңға охшаш, Адәм ата Худаға итаәтсизлик қилип, гунакар болди. Бизму Адәм атиниң әвлатлири болғачқа, бизму гунакар. Шу сәвәптин һәммимиз қериймиз һәм өлүмиз (Римлиқларға 3:23; 9-изаһәткә қараң).

8, 9. а) Шәйтан Адәм ата билән Һава анини немигә ишәндүрүшни халиған? ә) Немишкә Йәһва Худа Униңға қарши чиққанларни дәрру йоқ қилмиған?

⁸ Шәйтан Адәм ата билән Һава анини аздуруп, Худаға бойсунмаслиққа дәвәт қилип, Йәһваға қарши исиян көтәргән. У Адәм ата билән Һава анини Йәһва Худа ялғанчи вә әң яхши нәрсини уларға беришни халимиған начар һөкүмран екәнлигигә ишәндүрүшни халиған. Әмәлийәттә, Шәйтанниң шу сөзлири, инсанлар Худаниң башқурушиға муһтаҗ әмәс вә Адәм ата билән Һава ана неминиң яхши вә неминиң яман екәнлигини өзлири қарар қилалайду дегәнни билдүргән. Ундақта Йәһва Худа немә қилса болатти? У Униңға қарши чиққанларни йоқ қилип, исиянни бастурушқа қудрити йетәтти. Лекин шундақ қилса, Шәйтанниң ялғанчи екәнлиги испатлинамду? Яқ!

⁹ Йәһва Худа исиянчиларни дәрһал йоқ қилмиған, әксичә инсанларниң өзи хан, өзи бәг болуп көрүшигә вақит бәргән. Шундақ қилғандила, Шәйтанниң ялғанчи екәнлиги вә инсанлар үчүн неминиң әң яхши екәнлигини пәқәт Йәһва Худа билидиғанлиғи ениқ испатлиниду. Биз бу тоғрилиқ мошу китапниң 11-бабида үгинимиз. Бирақ Адәм ата билән Һава аниниң чиқарған қарари һәққидә немә ойлайсиз? Сизниңчә, уларниң Шәйтанға ишинип, Худаға бойсунмиғанлиғи тоғра болдиму? Йәһва Адәм ата билән Һава аниға керәклик һәммә нәрсини, йәни мукәммәл һаят, яшаш үчүн гөзәл макан, уларни хошал қилидиған ишни бәргән. Амма Шәйтан улар үчүн бирму яхшилиқ қилмиған. Сиз уларниң орнида болсиңиз, немә қилаттиңиз?

10. Һәрбиримиздә қандақ таллаш бар?

¹⁰ Бүгүнки күндә һәрбиримиз икки йолниң бирини таллишимиз керәк. Биз һөкүмранимиз сүпитидә Йәһва Худани таллап, Шәйтанниң ялғанчи екәнлигини дәлилләймиз яки һөкүмранимиз сүпитидә Шәйтанни таллаймиз (Зәбур 73:28; Пәнд-нәсиһәтләр 27:11ни оқуң). Бүгүнки күндә Худаға бойсунидиған адәмләр интайин аз. Әмәлийәттә, Худа дунияни башқурмайду. Ундақта, дунияни ким башқуруватиду?

КИМ ДУНИЯНИ БАШҚУРИВАТИДУ?

11, 12. а) Шәйтанниң Әйсаға ейтқан сөзлиридин немини билимиз? ә) Бу дунияни Шәйтанниң қол астида екәнлигини қайси айәтләр көрситиду?

¹¹ Бир қетим Шәйтан Әйса пәйғәмбәргә «дунияниң һәммә падишалиқлирини һәм уларниң шан-шәрипини» көрсәтти. Андин кейин: «Әгәр тизға жиқилип, маңа ибадәт қилсаң, мошуларниң барлиғини саңа беримән»,— дегән (Мәтта 4:8, 9; Луқа 4:5, 6). Ойлап көрүң, падишалиқлар Шәйтанниң қолида болмиған болса, уларни Әйса пәйғәмбәргә беримән дәп вәдә қилалаттиму? Әлвәттә, яқ! Демәк, дуниядики һәммә һөкүмәтләр Шәйтанниң қол астида.

