Гуманлардин қутулушқа немә ярдәм берәләйду?

1, 2. а) Худа хизмәтчилириниң қандақ гуманлири пәйда болуши мүмкин? ә) Бу мақалидә биз немиләрни көрүп чиқимиз?

ҚАНЧӘ яшта болмайли, бәзидә һәммимиздә гуманларa пәйда болуп туриду. Мәсилән, яш қериндишимиз «Йәһва Худа һәқиқәтән маңа көңүл бөләмду?» дәп ойлиниши мүмкин. Бәлким, у чөмдүрүлүштин өтәйму, өтмәйму дәп иккилинип жүргәнду. Йә болмиса, яш чеғида байлиқни қоғлимай, әксинчә Худаға хизмәт қилишни биринчи орунға қойған оттура яшлиқ аилә бешини алайли. Униң аилиси пулдин қисиливатқанда, «тоғра қарар қилдимму» дәп гуманлиниши мүмкин. Әнди яшинип қалған бир қериндишимиз тоғрилиқ ойлап бақайли. У Йәһваға бурунқидәк хизмәт қилалмиғанлиқтин, көңли чүшиду. Сиздиму: «Йәһва Худа маңа көңүл бөләмду? Худаға хизмәт қилиш үчүн бәзи нәрсиләрдин баш тартқиним тоғра болдиму? Мән Йәһва Худаға техичә керәкму?» дегән ойлар болғанму?

² Шундақ соалларға җавап тапмисақ, ишәнчимиз аҗизлишип, Йәһва Худаға хизмәт қилишни тохтитишимиз мүмкин. Әгәр 1) Йәһва Худаниң сизгә көңүл бөлидиғанлиғиға, 2) өз вақтида дурус қарар чиқарғанлиғиңизға яки 3) Худа сизни бурунқидәк қәдирләйдиғанлиғиға гуман қилсиңизчу? Келиңлар, Муқәддәс китапниң бу вәзийәтләрдә қандақ ярдәм берәләйдиғанлиғини көрүп чиқайли.

ГУМАНЛАРДИН ҚАНДАҚ ҚУТУЛАЛАЙМИЗ?

3. Гуманлиримиздин қутулушниң бир йоли немә?

³ Гумандин қутулушниң бир йоли — Худа Сөзидин бизни ғәмгә салидиған соалларниң җававини тепиш. Шундақ қилсақ, Йәһва Худаға болған ишәнчимиз вә Униң билән достлуғимиз мәһкәм болуп, «етиқатта чиң» туралаймиз (Кор. 1-х. 16:13).

4. «Һәммә нәрсини» тәкшүрүш үчүн немә қилишимиз керәк? (Салоникилиқларға 1-хәт 5:21)

⁴ Салоникилиқларға 1-хәт 5:21ни оқуң. Муқәддәс китап бизни «һәммә нәрсигә» көз йәткүзүшкә дәвәт қилиду. Буни қандақ қилсақ болиду? Өзүмиз тоғра дәп һесаплиған нәрсиләрни Худа Сөзидә йезилғанлар билән селиштуруп көрүшимиз керәк. Мәсилән, «Йәһва Худаниң мениң билән кари йоқ» дәп ойлап жүргән яш қериндашни алайли. Униң давамлиқ шундақ ойлап жүривәргини тоғриму? Яқ. У Муқәддәс китапни тәтқиқ қилип, һәммини тәкшүрүп, Йәһва Худаниң униңға һәқиқәтән қандақ қарайдиғанлиғиға көз йәткүзүши муһим.

5. Йәһва Худа гуман туғдурған соаллиримизға қандақ җавап берәләйду?

⁵ Муқәддәс китапни оқуғинимизда, Йәһва Худа бизгә сөзлигәндәк болиду. Лекин Униң нәқ бир нәрсә тоғрилиқ көзқаришини билиш үчүн, күч чиқиришимиз керәк. Жүригимизгә арам бәрмәйватқан нәрсигә бағлиқ айәтләрни тепишқа тиришишимиз лазим. Буниң үчүн тәшкилатимиз чиқарған издиниш қураллирини қоллиниң (Пәнд н. 2:3—6). Издинишни дуа билән башлап, Йәһва Худадин соаллириңизға җавап тепиш үчүн ярдәм сораң. Кейин вәзийитиңизгә тоғра келидиған Муқәддәс китаптики принципларни издәң. Шундақла охшаш қийинчилиққа учриған Худаниң хизмәтчилири тоғрисида Муқәддәс китаптин оқусиңиз болиду.

