Яқупниң ахирқи сөзлиридин немини үгинимиз? (2-қисим)

1. Бу мақалидә Яқупниң пәйғәмбәрлик сөзлириниң қайси қисмини муһакимә қилимиз?

ЯҚУПНИҢ оғуллири униң өп-чөрисигә жиғилип олтирип, һәрбиригә немә ейтидиғанлиғини зәң қоюп тиңшаватиду. Алдинқи мақалидә биз Рувим, Шимон, Лавий вә Йәһудаға ейтқан сөзлири уларни һәйран қалдурғанлиғини биливалдуқ. Шуңа улар дадиси Яқупниң қалған сәккиз оғлиға немә ейтидиғанлиғини билишни халиған. Келиңлар, униң Зәбулун, Иссакар, Дан, Гад, Ашер, Нафтали, Йүсүп вә Бениаминға ейтқан сөзлиридин қандақ савақ алалайдиғанлиғимизни көрүп чиқайлиa.

ЗӘБУЛУН

2. Яритилиш 49:13тики Яқупниң пәйғәмбәрлик сөзлири қандақ әмәлгә ашқан? (Рамкиғиму қараң.)

² Яритилиш 49:13ни оқуң. Яқупниң Зәбулунниң әвладлири деңиз қирғиғида Вәдә қилинған зиминида яшайдиғанлиғини ейтқан. Униң әвлади бу йәргә 200 жилдин ошуғирақ вақиттин кейин егә болған. Улар Җәлилийә деңизи билән Оттура деңизниң оттурисидики зиминда җайлашқан. Зәбулунниң әвладиға хошал болушқа немә сәвәп болған? Икки деңизниң оттурисида чегара болмиғанлиқтин, улар асанла сода-сетиқ билән шуғуллиналатти. Шуңа Муса пәйғәмбәр: «Зәбулун, өз йоллириңда хошал болғин» дегән пәйғәмбәрлик сөзләрни ейтқан (Қ. шәр. 33:18).

3. Бариға шүкүр қилишимизға немә ярдәм бериду?

³ Биз қандақ савақ алимиз? Мәйли қәйәрдә яшайли вә қандақ вәзийәттә болайли, бәхитлик болушимизға нурғун сәвәпләр бар. Бар нәрсигә шүкүр қилсақ, хошал болуп қалалаймиз (Зәб. 16:6; 24:5). Әгәр биз йоқ нәрсиләр тоғрилиқ ойлисақ, көңлүмиз йерим болуп қелиши мүмкин. Шуңа һаятиңизда һазир бар яхши нәрсиләр тоғрилиқ ойлашқа тиришиң (Гал. 6:4).

ИССАКАР

4. Яқуп Иссакарға немә дегән вә униң сөзлири қандақларчә әмәлгә ашқан? (Яритилиш 49:14, 15) (Рамкиғиму қараң.)

⁴ Яритилиш 49:14, 15ни оқуң. Яқуп Иссакарни тиришчан әмгиги үчүн махтиған. У уни еғир жүкләрни көтирәләйдиған җанивар билән селиштурған. Шундақла Яқуп Иссакар яхши йәрни мирас алиду дәп ейтқан. Яқупниң сөзлири әмәлгә ешип, Иссакарниң әвладлири Иордан дәриясиниң бойида мол һосул беридиған йәрни мирасқа алған (Йәшуа 19:22). Иссакар қәбилиси өз йеридин һосул елиш үчүн тәр төкүп әмгәк қилғанлиғи сөзсиз. Лекин улар башқиларға ярдәм бериш үчүнму көп күч чиқарған (Пад. 1-яз. 4:7, 17). Мәсилән, Барақ вә аял пәйғәмбәр Дебора исраиллардин Сисараға қарши җәңдә ярдәм сориғанда, Иссакар қәбилиси уларға ярдәм бәргән қәбилиләрниң бири болған. Улар башқа вақитлардиму қериндашлириға дүшмәнгә қарши чиқишқа ярдәм бәргән (Һак. 5:15).

