Өзүңизни Йәһваға беғишлашқа тәйярмусиз?

1, 2. Киши суға чөмдүрүлүштин илгири немиләрни қилиши лазим?

ӨТКӘН бәш жилда бир миллиондин көпирәк кишиләр суға чөмдүрүлүп, Йәһва гувачиси болди. Уларниң көпинчиси, биринчи әсирдики Тимотийға охшаш, «бовақ чеғидин» башлап, һәқиқәтни үгәнгән (Тим. 2-х. 3:14, 15). Йәнә бәзилири яш қурамиға йәткән чоңлар болуп, һәтта яшанғанларму һәқиқәтни тонуди. Бир қанчә жил илгири яшанған бир аял Йәһва гувачилири билән Муқәддәс китапни тәтқиқ қилип, 97 йешида суға чөмдүрүлди.

² Сиз һазир Муқәддәс китапни тәтқиқ қиливатамсиз яки кичигиңиздин ата-аниңиз билән Муқәддәс китап һәқиқитини үгиниватамсиз? Ундақта сиз чөмдүрүлүш һәққидә ойлап бақтиңизму? Бу һәқиқәтән махташқа әрзийдиған мәхсәт! Суға чөмдүрүлүштин илгири чоқум өзүңизни Йәһваға беғишлишиңиз керәк. Бу мақалидә өзүңизни беғишлашқа вә чөмдүрүлүшкә тәйярлиқ қилғанда, бу қәдәмни бесишниң қорқунучлуқ әмәслигини көрүп йетишиңизгә ярдәм бериду.

БЕҒИШЛАШ НЕМИНИ БИЛДҮРИДУ?

3. Муқәддәс китаптин Йәһва Худаға беғишланғанларниң мисаллирини кәлтүрүң.

³ Муқәддәс китапта беғишлаш дегән сөз мәлум бир нәрсини алаһидә бир мәхсәт үчүн бир тәрәпкә айрип қоюшни көрситиду. Қедимий Исраил хәлқи Йәһваға беғишланған алаһидә бир милләт еди. Амма бу милләт кишилири арисида йәнә алаһидә бир усулда бәзи шәхсләр Йәһваға беғишланған. Мәсилән, Һарунниң бешиға оралған сәллиниң алдиға «беғишлинишниң муқәддәс» бәлгүси болған пақирап туридиған алтун тахтай есилған. Бу кичик тахта униң алаһидә вәзиписигә, йәни баш роһанийлиққа айрилғанлиғини көрсәткән (Лав. 8:9). Нәзир қилинғанларму алаһидә усулда Йәһва Худаға беғишланған кишиләр еди. «Нәзир қилинғанлар» дегән сөз ибраний тилидики нәзир сөзидин келип чиққан болуп, у «айрип қоюлған» яки «беғишланған» дегән мәналарни билдүриду. Нәзир қилинғанлар Муса пәйғәмбәр арқилиқ чүшүрүлгән қанундики әшу кишиләр үчүн бәлгүләнгән қанун-қаидиләргә бойсунуши керәк еди (Сан. 6:2—8).

4. а) Һаятиңизни Йәһва Худаға беғишлиғиниңизда, пүтүн диққитиңизни қайси алаһидә мәхсәткә қаратқан болисиз? ә) «Өзидин ваз кәчиш» дегән немә? (Рәсимгиму қараң.)

⁴ Сиз өзүңизни Йәһва Худаға беғишлисиңиз, Әйса Мәсиһниң шагирти болушни халиған болисиз вә Худаниң ирадисини орунлаш һаятиңиздики әң муһим ишқа айлиниду. Ундақта Худаға өзүңизни беғишлаш үчүн немиләрни қилишиңиз керәк? Әйса Мәсиһ мундақ дәйду: «Әгәр кимду-ким мени әгәшкүси кәлсә, өзидин ваз [кәчсун]» (Мәт. 16:24). Грек тилидики «өзидин ваз кечиш» дәп тәрҗимә қилинған ибарини «чоқум өз-өзигә яқ дейиши керәк» дәпму тәрҗимә қилишқа болиду. Сиз Йәһваға өзини беғишлиған хизмәтчи сүпитидә Униң ирадисигә зит келидиған һәрқандақ нәрсигә яқ дейишиңиз керәк (Кор. 2-х. 5:14, 15). Бу «тәнниң ишлиридин», йәни җинсий әхлақсизлиқтин ваз кечишни өз ичигә алиду (Гал. 5:19—21; Кор. 1-х. 6:18). Бундақ чәкләш һаятиңизни қийинлаштурамду? Әгәр сиз Йәһвани сөйсиңиз, һәмдә Униң чәкләйдиған қанунлири сиз үчүн пайдилиқ екәнлигигә ишәнсиңиз, Униң әмирлири еғир жүк болмайду (Зәб. 119:97; Йәшая 48:17, 18). Николас исимлиқ бир бурадәр мундақ дәйду: «Сиз Йәһваниң қанунлирини әркинлигиңизни чәкләйдиған түрминиң төмүр балдақлириға охшатсиңиз болиду яки уни сизни ширдин қоғдайдиған төмүр қәпәзниң балдақлири дәп қарисиңизму болиду. Буниңға қандақ қарашни таллаш өзүңизгә бағлиқ».