6. Учришишлиримиз гуманларни йеңишимизгә қандақ ярдәм бериду?

⁶ Биз Йәһва Худани җамаәт учришишлиридиму «аңлаймиз». Уларға дайим барсақ, нутуқтин яки қериндашларниң җаваплиридин гуманланмаслиққа ярдәм беридиған ойларни аңлишимиз мүмкин (Пәнд н. 27:17). Келиңлар, биздә пәйда болуши мүмкин бәзи гуманларни көрүп чиқайли.

ЙӘҺВА ХУДА МЕНИ БАЙҚАМДУ ДӘП ГУМАНЛАНҒАНДА

7. Бәзиләрниң қандақ соали болуши мүмкин?

⁷ «Йәһва Худа маңа растинла көңүл бөләмду?» дегән гуманиңиз болғанму? Әгәр өзүңизни һечнемигә яримас дәп қарисиңиз, Аләмниң Яратқучиси билән дост болуш сизгә мүмкин әмәстәк көрүнидиғанду. Бәлким, Давут падишаму шундақ ойлиған. У Йәһваниң адәмләргә көңүл бөлгәнлигигә һәйран болуп, мундақ дегән: «Йәһва! Сән уни байқайдиған адәм, у ким? Вә диққитиңни униңға бөлүдиған, өлүп кетидиған кишиниң оғли, у ким?» (Зәб. 144:3) Шуңа, «Худа маңа көңүл бөләмду?» дегән соалниң җававини қәйәрдин тапалайсиз?

8. Самуилниң 1-язмиси 16:6, 7, 10—12-айәтләргә мас, Йәһва Худа инсанниң немисигә диққәт қилиду?

⁸ Муқәддәс китаптин билгинимиздәк, Йәһва башқилар көзгә илмайдиған адәмләргә көңүл бөлиду. Мәсилән, Йәһва Худа Самуил пәйғәмбәрни падиша тәйинләш үчүн Йишайниң өйигә әвәткән. Йишай сәккиз оғлидин йәттисини чақирип, кәнҗә оғли Давутни чақирмиғанb. Бирақ Худа Давутни таллиған (Самуилниң 1-язмиси 16:6, 7, 10—12ни оқуң). Чүнки Йәһва Худа Давутниң қандақ адәм екәнлигини, йәни Уни бәк яхши көргәнлигини билгән.

9. Йәһва Худаниң сизгә көңүл бөлидиғанлиғиға немә үчүн ишәнч қилалайсиз? (Рәсимгиму қараң.)

⁹ Йәһва Худа сизгә қандақ көңүл бөлүп кәлгәнлиги тоғрилиқ ойлинип беқиң. У дәл сизгә керәк болған әң яхши мәслиһәтни бериду (Зәб. 32:8). Әгәр У сизни яхши тонумиса шундақ қилаттиму? (Зәб. 139:1) Йәһва Худаниң мәслиһитигә әмәл қилип, сизгә қандақ ярдәм бәргәнлигини көргәндә, Униң сизгә көңүл бөлидиғанлиғиға ишәнчиңиз камил болиду (Тар. 1-яз. 28:9; Әлч. 17:26, 27). Йәһва Униңға хизмәт қилиш вә бойсунуш үчүн чиқириватқан күчиңизни байқайду. Униңдин башқа, У есил пәзиләтлириңизни көрүп, сизниң Достуңиз болушни халайду (Йәр. 17:10). Сизму Униң билән дост болушни халисиңиз, У наһайити хошал болиду (Йоһ. 1-х. 4:19).

ЧИҚАРҒАН ҚАРАРЛИРИҢИЗДИН ГУМАНЛАНҒАНДА

10. Өтмүштики қарарлиримиз тоғрисида ойлиғанда, қандақ соаллар пәйда болуши мүмкин?