5. Немишкә Иссакарниң әвлатлиридин үлгә елишимиз керәк?

⁵ Биз қандақ савақ алалаймиз? Йәһва Худа Иссакар қәбилисиниң әмгигини қәдирлигәндәк, бизниңму садиқ хизмитимизни қәдирләйду (Вәз 2:24). Җамаәткә ғәмхорлуқ қилиш үчүн көп күч чиқиридиған бурадәрләрни алайли (Тим. 1-х. 3:1). Удул мәнада җәңгә қатнашмисиму, лекин улар җамаәттики қериндашларни Йәһва Худа билән болған мунасивитини бузидиған нәрсиләрдин қоғдаш үчүн бар күчини чиқириду (Кор. 1-х. 5:1, 5; Йәһ. 17—23). Буниңдин башқа, бу тиришчан бурадәрлиримиз етиқатдашларни илһамландуридиған нутуқларни тәйярлап, уларни учришишларда ейтиду (Тим. 1-х. 5:17).

ДАН

6. Дан қәбилиси қандақ вәзипини орунлиған? (Яритилиш 49:17, 18) (Рамкиғиму қараң.)

⁶ Яритилиш 49:17, 18ни оқуң. Яқуп Данни җәңдә ишлитилидиған аттәк чоң җаниварларға қарши чиқидиған иланға охшатқан. Дан қәбилиси наһайити җасур болуп, Исраилниң дүшмәнлиригә қарши чиқишқа тәйяр болған. Исраиллар Вәдә қилинған зиминға меңиватқанда, әң ахирида Дан қәбилиси меңип, һәммә қәбилиләрни арқа тәрипидин қоғдиған (Сан. 10:25). Гәрчә башқа қәбилиләр буни көрмисиму, Дан қәбилисиниң вәзиписи интайин муһим болған.

7. Тәшкилаттики һәрқандақ тапшуруққа қандақ қаришимиз керәк?

⁷ Биз қандақ савақ алалаймиз? Бәлким, сиз бир тапшуруқни орунлап, башқилар уни байқимиғанду. Сиз Ибадәт өйини тазилашқа яки асрап күтүшкә қатнашқан, конгресста бир хизмәтни атқурған яки башқа тапшуруқни орунлиған болушиңиз мүмкин. Ундақ болса, сиз махташқа сазавәр. Унтумаңки, Йәһва Худа сиз Униң үчүн қилған һәрқандақ ишиңизни байқап, уни қәдирләйду. Болупму, У сизниң махташқа еришиш үчүн әмәс, бәлки Униңға болған меһир-муһәббитиңизни көрситиш үчүн хизмәт қиливатқанлиғиңизни көргәндә интайин хошал болиду (Мәт. 6:1—4).

ГАД

8. Дүшмәнләр немә үчүн Гад қәбилисигә асанла һуҗум қилалиған? (Яритилиш 49:19) (Рамкиғиму қараң.)

⁸ Яритилиш 49:19ни оқуң. Яқуп Гадқа қарақчилар топлири һуҗум қилидиғанлиғини алдин-ала ейтқан. Тәхминән 200 жилдин кейин Гад қәбилиси Иордан дәриясиниң шәрқидики йәрни егиләвалди. Улар мирас алған зимин дүшмәнләрниң йеригә йеқин болғанлиқтин, қарақчилар топлири уларға пат-пат һуҗум қилатти. Лекин шу йәрдә нурғун яйлақлар болғанлиқтин, Гад қәбилиси шу йәрдә турушни халиған (Сан. 32:1, 5). Көргинимиздәк, улар җасур болған вә Йәһваниң уларға бәргән йерини қоғдашқа ярдәм беридиғанлиғиға ишәнгән. Шундақла жиллар давамида Гад қәбилиси Иорданниң қарши тәрипидики башқа қәбилиләргә ярдәм бериш үчүн әскәрлирини әвәткән (Сан. 32:16—19). Улар җәңдә болғанда, Йәһва Худа уларниң аяллири билән балилирини қоғдайдиғанлиғиға ишәнгән. Йәһва Худа Гад қәбилисини уларниң җасурлуғи вә қийин болғандиму башқиларға ярдәм бәргәнлиги үчүн бәрикәтлигән (Йәшуа 22:1—4).