5. а) Йәһваға өзүңизни қандақ беғишлайсиз? ә) Йәһваға беғишлаш билән суға чөмдүрүлүшниң арисида қандақ пәриқ бар? (Рәсимгиму қараң.)

⁵ Йәһваға өзүңизни қандақ беғишлайсиз? Буниң үчүн сиз бир дуа қилип, ялғуз Униңғила ибадәт қилиш вә Униң ирадисини һаятиңизда биринчи орунға қоюшни вәдә қилисиз. Сиз давамлиқ «Йәһва Худани пүтүн жүригиң, пүтүн җениң, пүтүн әқлиң һәм пүтүн күчүң билән сөйгин» дегән әмир бойичә яшашқа вәдә қилисиз (Марк 12:30). Өзүңизни беғишлаш — сиз шәхсән қилидиған иш. Уни пәқәт сиз вә Йәһва билиду. Әксичә чөмдүрүлүш болса, көпчилик алдида ашкарә қилинидиған иш. Бу көпчиликкә өзүңизни Йәһваға беғишлиғанлиғиңизни көрситиду. Өзүңизни беғишлаш бир муқәддәс қәсәм болуп, сиз өз-өзүңиздин шу қәсәмгә садиқ яшашни қарар чиқарғандәк, Йәһва сиздин шу қәсимиңизгә садиқ яшишиңизни күтиду (Вәз 5:4, 5).

НӘМӘ ҮЧҮН ӨЗҮҢИЗНИ ЙӘҺВАҒА БЕҒИШЛАЙСИЗ?

6. Кишини өзини Йәһва Худаға беғишлашқа немиләр дәвәт қилиду?

⁶ Өзүңизни Йәһваға беғишлишиңизниң әң асасий сәвәви болса, сизниң Яратқучиға болған сөйгү-муһәббитиңиз. Бу сөйгү-муһәббәт пәқәт һис-туйғуға асасланмиған. Әксичә, тоғра билимгә вә роһий чүшинишкә асасланған. Сиз Йәһвани вә Униң ирадисини көпирәк тонуғансири, Униңға болған сөйгү-муһәббитиңиз барғансири чоңқурлишиду (Кол. 1:9). Сиз Муқәддәс китапни тәтқиқ қилип үгәнгәндин кейин, шуниңға қәтъий ишинисиз: 1) Йәһва Худа һәқиқәтән мәвҗут, 2) Муқәддәс китап Худаниң илһамландуруши билән йезилған вә 3) У Өз тәшкилатини ишлитип, Өз ирадисини әмәлгә ашуриду.

7. Өзүмизни Йәһваға беғишлаштин илгири қандақ қәдәмләрни ташлишимиз лазим?

⁷ Өзини Йәһваға беғишлиғанлар Худа Сөзидики асасий тәлиматларни билиши вә Униң өлчәм-қаидилиригә мас һаят кәчүрүши керәк. Улар қолидин келишичә өз шараитиға мас һалда башқиларға өзиниң үгәнгәнлирини ейтип бериду (Мәт. 28:19, 20). Уларниң Йәһваға болған меһир-муһәббити күчәйгәнсири, пәқәт Униңға садақәтмәнлик билән хизмәт қилиш арзу-истиги күчийиду. Сизму шундақ қиламсиз? Әгәр сиздиму шундақ сөйгү-муһәббәт болса, өзүңизни беғишлап, суға чөмдүрүлүшни пәқәт сизгә Муқәддәс китап үгитиватқан кишини яки ата-аниңизни хошал қилиш үчүн қилишим керәк дәп қаримайсиз яки достлириңизға қарап, шундақ қилишни ойлимайсиз.