¹⁰ Гайида бәзиләр чиқарған қарарлириниң тоғра болғанлиғиға гуманлиниши мүмкин. Бәлким, улар Йәһваға көпирәк хизмәт қилиш үчүн жуқури маашлиқ ишни яки тиҗаритини рәт қилған. Лекин бираз жиллардин кейин тонушлириниң пулдин қисилмай баяшат яшаватқанлиғини көрүп: «Йәһва Худаға хизмәт қилимән дәп мошуниң һәммисидин баш тартқиним дурус болғанму? Шу вақитта яхши пул тапсам, һазир қийналмай яшаттимму?» дәп гуманлиниши мүмкин.

11. Зәбур 73-бапниң язғучисини немиләр ғәм-тәшвишкә салған?

¹¹ Әгәр сиздиму шундақ гуман пәйда болса, Зәбур 73-бапниң язғучиси һәққидә ойлинип беқиң. У Худаға хизмәт қилмиғанларниң сақ-саламәт, бай вә һеч ғәм-қайғусиз яшиғанлиғини көргән (Зәб. 73:3—5, 12). У уларниң бир қаримаққа бәхитлик һаятини көргәндә, өзиниң Йәһва Худаға қилған хизмити бекар болғандәк һис қилған. Шундақ ойлар униңға арам бәрмәй, у күн бойи қийналған (Зәб. 73:13, 14). У бу сәлбий һис-туйғулар билән қандақ күрәшкән?

12. Зәбур язғучиси гуманлирини қандақ йәңгән? (Зәбур 73:16—18)

¹² Зәбур 73:16—18ни оқуң. Зәбур язғучиси Худаниң муқәддәс җайиға кирип, җимҗит йәрдә алдиримай ойланған. У башқилар ғәмсиз яшаватқандәк көрүнсиму, уларниң келәчәккә болған үмүти йоқлиғини чүшинип йәткән. У Йәһваға хизмәт қилишниң әң яхши қарар екәнлигигә көз йәткүзүп, көңүл хатирҗәмлигигә еришкән. Нәтиҗидә, у Йәһва Худаға давамлиқ садиқ хизмәт қилишқа қәтъий қарар қилған (Зәб. 73:23—28).

13. Өтмүштә чиқарған қарарлириңизға пушайман қилсиңиз, немә қилалайсиз? (Рәсимгиму қараң.)

¹³ Худа Сөзиниң ярдими билән Зәбур язғучисиға охшаш, сизму көңүл хатирҗәмлигигә еришәләйсиз. Қандақ қилип? Қолуңизда бар яхши нәрсиләр, мәсилән Йәһва Худа сизгә бәргән бәрикәтләр тоғрилиқ ойлинип беқиң. Лекин Йәһваға хизмәт қилмайдиған адәмләрни немә күтмәктә? Уларниң һечқандақ үмити болмиғанлиқтин, нурғунлири үчүн жуқури маашлиқ иш вә раһәт һаят кәчүрүш муһим. Амма сизгә Йәһва Худа һазирму, йеңи дуниядиму мол бәрикәтләрни беришкә вәдә қилиду (Зәб. 145:16). Буниңдин башқа, сиз Йәһваға хизмәт қилмай, башқа мәхсәтләргә интилған болсиңиз, һазир һаятиңиз қандақ болидиғанлиғини ениқ билмәйсиз. Лекин қарарлириңиз Худаға вә адәмләргә болған меһир-муһәббәткә асасланса, һечқандақ соғидин қуруқ қалмайдиғанлиғиңиз шәк-шүбһисиз.

ЙӘҺВАҒА ПАЙДАМ БАРМУ ДӘП ГУМАНЛАНҒАНДА

14. Бәзиләр немидин гуманлиниду?

¹⁴ Худаниң бәзи хизмәтчилири саламәтлиги начарлашқанлиқтин, яшанған яки мейип болғанлиқтин, халиғинидәк көп хизмәт қилалмайду. Шуңа улар Йәһва Худа үчүн һәқиқәтән қәдирлик екәнлигигә гуман қилип, «мениң Йәһваға һеч пайдам йоқ» дәп ойлиши мүмкин.

15. Зәбур 71-бапниң язғучиси немигә ишәнгән?