9. Йәһва Худаға ишәнгәнлигимиз қарарлиримиздин қандақ көрүниду?

⁹ Биз қандақ савақ алалаймиз? Қийинчилиқларға қаримастин давамлиқ Йәһва Худаға хизмәт қилиш үчүн биз Униңға ишәнч бағлишимиз керәк (Зәб. 37:3). Һәтта бу оңай болмисиму, нурғун қериндашлар тәшкилатниң қурулуш ишлириға қатнишиду, вәз ейтқучилар аз йәрдә хизмәт қилиду яки башқа вәзипиләрни орунлаш үчүн көп күч чиқириду. Улар буларниң һәммисини Йәһва Худаниң ярдимигә ишәнгәнликтин қилиду (Зәб. 23:1).

АШЕР

10. Ашер қәбилиси немә қилиштин баш тартқан? (Яритилиш 49:20) (Рамкиғиму қараң.)

¹⁰ Яритилиш 49:20ни оқуң. Яқуп Ашерниң бай болуп, гүлләп яшнайдиғанлиғини алдин-ала ейтқан вә униң сөзлири әмәлгә ашқан. Ашер қәбилиси мирасқа алған йәр интайин һосуллуқ болған (Қ. шәр. 33:24). Уларниң зимини Оттура деңизниң йенида болуп, сода-сетиқ мәркизи болған Сидон портини өз ичигә алған. Лекин Ашер қәбилиси қананлиқларни шу йәрдин қоғлап чиқармиған (Һак. 1:31, 32). Ашерлиқлар бай болуп кәткәнликтин вә қананлиқлар уларға яман тәсир қилғанлиқтин, уларниң Йәһва Худаға болған меһир-муһәббити совуп кәткән. Мәсилән, һаким Барақ исраилларни қананлиқларға қарши җәңдә ярдәм беришкә сориғанда, Ашер қәбилиси уларға ярдәм бәрмигән. Шуңа улар Йәһва Худаниң исраилларни қутқузуш үчүн қилған мөҗүзилирини көрмәй қалған (Һак. 5:19—21). Барақ билән Дебора «Ашер деңизниң қирғиғида. . . тинич яшимақта» дәп ейтқан нахшиси уларни уятқа қалдурғанду (Һак. 5:17).

11. Немә үчүн пулни һаятимизда биринчи орунға қоюштин нери турушимиз керәк?

¹¹ Биз қандақ савақ алалаймиз? Биз Йәһва Худаға қолумизда әң яхшисини беришни халаймиз. Буниң үчүн биз бу дуниядики адәмләрниң “пул вә мал-дуния һаяттики әң муһим нәрсә” дегән көзқаришидин нери туришимиз керәк (Пәнд н. 18:11). Әлвәттә, һәммимиз пулға муһтаҗ, лекин биз үчүн Йәһва Худаға хизмәт қилиш пулдин муһимирақ (Вәз 7:12; Ибр. 13:5). Биз керәк әмәс нәрсиләргә егә болуш үчүн вақтимиз вә күчимизни исрап қилмаймиз. Буниң орниға бар күчимизни Йәһва Худаға хизмәт қилиш үчүн чиқиримиз. Әгәр Худаға садиқ болуп қалсақ, У бизгә йеңи дуниядики мәңгү һаятни соға қилиду (Зәб. 4:8).

НАФТАЛИ

12. Яқупниң Нафталиға ейтқан сөзлири қандақ әмәлгә ашқан? (Яритилиш 49:21) (Рамкиғиму қараң.)

