Ақсақалларни чақириңлар

1. Йәһва Худа хизмәтчилирини яхши көридиғанлиғини қандақ көрсәтти?

ЙӘҺВА ХУДА Униңға хизмәт қиливатқан һәммисини яхши көриду, уларға меһрибан падичидәк ғәмхорлуқ қилиду. Худа «Өз Оғлиниң қени билән сетивалған» падисиға ғәмхорлуқ қилиш үчүн ақсақалларни тәйинлигән (Әлч. 20:28). Йәһва Худа ақсақалларниң Униң қойлириға меһрибанлиқ билән муамилә қилишини халайду. Әйсаниң рәһбәрлиги астида ақсақаллар қойларға далда болиду һәм уларни роһий хәвп-хәтәрдин һимайә қилиду (Йәшая 32:1, 2).

2. Әзәкиял 34:15, 16-айәтләргә асасән Йәһва Худа кимләргә ярдәм беришни халайду?

² Йәһва Худа һәммә хизмәтчилиригә ғәм қилиду, болупму җапа чекиватқанларға алайтән ярдәм беришни халайду. Бәзиләр өткүзгән хаталиқлири үчүн қийнилиши мүмкин. Йәһва Худа шундақ адәмләргә ақсақаллар арқилиқ ярдәм бериду (Әзәкиял 34:15, 16ни оқуң). У бизгә һәрқандақ вәзийәттә қол учини созушқа тәйяр. Шундақ вақитларда Худадин ярдәм сорап дуа қилиштин башқа, җамаәттики падичилар вә устазлардинму ярдәм издишимиз муһим (Әфәс. 4:11, 12).

3. Ақсақалларниң роли тоғрилиқ ойлиниш немишкә һәммимиз үчүн пайдилиқ?

³ Бу мақалидә Йәһваниң бизгә ақсақаллар арқилиқ қандақ ярдәм беридиғанлиғини көрүп, келәрки үч соални муһакимә қилимиз: Ақсақаллардин қачан ярдәм соришимиз керәк? Бу немишкә муһим? Ақсақаллар бизгә қандақ ярдәм берәләйду? Роһий җәһәттин мәһкәм болсақму, бу мақалиниң пайдиси көп. Биринчидин, биз җамаәттики ақсақалларниң хизмитини техиму қәдирләйдиған болимиз. Иккинчидин, ақсақалларниң ярдимигә муһтаҗ болған чағларда немә қилишимиз керәклигини биливалимиз.

АҚСАҚАЛЛАРНИ ҚАЧАН ЧАҚИРИШИМИЗ КЕРӘК?

4. Яқуп 5:14—16, 19, 20-айәтләрдә Йәһва билән мунасивити бузулған киши тоғрилиқ ейтилғанлиғини нәдин билимиз? (Рәсимләргиму қараң.)

⁴ Яқуп Йәһва Худаниң бизгә ақсақаллар арқилиқ қандақ ярдәм беридиғанлиғини чүшәндүргән. У мундақ дегән: «Араңларда бирси ағриқму? Җамаәтниң ақсақаллирини чақирсун» (Яқуп 5:14—16, 19, 20ни оқуң). Бу айәттә Худа билән мунасивити бузулған адәм тоғрилиқ ейтилған. Яқуп ағриқ кишигә дохтурни әмәс, ақсақалларни чақиришни ейтқан. Шундақла Яқупниң ейтишичә, кишиниң гуналири кәчүрүлгәндә, у сақийип кетиду. Кесәл киши дохтурға берип, униң қайси йери ағриватқанлиғини ейтиши вә кейин дохтурниң ейтқанлирини қилиши керәк. Дәл шуниңға охшаш, Йәһва Худа билән болған мунасивитимизни қайта тикләш керәк болса, биз ақсақаллар билән сөзлишип, уларниң Муқәддәс китапқа асасланған мәслиһитигә қулақ селишимиз зөрүр.

5. Йәһва Худа билән мунасивитимиз аҗизлишип кетиватқанлиғини қандақ ениқлисақ болиду?