¹⁵ Зәбур 71-бапниң язғучисидиму шундақ ғәм-әндишиләр болған. У Худаға дуа қилип: «Һалим қалмиғанда, ваз кәчмигинә»,— дәп сориған (Зәб. 71:9, 18). Амма у садиқ болуп қалса, Йәһва Худаниң ярдәм берип, уни қоллап-қувәтләйдиғанлиғиға ишәнчиси камил болған. Бизму зәбур язғучисиға охшаш, яшинип қалғинимизға яки саламәтлигимизниң начарлишиға қаримастин, қолумиздин кәлгининиң һәммини қилсақ, Йәһва Худани хошал қилимиз (Зәб. 37:23—25).

16. Яшанған қериндашлар Йәһва Худа вә башқилар үчүн немә қилалайду? (Зәбур 92:12—15)

¹⁶ Әзиз яшанған етиқатдашлар, өзүңларға Йәһва Худа қариғандәк қараңлар. Күчтин қалсиңизму, садақәтмәнлик билән хизмәт қиливәрсиңиз, Йәһва Худа сизгә чоқум ярдәм бериду (Зәбур 92:12—15ни оқуң). Қолуңиздин кәлмәйдиған әмәс, қилалайдиған ишларға көпирәк көңүл бөлүң. Сизниң давамлиқ садиқ хизмәт қиливатқанлиғиңиз башқиларни илһамландуриду. Шундақла қериндашларға көңүл бөлүп, сөзлишип қойсиңиз, улар хошал болуп қалиду. Уларға Йәһваниң сизгә қандақ ярдәм қилип келиватқанлиғи вә қайси вәдиләрниң орунлинишини төрт көзүңиз билән күтиватқанлиғиңизни ейтип бериң. Башқилар үчүн қилған дуалириңизниң мол күчи барлиғини унтумаң (Пет. 1-х. 3:12). Вәзийитимиз мәйли қандақ болсун, һәммимиз Йәһва Худа вә башқилар үчүн бирнәрсә қилалаймиз.

17. Немә үчүн биз өзүмизни башқилар билән селиштурмаслиғимиз керәк?

¹⁷ Йәһва Худаға көпирәк хизмәт қилмайватимән дәп ғәм қилсиңиз, У қолуңиздин кәлгән һәммә ишни қәдирләйдиғанлиғини унтумаң. Өзүңизни башқилар билән селиштуруштин нери болуң. Немә сәвәптин? Чүнки Йәһва Худа хизмәтчилирини бир-бири билән селиштурмайду (Гал. 6:4). Мәсилән, Мәрийәм Әйсадин интайин қиммәтбаһа майни айимиған (Йоһ. 12:3—5). Кәмбәғәл тул аял болса, ибадәтханидики сандуқчиға ушшақ икки тийинни салған (Луқа 21:1—4). Лекин Әйса бу аялларни бир-бири билән селиштурмай, әксичә, уларниң мәһкәм ишәнчисини көргән. Йәһва Худаму Уни яхши көргәнликтин вә Униңға ишәнгәнликтин қилған ишлириңизни жуқури баһалайду. Бу өзүңизгә қанчилик аз көрүнсиму, Худа бу ишларни чоқум қәдирләйду.

18. Гуманлардин қутулушимизға немә ярдәм бериду? («Худа Сөзиниң ярдими билән гуманларни йеңәләйсиз» намлиқ рамкиғиму қараң.)

¹⁸ Бәзидә Һәммимиздә гуманлар пәйда болуп туриду. Лекин мошу мақалидин көргинимиздәк, Муқәддәс китапниң ярдими билән уларни йеңип чиқалаймиз. Шуңа гумандин қутулуш үчүн күч чиқириң, шу чағда гуманниң орнини ишәнч алиду. Йәһва Худа шәхсән сизгә көңүл бөлиду. У сизниң Униңға хизмәт қилиш үчүн бәзи нәрсиләрдин ваз кәчкәнлигиңизни һечқачан унтумайду вә сизни сөзсиз мукапатлайду. Йәһва һәрбир садиқ хизмәтчисини яхши көридиғанлиғиға вә ғәмхорлуқ қилидиғанлиғиға гуман қилмаң.