¹² Яритилиш 49:21ни оқуң. Яқуп Нафталиниң чирайлиқ сөзләрни ейтидиғанлиғини бәшарәт қилған. Бәлким, бу Әйсаниң йәрдики хизмити вақтида ейтқан сөзлирини билдүргән. Әйса Нафтали қәбилисиниң мирасида җайлашқан Кәпәрнаһум шәһиридә көп вақит яшиған. Шуңа у уни «өз шәһири» дәп атиған (Мәт. 4:13; 9:1; Йоһ. 7:46). Йәшая пәйғәмбәр Әйса Мәсиһниң Зәбулун вә Нафтали қәбилилири үчүн йоруқлуқ болидиғанлиғини алдин-ала ейтқан (Йәшая 9:1, 2). Тәлим бериш арқилиқ Әйса «һәрхил хәлиқләрниң кишилирини йорутидиған һәқиқий нур» болған (Йоһ. 1:9).

13. Гәп-сөзлиримиз Йәһваниң жүригини хошал қилиши үчүн немә қилалаймиз?

¹³ Биз қандақ савақ алалаймиз? Йәһва Худа үчүн бизниң гәп-сөзлиримиз муһим. Йәһваниң жүригини хошал қилидиған сөзләрни қандақ ейталаймиз? Биринчидин, биз һәрқачан растини ейтишимиз керәк (Зәб. 15:1, 2). Шундақла биз башқиларға илһам-мәдәт беридиған сөзләрни ейтимиз. Мәсилән, башқилар яхши бир нәрсини қилғанда уларни махташқа тиришимиз. Шундақла башқиларниң хаталиқлирини тилға алмаймиз (Әфәс. 4:29). Буниңдин башқа, биз адәмләр билән техиму үнүмлүк сөһбәт башлашқа вә уларға Йәһва Худа тоғрилиқ ейтип беришни үгинәләймиз.

ЙҮСҮП

14. Йүсүп тоғрилиқ ейтилған бәшарәт қандақларчә әмәлгә ашқан? (Яритилиш 49:22, 26) (Рамкиғиму қараң.)

¹⁴ Яритилиш 49:22, 26ни оқуң. Яқуп оғли Йүсүптин интайин пәхирләнгән. Чүнки Йәһва Худа уни қериндашлири арисидин таллап, униңға алаһидә вәзипә бәргән. Яқуп Йүсүпни «мевилик дәрәқниң» шехи дәп атиған. Яқуп дәрәқ болса, Йүсүп униң шехи болған. Йүсүп Яқупниң сөйүмлүк аяли Раһилниң тунҗа оғли болған. Яқуп Лияниң чоң оғли Рувимниң орниға Йүсүпниң тунҗа оғуллуқ мирасни алидиғанлиғини ейтқан (Ярит. 48:5, 6; Тар. 1-яз. 5:1, 2). Бу сөзләр әмәлгә ашқан. Йүсүпниң оғуллири Әпраим билән Манасәдин Исраилниң икки қәбилиси чиқип, һәрбири алайтән мирас алған (Ярит. 49:25; Йәшуа 14:4).

15. Йүсүп адаләтсиз муамилигә учриғанда қандақ инкас қайтурған?

¹⁵ Яқуп «оқ-ячилар. . . [Йүсүпни] қистиди, униңға оқ атти вә униңға қарши адавәт сақлиди» дегән (Ярит. 49:23). Бу айәттә Йүсүпкә көрәлмәслик қилип, униңға адаләтсиз муамилә қилған вә җени азаплинишиға сәвәпчи болған қериндашлири тоғрилиқ ейтилған. Буниңға қаримастин, Йүсүп қериндашлириға өч болуп кәтмигән вә Йәһва Худани әйиплимигән. Яқуп ейтқандәк, Йүсүпниң «оқ-яси чиң турди, униң күчлүк қоллири әвришим қалди» (Ярит. 49:24). Синақларға дуч кәлгәндә Йүсүп Йәһва Худаға тайинип, қериндашлирини кәчүрүпла қоймай, йәнә уларға меһрибан муамилә қилған (Ярит. 47:11, 12). Йүсүп синақларниң уни техиму яхши адәм қилишиға йол қойған (Зәб. 105:17—19). Нәтиҗидә, у Йәһва Худа үчүн нурғун муһим ишларни қилған.