⁵ 5-бапта Яқуп бизни Йәһва Худа билән мунасивитимиз аҗизлап қалғанлиғини байқисақ, ақсақаллардин ярдәм сорашқа дәвәт қилиду. Лекин Худа билән болған мунасивитимиз бузулмай туруп ақсақаллардин ярдәм сорисақ, техиму дана иш қилған болимиз! Муқәддәс китапта ейтилғандәк, биз өзүмизни алдап, мән Худа билән йеқин мунасивәттә дәп ойлишимиз мүмкин (Яқуп 1:22). Мәсилән, Сардис җамаитидики бәзи қериндашлар шундақ тузаққа чүшкән. Лекин Әйса Мәсиһ уларниң роһий җәһәттин аҗиз екәнлигини көрсәткән (Вәһ. 3:1, 2). Йәһва Худа билән мунасивитим яхши екәнлигини қандақ тәкшүрсәм болиду? Йәһва Худани дәсләп сөйгәндә болған меһир-муһәббитим техичә чақнап турамду? (Вәһ. 2:4, 5) Мән Муқәддәс китапни оқуп, оқуғанлирим тоғрилиқ чоңқур ойлинишни бурунқидәк яқтуримәнму? Учришишларға анда-санда қатнишимәнму? Учришишқа тәйярланмай баримәнму? Мән вәз қилиштин бурунқидәк қанаәт алимәнму яки башқа ишлар билән көпирәк шуғуллинип, дайим пул тепиш тоғрилиқ ойлаймәнму? Әгәрдә бу соалларниң биригиму «һә» дәп җавап бәрсәк, бу Йәһва Худа билән мунасивитимиз аҗизлишип кәткәнлигини билдүрүши мүмкин. Йәһва билән болған мунасивитимизни күчәйтишкә чамимиз йәтмисә яки Униңға яқмайдиған бир нәрсини қилип қойсақ, ақсақаллардин ярдәм соришимиз керәк.

6. Еғир гуна қилған киши немә қилиши керәк?

⁶ Бир қериндаш еғир гуна қилип, гунасиға товва қилмиса, у җамаәттин чиқирилиши мүмкин. Әгәр сиз еғир гуна қилсиңиз, ақсақалларниң бири билән сөзлишиң (Кор. 1-х. 5:11—13). Еғир гунаға патқан киши Йәһва Худа билән болған мунасивитини өз алдиға әксигә кәлтүрәлмәйду. Йәһваниң кәчүрүмигә еришиш үчүн биз гунайимизға һәқиқәтән товва қилидиғанлиғимизни иш-һәрикәтлиримиз билән көрситишимиз керәк (Әлч. 26:20). Шундақ иш-һәрикәтләрниң бири — еғир гуна қилғанлиғимиз тоғрилиқ ақсақалға ейтип бериш.

7. Йәнә кимләр ақсақалларниң ярдимигә муһтаҗ?

⁷ Шундақла ақсақаллар роһий җәһәттин аҗизларға ярдәм берәләйду (Әлч. 20:35). Мәсилән, сиз яман һәвәслириңиз билән күрәш қиливатқан болушиңиз мүмкин. Һәқиқәтни билиштин бурун нәшә чәккән, порнография көргән яки бузуқчилиқ қилған болсиңиз, бу сизгә техиму қийин болидиғанду. Ярдәм сораштин қорқмаң. Өзүңиз ишәнч қилған ақсақал билән сөзлишиң. У сизни зәң қоюп тиңшап, әмәлий мәслиһәт бериду вә сиз давамлиқ яман һәвәслириңизгә қарши турсиңиз, Йәһваниң хошал болидиғанлиғиға ишәндүриду (Вәз 4:12). Яман һәвәслириңиз қайта-қайта пәйда болуватқанлиқтин, көңлүңиз чүшиши мүмкин. Шу чағда ақсақаллар өзүңизгә башқичә қаришиңизға ярдәм берәләйду. Сизниң ярдәм сориғанлиғиңиз кәмтәр екәнлигиңизни көрситиду. Гуна билән давамлиқ күришиватқанлиғиңиз Йәһва Худа билән мунасивитиңизни қәдирләйдиғанлиғиңизни испатлайду (Кор. 1-х. 10:12).

8. Ақсақалларға һәрбир хаталиғиңиз тоғрилиқ ейтишиңиз керәкму? Чүшәндүрүп бериң.