8. Миннәтдарлиқ өзүңизни Йәһваға беғишлашни қарар қилишиңизға қандақ ярдәм бериду? (Зәбур 116:12—14)

⁸ Йәһва Худаниң қилған барлиқ ишлири тоғрилиқ тәпсилий ойлиғиниңизда, сиз тәбиийла өзүңизни Униңға беғишлашни қарар қилисиз (Зәбур 116:12—14ни оқуң). Муқәддәс китап Йәһва Худани «яхши һәм мукәммәл» һәдийәләрни бәргүчи дәп тәсвирләйду (Яқуп 1:17). У бәргән барчә һәдийәләрниң арисида әң қиммәтлик соғат болса, Өз Оғли Әйсани төләм үчүн бериштур. Ойлап көрүң: бу төләм арқилиқ Йәһва сизгә чәксиз сөйгү-муһәббитини ипадиләп, Униң билән дост болуш вә мәңгү яшаш үмүтини бәрди (Йоһ. 1-х. 4:9, 10, 19). Сизму Йәһваға өзүңизни беғишлаш арқилиқ әшу чәксиз сөйгү-муһәббәт вә башқа барлиқ бәрикәтлири үчүн Худаға болған миннәтдарлиғиңизни ипадиләләйсиз (Қ. шәр. 16:17; Кор. 2-х. 5:15). Бу тоғрисида «Мәңгү шат-хорам яшаң!» китавиниң 46-дәрис, 4-абзацта йезилған вә «Худаға берәләйдиған соғилириңиз» намлиқ үч минутлуқ видеони көрүң.

ӨЗҮҢИЗНИ БЕҒИШЛАШ ВӘ ЧӨМДҮРҮЛҮШКӘ ТӘЙЯР БОЛДИҢИЗМУ?

9. Немә үчүн бир киши мәҗбурий һалда өзини Йәһваға беғишлашни қарар қилмаслиғи керәк?

⁹ Бәлким сиз өзүңизни беғишлаш вә чөмдүрүлүшкә тәйяр әмәстәк һис қиливатисиз. Йәһваниң өлчәм-қаидилиригә мас яшаш үчүн һаятиңизда бәзи өзгәртишләрни қилишиңиз керәк яки иман-етиқадиңизни техиму күчәйтиш үчүн көпирәк вақит чиқиришиңиз керәк, дәп ойлайдиғансиз (Кол. 2:6, 7). Муқәддәс китапни үгиниватқан кишиләрниң һәммисила охшаш сүръәттә алға илгирәлмәйду. Яшларниң һәммиси охшаш бир яшта өзини беғишлаш вә чөмдүрүлүшкә тәйяр болалмайду. Өзүңизниң қандақ өзгәртишләрни қилишиңиз керәклигини чүшинишкә тиришиң (Гал. 6:4, 5).

10. Әгәр өзүңизни Худаға беғишлаш вә суға чөмдүрүлүшкә техи тәйяр әмәстәк һис қилсиңиз, немиләрни қилсиңиз болиду? («Һәқиқәттә чоң болғанлар үчүн мәслиһәтләр» дегән рамкиғиму қараң.)

¹⁰ Һәтта сиз өзүңизни Йәһваға беғишлашқа техи тәйяр әмәстәк һис қилсиңизму, бу мәхситиңизгә йетиш үчүн давамлиқ тиришиң. Өзгәртишкә тегишлик тәрәплириңиз болса, Йәһва Худадин бәрикәт сорап, дуа қилиң (Флп. 2:13; 3:16). У чоқум дуайиңизни аңлайду вә дуайиңизға җәзмән җавап бериду (Йоһ. 1-х. 5:14).

НЕМӘ ҮЧҮН БӘЗИЛӘР ИККИЛИНИП АРҚИҒА СҮРИДУ?

11. Йәһва Худа Өзигә садақәтмән болуп қелишимизға қандақ ярдәм бериду?