16. Биз синақларға дуч кәлгәндә Йүсүпни қандақ үлгә қилалаймиз?

¹⁶ Биз қандақ савақ алалаймиз? Синақлар сәвәвидин Йәһва Худаға вә етиқатдашлиримизға болған меһир-муһәббитиңиз совуп кәтмисун. Қийинчилиқларға қаримастин давамлиқ Йәһва Худаға хизмәт қилсақ, У бизгә нурғун муһим нәрсиләрни үгитиши мүмкин (Ибр. 12:7). Яратқучимиз бизгә Уни техиму яхши үлгә қилип, рәһим-шәпқәтлик вә кәчүрүмчан болушимизға ярдәм берәләйду (Ибр. 12:11). Шәк-шүбһисизки, Йәһва Худа Йүсүпкә бәрикәт бәргәндәк, бизгиму мол бәрикәт бериду.

БЕНИАМИН

17. Бениаминға ейтилған пәйғәмбәрлик сөзләр қандақларчә орунланған? (Яритилиш 49:27) (Рамкиғиму қараң.)

¹⁷ Яритилиш 49:27ни оқуң. Яқуп Бениамин қәбилисини бөрә билән селиштуруп, уларниң яхши җәңчиләр болидиғанлиғини ейтқан (Һак. 20:15, 16; Тар. 1-яз. 12:2). Исраилниң тунҗа падишаси Саул Бениамин қәбилисидин чиққан. Саул падиша филистийәликләргә қарши җасарәт билән җәң қилған (Сам. 1-яз. 9:15—17, 21). Нурғун жиллар өтүп, Бениамин қәбилисидин чиққан Әстәр мәликә вә Мордикай Исраил хәлқини қирғинчилиқтин сақлап қалған (Әст. 2:5—7; 8:3; 10:3).

18. Биз Бениамин қәбилисиниң садиқлиғини қандақ үлгә қилалаймиз?

¹⁸ Биз қандақ савақ алалаймиз? Әлвәттә, Бениамин қәбилисидин чиққан Саул падиша болуп тәйинләнгәндә, бениаминлиқлар интайин хошал болған еди. Лекин кейинирәк Йәһва Худа Йәһуда қәбилисидин чиққан Давутни падиша қилғанда, улар Давутни қоллап-қувәтлигән (Сам. 2-яз. 3:17—19). Кейинирәк башқа қәбилиләр исиян көтәргәндә, улар Йәһуда қәбилиси вә Йәһва Худа тәйинлигән падишаға садиқ болуп қалған (Пад. 1-яз. 11:31, 32; 12:19, 21). Бениаминлиқлардин үлгә елип, бизму Йәһва Худа тәйинлигән кишиләрни қоллап-қувәтләш арқилиқ Худайимизға садиқ болуп қалалаймиз (Сал. 1-х. 5:12).

19. Яқупниң ахирқи сөзлири биз үчүн немиси билән пайдилиқ?

¹⁹ Яқупниң ахирқи сөзлири биз үчүн интайин пайдилиқ. Униң пәйғәмбәрлик сөзлири қандақ орунланғанлиғини көрүп чиқиш бизгә Худа Сөзидики башқиму вәдиләрниң чоқум әмәлгә ашидиғанлиғиға ишәндүриду. Шундақла биз бу сөзләрдин Йәһва Худаниң жүригини хошал қилиш үчүн немә қилишимиз керәклигиниму чүшинәләймиз.