⁸ Ақсақалларға һәрбир хаталиғиңиз тоғрилиқ ейтишиңиз керәкму? Яқ. Мәсилән, җамаәттики бирсини сөзиңиз билән рәнҗитип қойдиңиз яки униңға қаттиқ аччиқландиңиз дәйли. Ақсақалға беришниң орниға, қериндишиңиз билән сөзлишип, униңдин кәчүрүм сорап, бу мәсилини өз ара һәл қилсаңлар тоғра (Мәт. 5:23, 24). Издиниш өткүзүп, техиму кичик пеил вә сәвирчан болушни һәм өзүңизни техиму яхширақ тутувелишни үгәнсиңиз болиду. Шундақ қилған һаләттиму қийинчилиқни өзүңиз һәл қилалмисиңиз, ақсақалдин ярдәм сорисиңиз болиду. Еводия билән Синтихияниң арисида келишмәслик пәйда болғанда, әлчи Паул җамаәттики бир бурадәрни уларниң чиқишип өтүшигә ярдәм беришини сориған. Җамаитиңиздики ақсақал сизгиму ярдәм берәләйду (Флп. 4:2, 3).

АҚСАҚАЛЛАРНИ НЕМӘ ҮЧҮН ЧАҚИРИШИМИЗ КЕРӘК?

9. Биз немә үчүн уялмай ақсақаллардин ярдәм соришимиз керәк? (Пәнд-нәсиһәтләр 28:13)

⁹ Еғир гуна қилған яки аҗизлиғимиз билән күришиватқан болсақ, ақсақаллардин ярдәм сораш үчүн ишәнч вә дадиллиқ керәк. Уялсақму, ақсақаллардин ярдәм соришимиз муһим. Немишкә? Чүнки Йәһва Худа ақсақалларға роһий җәһәттин сағлам болушимизға ярдәм беришни тапшурған. Шуңа ақсақаллардин ярдәм сориғанда, Йәһваға тайинидиғанлиғимизни вә бойсунидиғанлиғимизни көрситимиз. Шундақла тоғра ишларни қилиш үчүн Худаниң ярдимигә муһтаҗ екәнлигимизни етирап қилимиз (Зәб. 94:18). Әгәр гунайимиз тоғрилиқ ақсақалларға ейтип, яман ишлиримизни ташлисақ, Йәһва Худа чоқум бизни кәчүриду (Пәнд-нәсиһәтләр 28:13ни оқуң).

10. Ақсақалларға еғир гунайимиз тоғрилиқ ейтмисақ, немә болуши мүмкин?

¹⁰ Қилған гунайимиз тоғрилиқ ақсақалларға ейтсақ, Йәһва Худа бизни кәчүриду вә Униң билән болған яхши мунасивитимизни қайта тикләләймиз. Лекин гунайимизни йошуруп қойсақ, көп азап чекимиз. Давут падиша бираз вақит гунаси тоғрилиқ һечкимгә демигән. Нәтиҗидә, униң роһи чүшүп, чирайи сарғийип, виждани уни қаттиқ азаплиған (Зәб. 32:3—5). Кесәл болуп қалғанда яки җараһәтләнгәндә давалиниш үчүн дохтурға бармай жүривәрсәк, ақивети ечинарлиқ болуши мүмкин. Шуниңға охшаш, еғир гуна қилсиңиз, лекин ақсақаллардин ярдәм соримай жүривәрсиңиз, Йәһва Худа билән болған мунасивитиңиз бузулиду. Лекин Худайимиз Йәһва Униң билән қайтидин дост болушимиз үчүн, бизни ақсақаллар билән сөзлишишкә дәвәт қилиду (Йәшая 1:5, 6, 18).

11. Өзүмизниң яки бирсиниң еғир гунасини йошурсақ, бу башқиларға қандақ тәсир қилиши мүмкин?

¹¹ Еғир гуна қилғанлиғимизни йошурсақ, бу башқиларғиму тәсир қилиши мүмкин. Шундақ қилсақ, Йәһва Худа җамаитимизгә бурунқидәк көп муқәддәс роһини бәрмәй, өз ара инақлиғимиз суслишип кетиши еһтимал (Әфәс. 4:30). Шундақла биз җамаәттики бирсиниң еғир гуна қилғанлиғини билип қалсақ, уни ақсақаллар билән сөзлишишкә дәвәт қилишимиз керәк. У бизгә қулақ салмиса, буни ақсақалларға өзүмиз ейтишимиз муһимa. Болмиса, бизму Йәһва Худаға қарши гуна қилған болумиз (Лав. 5:1). Йәһва Худани яхши көргәнликтин, биз бирсиниң еғир гунасини йошурмаймиз. Шу чағда биз җамаәттики қериндашларни роһий зияндин қоғдаймиз вә гуна қилған кишигә Йәһва билән болған мунасивитини тиклишигә ярдәм беримиз.