¹² Бәлким, сиз: «Шәйтан қандақларчә бу дунияниң башқурғучиси болиду? Аләмни яратқан Һәммигә Қадир Йәһва Худа әмәсму?»— дәп һәйран қалидиғансиз (Вәһий 4:11). Әлвәттә, Худа һәммини яратқан, лекин Әйса «бу дунияниң һөкүмрани» Шәйтан екәнлигини ениқ ейтқан (Йоһан 12:31; 14:30; 16:11). Әлчи Паулму Шәйтанни бу дунияниң һөкүмрани дәп атиған (Коринтлиқларға 2-хәт 4:3, 4). Әлчи Йоһанму: «Биз Худадин екәнлигимизни билимиз, амма пүткүл дуния Шәйтанниң һөкүми астида болмақта»,— дәп язған (Йоһанниң 1-хети 5:19).

ШӘЙТАННИҢ ДУНИЯСИ ЙОҚ БОЛИДУ

13. Немә үчүн биз йеңи дунияға муһтаҗ?

¹³ Бу дунияниң әһвали күндин-күнгә начарлишип кетиватиду. Әтрапимизда уруш, парихорлуқ, иккиүзлүк, зорлуқ-зомбулуқ көпийиватиду. Адәмләр қанчилик тиришип көрсиму, бу қийинчилиқларниң һәммисини йоқ қилалмайду. Амма йеқин арида Худа Һар-Магедон дәп атилидиған урушта бу рәзил дунияни йоқ қилип, униң орниға адаләтлик һөкүм сүридиған йеңи дунияни орнитиду (Вәһий 16:14—16; 10-изаһәткә қараң).

14. Худа кимни Өзиниң Падишалиғиниң Падишаси болушқа таллиған? Муқәддәс китапта Әйса һәққидә алдин-ала немә ейтилған?

¹⁴ Худа адаләтлик һөкүм сүридиған йеңи заманни қандақ орнитиду? Уни асмандики һөкүмәт арқилиқ орнитиду. Бу һөкүмәт Худа Падишалиғи дәп атилиду. Йәһва Худа Әйса Мәсиһни бу һөкүмәтниң падишаси сүпитидә таллиған. Нәччә миң жиллар илгири, Муқәддәс китапта Әйса Мәсиһниң «аман-хатирҗәмлик бәргүчи Шаһзадә» вә униң һөкүмити мәңгү болидиғанлиғи йезилған (Йәшая 9:6, 7, КТ). Әйса әгәшкүчилиригә мошу һөкүмәт тоғрилиқ: «Сениң Падишалиғиң кәлгәй. Ирадәң асманда орунланғандәк, йәрдиму шундақ орунланғай»,— дәп дуа қилишни үгәткән (Мәтта 6:10). Бу китапниң 8-бабидин келәчәктә дунияни пәқәт Худаниң Падишалиғи башқуридиғанлиғини билимиз (Даниял 2:44ни оқуң). Шу чағда Падишалиқ пүткүл йәр йүзини җәннәткә айландуриду (11-изаһәткә қараң).

ЙЕҢИ ДУНИЯҒА АЗ ҚАЛДИ

15. «Йеңи йәр» дегән немини билдүриду?

¹⁵ Муқәддәс китапта: «Һәққанийлиқ һөкүм сүридиған йеңи асман билән йеңи йәрни күтүватимиз»,— дәп йезилған (Петрусниң 2-хети 3:13; Йәшая 65:17). Муқәддәс китапта бәзидә «йәр» дегән сөз адәмләргә қаритилип ейтилған (Яритилиш 11:1). Демәк, бу айәттики «йеңи йәр» дегән сөз Худаға қулақ салидиған вә униң бәрикитигә еришкән һәммә адәмләрни билдүриду.

16. Йеңи дунияда яшайдиғанлар Худаниң қандақ бәрикәтлиригә еришиду? Мошу бәрикәтләргә еришиш үчүн чоқум немә қилишимиз керәк?

¹⁶ Әйса йеңи дунияда яшайдиған адәмләр «мәңгү һаятқа егә болидиғанлиғини» ейтқан (Марк 10:30). Мәңгү һаятқа еришиш үчүн чоқум немә қилишимиз керәк? Җавапни тепиш үчүн, мәрһәмәт, Йоһан 3:16 билән 17:3ни оқуп көрүң. Келиң, әнди Муқәддәс Язмиларда йәрдики җәннәт қандақ тәсвирләнгәнлигини көрәйли.

17, 18. Пүткүл йәр йүзидә теч-аманлиқ вә хатирҗәмлик болидиғанлиғини қәйәрдин билимиз?