¹¹ Бәзиләр өзини беғишлап, чөмдүрүлүшкә тәйяр болған болсиму, улар бу қәдәмни бесиштин иккилинип қалиду. Бәлким, улар: «Әгәр мән чөмдүрүлгәндин кейин еғир гуна өткүзүп қоюп, җамаәттин чиқирилсамчу?»— дәп ойлиши мүмкин. Әгәр сиз шундақ ой-пикирдә болсиңиз шуниңға ишиниңки, Йәһва сизгә һәммә ишта Уни хурсән қилиш үчүн тоғра йолда меңишиңизға ярдәм беридиған барлиқ нәрсиләрни бериду (Кол. 1:10). Худа йәнә тоғра ишларни қилишиңиз үчүн күч бериду. У Өзиниң башқа нурғун кишиләргиму шундақ ярдәм қилғанлиғини аллиқачан көрсәткән (Кор. 1-х. 10:13). Шу сәвәптин наһайити аз кишиләр җамаәттин чиқирилған. Йәһва Өз хәлқиниң Униңға садиқ болуп қелишиға ярдәм бериду.

12. Еғир гуналарни өткүзүштин қандақ сақлиналаймиз?

¹² Һәрбир мукәммәл болмиған инсан, хата ишларни қилишқа майил болиду (Яқуп 1:14). Амма езиқтурулушқа дуч кәлгәндә, қандақ һәрикәт қилиш өзүңизгә бағлиқ. Есиңиздә болсунки, қандақ яшашни пәқәт өзүңиз қарар қилалайсиз. Буниңға қарши көзқараштики бәзи кишиләр һис-туйғулиримизни вә иш-һәрикәтлиримизни өзүмиз контрол қилалмайсиз дейишиду. Амма уларниң көзқарашлири хата. Сиз хата арзу-һәвәслириңизни контрол қилишни үгинәләйсиз. Һәтта бәзидә шундақ аздурулушларға дуч кәлсиңиз, амма яман ишни қилмаслиқ таллалайсиз. Мәсилән, һәр күни Йәһваға дуа қилиш, Йәһваниң Сөзи болған Муқәддәс китапни шәхсий тәтқиқ қилип үгиниш яхши адитини давамлаштуруш, жиғилишлириға қатнишиш, өз иман-етиқадимиз һәққидә башқиларға ейтип бериш гуналардин сақлайду. Мошу қәдәм басқучларни бесиш, өзини беғишлаш қәсимигә садиқ яшишиңиз үчүн күч бериду. Йәнә шуни қәтъий унтумаңки, Йәһва сизниң қәсимиңизгә садиқ яшишиңизға ярдәм бериду (Гал. 5:16).

13. Йүсүп биз үчүн қандақ үлгә қалдурған?

¹³ Әгәр езиқтурушқа дуч кәлгәндә, немә иш қилидиғанлиғини алдин-ала қарар қилған болсиңиз, Йәһва Худаға бәргән қәсимиңизгә садиқ яшаш асанирақ болиду. Муқәддәс китапта шундақ қәсимигә садиқ яшиған нурғун кишиләр тилға елинған. Гәрчә улар намукәммәл кишиләр болсиму, улар тоғра иш қилған. Мәсилән, Потипарниң аяли Йүсүпни қайта-қайта аздурушқа урунған. Амма Йүсүп немә қилиши керәклигини аллиқачан қарар қилған. Шуңа у ғоҗайиниң аялини рәт қилған вә у мундақ дегән: «Қандақму мән бундақ зор яғузлуқни қилип, Худа алдида гунакар болай?» (Ярит. 39:8—10) Биз шуни ениқ көримизки, Йүсүп Потипарниң аялиниң аздурушидин илгири өзиниң немә қилиши керәклигини ениқ билгән. Шуңа Йүсүп езиқтурулушқа дуч кәлгәндә, униңға қарши туруш асан болған.

14. Езиқтурулғанда гуна садир қилишни рәт қилишни қандақ үгинәләймиз?

¹⁴ Сиз Йүсүпкә охшаш қәтъий ирадилик болуш үчүн немә қилалайсиз? Езиқтурушқа дуч кәлгәндә, немә иш қилидиғанлиғиңизни һазирниң өзидә қарар қилиң. Йәһва өч көрүдиған ишларға дәрһал яқ дейишни үгинивелиң (Зәб. 97:10; 119:165). Һәтта улар тоғрилиқ ой-хиял қилиштинму өзүңизни нери тутуң. Шундақ болғанда, езиқтурулғанда гуна садир қилиштин сақлиналайсиз. Чүнки сиз немә иш қилишиңизни билисиз вә шундақ қилишни аллибурун қарар қилип болған.