АҚСАҚАЛЛАР БИЗГӘ ҚАНДАҚ ЯРДӘМ БЕРИДУ?

12. Ақсақаллар роһий җәһәттин аҗиз қериндашларға қандақ ярдәм бериду?

¹² Йәһва билән мунасивити бузулған қериндашларға ярдәм бериш ақсақалларға тапшурулған (Сал. 1-х. 5:14). Гуна қилған болсиңиз, улар сизгә соалларни қоюп, ой-пикриңиз вә һис-туйғулириңизни чүшинишкә тиришиду (Пәнд н. 20:5). Ақсақаллар билән сөзлишиш сизгә қийин болуши мүмкин. Бәлким, сиз уялчақ адәмду яки болған вақиә тоғрилиқ ейтип бериштин хиҗил болидиғансиз. Амма һечнәрсини йошурмай, һәммини очуқ ейтип бәрсиңиз, ақсақалларға сизгә ярдәм бериш оңайирақ болиду. Кәлсә-кәлмәс бир нәрсини ейтип қоюмәнму дәп әнсиримәң (Аюп 6:3). Ақсақаллар һөкүм чиқиришқа алдиримай, әксичә, сизни зәң селип тиңшап, Муқәддәс китаптин мәслиһәт бериштин авал мәсилиниң ениқ-қениғини биливалиду (Пәнд н. 18:13). Улар бирсигә ярдәм бериш үчүн бираз вақит керәклигини чүшиниду. Шуңа сиз билән бирнәччә қетим учришиши мүмкин.

13. Ақсақалларниң дуаси вә Муқәддәс китапқа асасланған мәслиһити бизгә қандақ ярдәм бериду? (Рәсимләргиму қараң.)

¹³ Ақсақаллардин ярдәм сориғанда, улар дәрдиңизгә дәрт қошмайду. Әксичә, улар сизгә тәсәлли берип, роһий саламәтлигиңизни сақлап қелиш үчүн һәммини қилиду. Шу чағда уларниң сиз үчүн қилған дуасиниң «зор күчкә егә» екәнлигини көрәләйсиз. Шундақла ақсақаллар «Йәһваниң нами билән май сүркәп» ярдәм бериду (Яқуп 5:14—16). Бу йәрдики «май» дегинимиз, Худа Сөзидики һәқиқәт. Шуңа ақсақаллар сиз билән тәсәлли беридиған вә Йәһва Худа билән болған мунасивитиңизни тикләшкә ярдәм беридиған айәтләрни муһакимә қилиду (Йәшая 57:18). Уларниң Муқәддәс китапқа асасланған мәслиһити Худаниң көз алдида тоғра болған ишларни қилишиңизға күч бериду. Ақсақаллар арқилиқ Йәһва Худаниң сизгә: «Мана йол, униң билән меңиң»,— дегән авазини аңлалайсиз (Йәшая 30:21).

14. Галатилиқларға 6:1-айәткә мас ақсақаллар хаталиқ өткүзгән кишигә қандақ ярдәм бериду? (Рәсимләргиму қараң.)

¹⁴ Галатилиқларға 6:1ни оқуң. Худаниң хизмәтчиси хаталиқ өткүзгәндә, у Йәһваниң һәққаний өлчәмлиригә қарши иш қилған болиду. У әқилсиз қарар чиқирған яки еғир гуна садир қилған болуши мүмкин. Көйүмчан ақсақаллар «мундақ адәмни мулайимлиқ роһида түзитишкә» тиришиду. Бу йәрдә «түзитиш» дәп тәрҗимә қилинған грек сөзи сүйәкни орниға селишни билдүриду. Яхши дохтур сунған сүйәкни қолдин келишичә ағритмай орниға селишқа тиришиду. Шуниңға охшаш, ақсақаллар хаталиқ өткүзгән кишини түзәткәндә униң көңлигә техиму көп азар берип қоймаслиққа күч салиду. Шундақла Муқәддәс китапта ақсақаллар өзлиригиму пәхәс болуши керәклиги йезилған. Башқиларни тоғра йолға салғанда, ақсақаллар өзлириниңму намукәммәл вә хаталиқларни өткүзидиғанлиғини унтумаслиғи лазим. Улар ярдәмгә муһтаҗ адәмгә үстүн қаримай, әксичә кәмтәрлик көрситип, униңға ич ағритиду (Пет. 1-х. 3:8).