¹⁷ Яманлиқ, уруш, җинайәт вә зорлуқ-зомбулуқ йоқ болиду. Йеңи дунияда бирму яман адәм яшимайду (Зәбур 37:10, 11). Худа дунияниң булуң-пушқақлириғичә болған урушларни тохтитиду (Зәбур 46:9; Йәшая 2:4). Йәр йүзидә пәқәт Худани яхши көридиған вә Униңға бойсунидиған адәмләр яшайду. Шу чағда теч-аманлиқ мәңгү һөкүм сүриду (Зәбур 72:7).

¹⁸ Йәһва Худаниң хәлқи теч-аман яшайду. Қедимда Исраил хәлқи Йәһва Худаға бойсунғанда, Худа уларни қоғдиған һәм улар теч-аман һаят кәчүргән (Лавийлар 25:18, 19). Биз җәннәттә һечкимдин, һечнәрсидин қорқмай, хатирҗәм һаят кәчүримиз (Йәшая 32:18; Мика 4:4ни оқуң).

19. Йеңи дунияда йемәк-ичмәкләрниң мол болидиғанлиғиға немишкә ишәнсәк болиду?

¹⁹ Йемәк-ичмәк мол болиду. «Йәрдә буғдай дени зор болиду, тағлар чоққилирида у молчилиқта» (Зәбур 72:16). Йәһва Худайимиз бизни бәрикәтлигәчкә, йәр йүзи техиму мол һосул бериду (Зәбур 67:6).

20. Йәр йүзи җәннәткә айлинидиғанлиғини қәйәрдин билимиз?

²⁰ Йәр йүзи җәннәткә айлиниду. Һәрбир адәмниң өз өйи вә беғи болиду (Йәшая 65:21—24; Вәһий 11:18ни оқуң). Пүткүл йәр йүзи Ерәм баққа охшаш әҗайип чирайлиқ бир маканға айлиниду. Йәһва Худа һәрдайим биз еһтияҗлиқ нәрсиләрниң һәммисини бериду. Муқәддәс китапта Худа тоғрилиқ мундақ йезилған: «Қолуңни ечип, тирик җанларниң хаһишлирини Сән қанаәтләндүрисән» (Зәбур 145:16).

21. Адәмләр билән һайванатлар арисида течлиқ болидиғанлиғини қәйәрдин билимиз?

²¹ Адәмләр билән һайванатлар арисида тиничлиқ болиду. Һайванатлар адәмләргә зиян йәткүзмәйду. Һәтта кичик балиларму жиртқуч һайванларниң қешида қорқмай ойналайду (Йәшая 11:6—9; 65:25ни оқуң).

22. Әйса пәйғәмбәр ағриқлар үчүн немә қилиду?

²² Һечким ағримайду. Әйса пәйғәмбәр йәрдә болғанда нурғун ағриқларни сақайтқан (Мәтта 9:35; Марк 1:40—42; Йоһан 5:5—9). Келәчәктә болса, у Худа Падишалиғиниң Падишаси сүпитидә һәммә инсанларни сақайтиду. Шу чағда һечким «мән кесәл» демәйду (Йәшая 33:24, КТ; 35:5, 6).

23. Худа өлгәнләр үчүн немә қилиду?

²³ Өлгәнләр тирилиду. Худа миллионлиған адәмләрни тирилдүридиғанлиғини вәдә қилған. Һәққанийлар һәм һәққаний әмәсләр тирилиду (Әлчиләр 24:15; Йоһан 5:28, 29ни оқуң).

24. Җәннәттә яшашни халамсиз?

²⁴ Йәһва һәққидә билим елип, Униң көңлини хуш қилип яшаймизму яки өзүмиз халиғандәк яшаймизму, буни өзүмиз таллаймиз. Әгәр Йәһва Худаниң йолини таллисақ, келәчигимиз гүллинип, бәхитлик һаят кәчүримиз. Әйса Мәсиһ өлүштин илгири йенида түврүккә миқланған җинайәтчигә: «Саңа һәқни бүгүн ейтимәнки, сән мениң билән биллә җәннәттә болусән»,— дәп вәдә бәргән (Луқа 23:43). Келәрки бапта Әйса Мәсиһ тоғрилиқ вә у Худаниң әҗайип вәдилирини қандақ әмәлгә ашуридиғанлиғи һәққидә көпирәк үгинимиз.