15. Киши өзиниң Йәһвани әстаидил издәватқанлиғини қандақ көрситәләйду? (Ибранийларға 11:6)

¹⁵ Бәлким, сиз һазир һәқиқәтни тапқанлиғиңизни билисиз вә Йәһваға пүтүн вуҗудиңиз билән хизмәт қилишни халайдиғансиз. Амма өзүңизни Йәһваға беғишлаш вә чөмдүрүлүштин өтүштин әнсирәп, иккилинип туридиғансиз. Әгәр сиз шундақ вәзийәттә болсиңиз, падиша Давуттәк қилсиңиз болиду. У Йәһваға ялвуруп, шундақ дегән: «Мени чоңқур тәкшүрәп, Худайим, жүригимдә немә барлиғини билгинә. Шундақла мени синап, тәшвишкә әкелидиған нийәтлиримни билгинә. Қариғина, қәлбим мени ховуп йолға елип кетиватамду вә әбәдий йолда маңа Өзәң рәһбәрлик қилғина» (Зәб. 139:23, 24). Сиз өзүңизни беғишлап, суға чөмдүрүлүш мәхситиңизгә йетиш үчүн давамлиқ тиришип, Йәһвани әстаидил издәватқанлиғини көрсәттиңиз. Йәһва чоқум бундақ кишиләрни бәрикәтләйду (Ибранийларға 11:6ни оқуң).

ЙӘҺВАҒА ЙЕҚИНЛИШИШНИ ДАВАМЛАШТУРУҢ

16, 17. Йәһва Худа һәқиқәттә өскән яшларни Өзигә қандақ җәлип қилиду? (Йоһан 6:44)

¹⁶ Һәзрити Әйса өзиниң шагиртлириниң һәммисини Йәһваниң җәлип қилғанлиғини ейтқан (Йоһан 6:44ни оқуң). Бу немини билдүридиғанлиғини ойлинип көрүң. Йәһва Өзигә җәлип қилған һәрбир адәмдә бар артуқчилиқ тәрәпни көриду. У әшу кишини Өзиниң алаһидә мүлки яки қиммәтлик байлиғи дәп қарайду (Қ. шәр. 7:6). Йәһва сизгиму шундақ қарайду.

¹⁷ Бәлким, ата-аниңиз сизгә кичигиңиздин һәқиқәтни тонутуп, Йәһваға ибадәт қилишни үгәткәнду. Шуңа Йәһва сизни Өзигә җәлип қилмиди дәп ойлишиңиз мүмкин. Лекин Муқәддәс китапта мундақ дейилгән: «Худаға йеқинлишиңлар һәм Уму силәргә йеқинлишиду» (Яқуп 4:8; Тар. 1-яз. 28:9). Сиз тәшәббускарлиқ билән Йәһваға йеқинлашсиңиз, У сизгә йеқинлишиш арқилиқ җавап қайтуриду. Йәһва сизниң бир топ кишиләрниң арисида болғанлиғиңизға қаримайду. Униң нәзәридә сиз алаһидә. У һәрбир кишини җәлип қилиду, һәтта һәқиқәттә чоң болуватқан яшларниму Өзигә җәлип қилиду. Әгәр бир киши тәшәббускарлиқ билән Йәһваға йеқинлашса, худди Яқуп 4:8-айәттә диққәт қилғинимиздәк, Уму у кишигә йеқинлишиду (Салоникилиқларға 2-хәт 2:13ни селиштуруң).

18. Келәрки мақалидә немиләрни муһакимә қилимиз? (Зәбур 40:8)

¹⁸ Өзүңизни Йәһваға беғишлап суға чөмдүрүлсиңиз, Әйса Мәсиһни үлгә қилған болисиз. Йәһва Худа униңдин немини тәләп қилған болса, шуни қилиш үчүн өзини Атисиға беғишлиған (Зәбур 40:8ни оқуң; Ибр. 10:7). Кейинки мақалидә биз чөмдүрүлгәндин кейин давамлиқ Йәһваға садақәтмәнлик билән хизмәт қилишимизға немә ярдәм беридиғанлиғи һәққидә үгинимиз.