15. Қийинчилиғимиз болса, немә қилсақ болиду?

¹⁵ Җамаәттики ақсақалларға ишәнсәк болиду. Улар шәхсий ишлиримизни башқиларға ейтмайду, мәслиһәт бәргәндә өз ой-пикригә әмәс, Муқәддәс китапқа асаслинип вә қийинчилиқлиримиз билән күришишимизгә ярдәм бериш үчүн Йәһва Худадин тәлим алған (Пәнд н. 11:13; Гал. 6:2). Ақсақалларниң миҗәзи вә тәҗрибиси һәр түрлүк болсиму, биз һәрқандақ ақсақалға қийинчилиғимизни ейталаймиз. Өзүмизгә яқидиған мәслиһәтни тапмиғичә һәрбир ақсақал билән сөзләшсәк, тоғра болмайду. Шундақ қилған болсақ, биз «сағлам тәлимни» үгинишниң орниға, «қулиғиға хуш яқидиған сөзләрни» издәйдиған адәмгә охшаттуқ (Тим. 2-х. 4:3). Бир ақсақал билән мәслиһәтләшкәндә, у: «Бу мәсилә тоғрилиқ башқа ақсақал билән сөзләштиңизму, сөзләшкән болсиңиз, у сизгә қандақ мәслиһәт бәрди?»— дәп сориши мүмкин. Кәмтәр ақсақал мәслиһәт бериштин авал башқа ақсақал билән мәслиһәтлишиши мүмкин (Пәнд н. 13:10).

ҺӘРБИРИМИЗНИҢ ҖАВАПКАРЛИҒИ

16. Һәрбиримизниң қандақ җавапкарлиғи бар?

¹⁶ Ақсақаллар бизгә мәслиһәт берип, қийинчилиқларни һәл қилишқа ярдәм бәрсиму, биз үчүн қарар чиқармайду. Һәрбиримиз гәп-сөзлиримиз вә иш-һәрикәтлиримиз билән Йәһва Худаға Уни яхши көридиғанлиғимизни көрситишимиз керәк. Худайимиз дана қарарларни чиқиришимизға вә Униңға садиқ болуп қелишимизға ярдәм бериду (Рим. 14:12). Шуңа ақсақаллар бизгә өз ой-пикрини таңмай, Муқәддәс китаптин Йәһваниң бу мәсилигә қандақ қарайдиғанлиғини көрситип, шәхсий қарар чиқиришимизға йол қойиду. Уларниң Муқәддәс китапқа асасланған мәслиһитигә әмәл қилсақ, Йәһва Худадәк ой-пикир қилип, дана қарарларни чиқиришни үгинимиз (Ибр. 5:14).

17. Сиз немә қилишқа бәл бағлидиңиз?

¹⁷ Йәһва Худаниң падисида болуш биз үчүн чоң шан-шәрәп! Йәһва Худа бизниң мәңгү яшишимиз үчүн, «меһриван падичи», йәни Әйсани қурбанлиққа бәрди (Йоһ. 10:11). Йәһва Худа бизгә ғәмхорлуқ қилидиған ақсақалларни берип, мону вәдисини орунлиған: «Мән силәргә қәлбимгә яқидиған падичиларни беримән һәм улар силәрни әқил-идрәк һәм сағлам пикирлик билән бақиду» (Йәр. 3:15). Шуңа ишәнчимиз аҗизлашса яки Худа билән болған мунасивитимизни тикләшкә муһтаҗ болсақ, ақсақаллардин ярдәм сорашқа қорқмайли. Келиңлар, Йәһваниң ақсақаллар арқилиқ бәргән ярдимидин пайдилинишқа бәл бағлайли.